Maan junman nga e di i asɔnun’n nun’n ɔ yo e cinnjin
“Nyanmiɛn siesieli sran i wun ninnge mun kɛ i klun klo’n sa.”—1 KORƐNTFUƐ MUN 12:18.
1, 2. (a) ?Ngue yɛ ɔ kle kɛ asɔnun’n nun’n sran ngba kwla ɲan junman kun m’ɔ kwla yo i cinnjin ɔn? (b) ?Kosan benin yɛ é wá tɛ́ be su like suanlɛ nga nun ɔn?
KƐ Ɔ fin laa Izraɛli nvle’n i blɛ su lele andɛ’n, Zoova i anuannzɛ’n yɛ ɔ fa niɛn i sufuɛ’m be lika yɛ ɔ fa kle be atin ɔn. Kɛ Izraɛlifuɛ’m be kwlali klɔ nga be flɛ i Ai’n, Zozie “kanngannin ndɛ nga be klɛli mmla fluwa nun’n kwlakwla, yɛ ɔ kanngannin be nuan yralɛ, ɔ nin muae bolɛ, nin sannzan bolɛ ndɛ mun [...] kleli nzrafuɛ’m be kwlakwla.”—Zozie 8:34, 35.
2 Klistfuɛ klikli’m be blɛ su’n, akoto Pɔlu seli asɔnun kpɛnngbɛn Timote kɛ Klistfuɛ asɔnun’n ti ‘Nyanmiɛn i awlo.’ Yɛ i waan ‘sɛ nanwlɛ’n ti sua’n, wuun Asɔnun’n ti i kuatrɛn nin i kofiaja.’ (1 Timote 3:15) Andɛ’n, Ɲanmiɛn i “awlo’n” yɛle mɛn wunmuan’n nun Klistfuɛ kpa mɔ be tran aniaan tranlɛ’n. Pɔlu i fluwa klikli nga Ɲanmiɛn maan ɔ klɛli ko mannin Korɛnti lɔfuɛ mun’n, i ndɛ tre 12 nun’n, ɔ fali asɔnun’n sunnzunnin sran i wunnɛn’n i likalika mun. Ɔ seli kɛ kannzɛ sran i wunnɛn’n i ninnge’m be di junman wafawafa’n, sanngɛ be kwlaa be ti cinnjin. Pɔlu klɛli i kɛ: “Nyanmiɛn siesieli sran i wun ninnge mun kɛ i klun klo’n sa.” I kpa bɔbɔ’n, ɔ kɛnnin i ekun kɛ “e wun ninnge bɔ e bu-man kɛ be ti e wunnɛn’n wie’n, be yɛ be lo ye-ɔ, yɛ e lika nga be wun i-ɔ ɔ ti-man klanman’n, ɔ lo e, yɛ e kata su.” (1 Korɛntfuɛ Mun 12:18, 23) Ɔ maan, junman nga sran kpa kun m’ɔ ti Ɲanmiɛn i awlobofuɛ’n ɔ di’n, i kpa traman Klistfuɛ kpa uflɛ liɛ’n. Afin, junman’m be ti wafawafa. ?I sɔ’n ti’n, ninnge nga Ɲanmiɛn siesieli’n nun’n, wafa sɛ yɛ e kwla si junman nga e di’n naan w’a yo e cinnjin ɔn? ?Ngue yɛ ɔ kwla kan junman nga e di i asɔnun’n nun’n niɔn? ?Yɛ wafa sɛ yɛ e kwla yo naan ‘sran kwlaa w’a wun kɛ e su yo kpa tra laa’n’ niɔn?—1 Timote 4:15.
?Wafa sɛ yɛ junman nga e di’n kwla yo e cinnjin ɔn?
3. ?Like kun mɔ e kwla yo naan y’a si junman nga e di i asɔnun’n nun naan y’a kle kɛ ɔ ti e cinnjin’n yɛle benin?
3 Like kun mɔ e kwla yo naan y’a si junman nga e di i asɔnun’n nun naan y’a kle kɛ ɔ ti e cinnjin’n, yɛle kɛ ajalɛ nga “sran kpa nanwlɛfuɛ b’ɔ si ngwlɛlɛ’n,” ɔ nin e Ɲrun dinfuɛ’m be anuannzɛ’n m’ɔ ti i janunfuɛ’n be fa’n, e nanti su kpa. (An kanngan Matie 24:45-47 nun.) Kɛ sran kpa’n i akpasua’n man e afɔtuɛ’n sɛ e fa su annzɛ e faman su’n, ɔ fata kɛ e bu i sin e nian. I wie yɛle kɛ, kɛ afuɛ’m bé sín’n, ɔ man e wun wlawlalɛ nin e wun siesielɛ’n be su afɔtuɛ. Ɔ man e afɔtuɛ e ɲin su yiyilɛ’n nin ɛntɛnɛti su junman dilɛ kpa’n i su wie. ?E nian nun kpa e fa afɔtuɛ sɔ’m be su naan b’a sasa e Ɲanmiɛn ninnge’m be nun? ?Yɛ afɔtuɛ nga be mannin e kɛ e fa blɛ kun naan e nin e awlobofuɛ mun e su Ɲanmiɛn titi’n nin? ?E tili afɔtuɛ sɔ’n ɔ maan e fali nnɔsua kun kɛ é fá yó i sɔ like’n? ?Sɛ e nin a jaman bla annzɛ bian’n, e fa blɛ naan e bɔbɔ y’a suan Ɲanmiɛn Ndɛ’n nun like? Sɛ e fa atin nga sran kpa’n i akpasua’n kle e’n i su’n, maan ɔ yo e tinuntinun annzɛ e awlobo’n nun o, Zoova rá e su.
4. ?Kɛ é fá e bɔbɔ e ninnge’m be su ajalɛ’n ngue yɛ ɔ fataman kɛ e wla fi su ɔ?
4 Sran wie’m be kwla se kɛ be ɲin su yiyilɛ nin be wun wlawlalɛ yɛ be wun siesielɛ nun’n, Klistfuɛ kun bɔbɔ kwla fɛ i ajalɛ. Sanngɛ Klistfuɛ kun sa m’ɔ fɛli i wun mannin Ɲanmiɛn’n, nɛ́n i bɔbɔ i klunklo ninnge’m be ngunmin be su yɛ ɔ jran naan w’a fa ajalɛ ɔ. Akunndan nga Zoova bu m’ɔ o i Ndɛ’n ng’ɔ o Biblu’n nun’n, ɔ fata kɛ ɔ nian su kpa. Ɔ fata kɛ i nun ndɛ’n yo kɛ ‘kannin sa, ɔ kpaja e bo. Ɔ kpaja e nyrun atin’n su weiin.’ (Jue Mun 119:105) Asa ekun’n, maan ɔ yo asɔnun’n nun o, annzɛ lika uflɛ o, ajalɛ nga e fa be e bɔbɔ e ninnge’m be nun’n, wafa nga be kan e jasin fɛ’n i bolɛ’n ɔ nin sran uflɛ mun’n, sɛ e bu i akunndan’n ɔ ti kpa.—An kanngan 2 Korɛntfuɛ Mun 6:3, 4 nun.
5. ?Ngue ti yɛ ɔ fata kɛ e nian e wun naan y’a yoman ɲin klekle ɔ?
5 Aolia nun like nga ‘ndɛkɛn ɔ wlawla sran nga be nyin yi-man Nyanmiɛn’n,’ i trulɛ dan mɔ w’a tru’n, ɔ ti kɛ aunmuan nga e fa lo wunmiɛn’n sa. (Efɛzfuɛ Mun 2:2) Aolia nun like sɔ’n kwla yo maan e bu i kɛ atin nga Zoova i anuannzɛ’n kle e’n timan cinnjin manman e. E kunndɛman kɛ é yó kɛ Diotrɛfu m’ɔ ‘fa-man akoto Zan i ndɛ’n su’n’ sa. (3 Zan 9, 10) Ɔ fata kɛ e nian e wun naan y’a yoman ɲin klekle. E ijɔlɛ nin e aeliɛ’n nun’n, nán e yo like wie m’ɔ kle kɛ e ɲin yiman like nga Zoova fa di i junman andɛ’n. (Kalɛ 16:1-3) Sanngɛ ɔ fata kɛ ajalɛ nga sran kpa’n i akpasua’n fa mɔ i su falɛ’n ti e cenjele like’n, ɔ yo e cinnjin. Yɛ ɔ fata kɛ e lo e wun e man be mɔ be dun asɔnun’n i ɲrun mmua’n. Kpɛkun afɔtuɛ nga be man e’n, e mian e ɲin naan e fa be su.—An kanngan Ebre Mun 13:7, 17 nun.
6. ?Ngue ti yɛ ɔ fata kɛ e bu e wun akunndan ɔn?
6 E kwla yo like kun ekun e fa kle kɛ e klo junman nga e di i asɔnun’n nun’n. Yɛle kɛ e bu e bɔbɔ e wun akunndan e nian naan e yo like kwlaa nga e kwla yo’n naan e ‘fa e junman’n di e nuan [e kannvu e junman’n],’ naan Zoova ɲan ɲrun. (Rɔmfuɛ Mun 11:13) Sran wie’m be kwla yo titi atin bofuɛ. Wie’m be kusu be kwla kaci ngaliɛ difuɛ annzɛ nvle sunianfuɛ annzɛ akpasua annzɛ nvlenvle’m be sunianfuɛ. Annzɛ be kwla di junman mɛn wunmuan’n nun Betɛli’m be nun. Aniaan kpanngban be uka be nga be kplan Ɲanmiɛn Sielɛ Blɛ Sua mun’n. Zoova i nvle’n nunfuɛ’m be dan lika be mian be ɲin kpa naan b’a nian be awlobofuɛ’m be lika Ɲanmiɛn ninnge’m be nun, naan le mɔcuɛ kwlaa b’a bo jasin fɛ’n i kpa. (An kanngan Kolɔsfuɛ Mun 3:23, 24 nun.) Kɛ e klun su e fa e wun e wlɛ i Ɲanmiɛn junman’n nun mɔ e tu e klun e su i kpa’n, e kwla lafi su kɛ ɔ le junman kun mɔ e kwla di i ninnge nga Ɲanmiɛn siesieli’n nun ɔn.
Ninnge nga be ti yɛ e junman’n ti ngunminngunmin’n
7. Wafa nga e fa ti’n ɔ kwla ɲan ta junman nga e di i asɔnun’n nun’n i su. An yiyi nun.
7 Ɔ ti cinnjin kɛ e bu e wun akunndan afin junman nga e kwla di i asɔnun’n nun’n, ɔ fin like nga e kwlɛ i yo’n. I wie yɛle kɛ junman nga aniaan bian kun di i asɔnun’n nun’n, ɔ nin nga aniaan bla kun di’n, ninnge wie’m be nun’n, be timan kun. Asa ekun’n, sran kun i afuɛ’n nin wafa nga i wun fa yo i’n, ɔ nin ninnge uflɛ wie’m be le ta junman ng’ɔ kwla di man Zoova’n i su. Nyanndra Mun 20:29 se kɛ: “Wunmiɛn bɔ gbanflɛn’m be lɛ i’n, ɔ ti be anyrunnyan like. Kpɛnngbɛn’m be kusu be ti je’n, ɔ ti be anyrunnyan like.” Gbanflɛn nin talua nga be o asɔnun’n nun’n, kɛ mɔ gbanflɛn nzue’n te o be nun’n ti’n, be kwla di junman kpa. Be nga be ti kpɛnngbɛn’m be kusu’n, be yo asɔnun’n i ye kpa afin be si ngwlɛlɛ yɛ be si sa. Kusu nán maan e wla fi su kɛ sɛ e kwla di junman Zoova i anuannzɛ’n nun’n, ɔ fin Ɲanmiɛn i aklunye’n.—Sa Nga Be Yoli’n 14:26; Rɔmfuɛ Mun 12:6-8.
8. ?Wafa sɛ yɛ like nga e konvi o su kɛ é yó’n, ɔ le ta junman nga e di i asɔnun’n nun’n i su ɔ?
8 Like uflɛ m’ɔ le ta junman nga é dí i asɔnun’n nun’n i su’n, aniaan talua nɲɔn mɔ be si nin be nin ti kun’n, be su sunnzun ase’n ɔ yi i nglo. Be nɲɔn’m be ɲannin suklu dan kun nun diplɔmu. Be nɲɔn’n be ti kun. Be si nin be nin be miannin be ɲin be wlali be fanngan naan sɛ be ɲan be diplɔmu’n be kaci atin bofuɛ. Kɛ be ɲannin be diplɔmu’n, kun kacili atin bofuɛ, kun liɛ’n ɔ dili junman uflɛ. ?Ngue ti yɛ like nga be yoli’n, ɔ yoli fanunfanun ɔn? Like nga be konvi o su’n ti ɔ. I agualiɛ su’n like nga sran kun kunndɛ kɛ ɔ́ yó’n yɛ ɔ yoli ɔ. ?Nɛ́n i sɔ’n kunngba wie yɛ e yo ɔ? Ɔ fata kɛ e bu like nga e kunndɛ kɛ é yó mán Ɲanmiɛn i akunndan kpa. ?Kannzɛ bɔbɔ ɔ fata kɛ e siesie e ninnge yolɛ’n i uflɛ’n, sanngɛ e kwla uka like nga e yo e man Ɲanmiɛn’n su?—2 Korɛntfuɛ Mun 9:7.
9, 10. ?Sɛ like fi suman e bo kɛ e di Zoova i junman’n i kpa tra laa’n, ngue yɛ e kwla yo ɔ?
9 ?Yɛ sɛ e wunman like ng’ɔ kwla su e bo naan y’a di Zoova i junman’n kpa y’a tra laa naan junman sɔ’n i bue kaan sa yɛ e di’n nin? Lɛtri nga Pɔlu klɛli ko mannin Filipu lɔfuɛ mun’n i nun’n, ɔ seli kɛ: “Nyanmiɛn bɔbɔ yɛ ɔ maan i klun sa yolɛ’n yo amun fɛ yɛ maan an kwla yo-ɔ.” Zoova kwla di e klun akunndan’n su junman yɛ ɔ kaci like nga e klo kɛ é yó’n.—Filipfuɛ Mun 2:13; 2 Korɛntfuɛ Mun 4:7.
10 I sɔ’n ti’n, ɔ fata kɛ e se Zoova naan ɔ yo naan e kunndɛ i klun sa’n i yolɛ. Laa Izraɛli lɔ’n, i sɔ yɛ famiɛn Davidi yoli ɔ. Ɔ srɛli Ɲanmiɛn kɛ: “Anannganman, kle min wɔ atin’n, kle min kan n sin’n. Yo maan n fa ɔ nanwlɛ atin’n, kle min ngwlɛlɛ maan n si i, afin a ti min Nyanmiɛn, a ti min defuɛ. Ɔ su yɛ n fa min wla’n n gua-a.” (Jue Mun 25:4, 5) E kwla yo i kunngba sɔ’n wie. Yɛle kɛ e srɛ Zoova kɛ ɔ yo naan e kunndɛ kɛ é yó like ng’ɔ klo i’n. Kɛ e di junman e man Ɲanmiɛn Zoova nin i Wa’n, wafa ng’ɔ yo be’n, kɛ e bu i akunndan’n ɔ kan e awlɛn’n. Ɔ maan e si be ye. (Matie 26:6-10; Lik 21:1-4) I sɔ ye mɔ e si be’n, ɔ kwla su e bo maan e srɛ Zoova kɛ ɔ yo naan e kunndɛ kɛ é dí i junman’n kpa trá laa’n. Ɲanmiɛn nuan ijɔfuɛ Ezai kleli e like ng’ɔ fata kɛ e yo’n i wun ajalɛ. Zoova usali kɛ: “?Wan yɛ ń súnmɛn i ɔ? ?Yɛ wan yɛ ɔ́ dún mmua e ɲrun ɔn? ?Wan yɛ ɔ́ íjɔ e nuan an?” Kɛ Ɲanmiɛn nuan ijɔfuɛ’n tili i nnɛn’n, ɔ tɛli su kɛ: “Min ɔn, sunman min.”—Ezai 6:8.
?Wafa sɛ yɛ e kwla kɔ e ɲrun ɔn?
11. (a) ?Ngue ti yɛ anuannzɛ’n kunndɛ kɛ aniaan’m be yo naan be man be junman ɔn? (b) ?Ngue yɛ aniaan bian kun kwla yo naan b’a mɛn i junman ɔn?
11 Afuɛ 2008 nun’n, be yoli sran 289.678 be batɛmu. I sɔ’n kle weiin kɛ anuannzɛ’n i sa w’a mian aniaan yasua nga be ko dun asɔnun’n i ɲrun mmua’n be wun. ?Asamian sɔ’n, wafa sɛ yɛ aniaan bian kun kwla kle kɛ ɔ wun i wlɛ ɔ? Yɛle kɛ maan ɔ miɛn i ɲin naan ɔ yia ninnge nga be o Ɲanmiɛn Ndɛ’n nun’n be nuan naan be sie i asɔnunfuɛ’m be lika nianfuɛ annzɛ asɔnun kpɛnngbɛn. (1 Timote 3:1-10, 12, 13; Tit 1:5-9) ?Wafa sɛ yɛ aniaan bian kun kwla miɛn i ɲin yia i sɔ ninnge’m be nuan ɔn? Yɛle kɛ ɔ bo jasin fɛ’n i juejue su yɛ ɔ miɛn i ɲin kpa naan Klistfuɛ aɲia’m be bo’n w’a tɛ kosan’m be su kpa. Asa ekun’n maan i wiengu Klistfuɛ’m be ndɛ lo i. Kɛ ɔ yo sɔ’n ɔ kle kɛ junman ng’ɔ di i asɔnun’n nun’n, ɔ ti i cinnjin.
12. ?Wafa sɛ yɛ gbanflɛn’m be kwla kle kɛ ndɛ nanwlɛ’n ti cinnjin man be ɔ?
12 ?Ngue yɛ aniaan gbanflɛn kanngan mun, i li be nga b’a kpɛ cro’n, be kwla yo naan b’a wɔ be ɲrun asɔnun’n nun ɔn? Be kwla bo manndrɛn be suan Ɲanmiɛn Ndɛ’n naan be ‘si ngwlɛlɛ naan be wun sa nga [Ɲanmiɛn] i wawɛ’n kle be’n i wlɛ naan be si i klun sa’n kpa.’ (Kolɔsfuɛ Mun 1:9) Sɛ be suan Ɲanmiɛn Ndɛ’n kpa naan be fa be wun wlɛ i asɔnun aɲia’m be nun kpa’n, ɔ́ úka be i sɔ’n nun. Asa ekun’n, gbanflɛn’m be kwla mian be ɲin be fa ‘atin dan, b’ɔ maan be kwla di junman kpa’n,’ su. Yɛle kɛ be kwla di blɛ kwlaa nun Ɲanmiɛn junman wafawafa mun. (1 Korɛntfuɛ Mun 16:9) Zoova i junman’n i dilɛ’n, ɔ man aklunjuɛ sakpa. Kpɛkun ɔ man suralɛ kpanngban.—An kanngan Akunndanfuɛ’n 12:1 nun.
13, 14. ?Wafa sɛ yɛ aniaan bla’m be kwla kle kɛ junman nga be di i asɔnun’n nun’n, ɔ ti cinnjin man be ɔ?
13 Aniaan bla’m be kusu be kwla kle kɛ cenjele junman nga be di naan Jue Mun 68:12 w’a kpɛn su’n, ɔ ti be cinnjin wie. Be klɛli i lɛ kɛ: “Kɛ e Min’n kan ndɛ kunngba sa cɛ’n, kpɛkuun bla nga be bo jasin kpa be sin’n b’a ba kpanngban kɛ sonja mun sa.” Ninnge cinnjin kpafuɛ’m be nun kun mɔ aniaan bla’m be kwla yo be fa kle kɛ junman nga be di i asɔnun’n nun’n be si su ye’n, yɛle kɛ be di junman naan sran’m be kaci Zezi i sɔnnzɔnfuɛ. (Matie 28:19, 20) Ɔ maan, kɛ aniaan bla’m be bo jasin fɛ’n kpa mɔ be klunklo su be klɛn be wun be man junman sɔ’n, be kle kɛ junman nga be di i asɔnun’n nun’n, ɔ ti be cinnjin.
14 Kɛ Pɔlu klɛ́ Titi i fluwa’n, ɔ seli kɛ: “Kan kle bla kpɛnngbɛn’m be kɛ be kusu be yo sa nga Nyanmiɛn sran yo-ɔ ɔ ti su’n. [...] Maan be yo sa ng’ɔ ti kpa’n naan be fa kle talua mun kɛ be klo be wun nin be mma mun, be yo sa i nuan su, nán maan be yo sa sukusuku, maan be yo awlo bla kpa, maan be yo klun-ufuefuɛ, nán maan be fa be nyin wlawla be wun mun, maan be bu be sran, naan sran fi a se-man kɛ Nyanmiɛn ndɛ’n ti-man kpa.” (Tit 2:3-5) Nanwlɛ, aniaan bla nga be ɲin w’a ti’n be kwla ɲan ta kpa asɔnun’n su! Kɛ be ɲin yi aniaan nga be dun mmua asɔnun’n nun’n, mɔ be fa ajalɛ ngwlɛlɛ su ninnge kɛ be wun wlawlalɛ nin be wun siesielɛ nin be ɲin su yiyilɛ nun sa’n, be kle be wiengu’m be ajalɛ kpa. Kpɛkun be kle kɛ junman nga be di i asɔnun’n nun’n ti be like nanndoliɛ kpa.
15. ?Ngue yɛ aniaan bla kun m’ɔ leman bian’n, ɔ kwla yo naan w’a kɛmɛn i ngunmin ɔn?
15 Ɔ ju wie’n, aniaan bla kun m’ɔ leman bian’n ɔ kwlá wunman junman trele ng’ɔ di i asɔnun’n nun’n. Aniaan bla kun mɔ i sɔ sa’n juli i su’n, ɔ seli kɛ: “Kɛ a leman bian’n, blɛ wie ju’n a kwla ka ɔ ngunmin.” Kɛ be usɛli i wafa ng’ɔ yo naan w’a kwla jrɛn i sɔ’n i ɲrun’n, ɔ seli kɛ: “Ɲanmiɛn srɛlɛ’n nin Biblu’n nun like suanlɛ’n be uka min naan m’an wun junman nga n di i asɔnun’n nun’n ekun. Wafa nga Zoova bu min’n, n suan su like. Kpɛkun m mian min ɲin naan m’an kwla uka min wiengu mun asɔnun’n nun. I sɔ’n uka min naan m’an buman min bɔbɔ min wun akunndan dan.” Jue Mun 32:8 nun’n, Zoova seli Davidi kɛ: “Ń wá mán wɔ afɔtuɛ, ń nían wɔ su.” Zoova i sufuɛ’m be kwlaa be ndɛ lo i. Aniaan bla nga be leman bian’n be o be nun wie. Yɛ ɔ́ úka be kwlaa naan be wun junman nga be di i asɔnun’n nun’n.
Maan e di e junman’n titi!
16, 17. (a) ?Ngue ti yɛ kɛ Zoova yiali e kɛ e blɛ i anuannzɛ’n nun mɔ e kplinnin su’n, ɔ ti e ajalɛ’m be nun kpafuɛ’n niɔn? (b) ?Wafa sɛ yɛ e kwla di junman nga Zoova mannin e i anuannzɛ nun’n titi ɔ?
16 Klolɛ su Zoova yoli maan ɔ nin i sufuɛ’m be tinuntinun be afiɛn’n mantannin. Zezi seli kɛ: “Sran fi kwlá ba-man n sin san be nga n Si b’ɔ sunmannin min’n ɔ maan be ba n sin’n.” (Zan 6:44) Sran akpingbinngbin nga be o asiɛ’n su’n be nun’n, e tinuntinun Zoova yiali e kɛ e yo i anuannzɛ’n i nunfuɛ andɛ. Yialɛ sɔ mɔ e kplinnin su’n, ɔ ti ajalɛ nga e fali be’n be nun kpafuɛ’n. Ɔ yoli maan e mɛn dilɛ’n ɔ le bo. Yɛ kɛ e le junman kun e di i asɔnun’n nun’n, nanwlɛ aklunjuɛ nga e di’n ti dan!
17 Jue tofuɛ’n seli kɛ: “Anannganman, ɔ sua’n [...] i nun tranlɛ yo min fɛ.” Ɔ seli ekun kɛ: “Atin nanwlɛ’n yɛ ń fá-a, ń tó fuɛnmɛn i. Anyia’m be nun’n, ń lá Anannganman i ase.” (Jue Mun 26:8, 12) Ɲanmiɛn Kpli i anuannzɛ’n nun’n, ɔ le sran kun nin i junman. Sɛ e fa atin nga Ɲanmiɛn kle e’n su naan e di i junman’n titi’n, é kwlá dí junman cinnjin nga Zoova siesieli mannin e’n titi.
?Amun wla kwla kpɛn su?
• ?Ngue ti yɛ e kwla se kɛ Klistfuɛ’m be kwlaa be kwla di junman asɔnun’n nun ɔn?
• ?Wafa sɛ yɛ e kle kɛ junman nga e di i Ɲanmiɛn i anuannzɛ’n nun’n ɔ ti e cinnjin ɔn?
• ?Ninnge benin mun yɛ be le ta junman nga e di i asɔnun’n nun’n i su ɔ?
• ?Wafa sɛ yɛ Klistfuɛ gbanflɛn nin talua nin kpɛnngbɛn’m be kwla kle kɛ junman nga Ɲanmiɛn siesieli mannin be’n, ɔ ti be cinnjin ɔn?
[Foto mun, bue 21]
?Ngue yɛ aniaan bian’m be kwla yo naan b’a man be junman asɔnun’n nun ɔn?
[Foto, bue 22]
?Wafa sɛ yɛ aniaan bla’m be kwla kle kɛ junman nga be di i asɔnun’n nun’n ti be cinnjin ɔn?