Ɲrɛnnɛn’n o lika kwlaa ti’n, ɔ fata kɛ be nunnun i lika kwlaa

ƝRƐNNƐN’N o lika kwlaa yɛ be nga be uka sran nga be o ɲrɛnnɛn’n nun aunnvuɛ su’n, be sɔnnin. I wie yɛle dɔɔtrɔ mɔ be di junman cɛ kpa naan b’a uka be nga tukpacɛ o be su annzɛ like yaya w’a yo be’n. Sin nuanfuɛ nin polisie nin Zuze yɛ be nga kɛ sa wie tɔ’n be uka sran mun’n, be mian be ɲin naan sran’m be ɲrɛnnɛn’n w’a yoman dan. Annzɛ be yo sɔ naan ɲrɛnnɛn’n w’a tɔman be su. I sɔ liɛ’n yo sran’m be ye sanngɛ sran annzɛ anuannzɛ fi kwlá wieman ɲrɛnnɛn’n i asiɛ wunmuan’n su. Sanngɛ Ɲanmiɛn liɛ’n, ɔ kwla yo sɔ. Yɛ ɔ́ wá núnnún ɲrɛnnɛn’n i lika kwlaa.

Biblu’n nun fluwa kasiɛn’n gua e awlɛn su nzue kɛ: “[Ɲanmiɛn] núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.” (Sa Nglo Yilɛ 21:4) Sran kpanngban nga i sɔ ndɛ liɛ’n wɔ be’n, maan e bu be akunndan e nian. Nda sɔ mɔ Ɲanmiɛn tali’n ɔ bo like nga i waan ɔ́ yó naan ɲrɛnnɛn’n kwlaa wie’n i kpɔlɛ. I sɔ yolɛ’n nun’n, ɔ́ núnnún asiɛ’n su alɛ’n nin awe’n nin tukpacɛ’n ɔ nin sa mɔ be yomɛn i nuan su’n, ɔ nin klunwifuɛ mun. Klɔ sran fi kwlá yomɛn i sɔ liɛ’n.

Like nga Ɲanmiɛn Sielɛ’n wá yó’n

Zezi Klist mɔ saan Ɲanmiɛn yɛ i tinmin’n trɛ i liɛ’n, yɛ Ɲanmiɛn sín i sin yía nda ng’ɔ tali’n i nuan ɔn. Ɔ cɛ kaan sa’n Zezi wá dí Famiɛn asiɛ wunmuan’n su. Sran fi su jrɛnmɛn i ɲrun. Famiɛn nin plezidan nin politikifuɛ’m be su sieman klɔ sran’m be kun. Sanngɛ Famiɛn yɛ awa kunngba mɔ yɛle Ɲanmiɛn Sielɛ’n yɛ ɔ́ síe be ɔ.

Sielɛ sɔ’n núnnún klɔ sran’m be awa’m be kwlaa. Laa kpa’n, Biblu’n kannin kɛ: “Nyanmiɛn b’ɔ o nglo lɔ’n ɔ́ síe famiɛn diwlɛ kun b’ɔ su saci-man le, yɛ mɛn uflɛ su sie-mɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun, kpɛkuun i bɔbɔ ɔ́ ká lɛ tititi.” (Daniɛl 2:44) Ɲanmiɛn Sielɛ’n m’ɔ ti sielɛ kpa’n i bo’n, sran’m be kwlaa be bo yó kun.

I nun mɔ Zezi o asiɛ’n wu wa’n, kpɛ sunman ɔ kannin Sielɛ sɔ’n i ndɛ. Ɔ kɛnnin i ndɛ srɛlɛ ng’ɔ kleli i sɔnnzɔnfuɛ mun’n i nun. Ɔ seli be kɛ be srɛ kɛ: “Maan ɔ sielɛ blɛ’n ju, maan e bɔ e wo asiɛ’n su wa’n e yo ɔ klun sa kɛ be bɔ be o nyanmiɛn su lɔ’n be yo’n sa.” (Matie 6:10) Maan e sie i nzɔliɛ kɛ Zezi kleli kɛ Ɲanmiɛn Sielɛ’n nin Ɲanmiɛn i klun sa mɔ be yo i asiɛ’n su wa’n be kɔ likawlɛ. Ɔ ti Ɲanmiɛn klun su kɛ ɔ́ núnnún ɲrɛnnɛn’n asiɛ wunmuan’n su.

Ye nga Ɲanmiɛn i sielɛ kpa’n ɔ́ wá yó klɔ sran mun’n, sran’m be awa fi kwlá yomɛn i sɔ. Nán e wla fi su kɛ Zoova fɛli i Wa’n yili e ti tɛ naan klɔ sran’m b’a kwla ɲan anannganman nguan. Ɲanmiɛn Sielɛ’n m’ɔ́ wá yó sran’m be ye’n i bo’n, fɔ su tranman sran’m be nun kun. ?I sɔ’n i bo’n gúa sɛ? Zoova “núnnún wie’n mlɔnmlɔnmlɔn. Anannganman ɔ́ núnnún sran’m be kwlaa be nyinmuɛn’n.”—Ezai 25:8.

Sran wie’m be kwla usa kɛ: ‘?Ngue ti yɛ lele nin andɛ’n Ɲanmiɛn nin a yoman like fi ɔ? ?Ngue yɛ ɔ minndɛ i ɔ?’ Sɛ ɔ ti kɛ laa Zoova waan ɔ́ núnnún ɲrɛnnɛn’n annzɛ ɔ́ yó naan nán ɔ tɔ sran’m be su’n, nn ɔ yoli. Sanngɛ, sɛ ɔ yacili ɲrɛnnɛn’n i lɛ’n, nán kɛ i bɔbɔ i wun akunndan m’ɔ bu’n ti ɔ. Kɛ ɔ ko yo naan i mma mɔ be o asiɛ’n su’n b’a ɲan ye tititi’n ti ɔ. Siɛ nin niɛn nga be klo be mma mun’n, sɛ be si kɛ sɛ kekle wie tɔ be mma’m be su’n, i sin bé ɲán su ye’n, bé yáci be lɛ naan kekle sɔ’n tɔ be su. I kunngba’n, ninnge wie’m be ti yɛ Zoova yaci klɔ sran’m be nun mɔ be wun ɲrɛnnɛn kan’n niɔn. Biblu’n yiyi i sɔ’n nun. I wie yɛle e klunklo ajalɛ nga e kwla fa’n, ɔ nin sa tɛ’n, ɔ nin ndɛ wie m’ɔ tɔli atin nga Zoova le i sie nglo nin asiɛ’n su’n. Biblu’n yiyi nun wie kɛ Ɲanmiɛn yacili aolia nun sran tɛ kun i nun naan ɔ sie mɛn’n kan.a

Kannzɛ bɔbɔ e kwlá yiyiman ninnge sɔ’m be ngba nun wa’n, sanngɛ ninnge nɲɔn be kwla cici e wla yɛ be wla e fanngan. I klikli’n, yɛle kɛ: Wafa nga Zoova wá rá e su’n, i dan trá ɲrɛnnɛn kwlaa nga e wunnin be’n fatifati. Asa kusu’n Ɲanmiɛn se kɛ: “Be su bo-man laa sa’m be su be di-man jɔlɛ kun. Be su bu-man be akunndan kun.” (Ezai 65:17) Afɛ nin ɲrɛnnɛn nga kɛ Ɲanmiɛn mannin sa tɛ’n i atin’n be o sran’m be su’n, ɔ́ wá núnnún be mlɔnmlɔnmlɔn.

Like’n i nɲɔn su’n yɛle kɛ: Ɲanmiɛn sieli ɲrɛnnɛn’n i nunnunlɛ blɛ kun mɔ be kwlá kacimɛn i ɔ. Nán e wla fi su kɛ Ɲanmiɛn nuan ijɔfuɛ Abakiki usali kɛ cɛn onin ko yɛ Zoova núnnún nzaje sa nin sa tɛtɛ mun ɔn. Zoova tɛli i su kɛ: “Ndɛ nga ń kán be ń klé wɔ yɛ’n, be yolɛ blɛ nian ju-man. [...] San i sɔ sa liɛ’n ɔ́ tɔ́, ɔ su sɛn-mɛn i wun.” (Abakik 2:3) Kɛ nga é wá wún i ndɛ ng’ɔ́ bá lɛ’n nun’n sa’n, ninnge sɔ’m be “yolɛ blɛ” w’a mantan koko.

[Ja ngua lɛ ndɛ’n]

[Kuku/Foto mun, bue 7]

Biblu’n nun ndɛ mma nga be kle kɛ e ɲrun lɔ’n wá yó kpa’n

ALƐ’N SU TRANMAN LƐ KUN:

“Amun bla be wa nian sa nga Anannganman yo’n, amun nian sa sroesroe ng’ɔ yo i asiɛ’n su’n. Kɛ ɔ fɛ i lele b’ɔ́ fá jú mɛn’n i awieliɛ lɔ’n, w’a yo maan alɛ kunlɛ’n w’a wie.”—Jue Mun 46: 9, 10.

E AWLƐN SU SRAN’M BÉ CƐ́N NGUAN:

“Sran kpa mun o, sran tɛ mun o, bé cɛ́n.”—Sa Nga Be Yoli’n 24:15.

SRAN’M BE KWLAA BÉ ƝÁN ALIƐ:

“Maan ble’n ɔ su lele ɔ bu mɛn’n nun. Maan kpɔlɛ’m be su’n, be wun kɛ aunngban’n ɔ keje ble ja kpanngban.”—Jue Mun 72:16.

TUKPACƐ’N WÍE:

“Zerizalɛmfuɛ’n [annzɛ sran] wie fi su se-man kɛ: ‘N kpinndin-man.’”—Ezai 33:24.

BÉ NÚNNÚN KLUNWIFUƐ MUN:

“Klunwifuɛ’m be liɛ’n, bé trá be mɛn nga nun bé kɔ́. Bé tú gblɛfuɛ’m be bo.”—Nyanndra Mun 2:22.

BÉ YÓ SA I NUAN SU:

“Famiɛn kun [Klist Zezi] ɔ́ nían mmla’n su ɔ́ síe mɛn’n, i awlo lɔ sran dandan’m bé yó sa’m be nuan su.”—Ezai 32:1.

[Foto, bue 7]

Ɲanmiɛn Sielɛ’n wá núnnún ɲrɛnnɛn kwlaa nga e wunnin be’n.