Maan e klo Ɲanmiɛn nin sran lele e guɛ i ti nin i bo
‘Sran b’ɔ klo sran’n, ɔ trɛ i anwlɛn sa’n kwlaa nun. Ɔ klo i guɛ i ti nin i bo.’—1 Korɛntfuɛ Mun 13:7, 8.
1. (a) ?Kpɛ sunman wafa sɛ yɛ be kan Ɲanmiɛn nin sran klolɛ’n i ndɛ ɔ? (b) ?Wan annzɛ ngue yɛ sran kpanngban be klo i ɔ?
B’A KAN Ɲanmiɛn nin sran klolɛ’n su ndɛ kpanngban. Be yili i sɔ liɛ’n i ayɛ jue’m be nun. Ɲanmiɛn nin sran klolɛ’n ti like mɔ klɔ sran’m be sa miɛn i wun ɔn. Sanngɛ sran klolɛ ndɛ ng’ɔ fluwa nin flimu’m be nun’n, nɛ́n i kpa’n wie ɔ. Yɛ i sɔ fluwa nin flimu mun’n, be diman be yalɛ gua’m be bo. Sanngɛ Ɲanmiɛn nin e wiengu’m be klolɛ kpafuɛ’n be ɲɛnmɛn i sekeseke. Ndɛ nga Biblu’n kɛnnin i blɛ kasiɛn’n su’n, yɛ e wun i ɔ. Sran’m ‘be bu be bɔbɔ be wun akunndan, be ti sika klofuɛ, be klo mɛn dilɛ’n tra Nyanmiɛn.’—2 Timote 3:1-5.
2. ?Like ng’ɔ timan kpa’n i klolɛ’n i su afɔtuɛ benin yɛ Biblu’n man ɔn?
2 Sran’m be kwla yi klolɛ’n i nglo, sanngɛ Ɲanmiɛn Ndɛ’n se e kɛ e nian e wun like ng’ɔ timan kpa’n i klolɛ’n i lika. Kpɛkun kɛ i sɔ klolɛ liɛ’n tra ndin sran kun i awlɛn’n nun’n, wafa ng’ɔ yo’n, Biblu’n yiyi nun. (1 Timote 6:9, 10) ?Amun wla o Demasi i su ndɛ nga akoto Pɔlu klɛli’n i su? Kannzɛ Demasi nin Pɔlu yɛ be dili junman’n, sanngɛ ɔ wa kloli mɛn’n. (2 Timote 4:10) Ɔ maan akoto Zan wlali Klistfuɛ’m be su nun kɛ be nian be wun i sɔ liɛ’n i lika. (An kanngan 1 Zan 2:15, 16 nun.) Mɛn’n ɔ nin i nun ninnge mɔ be cɛman’n be klolɛ’n, ɔ nin Ɲanmiɛn nin ninnge nga be fin i’n be klolɛ’n, be kɔman likawlɛ mlɔnmlɔn.
3. ?Ngue yɛ ɔ fata kɛ e mian e ɲin e yo ɔ? ?Yɛ kosan benin yɛ be o i sɔ’n su ɔ?
3 Kannzɛ e o mɛn’n nun’n, sanngɛ e timan mɛn’n nunfuɛ. I ti’n, klolɛ’n i su akunndan tɛ nga mɛn’n nunfuɛ’m be bu’n, ɔ fata kɛ e mian e ɲin naan y’a kwla kpalo i. Nán e yaci e wun lɛ naan be akunndan tɛ sɔ’n sa e. I sɔ’n ti wie nin nguan ndɛ. ?Yɛ sɛ ɔ ti sɔ’n niɔn, wan yɛ ɔ fata kɛ e klo i klolɛ kpa ɔ? ?Ngue yɛ ɔ kwla uka e naan y’a tra e awlɛn Ɲanmiɛn nin sran klolɛ’n nun naan y’a klo be y’a guɛ i ti nin i bo ɔ? ?Wafa sɛ yɛ e ɲɛn i sɔ’n su mmlusuɛ andɛ ɔ? ?Yɛ wafa sɛ yɛ i sɔ’n le ta e ɲrun lɔ sa’m be su ɔ? Ɔ fata kɛ Ɲanmiɛn yɛ ɔ tɛ kosan sɔ’m be su ɔ, i liɛ’n ɔ kwla kle e atin.
Maan e yo naan e Zoova klolɛ’n yo kpa
4. ?Wafa sɛ yɛ Ɲanmiɛn i klolɛ’n yo dan ɔn?
4 Sɛ e lua like naan e waan ɔ yo kpa’n, ɔ fata kɛ e di i wun junman. Maan e bu fie difuɛ kun m’ɔ miɛn i ɲin siesie asiɛ’n i ye kpɛkun ɔ lua like’n, i akunndan e nian. I wla o su kɛ like sɔ m’ɔ luali’n, ɔ́ yó kpa. (Ebre Mun 6:7) I kunngba’n, sɛ é kwlá sé’n, ɔ fata kɛ klolɛ nga e klo Ɲanmiɛn’n, ɔ ɲin annzɛ ɔ yo dan. ?Ngue yɛ maan ɔ kwla yo sɔ ɔ? Ɔ fata kɛ e awlɛn’n m’ɔ ti kɛ asiɛ kpa sa mɔ e luali Ɲanmiɛn Sielɛ’n i su ndɛ nanwlɛ’n nun’n, e di su junman. Sɛ e suan Ɲanmiɛn Ndɛ’n naan e si Ɲanmiɛn kpa’n, yɛ e kwla yo sɔ ɔ. (Kolɔsfuɛ Mun 1:10) Aɲia’m be bo kɔlɛ’n nin kosan nga be usa be lɔ’n be su tɛlɛ’n yɛ junman nga be man e lɔ’n i dilɛ’n, ɔ́ úka e wie naan y’a si Ɲanmiɛn kpa. ?E tinuntinun e bo manndrɛn titi naan y’a si Ɲanmiɛn kpa?—Nyanndra Mun 2:1-7.
5. (a) ?Wafa sɛ yɛ e kwla suan Zoova i nzuɛn cinnjin’m be su like ɔ? (b) ?Ngue ndɛ yɛ e kwla kɛn i Ɲanmiɛn i sa sɛsɛ yolɛ’n nin i ngwlɛlɛ’n yɛ i kwlalɛ’n be su ɔ?
5 Zoova yi i wun nglo i Ndɛ’n nun. Sɛ e suan Ɲanmiɛn Ndɛ’n nun like naan e si Zoova blɛblɛblɛ’n, e kwla klo i nzuɛn mɔ yɛle sa i nuan su yolɛ nin kwlalɛ’n ɔ nin ngwlɛlɛ’n yɛ i sran klolɛ’n m’ɔ tra like kwlaa’n. Zoova yo sa i nuan su like kwlaa nun yɛ i mmla’m be ti sɛsɛ. (Mmla’n 32:4; Jue Mun 19:8) E kwla bu ninnge kwlaa nga Zoova yili be’n be akunndan kpɛkun i ngwlɛlɛ m’ɔ leman wunsu’n, e ɲin yi i kpa. (Jue Mun 104:24) Asiɛ’n nin nglo lɔ ninnge’m be kwlaa be kle kɛ wunmiɛn’n nin kwlalɛ m’ɔ leman awɛ’n be fin Zoova.—Ezai 40:26.
6. ?Wafa sɛ yɛ Ɲanmiɛn yili i sran klolɛ’n i nglo e lika ɔ? ?Yɛ wafa sɛ yɛ i sɔ’n kannin e ɔ?
6 ?Ngue ndɛ yɛ e kwla kɛn i Ɲanmiɛn i nzuɛn’m be nun danfuɛ mɔ yɛle sran klolɛ’n i su ɔ? Yɛle kɛ ɔ ti dan kpa, ɔ maan ɔ kan sran kwlaa. Ɔ yili i sran klolɛ’n i nglo ajalɛ ng’ɔ fɛli i kɛ sran kun kpɔ klɔ sran’m be ti’n, i nun. (An kanngan Rɔmfuɛ Mun 5:8 nun.) Sran kwlaa ti yɛ ɔ fɛli i sɔ ajalɛ’n niɔn. Sanngɛ be nga be sɔ Ɲanmiɛn i klolɛ’n nun mɔ be lafi i Wa’n i wulɛ’n su’n, yɛ bé dí su ɔ. (Zan 3:16, 36) Zezi i fa manlɛ mɔ Ɲanmiɛn fa mannin e kɛ ɔ kpɔ e sa tɛ’m be ti’n, ɔ fata kɛ ɔ su e bo naan e kusu e klo Ɲanmiɛn.
7, 8. (a) ?Sɛ e waan é yí e Ɲanmiɛn klolɛ’n i nglo’n, ngue yɛ ɔ fata kɛ e yo ɔ? (b) ?Ngue ɲrɛnnɛn yɛ kannzɛ be tɔ e su’n, sanngɛ e nanti Ɲanmiɛn i mmla’m be su titi ɔ?
7 ?Like kwlaa nga Ɲanmiɛn yoli mannin e’n ti’n, wafa sɛ yɛ e kwla kle kɛ e klo i ɔ? Ɲanmiɛn nuan ndɛ nga tɛ su klanman kpa. I waan: “Nyanmiɛn i klolɛ’n yɛlɛ kɛ e fɛ i ndɛ’n su, i ndɛ sɔ’n i su falɛ’n yo-man ya.” (1 Zan 5:3) Nanwlɛ, Ɲanmiɛn Zoova i klolɛ’n su e bo maan e fɛ i mmla’m be su. I sɔ’n ti like kun mɔ i ti yɛ e bo Ɲanmiɛn i dunman nin i Sielɛ’n be su jasin fɛ’n naan sran uflɛ’m be ɲan su ye’n niɔn. Sɛ e tu e klun e yo sɔ’n, i sɔ’n kle weiin kɛ awlɛn kpa yɛ e fa nanti Ɲanmiɛn i mmla’m be su ɔ.—Matie 12:34.
8 Ɲanmiɛn Sielɛ’n i jasin fɛ’n ti’n, sran’m be sɔman e niaan nga be o mɛn’n wunmuan’n nun be nun klanman’n, yɛ be yo be finfin. Sanngɛ be mian be ɲin be nanti Ɲanmiɛn i mmla’m be su. Be tu be klun kpa naan b’a di be jasin fɛ’n bolɛ junman’n b’a guɛguɛ i bo. (2 Timote 4:5) I kunngba’n, i sɔ’n maan e kan Ɲanmiɛn’n Ndɛ’n e kle e wiengu, yɛ e nanti Ɲanmiɛn i ndɛ’m be kwlaa be su.
Like nga ti yɛ e klo e Min Zezi Klist’n
9. ?Ɲrɛnnɛn benin wie mun yɛ be tɔli Zezi su ɔ? ?Yɛ ngue yɛ maan ɔ kwla jrannin kekle ɔ?
9 Ɔ ti su kɛ e klo Ɲanmiɛn. Sanngɛ ɔ le ninnge kpanngban uflɛ wie mɔ be ti’n, ɔ fata kɛ e suɛn i Wa’n i klolɛ wie ɔ. Kannzɛ y’a siman Zezi’n, sanngɛ kɛ é súɛn i su like é kɔ́’n, nn klolɛ mɔ e klo i’n, ɔ́ yó dan kɔ́ wie. (1 Piɛr 1:8) ?Ɲrɛnnɛn benin wie yɛ be tɔli Zezi su ɔ? Kɛ Zezi yó i Si klun sa’n, sran’m be kpɔli i sa ngbɛn. Be kleli i ɲrɛnnɛn, be tɔnnin i suɛn, be yoli i wanzo. Kpɛkun be kleli i ɲrɛnnɛn uflɛ wie mun ekun. (An kanngan Zan 15:25 nun.) Klolɛ mɔ Zezi klo i Si m’ɔ o ɲanmiɛn su lɔ’n ti’n, ɔ kwla trɛli i awlɛn i sɔ’n nun. Kpɛkun Zezi i sran klolɛ’n ti’n, ɔ fɛli i wun kpɔli sran kpanngban be ti.—Matie 20:28.
10, 11. ?Kɛ e wun like nga Klist yoli mannin e’n, ngue yɛ ɔ fata kɛ e fa sie e ɲrun kɛ é yó ɔ?
10 Like nga Zezi yoli’n maan e yo ninnge wie mun. Kɛ e bu Klist i like ng’ɔ yoli mannin e’n be akunndan’n, klolɛ mɔ e klo i’n, ɔ yo dan kpa. Ɔ fata kɛ e sɔnnzɔn i sran klolɛ’n naan e yo sɔ titi, afin e ti i sɔnnzɔnfuɛ. I liɛ’n, i ndɛ ng’ɔ kɛnnin i kɛ e bo Sielɛ Blɛ’n i su jasin fɛ’n naan e uka sran mun naan be kaci i sɔnnzɔnfuɛ’n, e kwla tra e awlɛn e nanti su.—Matie 28:19, 20.
11 Klist kloli sran’m be kwlaa. I ti’n, e wun i wlɛ kɛ ɔ fata kɛ e tu e klun e wie junman nga be fa mannin e’n i di ka naan mɛn’n i awieliɛ’n w’a ju. (An kanngan 2 Korɛntfuɛ Mun 5:14, 15 nun.) Like nga Ɲanmiɛn waan ɔ́ yó mán sran mun’n, kɛ Klist yó i nuan su sa’n, ɔ jrannin sran klolɛ’n su. Yɛ ajalɛ nga Klist kleli e kɛ e fa su kpa’n, ɔ yo maan e tinuntinun e le junman kun e di i like nga Ɲanmiɛn waan ɔ́ yó i sɔ’n i nun. Ɔ maan, sɛ e waan é kwlá dí junman sɔ’n, ɔ fata kɛ e suan Ɲanmiɛn i klolɛ kpa. (Matie 22:37) Kɛ e nanti like nga Zezi kleli’n su mɔ e fɛ i ndɛ’n su titi’n, e kle kɛ e klo i naan kannzɛ ɔ́ yó sɛ’n, é súan Ɲanmiɛn i Sielɛ’n i bo kɛ nga Zezi yoli’n sa cɛ.—Zan 14:23, 24; 15:10.
Maan klolɛ mɔ i kpa tra like ngba’n, ɔ yo e nzuɛn
12. ?Kɛ Pɔlu se kan “like nga sɛ an yo-ɔ ɔ ti kpa trɛ i ngba’n,” i bo’n yɛle benin?
12 Akoto Pɔlu yoli Klist i sɔnnzɔnfuɛ kpa. Kɛ m’ɔ yoli sɔ’n ti’n, nanwlɛ su ɔ kwla seli i niaan Klistfuɛ’m be kɛ be yo kɛ i sa. (1 Korɛntfuɛ Mun 11:1) Klistfuɛ klikli’m be blɛ su’n, Ɲanmiɛn wawɛ’n maan sran wie’m be kwla yoli tukpacifuɛ’m be juejue, kpɛkun be kannin aniɛnaniɛn wie mun. Pɔlu wlali Korɛnti lɔ Klistfuɛ’m be fanngan kɛ be ɲin blo i sɔ ninnge’m be yolɛ’n su. Sanngɛ ɔ kleli be kɛ like kun o lɛ’n, i yolɛ’n ti kpa trɛ i ngba naan ɔ fata kɛ ɔ kaci be nzuɛn. Ɔ yiyili like sɔ’n nun 1 Korɛntfuɛ Mun 12:31 nun kɛ: “Ń wá klé amun like nga sɛ an yo-ɔ ɔ ti kpa trɛ i ngba’n.” Ndɛ mma nga be ba ng’ɔ o yɛ’n i sin’n be kle kɛ sran klolɛ’n yɛ ɔ ti like m’ɔ ti dan trɛ i ngba’n niɔn. ?Wafa sɛ yɛ i dan trɛ i ngba ɔ? Pɔlu fali sunnzun ase mun yiyili i ndɛ’n nun. (An kanngan 1 Korɛntfuɛ Mun 13:1-3 nun.) ?Sɛ ɔ si ninnge wie’m be yo kpa, yɛ sɛ ɔ dili junman dandan wie mun sanngɛ sɛ ɔ kloman sran’n nn ngue yɛ w’a yo ɔ? Like fi! Ɲanmiɛn wawɛ’n yɛ ɔ sieli Pɔlu ti yɛ ɔ kwla yiyili ndɛ cinnjin sɔ’n nun ɔn. Kɛ ɔ yoli maan e wunnin ndɛ sɔ’n i wlɛ’n, ɔ kannin e kpa!
13. (a) ?Afuɛ 2010 nun Biblu’n nun ndɛ mma liɛ’n yɛle benin? (b) ?Kɛ be se kɛ sran klolɛ’n su wieman le’n, i bo’n yɛle benin?
13 I sin’n, Pɔlu kle e like nga sran klolɛ’n ti’n, ɔ nin ng’ɔ timan’n. (An kanngan 1 Korɛntfuɛ Mun 13:4-8 nun.) Siɛn’n e fa blɛ naan e nian sɛ e yo like nga sran klolɛ’n ti’n, ɔ fata kɛ e yo’n nin o. Maan e fa e ɲin e sie i ndɛ mma 7 i nun ndɛ ɲanman kasiɛn’n nin ndɛ mma 8 i nun ndɛ ɲanman klikli’n su e nian. Be waan: ‘Sran b’ɔ klo sran’n, ɔ trɛ i anwlɛn sa’n kwlaa nun. Ɔ klo i guɛ i ti nin i bo.’ Ndɛ sɔ’n yɛ ɔ ti afuɛ 2010 nun Biblu’n nun ndɛ mma’n niɔn. Maan e sie i nzɔliɛ kɛ i ndɛ mma 8 nun’n, Pɔlu waan like nga Ɲanmiɛn wawɛ’n maan sran yo mɔ i wie yɛle Ɲanmiɛn nuan ijɔlɛ nin aniɛn wafawafa’m be kanlɛ mɔ kɛ asɔnun’n bo i bo sran’m be yo’n, bé wíe. Sanngɛ sran m’ɔ klo sran’n, ɔ klo i lele guɛ i ti nin i bo. Sran klolɛ’n i bo’n o Zoova sa nun, yɛ kusu Zoova o lɛ tititi. I ti’n, sran klolɛ’n ɔ su wieman le, ɔ́ ká lɛ tititi. Afin ɔ ti Ɲanmiɛn m’ɔ o lɛ tititi’n i nzuɛn’n kun.—1 Zan 4:8.
Sran m’ɔ klo sran’n ɔ trɛ i awlɛn sa’n kwlaa nun
14, 15. (a) ?Wafa sɛ yɛ Ɲanmiɛn nin sran klolɛ’n kwla uka e naan y’a tra e awlɛn ɔn? (b) ?Ngue ti yɛ aniaan gbanflɛn kun w’a kplinman su kɛ ɔ́ kpɔ́ci Zoova ɔ?
14 Kannzɛ ɲrɛnnɛn ng’ɔ o Klistfuɛ’m be su’n ti sɛ’n, sanngɛ be tra be awlɛn. ?Ngue yɛ ɔ uka be ɔ? Sran klolɛ kpafuɛ’n niɔn. Ɔ ti dan tra kɛ y’a klɛn e sa nun ninnge mun y’a man. Ɔ yo maan e waan é nánti seiin titi. Annzɛ ɔ yo maan, e kplin su kɛ sɛ Klist ti be waan bé kún e’n, be kun e. (Lik 9:24, 25) Alɛ dan 2 su nun’n, yɛ i nun mɔ alɛ sɔ’n wieli’n, be kleli Zoova i Lalofuɛ wie’m be ɲrɛnnɛn Itilɛli i bisua’m be nun, yɛ wie’m be dili plɔtrɔ junman. Sanngɛ aniaan sɔ’m b’a kpɔciman Zoova le. Maan e bu i sɔ’n i akunndan.
15 Wilhelm m’ɔ ti Zoova i Lalofuɛ gbanflɛn m’ɔ fin Alemaɲi’n, ɔ yi i sɔ liɛ’n i nglo kpa. Kannzɛ Itilɛli i sonja’m be lɔngɔli kɛ be su wa kun i’n, sanngɛ w’a kpɔciman Zoova le. Lɛtri kun m’ɔ klɛli kaleli i osufuɛ mun’n i nun’n, ɔ seli kɛ: “I ng’ɔ ti cinnjin trɛ i ngba’n yɛle kɛ ɔ fata kɛ e klo Ɲanmiɛn kɛ nga e Min Zezi Klist fa kannin’n sa. Sɛ e jrɛn i sin’n, ɔ́ yó e mo.” I sin’n, Sasafuɛ Tranwlɛ’n kun nun’n, i osufuɛ kun klɛli i kɛ: “Kekle blɛ sɔ’m be nun’n, e awlobo’n miɛnnin i ɲin naan i Ɲanmiɛn klolɛ’n dun mmua like kwlaa ɲrun.” Aniaan kpanngban mɔ be o bisua nvle kɛ Arménie nin Érythrée nin Corée du Sud, ɔ nin nvle uflɛ nun sa’n, akunndan kunngba’n yɛ be bu ɔ. Aniaan sɔ’m be yaciman be Zoova klolɛ’n.
16. ?Ngue sa yɛ ɔ o e niaan nga be o Malawi lɔ’n be su ɔ?
16 Lika kpanngban nun’n, ɲrɛnnɛn wafawafa nga be kle aniaan mun ti’n, Ɲanmiɛn sulafilɛ’n nin klekle jranlɛ’n w’a yoman pɔpɔ. Nvle nga be flɛ i Malawi’n nun lɔ’n, awa tanninnin Zoova i Lalofuɛ’m be jasin fɛ’n i bolɛ. Be kleli be ɲrɛnnɛn kpa yɛ be yoli be sa tɛtɛ kpanngban lele afuɛ 26. Be kekle jranlɛ’n w’a yoman ngbɛn. Kɛ bé bó be ɲrɛnnɛn klelɛ’n i bo’n, nn be ti 18.000 nvle sɔ’n nun. Sanngɛ kɛ ɔ dili afuɛ 30 be juli lele sran 38.393. Ɔ yoli sɔ nvle uflɛ wie’m be nun.
17. ?Ngue sa yɛ ɔ o aniaan wie mɔ be awlobofuɛ’m be ngba be suman Zoova’n be su ɔ? ?Yɛ ngue ti yɛ be kwla jran kekle ɔ?
17 Kɛ be kle Ɲanmiɛn i sran’m be ɲrɛnnɛn trele sa’n, ɔ ti kekle man be. Sanngɛ kɛ Klistfuɛ wie’m be osufuɛ mun yɛ be tanndan be ɲrun’n, ɔ kwla yo kekle kpa. Ɔ kwla yo be awlobo’n nunfuɛ mun annzɛ be osufuɛ nga be mantan be’n yɛ be kle be yalɛ ɔ. ?Zezi w’a seman kɛ i sɔ sa liɛ’n ɔ́ wá jú? Ɔ seli sɔ. Sran kpanngban b’a wun kɛ i ndɛ sɔ’n ti nanwlɛ. (Matie 10:35, 36) Gbanflɛn nin talua wie’m be si nin be nin’m be kleli be nun. Wie’m be liɛ’n be fuannin be awlo’n nun. Sanngɛ Zoova i Lalofuɛ klun ufuefuɛ’m be sɔli be nun. Wie’m be liɛ’n be seli be kɛ be timan be osufuɛ kun. ?Ngue yɛ maan be kwla jrannin kekle ɔ? Nán be niaan Klistfuɛ’m be klolɛ’n ngunmin ti ɔ. Sanngɛ like ng’ɔ ukali be kpafuɛ’n, yɛle Zoova nin i Wa’n be klolɛ’n.—1 Piɛr 1:22; 1 Zan 4:21.
18. ?Wafa sɛ yɛ kɛ be se kɛ sran m’ɔ klo sran’n, ɔ trɛ i awlɛn sa’n kwlaa nun’n, ɔ kwla uka Klistfuɛ nga be o aja’n nun’n niɔn?
18 Ninnge kpanngban uflɛ o lɛ’n, be nun’n ɔ fata kɛ e kle kɛ e Ɲanmiɛn nin sran klolɛ’n nun’n e tra e awlɛn sa’n kwlaa nun. Be nga be o aja’n nun’n, Ɲanmiɛn nin sran klolɛ’n ti’n, be ɲin yi Zezi i ndɛ yɛ’n. Ɔ seli kɛ: “Like nga Nyanmiɛn kan be bo nun’n, nán maan sran fi ti be nun.” (Matie 19:6) Kɛ Klistfuɛ nga be jali be wun’n ‘bé wún be nyinsu’n,’ nán maan be wla fi su kɛ Zoova ti cinnjin kpa be aja’n nun. (1 Korɛntfuɛ Mun 7:28) I Ndɛ’n se kɛ ‘sran b’ɔ klo sran’n, ɔ trɛ i anwlɛn sa’n kwlaa nun.’ Yɛ sɛ yasua kun nin i yi be yi nzuɛn sɔ’n i nglo’n, bé trán likawlɛ titi. Ɔ maan be aja’n su saciman.—Kolɔsfuɛ Mun 3:14.
19. ?Kɛ sa kekleekle wie’m be juli’n, ngue yɛ Ɲanmiɛn i sran’m be yoli ɔ?
19 Ɲrɛnnɛn kɛ nzue dandan nin aunmuan mɔ be saci lika’n be blɛ’n nun’n, Ɲanmiɛn nin sran klolɛ’n uka e. I sɔ’n i ɲin fiteli blɛ nga asiɛ’n kejeli nvle nga be flɛ i Peru’n i ja ngua lɔ lika’n, ɔ nin blɛ nga aunmuan dan nga be flɛ i Katrina’n, ɔ sacili Amlɛnkɛn’m be lɔ lika kun’n, i nun. E niaan’m be nun kpanngban be sua nin be sa nun ninnge’n kwlaa wieli saci. Ɲanmiɛn nin sran klolɛ’n suli mɛn wunmuan’n nun asɔnun’m be bo kɛ be ko uka be. Aniaan wie’m be klunklo su, be ɔli be ko ukali be. Be kplannin be sua mun yɛ be siesieli Ɲanmiɛn Sielɛ Blɛ Sua’m be ye. I sɔ’n kle kɛ e niaan’m be klo be wun yɛ be wiengu ndɛ lo be blɛ nin sa kwlaa nun.—Zan 13:34, 35; 1 Piɛr 2:17.
Sran m’ɔ klo sran’n, ɔ klo i guɛ i ti nin i bo
20, 21. (a) ?Ngue ti yɛ Ɲanmiɛn nin sran klolɛ’n i kpa trɛ i ngba ɔ? (b) ?Ngue ti yɛ y’a ta nda kɛ é sɔ́nnzɔn Ɲanmiɛn nin sran klolɛ’n niɔn?
20 Andɛ e wun kɛ Zoova i sran’m be afiɛn’n be yi klolɛ mɔ i kpa tra like ngba’n i nglo. I sɔ’n i ɲin fite like kwlaa nun sakpa. Maan e nian wafa nga akoto Pɔlu tinnin i sɔ ndɛ nanwlɛ’n su’n. I klikli nun’n, ɔ seli kɛ ninnge nga Ɲanmiɛn wawɛ’n maan sran’m be yo’n bé wíe yɛ Klistfuɛ asɔnun’n ɔ́ trɛ́ naan ɔ́ tín. Kpɛkun ɔ guɛli i bo kɛ: “Siɛn’n, like nsan nga be ka lɛ’m be yɛ: Nyanmiɛn su lafilɛ, e wla bɔ e fa guɛ i Nyanmiɛn su’n, nin klolɛ bɔ e fa klo Nyanmiɛn nin sran’n, sanngɛ be nun dan’n yɛlɛ Nyanmiɛn nin sran be klolɛ.”—1 Korɛntfuɛ Mun 13:13.
21 Cɛn wie lele’n, ninnge nga e lafi be su’n bé kpɛ́n su. Ɔ maan ɔ su tranman nun kɛ e lafi be su ekun. E wla m’ɔ o ninnge nga Ɲanmiɛn waan ɔ́ yó be’n be sin’n, kɛ ninnge’n kwlaa ko kaci uflɛ’n, ɔ su tranman lɛ kun. ?Sanngɛ yɛ Ɲanmiɛn nin sran klolɛ’n nin? I liɛfuɛ’n, ɔ su wieman le. Ɔ́ ká lɛ tititi. Kɛ mɔ e si kɛ é trán nguan nun tititi ti’n, e si kɛ é wá sí Ɲanmiɛn i sran klolɛ’n i wafa uflɛ wie mun ekun. Sɛ e yo Ɲanmiɛn i klun sa’n, yɛle kɛ sɛ klolɛ’n kaci e nzuɛn yɛ e yi klolɛ sɔ’n i nglo lele e guɛ i ti nin i bo’n, é trán nguan nun tititi.—1 Zan 2:17.
?Amún tɛ́ su sɛ?
• ?Ngue ti yɛ ɔ fata kɛ e nian e wun Ɲanmiɛn nin sran klolɛ’n ng’ɔ nin i fataman’n i lika ɔ?
• ?Ɲanmiɛn nin sran klolɛ’n kwla uka e naan y’a jran ngue ɲrun kekle?
• ?Ngue ti yɛ Ɲanmiɛn nin sran klolɛ’n wieman le ɔ?
[Ndɛ kwle, bue 27]
Afuɛ 2010 nun Biblu’n nun ndɛ mma’n yɛle: ‘Sran b’ɔ klo sran’n, ɔ trɛ i anwlɛn sa’n kwlaa nun. Ɔ klo i guɛ i ti nin i bo.’—1 Korɛntfuɛ Mun 13:7, 8.
[Foto, bue 26]
Ɲanmiɛn nin sran mɔ be klo i be guɛ i bo’n ti’n Malawi lɔ aniaan’m be jrannin kekle.