Ndɛ nga Zezi kɛnnin i bɔbɔ su’n

Fluwa klɛfuɛ kun waan: “Zezi sili sran wafa ng’ɔ ti’n, ɔ nin lika ng’ɔ fin’n. Yɛ like nga ti yɛ ɔ bali mɛn’n nun’n, ɔ nin sa nga bé wá jú i su’n, ɔ sili be weiin wie.”—HERBERT LOCKYER.

KWLAA naan y’a bu Zezi i ninnge ng’ɔ kleli’n be nanwlɛ naan y’a fa be su’n, ɔ fata kɛ e si ninnge wie mun i su. ?Wan yɛle Zezi bɔbɔ? ?Nin yɛ ɔ fin ɔn? ?Ngue ti yɛ ɔ bali asiɛ’n su ɔ? Wafa nga Zezi bɔbɔ tɛ kosan sɔ’m be su’n yɛ Matie, Mark, Lik yɛ Zan be klɛli ɔ.

Ɔ o lɛ kwlaa naan b’a wu i asiɛ’n su wa Le kun Zezi seli kɛ: “Kɛ bé wú Abraam’n, wuun n wo lɛ.” (Zan 8:58) Kɛ Abraamu trannin asiɛ’n su’n ɔ dili afuɛ ko ju 2.000 kun ka naan b’a wu Zezi. Sanngɛ ka naan b’a wu Ɲanmiɛn sufuɛ kpa sɔ’n nn Zezi o lɛ lele. ?Sɛ ɔ ti sɔ’n nn blɛ sɔ’n nun’n, nin yɛ Zezi o ɔ? Ɔ yiyi nun kɛ: “N fin nyanmiɛn su lɔ bali.”—Zan 6:38.

Ɲanmiɛn i Wa’n Zoova i mma mɔ yɛle anzi mun’n, be sɔnnin. Sanngɛ Zezi ti i liɛ ngunmin kun. Ɔ seli kɛ ɔ ti Ɲanmiɛn “i Wa kunngba cɛ’n.” (Zan 3:18) Ndɛ sɔ’n i bo’n yɛle kɛ Zezi kunngba cɛ yɛ Ɲanmiɛn bɔbɔ yili i trele sa ɔ. Ɲanmiɛn sinnin i Wa kunngba cɛ’n i lika naan w’a yi ninnge’n kwlaa.—Kolɔsfuɛ Mun 1:16.

“M bɔ n kacili Sran’n” Zezi fɛli i sɔ liɛ’n flɛli i wun kpɛ sunman. W’a faman dunman uflɛ w’a flɛmɛn i wun sɔ. (Matie 8:20) Ɔ kannin sɔ fa kleli kɛ ɔ timan anzi kun m’ɔ kacili sran ɔn, annzɛ like wie yɛ ɔ kacili sran ɔn. Sanngɛ ɔ ti klɔ sran jrɛiin. Ɲanmiɛn fɛli i wawɛ’n yoli maan ɔ fɛli i Wa’n i nguan’n wlɛli Mali mɔ nin a sinman bian’n i ku sɛ’n nun. I sɔ’n ti’n, kɛ bé wú Zezi’n fɔ nunmɛn i nun.—Matie 1:18; Lik 1:35; Zan 8:46.

Mɛsi mɔ be seli kɛ ɔ́ bá’n Samali bla kun seli Zezi kɛ: “N si kɛ Mɛsi [...] ɔ́ bá.” Zezi tɛli i su kɛ: “Yɛlɛ min, Mɛsi’n yɛ ɔ su kan ndɛ kle wɔ yɛ.” (Zan 4:25, 26) Ndɛ mma “Mɛsi’n” ɔ nin “Klist’n” be bo ti kun. Be bo’n yɛle “sran mɔ be kpɛli i sieli i ngunmin’n.” Ɲanmiɛn kpali Zezi sieli i ngunmin. Yɛle kɛ ɔ sieli i kɛ ɔ di junman ngunmin kun ninnge nga ɔ tali nda kɛ ɔ́ yó’n i su kpɛnlɛ’n nun.

Like cinnjinfuɛ nga ti yɛ ɔ bali’n Le kun Zezi seli kɛ: “Nyanmiɛn sielɛ’n i ndɛ kanlɛ klɔ uflɛ wie’m be su’n ɔ ti n cinnjin, i sɔ’n ti yɛ Nyanmiɛn sunmannin min-ɔn.” (Lik 4:43) Kannzɛ Zezi yoli sa kpa kpanngban mannin be nga kekle o be su’n, sanngɛ Ɲanmiɛn Sielɛ’n i jasin fɛ’n i bolɛ’n yɛ ɔ yoli i like cinnjin kpafuɛ’n niɔn. Sɛ ɔ yo’n, é wá kán ninnge ng’ɔ kleli i Sielɛ sɔ’n i su’n, i ndɛ.

Ɔ ti weiin kɛ Zezi timan sran ngbɛn sa.a Kɛ nga é wá wún i sa’n, kɛ mɔ Zezi trannin ɲanmiɛn su lɔ’n ti’n, ndɛ ng’ɔ kɛnnin i asiɛ’n su wa’n i bo’n yoli kploun kpa. Ɔ maan sɛ jasin nga Zezi boli’n ɔ kacili sran kpanngban be mɛn dilɛ’n asiɛ wunmuan’n su’n, ɔ boman e nuan.

[Ja ngua lɛ ndɛ’n]