Aniaan yasua mun, an lua like nga Ɲanmiɛn wawɛ’n klo i’n naan be man amun junman!
“Sɛ [sran kun] ɔ lua like nga Nyanmiɛn Wawɛ’n klo i’n, i mma nga Wawɛ sɔ’n maan ɔ ti’n yɛlɛ anannganman nguan’n.”—GAL. 6:8.
1, 2. ?Wafa sɛ yɛ Matie 9:37, 38 su kpɛn su ɔ? ?Yɛ i sɔ’n i su ajalɛ benin yɛ ɔ fata kɛ be fɛ i asɔnun’m be nun ɔn?
SA NGA e su wun be dɔ nga su’n, e wla su fiman be su le! Junman kun mɔ Zezi Klist kɛnnin i ndɛ’n be su di i dan kpa. Yɛ junman sɔ’n kɔ i ɲrun ndɛndɛ kpa wie. Zezi seli kɛ: “Fie’n w’a yo ye, sanngɛ i su junman difuɛ’m b’a sɔn-man. I sɔ’n ti, an se fie i fuɛ’n maan ɔ fa sran wie mun ekun maan be ko di i junman’n.” (Mat. 9:37, 38) Ɲanmiɛn Zoova su yia srɛlɛ sɔ’n i nuan kpa tra laa’n. Afuɛ nga be flɛ i 2009 nun’n, Zoova i Lalofuɛ’m be takali asɔnun uflɛuflɛ 2.031. Siɛn’n, be asɔnun nga be o mɛn wunmuan’n nun’n, b’a yo 105.298. Ɔ ti kɛ cɛn ba kun’n, be yo sran 757 be batɛmu sa!
2 I sɔ trɛlɛ’n ti’n, aniaan nga be si junman di mɔ be kwla nian Ɲanmiɛn i sran’m be lika, kpɛkun be kwla dun like klelɛ’n i ɲrun mmua’n, be le be awuliɛ. (Efɛ. 4:11) Kɛ afuɛ’m bé sín’n, Zoova yoli maan yasua wie mɔ be si junman di’n be niɛnnin i bua’m be lika. Ɔ maan e kwla lafi su kɛ ɔ́ yó sɔ titi. Ɲanmiɛn nuan ndɛ ng’ɔ o Mise 5:4 nun’n, ɔ gua e awlɛn su nzue kɛ blɛ kasiɛn’n nun’n, Zoova i nvlefuɛ’m bé ɲán “sonja kpɛnngbɛn kpanngban kpa.” Sran sɔ’m be ti sran kpanngban nga be si junman di, mɔ bé níɛn i nvlefuɛ’m be lika’n be nzɔliɛ.
3. ?Kɛ be se kɛ be “lua like nga Nyanmiɛn Wawɛ’n klo i’n,” i bo’n yɛle benin?
3 ?Sɛ amun ti Zoova i Lalofuɛ yasua kun mɔ b’a yo i batɛmu’n, ngue yɛ ɔ kwla uka amun naan amun a kunndɛ kɛ amún dí cenjele junman sɔ’n wie ɔ? Like cinnjin kun m’ɔ kwla uka amun’n, yɛle kɛ amun “lua like nga Nyanmiɛn Wawɛ’n klo i’n.” (Gal. 6:8) I sɔ yolɛ’n i wie yɛle kɛ amun yaci Ɲanmiɛn wawɛ’n i nun naan ɔ kle amun atin amun mɛn dilɛ’n nun. Amun ta nda kɛ amun su ‘luaman like nga amun bɔbɔ amun klun klo’n.’ Nán amun yaci ninnge kɛ fɛ dilɛ nin amun ɲin su yiyilɛ’n be nun naan be yo naan amun a diman Ɲanmiɛn junman’n i kpa. Ɔ fata kɛ Klistfuɛ’m be kwlaa be “lua like nga Nyanmiɛn Wawɛ’n klo i’n.” I liɛ’n kɛ ɔ́ kɔ́ i ɲrun’n, yasua’m be kwla di junman m’ɔ ti cenjele like’n asɔnun’n nun. Kɛ mɔ be le asɔnunfuɛ’m be lika nianfuɛ nin asɔnun kpɛnngbɛn’m be awuliɛ kpa andɛ’n ti’n, like suanlɛ nga ti Klistfuɛ yasua’m be liɛ. I sɔ’n ti’n, aniaan yasua mun, é wlá amun fanngan kɛ amun fa amun ɲin sie su kpa srɛlɛ’n nun.
An siesie be wun naan be di junman m’ɔ ti kpa’n
4, 5. (a) ?Cenjele junman benin yɛ be wla yasua nga b’a yo be batɛmu’n be fanngan kɛ be mian be ɲin be di ɔ? (b) ?Ngue yɛ ɔ fata kɛ sran kun yo naan w’a kwla di i sɔ junman’n niɔn?
4 Klistfuɛ yasua kun kwlá kaciman asɔnun sunianfuɛ annzɛ asɔnunfuɛ’m be lika nianfuɛ kpɛ kunngba. Ɔ fata kɛ ɔ miɛn i ɲin kpa naan w’a kwla di ‘junman b’ɔ ti kpa’n.’ (1 Tim. 3:1) Junman m’ɔ ti kpa’n, i dilɛ’n i wie yɛle kɛ ɔ di junman mɛn i wiengu Klistfuɛ mun naan ɔ nian be lika. (An kanngan Ezai 32:1, 2 nun.) Sran nga akunndan kpa ti yɛ ɔ yo sɔ’n, ɔ kunndɛman kɛ ɔ́ yó sran dan. Sanngɛ ɔ klo kpa kɛ ɔ́ yó i wiengu’m be ye.
5 Sran ng’ɔ kunndɛ kɛ ɔ́ káci asɔnunfuɛ’m be lika nianfuɛ naan ɔ́ káci asɔnun sunianfuɛ’n, ɔ fata kɛ ɔ miɛn i ɲin naan ɔ yia ninnge nga Ɲanmiɛn Ndɛ’n kan be ndɛ’n, be nuan. (1 Tim. 3:1-10, 12, 13; Tit 1:5-9) Sɛ amun ti Klistfuɛ yasua m’ɔ fɛli i wun mannin Ɲanmiɛn’n, amun usa amun wun kɛ: ‘?N wla min wun ase n di jasin fɛ’n i bolɛ junman’n? ?Yɛ n uka min wiengu mun naan b’a yo sɔ? ?Min wiengu Klistfuɛ’m be ndɛ m’ɔ lo min kpa’n ti’n, n yo maan be yo kpa? ?Sran’m be si kɛ n suan Ɲanmiɛn Ndɛ’n i kpa? ?N yo naan wafa nga n tɛ kosan’m be su’n w’a yo kpa w’a tra laa’n? ?Junman nga asɔnun kpɛnngbɛn’m be fa man min’n, n nian nun n di i kpa?’ (2 Tim. 4:5) Ɔ fata kɛ amun bu kosan sɔ’m be akunndan kpa.
6. ?Like cinnjin benin yɛ sran kun kwla yo naan b’a mɛn i junman asɔnun’n nun ɔn?
6 Like kun ekun m’ɔ kwla yo naan amun a di junman sɔ’n, yɛle kɛ maan Ɲanmiɛn i “Wawɛ’n wla amun fanngan naan an tra amun anwlɛn yɛ an jran kekle.” (Efɛ. 3:16) Asɔnunfuɛ’m be lika nianfuɛ annzɛ asɔnun kpɛnngbɛn kacilɛ’n, ɔ timan kɛ b’a fa sran kun b’a sie i junman kun su sa ngbɛn. Kɛ sran kun yo m’ɔ nin Zoova be afiɛn’n sɛ kpa kɔ i ɲrun’n, yɛ ɔ kwla ɲɛn i sɔ cenjele like’n niɔn. ?Wafa sɛ yɛ sran kun nin Zoova be afiɛn’n kwla sɛ kpa ɔ? I kun yɛle kɛ amun “yo sa nga Nyanmiɛn Wawɛ’n kle amun’n.” (Gal. 5:16, 22, 23) Maan amun nzuɛn’n kle kɛ amun nin Ɲanmiɛn be afiɛn’n sɛ naan sɛ be man amun junman wie ekun’n, amun kwla di. Kpɛkun Ɲanmiɛn ninnge’m be nun afɔtuɛ nga be man amun naan amun a wɔ be ɲrun’n, amun fa be su. I liɛ’n, ‘sran kwlaa wún kɛ amun su yo kpa tra laa’n.’—1 Tim. 4:15.
Ɔ fata kɛ amun klɛn amun wun
7. ?Junman nga be di be man sran’n, i dilɛ’n nun’n ngue yɛ ɔ fata kɛ sran kun yo ɔ?
7 Junman nga be di be man sran’n, ɔ timan pɔpɔ. Ɔ fata kɛ sran kun klɛn i wun naan w’a kwla di. Kɛ mɔ Klistfuɛ asɔnun sunianfuɛ’m be ti kɛ bua sunianfuɛ sa’n ti’n, sɛ é kwlá sé’n bua fa’n i ndɛ lo be kpa. Maan e nian wafa nga asɔnun su nianlɛ’n yoli akoto Pɔlu’n. Ɔ seli i wiengu Klistfuɛ nga be o Korɛnti lɔ’n be kɛ: “Kɛ ń klɛ́ amun fluwa sɔ’n, n wla ti bowa dan kpa, min anwlɛn’n kpɛ n klun, yɛ min nyinmuɛn gua. Nán amun wla bolɛ ti yɛ n klɛli-ɔ, sanngɛ n yo i sɔ naan an si klolɛ dan nga n fa klo amun’n.” (2 Kor. 2:4) Ɔ ti weiin kɛ Pɔlu fɛli i wla’n kwlaa guɛli i junman’n su.
8, 9. An fa Biblu’n nun ndɛ wie’m be kle wafa nga yasua wie’m be niannin be wiengu’m be lika’n.
8 Yasua nga be dili junman be mannin Zoova i sufuɛ mun’n, like kun mɔ be fa sie be nzɔliɛ’n, yɛle be wun klɛnlɛ’n. I wie yɛle kɛ Nowe w’a semɛn i awlobofuɛ’m be le kɛ: ‘Sɛ amun wie mmeli’n i bobo’n, amun ko flɛ min.’ Ezipti lɔ’n, Moizi w’a seman Izraɛlifuɛ’m be kɛ: ‘Like kwlaa nga amun kwla yo naan amun a ju Ndɛ Mma jenvie’n i nuan lɔ’n, amun yo. E ko yia lɔ.’ Zozie kusu w’a seman le kɛ: ‘Sɛ Zeriko talɛ’n bu’n, amun w’a kan kle min.’ Yɛ Ezai kusu w’a tinngɛmɛn i sa sran uflɛ wun w’a seman kɛ: ‘I ɔ, sunmɛn i.’—Eza. 6:8.
9 Sran kun mɔ yacili Ɲanmiɛn wawɛ’n nun maan ɔ sieli i’n, yɛle Zezi Klist. I yɛ ɔ ti e ajalɛ klefuɛ ɔ. I klunklo su ɔ kplinnin su kɛ ɔ́ kpɔ́ sran’m be ti. (Zan 3:16) Nanwlɛ, ɔ fata kɛ Zezi i wun ng’ɔ klɛnnin’n, ɔ su e bo naan e kusu e klɛn e wun wie. Asɔnun kpɛnngbɛn kun m’ɔ ti asɔnun kpɛnngbɛn w’a cɛ kpa’n, ɔ kan wafa ng’ɔ bu be nga be ti Ɲanmiɛn i bua fa’n be nunfuɛ’n, be ndɛ. Ɔ seli kɛ: “Ndɛ nga Zezi kan kleli Piɛli kɛ ɔ niɛn i bua’m be lika’n, ɔ kannin min kpa. Kɛ afuɛ’m bé sín’n, m ma wunnin kɛ be nuan nun ndɛ kan mɔ be kɛn i klolɛ su’n, annzɛ aklunye kan mɔ be yo’n, ɔ kwla wla sran fanngan. Sran’m be lika nianlɛ’n ti junman kun mɔ n klo i kpa ɔ.”—Zan 21:16.
10. ?Ngue yɛ ɔ kwla yo naan Klistfuɛ yasua’m b’a di junman b’a man be wiengu mun kɛ Zezi sa ɔ?
10 Wafa nga Zezi yoli Ɲanmiɛn i bua fa’n yɛ ɔ fata kɛ Klistfuɛ yasua nga be fali be wun mannin Ɲanmiɛn mɔ be o asɔnun’n nun’n, be fa yo be ɔ. Zezi seli kɛ: “Ń síke amun, yɛ amún dé wunmiɛn.” (Mat. 11:28) Ɲanmiɛn sulafilɛ’n nin asɔnun’n i klolɛ’n yo maan Klistfuɛ yasua’m be kunndɛ kɛ bé dí junman m’ɔ ti kpa’n. Be seman be wun kɛ junman sɔ’n ti klekle ngboko naan ɔ́ wá klé be yalɛ dan. ?Yɛ sɛ sran kun i konvi nunman junman sɔ’n i dilɛ’n su nin? ?Aniaan bian kun kwla yo naan i konvi w’a tran asɔnun’n nun junman dilɛ’n su?
Maan amun konvi tran junman’n su
11. ?Ngue yɛ sran kun kwla yo naan i konvi w’a tran junman nga be di be man be wiengu’n su ɔ?
11 Sɛ amun bu i kɛ amun su siman asɔnun sunianfuɛ junman’n di’n, ɔ ti kpa kɛ amun srɛ Ɲanmiɛn kɛ ɔ fɛ i wawɛ’n man amun. (Lik 11:13) Zoova i wawɛ’n úka amun naan amun a jran akluntitiɛ’n i ɲrun kekle. Ɲanmiɛn yɛ maan sran kun kunndɛ kɛ ɔ́ dí i junman’n niɔn. Afin Zoova i wawɛ’n yɛ ɔ wla sran fanngan maan ɔ kwla di i junman’n niɔn. (Fil. 2:13; Jue. 121:1, 2) Ɔ maan ɔ fata kɛ amun srɛ Zoova naan ɔ uka amun naan amun konvi tran i junman’n i dilɛ m’ɔ ti cenjele like’n su.—An kanngan Jue Mun 25:4, 5 nun.
12. ?Ngue yɛ sran kun kwla yo naan w’a si ngwlɛlɛ naan w’a di junman nga be fa mɛnnin i’n niɔn?
12 Klistfuɛ kun kwla sie i nzɔliɛ kɛ Ɲanmiɛn i bua fa’n i lika nianlɛ’n ti kekle naan afɛ o nun. I ti naan ɔ dimɛn i sɔ junman’n. Annzɛ kusu ɔ kwla yo i kɛ i ngwlɛlɛ liɛ’n jumɛn i sɔ junman’n i dilɛ’n nun. Sɛ ɔ ti sɔ’n, sɛ ɔ miɛn i ɲin suan Ɲanmiɛn Ndɛ’n nin Biblu’n i akua’m be nun like kpa tra laa’n, ɔ kwla si ngwlɛlɛ. Ɔ fata kɛ ɔ usɛ i wun kɛ: ‘?N fa blɛ n suan Ɲanmiɛn Ndɛ’n nun like? ?Yɛ n srɛ Ɲanmiɛn kɛ ɔ kle min ngwlɛlɛ?’ Zezi i sɔnnzɔnfuɛ Zaki klɛli i kɛ: “Sɛ ngwlɛlɛ’n w’a ti-man amun nun wie kpa’n, maan ɔ kan kle Nyanmiɛn bɔ i sa ti-man tankaan’n, b’ɔ fa like man sran’m be kwlaa ɔ ijɔ-mɛn i sin’n. Ɔ maan sran sɔ’n ɔ́ wún sa wlɛ.” (Zak 1:5) ?Amun lafi ndɛ sɔ m’ɔ fin Ɲanmiɛn’n su? Kɛ Salomɔn srɛli Ɲanmiɛn’n, Ɲanmiɛn tɛli i srɛlɛ’n su. Ɔ mɛnnin i ‘ngwlɛlɛ [yɛ] ɔ yoli akunndanfuɛ dan.’ I sɔ’n yoli maan kɛ Salomɔn dí sran’m be jɔlɛ’n, ɔ wunnin sa kpa nin sa tɛ’n be ngbaciɛ’n. (1 Fam. 3:7-14) Salomɔn liɛ’n nin e liɛ’n timan kun. Sanngɛ e kwla lafi su kɛ Ɲanmiɛn mán yasua nga be mannin be junman asɔnun’n nun’n be ngwlɛlɛ, naan be niɛn i bua’m be su kpa.—Nya. 2:6.
13, 14. (a) Wafa nga “klolɛ bɔ Krist fa klo sran’n” ɔ ɲannin ta Pɔlu su’n, an yiyi nun. (b) ?Ngue yɛ ɔ fata kɛ “klolɛ bɔ Krist fa klo sran’n” ɔ su e bo naan e yo ɔ?
13 Like kun ekun kwla uka amun naan amun naan junman nga be di man be wiengu’n, amun konvi w’a tran su. Yɛle kɛ amun bu ninnge kwlaa nga Zoova nin i Wa’n be yoli mannin e’n, be akunndan. Amun kwla bu 2 Korɛntfuɛ Mun 5:14, 15 i akunndan. (An kanngan nun.) ?Ngue ti yɛ “klolɛ bɔ Krist fa klo sran’n ti” yɛ e yo “sa kwlaa nga e yo’n” niɔn? Klolɛ mɔ Klist kloli sran’n ti’n, ɔ fɛli i nguan’n mannin e kɛ nga Ɲanmiɛn fa klo’n sa. Kɛ e wun i sɔ’n i wlɛ kpa mɔ é sí i ye kpa é kɔ́’n, i sɔ’n su e bo maan e fa ajalɛ. Ajalɛ kwlaa nga Pɔlu fali be’n, be taka Klist i sran klolɛ’n su. I sɔ’n yoli maan w’a bumɛn i ngunmin i wun akunndan. Kpɛkun ɔ ukɛli i maan like ng’ɔ yoli i cinnjin kpafuɛ’n yɛle Ɲanmiɛn i sulɛ nin i wiengu nga be o asɔnun’n nun ɔ nin be nga be nunman asɔnun’n nun’n, be ukalɛ.
14 Kɛ e bu klolɛ nga Klist kloli sran mun’n i akunndan’n, ɔ yo maan e si i ye. Ɔ maan i agualiɛ su’n, e wun i wlɛ kɛ ɔ nin i fataman mlɔnmlɔn kɛ e ‘lua like nga e bɔbɔ klun klo’n.’ Yɛle kɛ ɔ fataman kɛ like ng’ɔ́ yó e cinnjin’n yɛle fɛ dilɛ’n. Sanngɛ e siesie e wun naan junman nga Ɲanmiɛn fa mannin e’n, ɔ yo like cinnjin kpafuɛ’n e mɛn dilɛ’n nun. I sɔ’n yo maan klolɛ su, e bu e wun kɛ e ti e niaan’m be “kanga.” (An kanngan Galasifuɛ Mun 5:13 nun.) Sɛ e bu e wun kɛ e ti kanga naan e su di junman e man Zoova i sufuɛ mɔ be fali be wun be mɛnnin i’n, e nin be é trán aɲinyiɛ’n nun. Yɛ é bú be sran. Sran’m be wun ndɛ tɛ kanlɛ mɔ Satan w’a fa tru i mɛn’n nun’n, e su sɔnnzɔnmɛn i kaan sa.—Ngl. 12:10.
Ɔ ti awlobo nunfuɛ’m be kwlaa be ndɛ
15, 16. ?Ngue yɛ siɛ kun i awlobofuɛ’m be kwla yo naan b’a sie i asɔnunfuɛ’m be lika nianfuɛ annzɛ asɔnun kpɛnngbɛn ɔn?
15 Sɛ aniaan kun le bla nin ba’n, be dun mmua nian wafa nga i awlobo’n fa ti’n, naan b’a sie i asɔnunfuɛ’m be lika nianfuɛ annzɛ asɔnun kpɛnngbɛn. Wafa nga i awlobofuɛ’m be nin Ɲanmiɛn be afiɛn’n fa ti’n, ɔ nin ndɛ nga sran’m be kɛn i be su’n, ɔ wɔ awlobo kpɛn’n i junman’n. I sɔ’n kle kɛ like ng’ɔ fata kɛ awlobofuɛ’m be yo naan b’a suan siɛ’n mɔ i waan ɔ́ káci asɔnunfuɛ’m be lika nianfuɛ annzɛ asɔnun kpɛnngbɛn’n i bo’n, ɔ ti cinnjin kpa.—An kanngan 1 Timote 3:4, 5, 12 nun.
16 Kɛ Klistfuɛ awlobofuɛ’m be kwlakwla be di junman likawlɛ’n, ɔ yo Zoova i fɛ. (Efɛ. 3:14, 15) Ɔ fata kɛ awlobo kpɛn’n yo ninnge’m be cɛcɛ naan w’a kwla di junman nga be mɛnnin i asɔnun’n nun’n, naan w’a ‘si i awlo’n su nian’ wie. Ɔ maan ɔ ti cinnjin kpa kɛ le mɔcuɛ kwlaa nun’n, asɔnun kpɛnngbɛn’n annzɛ asɔnunfuɛ’m be lika nianfuɛ’n, ɔ nin i yi nin i mma’m be suan Biblu’n nun like awlo lɔ. I liɛ’n be ngba bé ɲán su ye. Ɔ fata kɛ ɔ nin be bo jasin fɛ’n tititi. I kunngba’n, ɔ ti cinnjin kɛ awlobofuɛ’m be suan awlobo kpɛn’n i ɲin ng’ɔ mian’n, i bo.
?Amun kwla di junman sɔ’n ekun?
17, 18. (a) ?Sɛ aniaan kun i junman ng’ɔ di i asɔnun’n nun’n fi i sa’n, ngue yɛ ɔ fata kɛ ɔ yo ɔ? (b) ?Akunndan benin yɛ aniaan kun mɔ laa ɔ ti asɔnun kpɛnngbɛn annzɛ asɔnunfuɛ’m be lika nianfuɛ’n ɔ kwla bu ɔ?
17 Atrɛkpa’n, laa amun ti asɔnun kpɛnngbɛn annzɛ asɔnunfuɛ’m be lika nianfuɛ. Sanngɛ siɛn’n, amun dimɛn i sɔ junman’n kun. Amun klo Zoova yɛ amun lafi su kɛ ɔ nian amun lika. (1 Piɛ. 5:6, 7) Atrɛkpa’n, be seli amun kɛ ninnge wie’m be yolɛ’n nun’n, amun kaci amun sa. Amun di i sɔ’n i nanwlɛ naan Ɲanmiɛn uka amun naan amun kaci amun sa. Nán maan klunngbɔ tran amun klun. Yɛ nán amun wla bo, sanngɛ amun yo ngwlɛlɛfuɛ. Asɔnun kpɛnngbɛn m’ɔ dili asɔnun junman cɛli kpa mɔ i sin junman sɔ’n fili i sa’n, ɔ seli kɛ: “N tali nda kɛ ń kɔ́ aɲia’m be bo titi naan ḿ bó jasin fɛ’n titi yɛ ń kánngan Biblu’n nun titi kɛ i nun mɔ n te yo asɔnun kpɛnngbɛn’n n fa yo’n sa. N kwla yoli sɔ kusu. M ma suannin min awlɛn tralɛ. Afin m buli i kɛ sɛ ɔ di afuɛ kun annzɛ nɲɔn’n, bé wá síe min asɔnun kpɛnngbɛn ekun. Sanngɛ ɔ dili afuɛ lele nso naan m’an kaci asɔnun kpɛnngbɛn ekun. I sɔ blɛ’n nun’n, fanngan nga be wlali min kɛ nán min sa sin bubu min’n, ɔ yoli min ye kpa.”
18 Sɛ i sɔ sa’n o amun su wie’n, nán amun sa sin bubu amun. An bu wafa nga Zoova su ra amun jasin fɛ’n i bolɛ junman’n nin amun awlobo’n su’n i akunndan. Amun ta amun awlobofuɛ mun Ɲanmiɛn ninnge’m be nun. Amun ko nian tukpacifuɛ’m be osu yɛ amun wla be nga be awlɛn sɔman’n be fanngan. Ng’ɔ ti cinnjin trɛ i ngba’n, yɛle kɛ maan Sielɛ’n i jasin fɛ’n mɔ kɛ amun ti Zoova i Lalofuɛ’n amun kwla bo be fa manman Ɲanmiɛn’n, ɔ yo amun cinnjin kpa.a—Jue. 145:1, 2; Eza. 43:10-12.
An bu i akunndan ekun
19, 20. (a) ?Ngue yɛ be wla yasua kwlaa nga be yoli be batɛmu’n be fanngan kɛ be yo ɔ? (b) ?Like suanlɛ ng’ɔ́ bá lɛ’n nun’n, ngue yɛ é wá kókó su yalɛ ɔ?
19 Be le asɔnun sunianfuɛ nin asɔnunfuɛ’m be lika nianfuɛ’m be awuliɛ kpa andɛ tra laa’n. I sɔ’n ti’n, é wlá yasua kwlaa nga b’a yo be batɛmu’n be fanngan kɛ be nian be wun siin naan be usa be wun kɛ: ‘?Sɛ n timan asɔnunfuɛ’m be lika nianfuɛ annzɛ asɔnun kpɛnngbɛn’n, ngue ti yɛ n dimɛn i sɔ junman’n wie ɔ?’ Maan Ɲanmiɛn wawɛ’n uka amun naan amun fa like cinnjin kpa sɔ’n i su ajalɛ kpafuɛ’n.
20 Kɛ aniaan yasua’m be tu be klun be di Ɲanmiɛn junman’n, ɔ yo asɔnun’n nunfuɛ’m be kwlaa be ye dan kpa. Be nga be nian be wiengu’m be lika mɔ be lua like nga Ɲanmiɛn wawɛ’n klo i’n, be di aklunjuɛ. Kɛ e kunndɛman e bɔbɔ e ninnge mun mɔ e yo sa kpa e man e wiengu mun’n, e di i sɔ aklunjuɛ’n wie. Sanngɛ kɛ nga é wá wún i like suanlɛ ng’ɔ́ bá lɛ’n nun’n sa’n, ɔ fataman kɛ e bo Ɲanmiɛn wawɛ’n i wla. ?Wafa sɛ yɛ e kwla yo sɔ ɔ?
[Ja ngua lɛ ndɛ’n]
a An nian Sasafuɛ Tranwlɛ’n, afuɛ 2009, Utu 15 i bue 30-32 nun. (Blɔfuɛ nun)
?Amún tɛ́ su sɛ?
• ?Ɲanmiɛn nuan ndɛ ng’ɔ o Mise 5:4 nun’n, ɔ gua e awlɛn su nzue kɛ é ɲán ngue?
• Like ng’ɔ fata kɛ sran kun yo naan w’a kle kɛ ɔ klɛn i wun’n, an yiyi nun.
• ?Ngue yɛ sran kun kwla yo naan i konvi w’a tran i wiengu’m be lika nianlɛ’n su ɔ?
• ?Ngue ti yɛ ɔ ti cinnjin kɛ yasua kun i awlobofuɛ’m be suɛn i bo naan b’a sie i asɔnunfuɛ’m be lika nianfuɛ annzɛ asɔnun kpɛnngbɛn ɔn?
[Foto, bue 25]
?Ngue yɛ amun kwla yo naan amun a kwla di junman’n niɔn?