3 ?Wafa sɛ yɛ ɔ fata kɛ e srɛ Ɲanmiɛn ɔn?
ƝANMIƐN SRƐLƐ’N nun’n, ninnge nga be ti Ɲanmiɛn sulɛ wafa’m be cinnjin’n, yɛle wafa nga be jran’n, annzɛ be koto’n annzɛ be tran ase’n annzɛ wafa uflɛ wie mun ekun’n. Wafa nga be kan ndɛ’n, ɔ nin ninnge nga be yo be’n, be ti be cinnjin wie. Biblu’n uka e naan y’a faman e ɲin y’a siemɛn i wafa nga e yo e wun’n naan y’a srɛ Ɲanmiɛn’n i su. Sanngɛ ninnge nga be ti cinnjin kpa’n, be su yɛ ɔ fa e ɲin sie ɔ. Ɔ uka e naan y’a wun kosan nga i su tɛlɛ. Yɛle kɛ: “?Wafa sɛ yɛ ɔ fata kɛ e srɛ Ɲanmiɛn ɔn?”
Biblu’n kan Ɲanmiɛn i sufuɛ kpa’m be ndɛ kɛ lika kwlaa nga be o’n, be srɛli. I srɛlɛ’n nun’n, wie liɛ’n, be srɛ be klun lɔ annzɛ be man be nɛn’n su. Wie liɛ’n be man be ti’n su be nian nglo lɔ. Annzɛ be koto be utu be ɲin ase. Be faman foto nin srɛlɛ ɲanman nin srɛlɛ fluwa mun be srɛman Ɲanmiɛn. Sanngɛ be wla be wun ase be kan be klun ndɛ. ?Ngue ti yɛ Ɲanmiɛn tieli be srɛlɛ’n niɔn?
Kɛ nga e fa kɛnnin i ndɛ ng’ɔ sinnin lɛ’n nun’n sa’n, Zoova mɔ i kunngba cɛ yɛ ɔ ti Ɲanmiɛn’n, yɛ be srɛli i ɔ. Be yoli like cinnjin kun ekun. Be klɛli i 1 Zan 5:14 nun kɛ: ‘Sa nga ti yɛ e wla’n wo Nyanmiɛn su dan’n yɛ: e si kɛ like kwlaa nga e srɛ i’n, b’ɔ ti i klun su’n, ɔ́ mán ye.’ Ɔ fata kɛ e srɛlɛ’n yo Ɲanmiɛn i klun su naan w’a tie. ?I sɔ’n i bo’n yɛle benin?
Sɛ e waan e srɛlɛ’n yo Ɲanmiɛn i klun su’n, ɔ fata kɛ e si i klun sa sɔ’n. Sɛ kusu e waan é sí i’n, ɔ ti cinnjin kɛ e suan Biblu’n nun like. ?I sɔ’n kle kɛ sɛ e siman Biblu’n nun like kpa liɛ su’n, Ɲanmiɛn su tieman e srɛlɛ’n? Cɛcɛ, nɛ́n i sɔ ɔ. Sanngɛ Ɲanmiɛn kunndɛ kɛ e suɛn i klun sa’n, naan e wun i wlɛ, yɛ e nian su e nanti. (Matie 7:21-23) Ɔ fata kɛ like nga e suan’n ɔ nin e Ɲanmiɛn srɛlɛ’n be wɔ likawlɛ.
Kɛ é súan Zoova nin i klun sa’n be su like é kɔ́’n, nn e Ɲanmiɛn sulafilɛ’n yó dan kɔ́ wie. Sɛ e waan Ɲanmiɛn tie e srɛlɛ’n, ɔ ti cinnjin kpa kɛ e lafi i su. Zezi seli kɛ: ‘Like kwlaa nga an kan kle Nyanmiɛn kɛ ɔ yo bɔ an lafi i su kɛ ɔ́ yó’n, ɔ́ yó mán amun.’ (Matie 21:22) Ɲanmiɛn sulafilɛ’n, nɛ́n i yɛle ndɛ kwlaa nga be kan’n i su lafilɛ sa ngbɛn’n. Sanngɛ i bo’n yɛle kɛ e lafi like wie mɔ e wunmɛn i’n i su. Afin kannzɛ e wunman like sɔ’n, sanngɛ ninnge kpanngban be kle kɛ ɔ wo lɛ sakpa. (Ebre Mun 11:1) Ninnge wie’m be kle kɛ Zoova mɔ e wunmɛn i’n ɔ o lɛ, naan e kwla lafi i su, naan ɔ klo kɛ ɔ́ tɛ́ be nga be lafi i su’n be srɛlɛ’n su. Be dimɛn i sɔ ninnge liɛ’m be yalɛ Biblu’n nun. Asa ekun’n, e kwla srɛ Ɲanmiɛn cɛn kwlaa kɛ ɔ yo naan e lafi i su kpa. Zoova kusu’n, ɔ yo i fɛ kɛ ninnge nga be mian e sa’n, ɔ fa man e.—Lik 17:5; Zak 1:17.
Sɛ e waan Ɲanmiɛn tie e srɛlɛ’n like cinnjin kpa kun ekun yɛ ɔ o yɛ. Zezi seli kɛ: “Sran nga w’a sin-man min nun’n, ɔ ju-man e Si wun lɔ.” (Zan 14:6) Ɔ maan Zezi yɛ ɔ ti atin mɔ e kwla sin nun naan y’a to e Si Zoova lɔ ɔ. I sɔ’n ti Zezi seli i sɔnnzɔnfuɛ’m be kɛ be srɛ Ɲanmiɛn i dunman nun. (Zan 14:13; 15:16) I sɔ’n kleman kɛ Zezi yɛ ɔ fata kɛ e srɛ i ɔ. Sanngɛ Ɲanmiɛn yɛ e srɛ i Zezi dunman nun ɔn. Afin e wla fiman su kɛ Zezi yɛ maan e kwla kan ndɛ e kle e Si mɔ fɔ kaan sa nunmɛn i nun’n niɔn.
Le kun’n, Zezi i sɔnnzɔnfuɛ nga be mɛntɛn i kpa’n be seli i kɛ: “Nannan, kle ye sran nin Nyanmiɛn be yalɛ kokolɛ’n.” (Lik 11:1) Ɔ ti weiin kɛ nán ninnge ng’ɔ fata kɛ e yo be srɛlɛ’n nun mɔ y’a kan be ndɛ lɛ’n be ndɛ yɛ be kan ɔn. Sanngɛ be kunndɛli kpa kɛ bé sí ndɛ ng’ɔ fata kɛ be kɛn i srɛlɛ’n nun’n. Ɔ ti kɛ be su se i kɛ: ‘?Ngue yɛ ɔ fata kɛ e srɛ i Ɲanmiɛn sa nun ɔn?’
[Ndɛ kwle, bue 6]
Kɛ srɛlɛ’n ti Ɲanmiɛn klun su’n, mɔ bé srɛ́ i’n be lafi i su’n, mɔ be srɛ i Zezi dunman nun’n, ɔ tie.