Zoova yɛ ɔ sie mɛn wunmuan’n niɔn!

“Afin Anannganman b’ɔ sie mɛn wunmuan’n [...] i yɛ ɔ ti asiɛ’n su famiɛn dan nin-ɔn.”—Jue. 47:3.

1. ?Pɔlu i ndɛ ng’ɔ kɛnnin i 1 Korɛntfuɛ Mun 7:31 nun’n, ngue yɛ ɔ fa mɛn’n sunnzun i ɔ?

AKOTO PƆLU seli kɛ: “Mɛn ng’ɔ o yɛ’n ɔ cɛ-man.” (1 Kor. 7:31) Aniɛn nga be fa klɛli Biblu’n i klikli nun’n, ndɛ sɔ’n ti kɛ Pɔlu su fa mɛn’n fa sunnzun lika kun mɔ sran’m be yia be yi anɔ’n sa. Sran kun ba w’a yi i liɛ kɔ, kun ba w’a yi i liɛ kɔ, sɛ ɔ ti kpa o, annzɛ ɔ ti tɛ o.

2, 3. (a) ?Atin nga Zoova le i sie’n mɔ be tɛnndɛnnin i ɲrun’n, sunnzun ase benin yɛ ɔ kle i sɔ liɛ’n niɔn? (b) ?Kosan benin mun yɛ é wá tɛ́ be su ɔ?

² Andɛ kusu’n, be su yi anɔ cinnjin kun. I sɔ anɔ yilɛ liɛ’n wɔ amun! Like ng’ɔ wɔ i kpa bɔbɔ’n yɛle atin nga Ɲanmiɛn Zoova le i sie nglo’n nin asiɛ’n. Anɔ yilɛ sɔ nun’n, ɔ ti kɛ be su kan sa kun m’ɔ juli nvle kun nun’n i ndɛ sa. Sran kun mɔ i yɛ ɔ le i lika’n m’ɔ fata kɛ i yɛ ɔ sie’n o bue kun. Bue kun kusu’n, anuannzɛ tɛtɛ kun mɔ ndrunmun dilɛ nin nzaje sa nin sran kunlɛ’n yɛ ɔ ti i junman’n, ɔ o lɛ. Anuannzɛ tɛ sɔ’n, ɔ tanndan sran ng’ɔ le i lika’n i ɲrun. Kpɛkun kɛ ɔ yo naan nvlefuɛ’m be kle sran nga be waan bé jrɛ́n i sin’n, ɔ ti kekle man be.

³ Sa kɛ ngalɛ’n sa o mɛn’n wunmuan’n nun andɛ. Yɛle kɛ e “Min Ɲanmiɛn” Zoova mɔ i liɛ yɛle lika’n mɔ i yɛ ɔ fata kɛ ɔ sie’n, ɔ le i awa kun. (Jue. 71:5) Sanngɛ anuannzɛ tɛtɛ kun mɔ “Klunwifuɛ’n” yɛ ɔ ti i ɲrun dunfuɛ’n, ɔ su kle klɔ sran’m be yalɛ. (1 Zan 5:19) Anuannzɛ sɔ’n tanndan Ɲanmiɛn mɔ i yɛ ɔ fata kɛ ɔ sie’n i ɲrun. Kpɛkun sran kwlaa nga be waan bé jrán i sielɛ’n sin’n, ɔ ti kekle man be. ?Ngue yɛ maan i sɔ sa liɛ’n juli ɔ? ?Yɛ ngue ti yɛ maan Ɲanmiɛn kplinnin su kɛ ɔ ju ɔ? ?E tinuntinun’n, ngue yɛ e kwla yo ɔ?

Anɔ yilɛ sɔ’n i nun ndɛ mun

4. ?Ndɛ nɲɔn benin yɛ be bla nun m’ɔ ti asiɛ wunmuan’n su anɔ yilɛ nun ndɛ’n niɔn?

⁴ Anɔ yilɛ sɔ’n i nun ndɛ’n timan fiawa. Ɔ wɔ like nɲɔn mɔ be bla nun’n. Like nɲɔn sɔ’n yɛle atin mɔ Zoova le i sie’n, ɔ nin klɔ sran’m be seiin nantilɛ’n. Ɲanmiɛn Ndɛ’n nun’n, be kan Zoova ndɛ kɛ ɔ “sie mɛn wunmuan’n.” I wie yɛle kɛ jue tofuɛ’n seli kɛ: “Afin Anannganman b’ɔ sie mɛn wunmuan’n [...] i yɛ ɔ ti asiɛ’n su famiɛn dan nin-ɔn.” (Jue. 47:3) Kɛ be se kɛ like fi nunman Ɲanmiɛn Zoova sin’n, ɔ ti su.—Dan. 7:22.

5. ?Ngue ti yɛ ɔ fata kɛ e suan Zoova i ɲrun m’ɔ le i’n i bo ɔ?

⁵ Kɛ mɔ Ɲanmiɛn Zoova yɛ ɔ yili like kwlaa ti’n, i yɛ ɔ sie nglo’n nin asiɛ’n ɔ nin i su ninnge’n kwlaa ɔ. (An kanngan Sa Nglo Yilɛ 4:11 nun.) Asa ekun’n, Zoova ti e Jɔlɛ difuɛ, i yɛ ɔ siesie Mmla’n man e ɔ, i yɛ ɔ ti e Famiɛn ɔn. (Eza. 33:22-23) Kɛ mɔ Ɲanmiɛn ti yɛ maan e o lɛ’n, ɔ fata kɛ e bu i kɛ e Min ɔn, naan i yɛ ɔ sie e ɔ. “Anannganman takali i famiɛn bia’n nyanmiɛn su lɔ, ɔ sie ninnge’n kwlaa.” Sɛ i sɔ liɛ’n o e klun titi’n, ɔ́ yó maan é súɛn i ɲrun m’ɔ le i’n i bo titi.—Jue. 103:19; Yol. 4:24.

6. ?Seiin nantilɛ’n i bo’n yɛle benin?

⁶ Sɛ e waan é jrán Zoova sin kɛ i yɛ ɔ le atin sie nglo’n nin asiɛ’n, ɔ fata kɛ e “nanti seiin” titi i ɲrun. Sran ng’ɔ nanti seiin’n, i aeliɛ’n ti kpa like kwlaa nun. I sɔ sran liɛ’n be kwlá sacimɛn i wun kaan sa. Ɔ yo sa i nuan su. Kɛ Zɔbu yoli sɔ ɔ.—Zɔb 1:1.

?Anɔ yilɛ’n boli i bo sɛ?

7, 8. ?Wafa sɛ yɛ Satan sili atin nga Zoova le i sie nglo’n nin asiɛ’n i su akplowa ɔ?

⁷ I afuɛ 6.000 tra su yɛ, aolia nun sran kun sili atin nga Zoova le i sie nglo’n nin asiɛ’n i su akplowa. Like nga ti yɛ ɔ fɛli i sɔ ajalɛ’n yɛle kɛ i konvi sɔli kɛ be su i. Ɔ lakali Adam nin Ɛvu mɔ be ti sran klikli’n, ɔ maan be jasoli Ɲanmiɛn m’ɔ le sielɛ’n i wun. Kpɛkun ɔ kunndɛli kɛ ɔ́ sáci Zoova i dunman’n ti’n, ɔ seli kɛ Ɲanmiɛn buali ato. (An kanngan Bo Bolɛ 3:1-5 nun.) Ɲin keklefuɛ sɔ’n kacili Ɲanmiɛn i kpɔfuɛ dan kpa. Be flɛ i kɛ Satan (ɲrun tanndanfuɛ), mmusu’m be si (sran suɛn tɔnfuɛ), wuo (sran lakafuɛ), dragɔn (sran kunfuɛ).—Ngl. 12:9.

⁸ Ninnge’m be sielɛ’n nun’n, Satan bɔbɔ fali Ɲanmiɛn kacili i wla. ?Kɛ ɔ fɛli i ɲin wlawlali Ɲanmiɛn kɛ ngalɛ’n sa’n, ngue yɛ Zoova m’ɔ ti mɛn wunmuan’n i siefuɛ’n yó ɔ? ?Ɔ́ kɛ́ i ja nun lɛ núnnún ɲin keklefuɛ nsan’n mɔ be yɛle Satan nin Adam nin Ɛvu’n? Nanwlɛ, sɛ i waan ɔ́ yó i sɔ’n, ɔ kwla yo. Asa kusu’n, sɛ ɔ yo sɔ’n, bé wún sran ng’ɔ le tinmin trɛ i wiengu’n i wlɛ. Kpɛkun bé wún i wlɛ ekun kɛ, kɛ Zoova seli Adam nin Ɛvu kɛ sɛ be fɔn i mmla’n bé wú’n, nán ato yɛ ɔ buali ɔ. ?Sanngɛ ngue ti yɛ Ɲanmiɛn w’a nunnunman be ɔ?

9. ?Ngue yɛ Satan sili su akplowa ɔ?

⁹ Kɛ Satan buali ato’n m’ɔ lakali Adam nin Ɛvu maan be yoli ɲin kekle Ɲanmiɛn su’n, i lɛ nun’n, Satan sili atin nga Zoova le i se klɔ sran’m be kɛ be ɲin yi i’n i su akplowa. Asa ekun’n, kɛ Satan yoli maan Adam nin Ɛvu be yoli ɲin kekle Ɲanmiɛn su’n, Satan sili klɔ sran nin anzi’m be kwlakwla be seiin nantilɛ’n i su akplowa wie. I sɔ yɛ e fa wun i Zɔbu mɔ w’a kpɔciman Zoova le’n, i ndɛ’n nun ɔn. Yɛle kɛ Satan waan ɔ kwla yo naan klɔ sran’m be kwlaa be kpɔci Ɲanmiɛn.—Zɔb 2:1-5.

10. ?Kɛ mɔ Ɲanmiɛn w’a kaman lɛ w’a yimɛn i nglo kɛ i yɛ ɔ le atin sie nglo’n nin asiɛ’n, ngue yɛ ɔ mɛnnin i yolɛ’n i wun atin ɔn?

¹⁰ Kɛ mɔ Zoova w’a kaman lɛ w’a yimɛn i wun nglo kɛ i yɛ ɔ le atin sie mɛn wunmuan’n, mɔ w’a kaman lɛ w’a nunnunman Satan’n, i lɛ nun’n, ɔ mannin Satan i atin kɛ ɔ yo i ndɛ ng’ɔ kannin’n i nuan sa’n. Asa ekun’n, Ɲanmiɛn mannin klɔ sran’m be atin kɛ be yi i nglo kɛ be suɛn i bo kɛ i yɛ ɔ le atin sie nglo’n nin asiɛ’n niɔn. ?Kɛ ɔ́ cɛ́ kɔ́ i ɲrun’n ɔ yoli sɛ? Satan siesieli i anuannzɛ tɛtɛ kpa kun. Zoova wá núnnún anuannzɛ sɔ’n ɔ nin mmusu’m be si Satan. Ɔ maan sran kwlaa wún kɛ Ɲanmiɛn le atin sie sakpa. Ɲanmiɛn Zoova si kɛ ndɛ sɔ’n i bo’n gúa kpa ti’n, blɛ mɔ be yoli ɲin kekle Edɛni fie’n nun lɔ’n, ɔ boli su.—Bob. 3:15.

11. ?Zoova i atin m’ɔ le i sie nglo’n nin asiɛ’n i su ndɛ’n nun’n, ngue yɛ sran kpanngban be yo ɔ?

¹¹ Zoova i atin’n m’ɔ le i sie nglo’n nin asiɛ’n i su ndɛ’n nun’n, ɔ nin i dunman’n i sanwun yolɛ’n nun’n, sran kpanngban be lafili i su, yɛ b’a kpɔcimɛn i le. Sran sɔ’m be nun wie mun yɛle Abɛli, Enɔku, Nowe, Abraamu, Sara, Moizi, Riti, Davidi, Zezi yɛ Klist i sɔnnzɔnfuɛ klikli mun, ɔ nin sran kpanngban kpa wie mun ekun mɔ be nanti seiin andɛ’n. I sɔ sran mɔ be jran Zoova sin kɛ i yɛ ɔ ti m’ɔ sie nglo’n nin asiɛ’n, be kle kɛ Satan ti ato buafuɛ. Asa ekun’n, mmusu’m be si Satan i nuan m’ɔ di i kɛ ɔ kwla yo maan sran’m be kwlaa be yaci Ɲanmiɛn sulɛ’n, be kle kɛ ɔ ti ato.—Nya. 27:11.

E si wafa nga i bo’n gúa’n

12. ?Ngue yɛ maan e si kɛ Ɲanmiɛn su yaciman klunwi yolɛ’n i lɛ sa trilili ɔ?

¹² E kwla lafi su kɛ ɔ ka kaan sa’n Zoova wá klé kɛ ɔ le atin sie nglo’n nin asiɛ’n. Afin ɔ su yacimɛn i lɛ naan be yo klunwi’n sa trilili. Asa ekun’n, e si kɛ mɛn’n w’a ju i bue nuan. Nowe i blɛ su’n Zoova w’a yaciman klunwifuɛ’m be lɛ. Ɔ nunnunnin Sodɔmu nin Gomɔru yɛ Faraɔn nin i sonja mun. Sizɛra nin i sonja mun yɛ Sankeribu nin i sran mun b’a kwlá jranman i m’ɔ sie mɛn wunmuan’n i ɲrun. (Bob. 7:1, 23; 19:24, 25; Tul. 14:30, 31; Jɔl. 4:15, 16; 2 Fam. 19:35, 36) Ɔ maan e kwla lafi su kɛ Ɲanmiɛn Zoova su yaciman be nga be yo i dunman’n i finfin’n ɔ nin be nga be kle i Lalofuɛ’m be ɲrɛnnɛn’n be lɛ sa tititi. Asa kusu’n, nzɔliɛ ninnge nga be kle kɛ Zezi w’a ba naan mɛn’n w’a ju i awieliɛ’n, siɛn’n, e wun be jrɛiin.—Mat. 24:3.

13. ?Ngue yɛ é yó naan Zoova w’a nunnunman e ɔ nin i kpɔfuɛ’m be likawlɛ ɔ?

¹³ Sɛ e kunndɛman kɛ Ɲanmiɛn nunnun e nin i kpɔfuɛ’m be likawlɛ’n, ɔ fata kɛ e kle kɛ e jrɛn i sin kɛ i yɛ ɔ sie nglo’n nin asiɛ’n niɔn. ?Wafa sɛ yɛ e kwla yo sɔ ɔ? Yɛle kɛ maan e jaso Satan i sran sielɛ tɛtɛ’n i sin yɛ nán maan srɛ kun e i minniɛn’m be wun. (Eza. 52:11; Zan 17:16; Yol. 5:29) Saan kɛ y’a yo sɔ, yɛ e kwla jran e Si m’ɔ o ɲanmiɛn su lɔ’n i sin kɛ i yɛ ɔ le atin sie nglo’n nin asiɛ’n niɔn. Kpɛkun i sɔ yolɛ nun’n, yɛ e kwla lafi su kɛ blɛ m’ɔ wá yó naan i dunman’n yo sanwun’n, naan be si kɛ i yɛ ɔ sie mɛn wunmuan’n, é kwlá fíte nun ɔn.

14. ?Ninnge benin mun yɛ be yiyi nun Biblu’n i ndɛ tre akpasua fanunfanun’m be nun ɔn?

¹⁴ Kɛ ɔ fɛ i Biblu’n i bo bolɛ’n nun lele m’ɔ́ fá jú i awieliɛ lɔ’n, be kan klɔ sran nin Zoova i atin m’ɔ le i sie mɛn wunmuan’n i ndɛ. I ndɛ tre nsan klikli’n kan ninnge’m be yilɛ’n ɔ nin klɔ sran’n i fɔnlɛ’n i ndɛ. Kpɛkun i ndɛ tre kasiɛn nsan’n kusu be kan wafa nga ɔ́ wá yó mɔ klɔ sran’m bé yó kpa ekun’n i ndɛ. I ndɛ tre nga be o i afiɛn’n be kan ajalɛ nga e Min Ɲanmiɛn Zoova wá fá naan i klun sa’n w’a kpɛn su i klɔ sran o, i mɛn wunmuan’n nin o, be lika’n i ndɛ. Bo Bolɛ fluwa’n kan wafa nga Satan nin klunwi yolɛ’n be bali mɛn’n nun’n i ndɛ. Kpɛkun Sa Nglo Yilɛ fluwa’n i agualiɛ lɔ’n, ɔ kan wafa nga bé wá núnnún klunwi yolɛ’n ɔ nin mmusu’m be si Satan’n, ɔ nin wafa nga Ɲanmiɛn i klun sa’n ɔ́ wá kpɛ́n su asiɛ’n su wa kɛ ɲanmiɛn su lɔ’n sa’n i ndɛ. Nanwlɛ, Biblu’n yiyi like nga ti yɛ sa tɛ’n nin wie’n be o lɛ’n i nun. Asa ekun’n, ɔ kle wafa nga ninnge sɔ’m bé wíe mɔ be nga be nanti seiin’n bé dí aklunjuɛ mɔ bé ɲán anannganman nguan’n.

15. ?Kɛ nglo’n nin asiɛ’n i su anɔ yilɛ’n wá wíe’n, sɛ e kunndɛ kɛ é ɲɛ́n i su mmlusuɛ’n wie’n, ngue yɛ ɔ fata kɛ sran kun bɔbɔ yo ɔ?

¹⁵ Mɛn ng’ɔ o yɛ’n ɔ su cɛman kun mlɔnmlɔn. Nglo’n nin asiɛ’n i sielɛ’n i su anɔ yilɛ nga be boli i yilɛ bo lalafuɛ nun lele’n, i awieliɛ’n w’a ju. Satan su kpɛnman nzra nun yiman anɔ kun, kpɛkun Ɲanmiɛn i sielɛ’n yɛ ɔ́ ká lɛ titi ɔ. Sanngɛ sɛ e kunndɛ kɛ é ɲɛ́n i su mmlusuɛ’n naan é dí aklunjuɛ nga Ɲanmiɛn Ndɛ’n kɛn i ndɛ’n wie’n, ɔ fata kɛ e suan Zoova i atin m’ɔ le i sie nglo’n nin asiɛ’n i bo ikisa. E kwlá diman e fuka nɲɔn nun. Kɛ ɔ yo naan y’a kwla se kɛ: ‘Anannganman jin min sin’n,’ ɔ fata kɛ e kusu e jrɛn i sin.—Jue. 118:6, 7.

E kwla nanti seiin titi!

16. ?Ngue ti yɛ e si weiin kɛ e kwla suan Ɲanmiɛn bo kɛ i yɛ ɔ le atin sie nglo’n nin asiɛ’n niɔn?

¹⁶ E kwla suan Zoova bo kɛ i yɛ ɔ le atin sie mɛn wunmuan’n niɔn, afin akoto Pɔlu klɛli i kɛ: “Sa ng’ɔ tɔ amun su’n, nán amun ngunmin yɛ i kwlaa sɔ’n tɔ amun su-ɔ. E kwla fa e wla’n kwlaa guɛ i Nyanmiɛn su, afin ɔ kplin-man su kɛ sa ng’ɔ sɔn-man amun nun’n ɔ tɔ amun su. I sɔ’n ti’n, sɛ sa tɔ amun su’n, ɔ́ yó maan ɔ́ sɔ́n amun nun yɛlɛ kɛ ɔ́ yó sa nga b’ɔ maan án kwlá fíte nun’n.” (1 Kor. 10:13) ?Sa ng’ɔ tɔ e su mɔ Pɔlu kɛnnin i ndɛ’n, ɔ fin ngue, yɛ wafa sɛ yɛ Ɲanmiɛn yo maan ɔ sɔn e nun ɔn?

17-19. (a) ?Sa benin mun yɛ be tɔli Izraɛlifuɛ’m be su mɔ b’a jrɛnmɛn i ɲrun kekle aawlɛ flɛnnɛn’n nun lɔ ɔ? (b) ?Ngue ti yɛ e nanti seiin titi Zoova ɲrun ɔn, ɔ yo ye ɔ?

¹⁷ Sa nga be tɔli Izraɛlifuɛ’m be su aawlɛ flɛnnɛn’n nun lɔ’n kle kɛ “sa ng’ɔ tɔ” sran su’n, ɔ kwla yo ninnge wie mɔ be kwla yo maan e fɔn Ɲanmiɛn mmla’n. (An kanngan 1 Korɛntfuɛ Mun 10:6-10 nun.) Sɛ ɔ ti kɛ Izraɛlifuɛ’m be waan bé jrán sa ng’ɔ tɔli be su’n, be ɲrun kekle’n, nn be kwla jrannin. Sanngɛ w’a yoman sɔ. Blɛ mɔ Zoova yoli abonuan sa maan be ɲannin aoko mɔ be kwla di i lele anglo klonglo kun’n, be ɲin trannin “sa tɛtɛ’m” be su. Kannzɛ bɔɔ b’a diman nnɛn cɛn ba nɲɔn kun’n, sanngɛ Ɲanmiɛn mannin be mani naan be di. Ɔ nin i sɔ ngba’n, be yoli maan sa tɔli be su. Yɛle kɛ be konvi kpli’n maan be isali aoko’m be lele tratrali su.—Kal. 11:19, 20, 31-35.

¹⁸ Ka naan sa sɔ’n w’a ju’n, kɛ Ɲanmiɛn fá Mmla’n mán Moizi Sinai oka’n su lɔ’n, Izraɛlifuɛ’m be sɔli nannin ba, kpɛkun be yoli sa sukusuku. Kɛ mɔ sran ng’ɔ dun be ɲrun’n mɔ be ɲin tɛ i’n tuli i bo kan’n, kɛ sa’n tɔli be su’n b’a jrɛnmɛn i ɲrun kekle. (Tul. 32:1, 6) Ka naan Izraɛlifuɛ’m b’a wlu mɛn nga Ɲanmiɛn tali nda kɛ ɔ́ fá mán be’n i nun’n, Moabu bla’m be lakali Izraɛlifuɛ akpi kpanngban. Ɔ maan be tɔli sa sukusuku yolɛ’n nun. Blɛ sɔ nun’n, Izraɛlifuɛ kpanngban be wuli be sa tɛ’n i nuan. (Kal. 25:1, 9) Blɛ wie nun ekun’n, Izraɛlifuɛ’n be yoli ɲin kekle, be ijɔli be konviabo. Le kun liɛ’n be kannin Moizi ɔ nin Ɲanmiɛn bɔbɔ be wun ndɛ tɛtɛ! (Kal. 21:5) Kɛ Zoova kunnin Kɔre nin Datan nin Abiramu mɔ be ti klunwifuɛ’n, ɔ nin be sin jranfuɛ mun’n, Izraɛlifuɛ’m be ijɔli be konviabo ekun. Be seli kɛ be nunnunlɛ mɔ be nunnunnin be’n timan su, sanngɛ nn be ndɛ yoman fɛ. I sɔ’n ti’n, sran 14.700 be wuli ɲrɛnnɛn mɔ Ɲanmiɛn fa yili be su’n i nuan.—Kal. 17:6, 14.

¹⁹ Sa nga be tɔli Izraɛlifuɛ’m be su lɛ’n, i nun wie fi timan kekle sɔ liɛ mɔ sɛ be waan bé jrɛ́n i ɲrun’n, be kwlá jranman ɔn. Sɛ Izraɛlifuɛ’m be tɔli sa tɛ’n i yolɛ nun’n, ɔ fin kɛ be wla fili Zoova su, yɛ b’a lafimɛn i su kun. Be wla fili su kɛ i yɛ ɔ nian be lika ɔ, naan i atin’m be ti kpa. Kɛ nga e fa wunnin i Izraɛlifuɛ’m be su lɛ’n sa’n, sa nga be tɔ e su’n, nán e ngunmin yɛ ɔ tɔ e su ɔ. Sɛ e mian e ɲin naan e jran be ɲrun kekle’n, naan e fa e wla gua Ɲanmiɛn su’n, é kwlá nánti seiin titi. “E kwla fa e wla’n kwlaa guɛ i Nyanmiɛn su, afin ɔ kplin-man su kɛ sa ng’ɔ sɔn-man [e] nun’n ɔ tɔ [e] su.” Zoova su yiman e blo le, ɔ maan sa ng’ɔ si kɛ sɛ ɔ tɔ e su’n e su kwlá yomɛn i klun sa’n, ɔ su kplinman su kɛ ɔ tɔ e su.—Jue. 94:14.

20, 21. ?Kɛ sa tɔ e su’n wafa sɛ yɛ Ɲanmiɛn yo maan ɔ ‘sɔn e nun’ ɔn?

²⁰ Zoova man e wunmiɛn naan sa nga be tɔ e su’n b’a “sɔn e nun.” I wie yɛle kɛ e ɲrɛnnɛn klefuɛ’m be kwla kle e ɲrɛnnɛn lele naan e yaci Ɲanmiɛn su lafilɛ. I sɔ ɲrɛnnɛn mɔ be kle e’n, maan e kwla yo like wie naan b’a yaci e bolɛ, annzɛ naan b’a kleman e ɲrɛnnɛn lele b’a kunman e. Sɛ e jran ndɛ nga Pɔlu kɛnnin i 1 Korɛntfuɛ Mun 10:13 nun su’n, e si kɛ sa nga be tɔ e su’n be su cɛman. Zoova su kplinman su kɛ sa sɔ’n ɔ tin e su lelee naan w’a sɔnman e nun kun naan i ti’n y’a yaci i sulɛ. Ɲanmiɛn kwla yo maan e Ɲanmiɛn sulafilɛ’n i bo’n wla ase kpa naan y’a ɲan fanngan y’a nanti seiin titi.

²¹ Zoova fɛ i wawɛ’n fa suan e bo. Ɲanmiɛn i wawɛ sɔ’n ɔ yo maan e wla kpɛn Biblu’n nun ndɛ nga be kwla uka e naan sa sɔ’n w’a sɔn e nun’n be su. (Lik 24:49) Ɔ maan like fi su lakaman e naan y’a fa ajalɛ tɛ. I wie yɛle kɛ atin nga Zoova le i sie nglo’n nin asiɛ’n, ɔ nin klɔ sran’m be seiin nantilɛ’n i cinnjin m’ɔ ti’n, i su ndɛ’n, e wun be wlɛ. Kɛ mɔ Ɲanmiɛn i sufuɛ sunman be wunnin i sɔ’n i wlɛ’n, ɔ nin ukalɛ mɔ Ɲanmiɛn ukali be’n ti’n, be ɲannin fanngan be nantili seiin lele be fa wuli. Sanngɛ nán wie m’ɔ kunnin be’n i ti yɛ é sé kɛ ɔ sɔnnin be nun ɔn. Afin Zoova m’ɔ suannin be bo’n yɛ maan be trali be awlɛn lele naan b’a tɔman sa tɛ yolɛ’n nun ɔn. Ɔ kwla yo i kunngba’n man e wie. I kpa bɔbɔ’n, Ɲanmiɛn fɛ i anzi mun fa nian e su. I ti yɛ Biblu’n se kɛ: “?W’a sunman-man be kɛ be w’a nian be nga bé wá nyán be ti’n be su?” (Ebr. 1:14) Kɛ nga é wá wún i like suanlɛ ng’ɔ́ bá lɛ’n i nun sa’n, saan be nga be nanti seiin’n yɛ bé kwlá súan Ɲanmiɛn i sielɛ’n i bo tititi ɔ. Sɛ e fa e wun mantan Zoova kɛ i yɛ ɔ ti e siefuɛ’n kpa’n, yɛ é kwlá trán be nun wie ɔ.

?Amún tɛ́ su sɛ?

• ?Ngue ti yɛ ɔ fata kɛ e si kɛ Zoova yɛ ɔ le atin sie mɛn wunmuan’n niɔn?

• ?Kɛ be se kɛ be nanti seiin Ɲanmiɛn ɲrun’n, i bo’n yɛle benin?

• ?Ngue yɛ ɔ kle kɛ ɔ ka kaan sa’n Zoova wá klé kɛ i yɛ ɔ sie nglo’n nin asiɛ’n niɔn?

• ?Wafa sɛ yɛ 1 Korɛntfuɛ Mun 10:13 kle kɛ e nanti seiin ɔ yo ye ɔ?