Amun yaci sa nga amun wiengu yo amun’n cɛ i

“Sɛ sran kun yo i wiengu sa’n, maan ɔ yaci cɛ i.”​—KOL. 3:13.

?WAFA SƐ YƐ AMÚN TƐ́ KOSAN NGA’M BE SU Ɔ?

?Ngue ti yɛ ɔ fata kɛ e yaci sa cɛ klun ufue su ɔ?

?Sunnzun ase benin yɛ Zezi fali naan w’a kle kɛ sa yaci cɛlɛ’n ti cinnjin ɔn?

?Kɛ e yaci sran’m be wun sa cɛ be’n, ye benin yɛ e di ɔ?

1, 2. ?Ngue ti yɛ sa yaci cɛlɛ’n kwla yo kekle man e ɔ?

KƐ E yo sa tɛ’n, wafa nga Zoova i wun fa yo i’n, ɔ nin wafa nga ɔ bu sa tɛ’n bɔbɔ ba’n, Biblu’n yiyi be nun kle e. Asa ekun’n, ɔ kle e sa yaci cɛlɛ’n su ninnge kpanngban wie. Like suanlɛ ng’ɔ sinnin lɔ’n nun’n, e wunnin i kɛ wafa nga Davidi nin Manase be yoli’n ti’n, Zoova yacili be wun sa’n cɛli be. Afin kɛ be yoli sa tɛ’n, ɔ yoli be nsisɔ, yɛ be koko kleli i. Kpɛkun be tuli be klun be kacili be nzuɛn’n. I sɔ’n ti’n, Zoova i klun wa jɔli be wun ekun.

² ?Yɛ e li, sɛ e osufuɛ wie yɛ Manase kunnin i’n, ɔ́ yó e sɛ? ?É kwlá yáci e cɛ́ i? Ɔ kwla yo kekle man e andɛ. Afin mɛn nga e o nun yɛ’n nun’n, sran’m be buman Ɲanmiɛn mmla’n i like fi, be klo nzaje sa yolɛ, yɛ be bu be bɔbɔ be ngunmin be wun akunndan. ?Sanngɛ, ngue ti yɛ ɔ fata kɛ e suan sa yaci cɛlɛ ɔ? ?Yɛ sɛ be yo e sa ya’n, annzɛ be bu e lufle’n, wafa sɛ yɛ e kwla tra e awlɛn ɔn? ?Yɛ wafa sɛ yɛ é yó naan kannzɛ bɔbɔ be yo e sa tɛ’n, y’a kwla yo like nga Zoova klo’n, naan y’a yaci y’a cɛ klun ufue su ɔ?

SA NGA TI M’Ɔ FATA KƐ E YACI SA CƐ’N

3-5. (a) ?Kɛ ɔ ko yo naan Zezi w’a kle i ndɛ tiefuɛ’m be kɛ ɔ ti cinnjin kɛ be yaci sa cɛ’n, sunnzun ase benin yɛ ɔ fali ɔ? (b) ?Afɔtuɛ benin yɛ Zezi i sunnzun ase sɔ’n man e ɔ?

³ Sran kwlaa ng’ɔ yo e sa’n, maan ɔ yo e niaan Klistfuɛ annzɛ sran uflɛ o, ɔ fata kɛ e yaci e cɛ i klun ufue su. Sɛ e yo sɔ’n, ndɛnnganndɛnngan su tranman e nin e awlobofuɛ mun, nin e janvuɛ mun, ɔ nin sran onga mun e afiɛn. Yɛ e nin Zoova e afiɛn’n ɔ́ sɛ́ wie. Ɲanmiɛn Ndɛ’n waan kannzɛ sran’m bé ló e ngasi sɛ, sanngɛ ɔ fata kɛ e yaci e cɛ be klun ufue su, naan i sɔ’n ti Klistfuɛ’m be mmla. Kɛ ɔ ko yo naan y’a wun i wlɛ kɛ i sɔ yolɛ’n ti su’n, Zezi fali sunnzun ase kun. Sunnzun ase sɔ’n nun’n, ɔ kannin junman difuɛ kun mɔ kalɛ wo i su’n i ndɛ.

⁴ Junman difuɛ sɔ’n, i min’n i sika ng’ɔ o i su’n sɔnnin kpa. Ɔ maan sɛ i waan ɔ́ dí junman naan w’a yi i sɔ sika’n, ɔ fata kɛ ɔ di junman cɛn ba lele akpinngbin 60. Sanngɛ i min’n yacili kalɛ sɔ’n cɛli i. I sin’n, junman difuɛ sɔ’n nin i wiengu junman difuɛ kun mɔ i denie 100 cɛ wo i su’n be yiali. Denie 100 ti cɛn ba 100 junman’n i ti akatua. I wiengu’n kotoli i bo srɛli i kɛ ɔ minndɛ kan naan ɔ yo’n, ɔ ko yi i sika’n ko mɛn i. Sanngɛ, w’a kplinman su, ɔ ko wlɛli i bisua. Kɛ be min’n tili ndɛ sɔ’n, w’a yomɛn i fɛ mlɔnmlɔn. Ɔ seli i kɛ: “?Kɛ n sili wɔ aunnvuɛ’n [...] a kwlá si-man ɔ wiengu’n i aunnvuɛ wie? I min’n fɛli i wun ya, ɔ maan be kleli i nyrɛnnɛn lele saan ɔ wieli i kalɛ sɔ’n kwlaa tua.”​—Mat. 18:21-34.

⁵ ?Afɔtuɛ benin yɛ Zezi i sunnzun ase sɔ’n man e ɔ? I bɔbɔ guɛli i ndɛ’n bo seli kɛ: “Sɛ an yaci-man amun wiengu’m be sa bɔ be yo amun’n cɛ-man be amun klun-ufue su’n, kɛ min Si b’ɔ o nyanmiɛn su lɔ’n ɔ́ wá yó amun sɔ-ɔ.” (Mat. 18:35) I yo, kɛ e bu fɔnlɛ nga e fɔn Zoova i wun’n e nguan cɛn’n nun’n i akunndan’n, e wun i wlɛ kɛ sɛ bɔbɔ e mian e ɲin’n, sanngɛ e kwlá nantimɛn i mmla’m be su kpa kɛ ɔ nin i fata’n sa. Sanngɛ, ɔ nin i sɔ ngba’n, ɔ yaci e wun sa mun cɛ e klun ufue su. Yɛ ɔ boman be su diman jɔlɛ kun. Ɔ maan, sran kwlaa ng’ɔ kunndɛ kɛ ɔ́ yó Zoova i janvuɛ’n, ɔ nin i fata kɛ ɔ yaci sa nga be yo i’n cɛ. I sɔ’n yɛ kɛ Zezi íjɔ Oka’n su lɔ’n, ɔ kannin ɔn. Ɔ seli kɛ: “Sɛ an yaci sa nga sran’m be yo amun’n cɛ be’n, amun Si b’ɔ o nyanmiɛn su lɔ’n, i kusu ɔ́ yáci amun liɛ’n cɛ amun. Sanngɛ sɛ an yaci-man sa nga sran’m be yo amun’n cɛ-man be’n, amun Si kusu su yaci-man amun liɛ’n cɛ-man amun.”​—Mat. 6:14, 15.

6. ?Ngue ti yɛ sa yaci cɛlɛ’n timan pɔpɔ titi ɔ?

⁶ Zezi i afɔtuɛ sɔ’n kwla yo e klanman. Sanngɛ i su falɛ’n kwla yo kekle man e. Sa nga ti yɛ ɔ ti sɔ’n yɛle kɛ, kɛ be yo e sa’n, e awlɛn’n be e klun, yɛ e kunndɛ kɛ é tú e klunngbɔ. Wie’m be se kɛ sa nga be yoli be’n, be yaci cɛ ɔ, ɔ yoman ye. ?Sɛ ɔ yo e sɔ wie’n, wafa sɛ yɛ e kwla suan sa yaci cɛlɛ kɛ Zoova klo’n sa ɔ?

LIKE NGA TI YƐ SA NGA BE YOLI E’N YO E YA’N, MAAN E BU I SIN

7, 8. ?Sɛ e wiengu kun loli e ngasi’n, ngue yɛ ɔ kwla uka e naan y’a yaci i wun sa’n y’a cɛ i ɔ?

⁷ Wie liɛ’n kɛ be yo e tɛ’n annzɛ kɛ ɔ yo e kɛ b’a yo e tɛ’n, ɔ kwla lo e ngasi. Kɛ cɛn kun gbanflɛn kun fali ya’n, sa ng’ɔ bɛli i sin’n, ɔ kɛn i ndɛ seli kɛ: “Min awlɛn m’ɔ be min klun’n ti’n, n fiteli. Yɛ n fuali kɛ min ja su kpɛnman awlo lɔ kun le. Blɛ sɔ nun’n, e o wawa’n nun. Kɛ ń nánti ń kɔ́’n, n wun i kɛ atin’n ti klanman, kpɛkun lika’n ti diin. Kɛ ɔ yoli kan’n, min wla’n wa guali ase. Ɔ maan, lele mɔ ń fá sá min sin’n, ya dan nga n fali’n, ɔ wa yoli min nsisɔ, yɛ m ma jɔli sa flɔlɔɔ.” Gbanflɛn sɔ’n i ndɛ’n kle kɛ, kɛ sa kun lo e ngasi’n, maan e gua e wla ase, naan e bu akunndan. I liɛ’n e su kanman ndɛ annzɛ e su yoman sa wie m’ɔ́ kwlá yó e nsisɔ ɔ.​—Jue. 4:5; Nya. 14:29; Zak 1:19, 20.

⁸ ?Yɛ sɛ e yo i kwlaa sɔ’n sanngɛ e ya’n kanman ase’n nin? Sa nga ti mɔ sa sɔ’n te yo e ya’n, maan e kunndɛ i bo’n. ?Be buli e lufle annzɛ be wɔli e safle ti ɔ? ?Annzɛ kɛ mɔ e bu i kɛ sran’n i ɲinfu yɛ ɔ yoli e like’n ti ɔ? ?Sa’n i bɔbɔ ba’n ti sa mɔ be kwlá yaci cɛman ti ɔ? Sɛ e bu like nga ti yɛ e ya’n kanman ase’n i akunndan’n, i sɔ’n úka e naan y’a wun Biblu’n nun ndɛ nga é nánti su’n, naan y’a si like ng’ɔ fata kɛ e yo’n. (An kanngan Nyanndra Mun 15:28 ɔ nin 17:27 nun.) Yɛ sɛ e bu su akunndan kpa’n, ɔ́ úka e wie naan y’a kwla yaci sa nga be yoli e’n y’a cɛ klun ufue su. Kɛ ya’n wo e klun’n, ɔ timan pɔpɔ kɛ e gua e wla ase naan e bu akunndan. Sanngɛ sɛ e mian e ɲin e gua e wla ase naan e bu akunndan’n, e kwla man Ɲanmiɛn Ndɛ’n i atin naan ‘ɔ si e klun akunndan’n, ɔ nin e klun sa’n.’ Kpɛkun ɔ́ úka e naan y’a sɔnnzɔn Zoova i sran sa yaci cɛlɛ’n.​—Ebr. 4:12.

MAAN E BU E WIENGU M’Ɔ YOLI E SA’N, I AKUNNDAN

9, 10. (a) ?Sɛ be lo e ngasi’n, ngue yɛ ɔ fata kɛ e yo ɔ? (b) ?Sɛ be yo e sa naan e faman ya ndɛndɛ’n, naan e klo kɛ é yáci sran’n i wun sa’n cɛ́ i klun ufue su’n, ye benin yɛ é ɲɛ́n i ɔ?

⁹ Sa nga be kwla kun e ya’n, be diman be yalɛ. Sa sɔ’m be nun kun yɛ: Wienun ɔn e su cisan loto nun é kɔ́ lika, kpɛkun sran kun w’a fɛ i loto liɛ’n w’a si e liɛ’n. ?Ngue yɛ é yó ɔ? Sran wie’m be liɛ’n, be yili be ya’n i nglo, ɔ maan be kpɛli be wiengu kun’n i nzowa. Sanngɛ e liɛ’n, kɛ mɔ e ti Klistfuɛ ti’n e su yoman sɔ wie.

¹⁰ Sɛ sa kɛ ngalɛ’n sa ju e su’n, maan e dun mmua bu i sin ka naan y’a ijɔ annzɛ y’a fa ajalɛ wie. Afin, atrɛkpa’n e bɔbɔ ti yɛ ɔ sili e ɔ. Kɔlɛ, blɛ sɔ nun’n nn e akunndan’n o lika uflɛ. I sɔ’n ti’n, y’a nianman atin’n i kpa. Sran ng’ɔ fɛ i loto’n sili e kusu’n, kɔlɛ nɛ́n i ɲinfu ɔ. Afin, atrɛkpa’n, i loto’n nun like wie wa sacili. I ti yɛ ɔ wa sili e loto liɛ’n niɔn. I kwlaa nga e wun i lɛ’n, ɔ kle kɛ sɛ be yo e sa’n, naan e bu akunndan e wun like nga ti yɛ sran’n yoli sɔ’n i wlɛ’n, yɛ sɛ e klo kɛ é yáci i wun sa’n cɛ́ i sakpa’n, e ya’n kán ase. Akunndanfuɛ’n 7:9 waan: “Nán fa ya ndɛndɛ. Afin sinnglinfuɛ yɛ i anwlɛn’n ɔ ti fufu-ɔ.” Ɔ maan, e wiengu ng’ɔ yo e sa’n, maan e bu i akunndan. Afin, kpɛ sunman, nán kɛ sran’n bu e wun akunndan tɛ ɔ. Kɔlɛ y’a timan e wun aniɛn. Asa kusu, fɔ m’ɔ o e nun’n kle e ngba e yalɛ. Ɔ maan nán e kpli e se kɛ ɔ bu e wun akunndan tɛ ti yɛ ɔ yoli sɔ ɔ. Maan e yaci sa ng’ɔ yoli’n cɛ i klun ufue su. Sɛ e yo sɔ’n, é dí aklunjuɛ.​—An kanngan 1 Piɛr 4:8 nun.

‘MAAN AMUN ALAJE’N SƐ I SIN AMUN SU’

11. ?Kɛ é bó jasin fɛ’n, é yó sɛ naan y’a kwla di alaje titi?

¹¹ ?Sɛ é bó jasin fɛ’n, naan sran kun ijɔ e tɛtɛ’n, wafa sɛ yɛ e kwla tra e awlɛn ɔn? Kɛ Zezi sunmannin i sɔnnzɔnfuɛ 70a mun kɛ be ko bo jasin fɛ’n, ɔ seli be kɛ awlo kwlaa nga be wlu nun’n, maan be se kɛ alaje tran awlo sɔ’n nun. Yɛ ɔ kan kleli be kɛ: “Sɛ sran wɛtɛɛfuɛ wie o awlo sɔ nun’n, maan ɔ nyan alaje, sanngɛ sɛ i sɔfuɛ nun-man lɛ’n, nán maan amun nuan yralɛ’n yo ye.” [‘ɔ́ sɛ́ i sin amun su.’ Anuãsɛ Fuflɛ] (Lik 10:1, 5, 6) Kɛ e bo jasin fɛ’n, mɔ sran’m be tie e ndɛ’n kpa’n, ɔ yo e fɛ. Afin jasin fɛ sɔ’n ti’n, bé kwlá dí ye. Sanngɛ, nán sran’m be ngba yɛ be sɔ e nun klanman ɔn. ?I sɔ’n ti’n, ngue yɛ ɔ fata kɛ e yo ɔ? Zezi seli kɛ, sɛ ɔ ti sɔ’n, maan e alaje’n ɔ sɛ i sin e su. Yɛle kɛ, awlo kwlaa nga e wlu nun’n, sɛ sran’m be sɔ e nun kpa o, sɛ b’a sɔman e nun kpa o, kɛ é jáso lɔ’n, ɔ nin i fata kɛ e di alaje. Sanngɛ, sɛ sran’m b’a sɔman e nun klanman’n, naan i ti’n e fa ya’n, e su kwlá diman alaje.

12. ?Kɛ nga Pɔlu fa kɛnnin i Efɛzfuɛ Mun 4:31, 32 nun sa’n, sɛ be yo e sa’n, ngue yɛ ɔ fata kɛ e yo ɔ?

¹² Nán jasin fɛ’n bolɛ nun ngunmin yɛ ɔ fata kɛ e mian e ɲin naan y’a di alaje ɔ. Ɔ nin i fata kɛ sa kwlaa nun’n, e di alaje. Kɛ be se kɛ e yaci sa cɛ klun ufue su’n, nɛ́n i yɛle kɛ kannzɛ sran’m be yo sa tɛ’n, e se kɛ b’a yoman like fi annzɛ e blu sa sɔ’n su. Sanngɛ, i bo’n yɛle kɛ, e su faman sa sɔ’n e sieman e klun lele naan e alaje’n w’a fi e sa. Sran wie’m be fa sa nga be yo be’n fa sie be klun. I ti’n, be diman aklunjuɛ. Sanngɛ e liɛ’n, nán maan e yo i sɔfuɛ. Nán amun wla fi su kɛ sran nga klunngbɔ o i klun’n, ɔ di alaje ɔ ɔ yoman ye. I sɔ’n ti’n, maan e yaci sran’m be wun sa cɛ be.​—An kanngan Efɛzfuɛ Mun 4:31, 32 nun.

SƐ BE YO E SA’N, MAAN E YO KƐ ZOOVA KLO’N SA

13. (a) ?Wafa sɛ yɛ Klistfuɛ kun kwla fa ‘sɛnmlɛn nyannyannyan tiɛn i nuan’ i kpɔfuɛ’m be ti su ɔ? (b) ?Sɛ sran’m be kan e ndɛ tɛ naan e tɛ be su amanniɛn su’n, i bo’n kwla gua sɛ?

¹³ Wie liɛ’n, kɛ sran’m be yo e tɛ’n, e kunndɛ kɛ é úka be naan be wun i wlɛ kɛ Biblu’n nun mmla mɔ Klistfuɛ’m be fa su’n, be ti kpa. Akoto Pɔlu klɛli i kɛ: “‘Sɛ awe kun ɔ kpɔfuɛ’n, mɛn i like maan ɔ di. Sɛ nzue we kun i’n, mɛn i nzue maan ɔ nɔn. Afin sɛ a yo sɔ’n, ɔ ti kɛ sɛnmlɛn nyannyannyan yɛ w’a tiɛn i nuan i ti su sa.’ Nán maan be nga be yo amun tɛ’n be kwla amun, sanngɛ an yo be kpa lele an kwla be.” (Rɔm. 12:20, 21) Sɛ sran’m be kan e ndɛ tɛ, naan e liɛ’n, e tɛ be su amanniɛn su’n, i sɔ’n kwla yo naan b’a lo be wun, naan b’a yi be nzuɛn kpa’n i nglo e lika. Sɛ e bu be wun akunndan kpa’n, naan e si be aunnvuɛ’n, atrɛkpa’n, bé kwlá kúnndɛ kɛ bé súan Biblu’n nun like. Yɛ sa nga ti yɛ e nzuɛn’n ti kpa sɔ’n, bé kwlá kúnndɛ kɛ bé sí i bo.​—1 Piɛ. 2:12; 3:16.

14. ?Kannzɛ bɔbɔ be yoli e tɛ kpa’n, sanngɛ ngue ti yɛ ɔ fataman kɛ e fa sie e klun ɔn?

¹⁴ Sran wie’m be o lɛ’n, ɔ nin i fataman kɛ e mantan be. Be nun wie yɛle Klistfuɛ nga be yoli sa tɛ, mɔ b’a kaciman be nzuɛn’n, mɔ i ti’n be wa tuli be asɔnun’n nun’n. Sɛ i sɔ sran’m be nun kun yoli e tɛ’n, kɛ ɔ ko yo naan e yaci e cɛ i’n, ɔ kwla yo kekle kpa man e. Kannzɛ bɔbɔ, w’a kaci i nzuɛn’n, sanngɛ atrɛkpa’n, sa ng’ɔ yoli e’n te yo e ya kpa. Sɛ ɔ ti sɔ’n, maan e srɛ Zoova kɛ ɔ uka e naan e tu e klun e yaci sran sɔ’n i wun sa’n e cɛ i. I sɔ yolɛ’n ti cinnjin. Afin like ng’ɔ wo sran ng’ɔ yoli e sa’n i klun’n, e simɛn i. Sanngɛ Zoova liɛ’n ɔ si i. Afin, ɔ si klɔ sran’m be klun lɔ akunndan’n. Yɛ ɔ trɛ i awlɛn sa tɛ yofuɛ’m be wun. (Jue. 7:10; Nya. 17:3) I sɔ’n ti yɛ Ɲanmiɛn Ndɛ’n se e kɛ: “Sɛ sran yo amun tɛ’n, nán an yo i wie. Sa kwlaa nga amun yo’n, an yo maan sran’m be kwlaa be wun kɛ an ti kpa. Like kwlaa nga amun kwla yo bɔ amun nin sran su kan-man ndɛ’n, amun yo. N sran kpa mun, nán amun se kɛ amun bɔbɔ amún tú amun klunngbɔ’n, sanngɛ an yaci man Nyanmiɛn, afin be klɛli i kɛ: ‘E Min’n se kɛ: “Min yɛ n tu klunngbɔ nin-ɔn, min yɛ ń túa be kalɛ-ɔ.”’” (Rɔm. 12:17-19) E kwlá diman e wiengu’m be jɔlɛ kɛ ɔ nin i fata’n sa. (Mat. 7:1, 2) Sanngɛ Ɲanmiɛn liɛ’n, e kwla lafi su kɛ ɔ kwlɛ i sɔ yo.

15. ?Kɛ sran’m be yo e tɛ’n, ngue yɛ ɔ fata kɛ e wun i wlɛ ɔ?

¹⁵ Kɛ be bu e lufle’n, ɔ yoman e fɛ. Asa’n, kɛ sran kun yo e sa mɔ kasiɛn ɔ wa kpata e’n, ɔ kwla yo kekle man e kɛ e sɔ i ngbata’n nun. Sanngɛ ɔ fata kɛ e wun i wlɛ kɛ sran ng’ɔ yoli e sa’n, afɛ’n wo i su. Yɛle kɛ, fɔ m’ɔ o klɔ sran’m be nun’n, ɔ kle i yalɛ wie. (Rɔm. 3:23) Zoova si klɔ sran’m be kwlaa be aunnvuɛ. I sɔ’n ti’n, ɔ nin i fata kɛ e srɛ Ɲanmiɛn e man sran ng’ɔ yo e tɛ’n. Amun bɔbɔ amun nian ?Sɛ e srɛ Ɲanmiɛn e man sran’n, e kwla fɛ i wun ya ekun? Cɛcɛ. Asa ekun’n, Zezi kannin ndɛ kun m’ɔ kle kɛ kannzɛ sran yo e tɛ sɛ’n, ɔ fataman kɛ e fa sie e klun. Ɔ seli kɛ: “Be nga be yo amun tɛtɛ bɔ be kle amun yalɛ’n, an srɛ Nyanmiɛn kɛ ɔ yo be kpa.”​—Mat. 5:44.

16, 17. ?Sɛ asɔnun kpɛnngbɛn’m be wun i kɛ sran kun w’a kaci naan ɔ sɛ i sin asɔnun’n nun ekun’n, ngue yɛ ɔ fata kɛ e yo ɔ? ?Yɛ ngue ti yɛ ɔ fata kɛ e yo sɔ ɔ?

¹⁶ Zoova waan sɛ sran kun yo sa tɛ kpa asɔnun’n nun’n, be fa ndɛ’n wɔ asɔnun kpɛnngbɛn’m be ja su naan be siesie. Ɔ ti su kɛ aniaan sɔ’m be kwlá wunman sa’m be bo kpa kɛ Zoova sa. Sanngɛ, be lo be wun be man Ɲanmiɛn i wawɛ’n. kpɛkun be mian be ɲin naan wafa nga Ɲanmiɛn Ndɛ’n waan be siesie ndɛ’n, be nian su yo. Ɔ maan, kɛ mɔ be srɛli Zoova kɛ ɔ uka be’n ti’n, e kwla lafi su kɛ ajalɛ nga be fali’n ti Zoova liɛ’n su.​—Mat. 18:18.

¹⁷ ?Sɛ asɔnun kpɛnngbɛn’m be wun i kɛ sran’n w’a kaci i nzuɛn’n naan ɔ sɛ i sin asɔnun’n nun ekun’n, é yó i sɛ? ?É yáci sran’n i wun sa’n e cɛ́ i, yɛ é sɔ́ i nun klolɛ su? (2 Kor. 2:5-8) I sɔ yolɛ’n timan pɔpɔ. I li sɛ e bɔbɔ yɛ sran’n yoli e sa’n, annzɛ sɛ e osufuɛ wie yɛ ɔ yoli i sa’n, yɛ ɔ ti kekle kpa’n niɔn. Sanngɛ, sɛ e fa e wla gua Zoova su’n, naan e lafi su kɛ wafa ng’ɔ siesie ninnge mun asɔnun’n nun’n, ɔ ti su’n, é yó sa kpa. Yɛle kɛ é yáci sran’n i wun sa cɛ́ i klun ufue su.​—Nya. 3:5, 6.

18. ?Kɛ e yaci sran’m be wun sa cɛ be’n, ye benin yɛ e di ɔ?

¹⁸ Dɔɔtrɔfuɛ’m be kan kɛ sɛ be yo e sa naan e waan e yaci cɛman’n, ɔ timan kpa. Afin i sɔ’n kwla man e tukpaciɛ, kpɛkun e nin e wiengu mun e kwlá timan e wun aniɛn. Sanngɛ, sɛ e yaci sa e cɛ’n, klunngbɔ’n su kunman e. Asa ekun’n, e nin sran mun é trán klanman. Yɛ ye dan nga é dí’n yɛle kɛ e nin e Si Zoova, e afiɛn’n ɔ́ sɛ́.​—An kanngan Efɛzfuɛ Mun 4:32 ɔ nin Kolɔsfuɛ Mun 3:12, 14 nun.

[Ja ngua lɛ ndɛ’n]

[Foto, bue 29]

?Afɔtuɛ benin yɛ Zezi i sunnzun ase’n man e ɔ?

[Foto, bue 32]

Sran wun sa yaci cɛlɛ klun ufue su’n, ɔ ti Klistfuɛ’m be mmla.