NDƐ NG’Ɔ O FLUWA’N SU’N: E KWLA WUN E WUN FƐ

?E kwla wun e wun fɛ sakpa?

“Sɛ be waan y’a cɛ o, wuun y’a di afuɛ ableso. Be nga be lɛ wunmiɛn kpa’n be kwla di afuɛ ablaɔcuɛ. Sanngɛ afɛ nin nyrɛnnɛn ngunmin yɛ e wun i ɔ.”​—Jue Mun 90:10.

ƝANMIƐN ndɛ sɔ’n, ɔ ti nanwlɛ weiin! Mɛn nga é dí i yɛ’n, ɔ ti “afɛ nin nyrɛnnɛn” ngunmin. Ɔ maan atrɛkpa’n, amun a usa amun wun le kɛ: ‘?N kwla wun min wun fɛ le?’

Maan e kan bla kun mɔ be flɛ i Maria i ndɛ e nian. Ɔ le afuɛ 84 yɛ ɔ te si ngwlɛlɛ. Laa’n, ɔ yoli bla wakawakafuɛ. Sanngɛ siɛn’n, ɔ leman wunmiɛn kun. ?I lɛ nun’n, ɔ kwla se kɛ ɔ wun i wun fɛ?

Atrɛkpa’n, amun se kɛ amun kwlá wunman amun wun fɛ le. Afin wienun ɔn, aklunfian junman yɛ amun di ɔ. Sanngɛ amun lemɛn i yowlɛ. Wie liɛ’n, amun tu amun klun di junman’n. Sanngɛ be bumɛn i like naan se kɛ bé yó amun mo. Sɛ junman kpa wie kusu yɛ amun di naan amun le ɲrun’n, kɛ mɛn’n fa ti’n i su sa mɔ be ju’n ti’n, cɛn kwlaa amun tran akluntitiɛ. Afin sa kwla ɲan amun. Wie kusu ɔ, ɔ yo amun kɛ be buman amun wie. Amun ɲrun yo amun koun yɛ amun tran awlaboɛ. Wie liɛ kusu’n, ndɛnngan’n wo amun awlo’n nun sa trilili. Annzɛ kusu’n, amun sran kpa wie ɔ kpɛ co wu. I wie yɛle bian kun mɔ be flɛ i Andre i liɛ’n. Ɔ nin i si’n be tran be tranlɛ klanman cɛ. Kpɛkun cɛn kun be o lɛ’n, i si’n wa tɔ tukpacɛ. Tukpaciɛ sɔ’n yoli i wie. Kɛ ɔ yoli sɔ’n, Andre i wla boli i wun dan. Ɔ buli i kɛ ɔ su fiteman nun le.

Kɛ sa tɔ e su’n, kosan nga e fa usa e wun yɛle kɛ: ?Sran kwla wun i wun fɛ sakpa? Bian kun i mɛn dilɛ’n tɛ kosan sɔ’n su man e. Bian sɔ’n yɛle Zezi Klist. Ɔ bali asiɛ’n su wa’n, w’a di i liɛ afuɛ 2.000. Sa fanunfanun be tɔli i su sanngɛ ɔ wunnin i wun fɛ. Sɛ e niɛn i ajalɛ’n su’n, e kwla wun e wun fɛ wie.

[Foto, bue 3]