BIBLU’N I SU KOSAN’M BE SU TƐLƐ

?Wan mun yɛ bé kɔ́ ɲanmiɛn su ɔ? ?Ngue yɛ bé kó yó ɔ?

Sran kpanngban kpa be lafi su kɛ sɛ be wu’n, bé kɔ́ ɲanmiɛn su. Afin Zezi seli i akoto mun kɛ bé kɔ́ ɲanmiɛn su. Kwlaa naan b’a kun i’n, ɔ seli kɛ ɔ́ kó síesíe lika i Si wun lɔ mán be.​—An kanngan Zan 14:2 nun.

?Ngue ti yɛ bé cɛ́n sran mun kɛ be ko tran ɲanmiɛn su lɔ ɔ? ?Ngue yɛ bé kó yó ɔ? Zezi seli i akoto mun kɛ bé kó dí famiɛn. Bé síe sran mun asiɛ’n su wa.​—An kanngan Lik 22:28-30 nin Sa Nglo Yilɛ 5:10 nun.

?Sran kpa’m be kwlakwla bé kɔ́ ɲanmiɛn su?

Nvle sunman nun’n, sran akpasua kaan kun yɛ ɔ sie nvle’n niɔn. I kunngba’n yɛle be nga bé kɔ́ ɲanmiɛn su’n, b’a sɔnman. (Lik 12:32) Biblu’n bo be mɔ be nin Zezi bé dí famiɛn’n, be nuan.—An kanngan Sa Nglo Yilɛ 14:1 nun.

Nán be nga bé kɔ́ ɲanmiɛn su’n be ngunmin yɛ be liɛ su ti ye ɔ. Afin asiɛ’n wá sɛ́ i sin káci lika klanman. Yɛ sran kpa nga be lo be wun man Zezi kɛ ɔ sie be’n, bé trán su tititi. (Zan 3:16) Kɛ mɛn tɛ nga wá núnnún’n, be su wuman wie. Bé trán asiɛ mɔ wá káci lika klanman’n su. Sran kpa nga be wuli naan mɛn’n i awieliɛ’n w’a ju’n, mɛn klanman nun lɔ yɛ bé cɛ́n be ɔ.​—An kanngan Jue Mun 37:29 nin Zan 5:28, 29 nun.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 8 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.pr418.com

[Foto, bue 32]

Zezi ko siesieli i sɔnnzɔnfuɛ wie’m be tranwlɛ ɲanmiɛn su lɔ. ?A si like nga bé kó yó i lɔ?