Gbanflɛn annzɛ talua, fa ajalɛ ng’ɔ su yoman ɔ nsisɔ’n
“Gbanflɛn mun o, talua mun o, [...] amun bo flɛ Anannganman.”—JUE. 148:12, 13.
?AMUN KWLA YIYI NUN?
?Ngue yɛ dɔ nga su a kwla yo naan cɛn wie lele’n, w’a kwla yo ninnge fanunfanun Zoova i sulɛ’n nun ɔn?
?Ngue yɛ aniaan gbanflɛn nin talua wie’m be yoli naan b’a kwla tu be klun b’a su Zoova ɔ?
?Biblu’n nun ndɛ benin yɛ be kwla uka wɔ naan w’a fa ajalɛ kpa ɔ?
1. ?Ngue yɛ gbanflɛn nin talua sunman be yo i aklunjuɛ su andɛ ɔ?
BLƐ nga e o nun yɛ’n ti i liɛ ngunmin. Afin sran kpanngban kpa be ba Zoova sulɛ. Be fin mɛnmɛn nin nvlenvle kwlaa nun yɛ be ba ɔ. (Ngl. 7:9, 10) Be nga be yia be’n, be nun kpanngban be ti gbanflɛn nin talua. Aklunjuɛ su’n, be yia be kɛ be wa fa “nzue ng’ɔ man nguan’n.” (Ngl. 22:17) Be kle be Biblu’n nun like naan be nanti ye. Gbanflɛn nin talua sɔ’m be nun wie’m be suan nvle uflɛ nun aniɛn. Kpɛkun be bo jasin fɛ’n juejue su aniɛn sɔ’m be nun. (Jue. 110:3; Eza. 52:7) ?Ngue yɛ ɔ fata kɛ a yo naan w’a yo kɛ be sa ɔ?
2. ?Ngue yɛ ɔ kle kɛ Zoova kunndɛ kɛ ɔ́ mán gbanflɛn nin talua’m be junman ɔn? An fa Timote i su ndɛ’n be yiyi nun. (An nian desɛn ng’ɔ o kan like suanlɛ’n bo i bo lɛ’n.)
2 Gbanflɛn annzɛ talua, ajalɛ nga á fá be naan cɛn wie lele w’a ɲan atin a di Ɲanmiɛn junman’n, fa be ikisa. I sɔ yɛ Timote m’ɔ ti Listrifuɛ’n, ɔ yoli ɔ. Ɔ fali ajalɛ kpa wie mun. Ɔ maan kɛ ɔ nin a ɲanman afuɛ 24, ɔ kacili ngaliɛ difuɛ. (Yol. 16:1-3) I osu w’a cɛman naan b’a kle Tɛsaloniki lɔ Klistfuɛ’m be ɲrɛnnɛn kpa. Kɛ ɔ́ yó sɔ’n nn Tɛsaloniki asɔnun’n takali ɔ nin a cɛman. Ɲrɛnnɛn sɔ’n ti’n, Pɔlu tuli Tɛsaloniki klɔ’n su. I sin, ɔ seli Timote kɛ ɔ sɛ i sin Tɛsaloniki lɔ naan ɔ ko wla aniaan’m be fanngan. (Yol. 17:5-15; 1 Tɛs. 3:1, 2, 6) ?Kɛ a bu i akunndan’n, wafa sɛ yɛ junman sɔ’n i nun sɔlɛ yoli Timote ɔ?
AJALƐ CINNJIN KPAFUƐ NG’Ɔ FATA KƐ A FA’N
3. ?Ajalɛ cinnjin kpafuɛ ng’ɔ fata kɛ a fa’n, yɛle benin? ?Blɛ benin nun yɛ ɔ fata kɛ a fɛ i sɔ ajalɛ’n niɔn?
3 Dɔ nga su mɔ a ti gbanflɛn annzɛ talua’n, yɛ ɔ fata kɛ a fa ajalɛ cinnjin mun ɔn. ?Ajalɛ kwlaa nga á fá be’n, be nun cinnjin kpafuɛ’n yɛle benin? Yɛle Zoova i sulɛ’n. Dɔ nga su yɛ ɔ ti cinnjin kpa kɛ a fɛ i sɔ ajalɛ’n niɔn. Afin Zoova se ɔ kɛ: “Blɛ bɔ a tɛ yo gbanflɛn’n [annzɛ talua’n], maan ɔ wla kpɛn ɔ yifuɛ’n i su.” (Aku. 12:1) Like kunngba cɛ nga á yó naan w’a kle kɛ “ɔ wla kpɛn” Zoova su’n, yɛle kɛ a tu ɔ klun su i. (Mml. 10:12) I sɔ’n mɔ á yó’n, ɔ ti ajalɛ cinnjin kpa. Yɛ ajalɛ wie fi kwlá tomɛn i. Kɛ á wá fá ajalɛ sɔ’n, i su yɛ like kwlaa nga á wá yó’n, ɔ́ táka ɔ.—Jue. 71:5.
4. ?Ninnge benin wie’m be nun yɛ ajalɛ nga á fá’n be’n, ɔ nin wafa nga á sú Zoova’n bé kɔ́ likawlɛ ɔ?
4 I yo, nán Zoova i sulɛ ngunmin yɛ ɔ ti ajalɛ mɔ kɛ a ko fa’n, like onga nga á yó’n, ɔ taka su ɔ. Afin sɛ á já bla annzɛ bian’n, annzɛ a su jaman wie’n, ɔ fata kɛ a bu i akunndan. ?Sɛ cɛn wie lele á já bla annzɛ bian’n, wan yɛ á jɛ́ i ɔ? ?Asa kusu’n, junman benin yɛ á dí? Ajalɛ sɔ’m be falɛ’n ti cinnjin wie. Sanngɛ be nun cinnjin kpafuɛ’n yɛle kɛ, a tu ɔ klun su Zoova. (Mml. 30:19, 20) Afin sɛ a fɛ i sɔ ajalɛ’n, i su like yɛ á yó ɔ. Bla annzɛ bian jalɛ’n, ɔ nin junman dilɛ’n be su ajalɛ nga á fá’n, be yɛ maan á kwlá yó ninnge wie mun annzɛ a su kwlá yoman be ɔ. (An nian Lik 14:16-20 nun.) I sɔ’n ti’n, dun mmua fa ajalɛ’m be nun cinnjin kpafuɛ’n.—Fil. 1:10.
?NGUE YƐ Á FÁ Ɔ GBANFLƐN ANNZƐ TALUA BLƐ’N YÓ Ɔ?
5, 6. Sɛ a fa ajalɛ kpa’n, á kwlá dí aklunjuɛ dan Zoova sulɛ nun. Fa sa kun yiyi nun.
5 Dun mmua fa ajalɛ kɛ á sú Ɲanmiɛn. I sin, bu wafa ng’ɔ kunndɛ kɛ a su i’n i akunndan. Kɛ a ko si i’n, á wún like nga ɔ nguan cɛn nun’n, á yó’n. Aniaan bian kun m’ɔ fin Zapɔn’n wa wunnin i sɔ liɛ’n i wlɛ. Be flɛ i Yuichiro. Ɔ klɛli i kɛ: “I nun nga n le afuɛ 14, min nin asɔnun kpɛnngbɛn kun e ɔli jasin fɛ’n bolɛ. Ɔ sieli i nzɔliɛ kɛ m boman jasin fɛ’n aklunjuɛ su. I sɔ’n ti’n, ɔ seli min amanniɛn su kɛ: ‘Yuichiro, kɔ awlo. Kpɛkun, tran ase bu ninnge kpakpa nga Zoova yoli mannin wɔ’n be akunndan.’ I sɔ yɛ n yoli ɔ. Yɛ cɛn kwlaa m’an yaciman Ɲanmiɛn srɛlɛ ɔ nin ninnge ng’ɔ yoli be mannin min’n be akunndan bulɛ. Ɔ maan blɛblɛblɛ, min akunndan’n wa kacili. W’a cɛman naan Zoova i sulɛ’n w’a yo n fɛ. N kloli ngaliɛ difuɛ’m be su ndɛ’m be nun kannganlɛ. I ti’n, blɛblɛblɛ, n wa kunndɛli kɛ ń tú n klun ń sú Zoova trá laa’n.”
6 Yuichiro kɛn i ekun kɛ: “N wa fali ajalɛ wie mun naan cɛn wie lele’n m’an kwla ko bo jasin fɛ’n nvle uflɛ nun. I wie yɛle kɛ n wa suannin Angle aniɛn’n. Kɛ n wieli suklu di’n, n kunndɛli junman ng’ɔ su faman min blɛ dan’n naan m’an kwla di atin bolɛ junman’n. Yɛle kɛ n kleli sran mun Angle aniɛn’n. Kɛ n ɲannin afuɛ 20, n wa suannin Mɔngɔl aniɛn’n. Ɔ maan, n kwla ko suannin aniaan wie mɔ be bo jasin fɛ’n Mɔngɔl aniɛn nun’n, be bo. I afuɛ nɲɔn m’ɔ́ yía’n, yɛle kɛ afuɛ 2007 nun’n, n wɔli nvle nga be flɛ i Mɔngoli’n nun lɔ. E nin atin bofuɛ wie mun e boli jasin fɛ’n likawlɛ. N sieli i nzɔliɛ kɛ sran kpanngban be sɔ Ɲanmiɛn ndɛ’n nun klanman. Ɔ maan, n kunndɛli kɛ ń trán nvle sɔ’n nun naan ń úka aniaan mun. I sɔ’n ti, n sali min sin Zapɔn lɔ n ko siesieli min wun. Kɛ ɔ fɛ i afuɛ 2008 nun Avrili anglo nun’n, n ti atin bofuɛ Mɔngoli wa. Wa tranlɛ’n timan pɔpɔ. Sanngɛ sran’m be klo Ɲanmiɛn ndɛ’n. Ɔ maan n uka be naan b’a fa be wun b’a mantan Zoova. Kɛ m bu i akunndan sa’n, like nga n yo i dɔ nga su’n, like uflɛ fi i kpa tomɛn i.”
7. ?Ajalɛ benin yɛ i falɛ’n, ɔ ti sran kun bɔbɔ i ndɛ ɔ? ?I lɛ nun’n, ngue yɛ like nga Moizi yoli’n kle e ɔ?
7 Kɛ sran kun yo Zoova i Lalofuɛ’n, ajalɛ ng’ɔ́ fá naan w’a kwla su Zoova kpa’n, ɔ o i bɔbɔ sa nun. (Zoz. 24:15) I sɔ’n ti’n, e kwlá seman wɔ kɛ a ja bla annzɛ bian, annzɛ a ka lɛ sa. Asa ekun’n, e kwlá seman wɔ kɛ a di junman nga sa annzɛ nán a di. Wienun ɔn, a kwla se kɛ á dí junman nga i suanlɛ’n su faman blɛ kaka’n. Asa kusu’n, nán Klistfuɛ gbanflɛn nin talua ngba yɛ be tran aboje klɔ’m be su ɔ. Wie’m be tran nanmue’m be nun yɛ be ti yalɛfuɛ. Amun nzuɛn’n kusu ti fanunfanun. Asa ekun’n, ɔ le like nga amun tinuntinun amun si i yo’n. Amun ngwlɛlɛ’n sɛman yɛ amun akloliɛ’n ti fanunfanun. Kpɛkun, Zoova i sulɛ nun’n, nán junman kunngba’n yɛ amun kwlaa amun sunnzun kɛ amún dí ɔ. Moizi i su sa’n nin Ebre gbanflɛn nin talua’m be liɛ’n w’a yoman kun. Moizi yoli Ezipti famiɛn’n i wa bla’n i wa. Ɔ maan ɔ ɲannin aɲrunɲan ninnge kpanngban. Kusu nn Ebre gbanflɛn nin talua onga’m be ti kanga. (Tul. 1:13, 14; Yol. 7:21, 22) Be blɛ su’n, ɔ fata kɛ be fa ajalɛ cinnjin kpa kun. (Tul. 19:4-6) Yɛle kɛ sɛ bé sú Zoova, annzɛ be su sumɛn i’n, ɔ fata be kle. Moizi liɛ’n, ɔ fali ajalɛ kpafuɛ’n. Zoova i klun sa yɛ ɔ yoli ɔ. I sɔ wie yɛ ɔ fata kɛ andɛ a yo ɔ.—An kanngan Ebre Mun 11:24-27 nun.
8. ?Nin yɛ gbanflɛn nin talua’m be kwla ɲan afɔtuɛ kpa ɔ?
8 Gbanflɛn annzɛ talua, Zoova yaciman ɔ ngbɛn. Ɔ uka ɔ naan a fa akunndan nanti. ?Wafa sɛ yɛ ɔ yo sɔ ɔ? Yɛle kɛ Biblu’n nun’n, ɔ man ɔ afɔtuɛ wie mun mɔ kannzɛ ɔ su sa’n ti sɛ ti sɛ’n, a kwla fa be su’n. (Jue. 32:8) Sɛ ɔ si nin ɔ nin be ti Zoova i Lalofuɛ’n, be kwla uka ɔ kpa naan w’a si wafa nga a kwla fa afɔtuɛ sɔ’m be su’n. Asɔnun kpɛnngbɛn’m be kwla uka ɔ wie. (Nya. 1:8, 9) Siɛn’n, maan e kan Biblu’n nun afɔtuɛ nsan mɔ be kwla uka ɔ naan w’a fa ajalɛ kpa dɔ nga su’n, be ndɛ.
BIBLU’N NUN NDƐ NSAN MƆ BE KWLA UKA WƆ’N
9. (a) ?Wafa sɛ yɛ e tiaun ajalɛ mɔ Zoova maan e kwla fa’n, ɔ kle kɛ Zoova bu e sran? (b) ?Sɛ e dun mmua fa e wun man Ɲanmiɛn kɛ ɔ sie e’n, i su mmlusuɛ benin yɛ é ɲɛ́n i ɔ?
9 Dun mmua fa ɔ wun man Ɲanmiɛn maan ɔ sie wɔ, yɛ yo i klun sa’n. (An kanngan Matie 6:19-21, 24-26, 31-34 nun.) Ɔ tiaun ajalɛ mɔ Zoova maan ɔ atin kɛ a fa’n, ɔ kle kɛ ɔ bu ɔ sran. Zoova man ɔ atin kɛ a kle like nga á fá ɔ blɛ’n yó’n. Ɔ su seman kɛ a fa ɔ blɛ’n kwlaa bo jasin fɛ’n. Sanngɛ Zezi kleli kɛ sɛ e dun mmua fa e wun man Ɲanmiɛn kɛ ɔ sie e’n, i sɔ’n yó e wun sa ye. Afin kɛ sran kun fa ndɛ nga Zezi kannin’n su’n, ɔ ɲan ninnge kaka be yolɛ wun atin. Ninnge sɔ mɔ á yó be’n, bé klé kɛ a klo Ɲanmiɛn nin sran naan a si anannganman nguan mɔ a kwla ɲɛn i’n i su ye. Ajalɛ nga á fá be bla annzɛ bian jalɛ nin junman dilɛ ndɛ’n nun’n, bu be akunndan kpa. Afin sɛ á dún mmua yó Ɲanmiɛn i klun sa’n naan á yó i juejue su, ɔ fin be. Sɛ kusu ɔ awlofuɛ’m be lika nianlɛ’n ti á kókó ɔ maan a su kwlá suman Zoova kpa’n, ɔ fin be.
10. ?Ngue yɛ Zezi yoli m’ɔ dili su aklunjuɛ dan ɔn? ?Ngue yɛ ɔ fata kɛ a yo naan ɔ klun w’a jɔ ɔ?
10 Maan sran ukalɛ yo ɔ fɛ. (An kanngan Sa Nga Be Yoli’n 20:20, 21, 24, 35 nun.) Ngwlɛlɛ ndɛ yɛ Zezi kɛnnin i lɛ ɔ. Zezi w’a yoman i bɔbɔ i klun sa. Ɔ yoli i Si’n i klun sa. Kpɛkun ɔ boli jasin fɛ’n kleli sran mun. I kwlaa sɔ’n ti, ɔ dili aklunjuɛ kpa. (Lik 10:21; Zan 4:34) Atrɛkpa’n, w’a uka sran wie le. Yɛ ɔ yoli ɔ fɛ kpa. Ɔ maan, sɛ a nian ndɛ nga Zezi kannin’n su fa ajalɛ cinnjin mun’n, ɔ klun jɔ́. Yɛ Zoova klun jɔ́ wie.—Nya. 27:11.
11. ?Ngue ti yɛ blɛ wie nun’n, Bariki w’a diman aklunjuɛ ɔ? ?Ndɛ benin yɛ Zoova kan kleli i fa tuli i fɔ ɔ?
11 Like uflɛ fi kwlá manman e aklunjuɛ kɛ Zoova i sulɛ’n sa. (Nya. 16:20) Sanngɛ blɛ wie nun’n, Bariki m’ɔ ti Zeremi i fluwa klɛfuɛ’n, i ɲin kpali i sɔ’n su. Ɔ maan w’a diman aklunjuɛ kun. I ti Zoova seli i kɛ: “Pɔɔ yɛ a kunndɛ kɛ á trán nun-ɔn. Nán kunndɛ pɔɔ nun tranlɛ. Nyrɛnnɛn nga ń fá yí i mɛn’n su’n, like kun ng’ɔ su nyɛn-mɛn i’n ɔ nun-man lɛ. Ɔ liɛ nga á nyɛ́n i’n yɛlɛ ɔ nguan’n. Kan kwlaa nga ɔ waan á kɔ́’n, ɔ wun fɔuun!” (Zer. 45:3, 5) ?Sɛ Bariki kunndɛ pɔɔ nun tranlɛ’n yɛ i klun jɔ́ sakpa ɔ? ?Annzɛ sɛ ɔ su Zoova ndɛnman su naan kɛ bé wá núnnún Zerizalɛmu klɔ’n ɔ ɲɛn i ti’n, yɛ i klun jɔ́ ɔ? ?A bu i sɛ?—Zak 1:12.
12. ?Ngue yɛ Ramiro yoli mɔ i ti dɔ nga su’n, i klun ti jɔwa dan ɔn?
12 Sran’m be ukalɛ’n yoli aniaan kun i fɛ kpa. Ɔ suan Ramiro. Ɔ seli kɛ: “N fin nvle nga be flɛ i Bolivi’n. Min nin min osufuɛ mun e ti yalɛfuɛ. Klɔ nga e tran su’n, ɔ o oka’m be afiɛn. Cɛn kun’n, min ɲrun kpɛnngbɛn yasua’n seli min kɛ ɔ́ mán sika naan n di inivɛsite. Nanwlɛ, ɔ kunndɛli kɛ ɔ́ dí min nɛnnɛn. Kɛ ɔ́ yó sɔ’n nn be yoli min batɛmu ɔ nin a cɛman. M’an kaci Zoova i Lalofuɛ. Aniaan kun m’ɔ ti atin bofuɛ’n seli min kɛ ɔ́ kó bó jasin fɛ’n blɔfuɛ klɔ kaan kun su naan n ko sunmɛn i. N kplinnin su. Kɛ e juli lɔ’n, n suannin be ti yilɛ. I sin’n, n tikeli be ti yilɛ lika kun naan sika nga ń ɲɛ́n i’n ń fá nían min wun lika. Kɛ é bó jasin’n mɔ e se sran mun kɛ e klo kɛ é klé be Ɲanmiɛn Ndɛ’n, be nun kaka be kplin su. Kɛ ɔ́ kɔ́ i ɲrun’n, be wa takali asɔnun uflɛ kun. Be yo aɲia mun lɔ aniɛn’m be nun kun nun. N ɔli asɔnun sɔ’n nun. N ti atin bofuɛ i afuɛ blu yɛ. Dɔ nga su’n, n kle sran’m be Ɲanmiɛn ndɛ be klɔ aniɛn’n nun. Min klun ti jɔwa dan. N wunman junman uflɛ mɔ i dilɛ’n kwla man min aklunjuɛ tra sran’m be ukalɛ naan be suan Ɲanmiɛn ndɛ’n be klɔ aniɛn’n nun’n.”
13. ?Ngue ti yɛ dɔ nga su mɔ a te yo gbanflɛn annzɛ talua’n, yɛ ɔ ti blɛ kpafuɛ nga a kwla tu ɔ klun kpa su Zoova ɔ?
13 Tu ɔ klun su Zoova blɛ mɔ a te yo gbanflɛn annzɛ talua’n nun. (An kanngan Akunndanfuɛ’n 12:1 nun.) Nán se kɛ á kúnndɛ junman kpa dí naan w’a kaci atin bofuɛ. Dɔ nga su mɔ a ti gbanflɛn annzɛ talua’n, yɛ ɔ fata kɛ a wla ɔ wun ase a su Zoova ɔ. Afin kɛ e se yɛ’n, a nin a jaman bla annzɛ bian yɛ atrɛkpa’n, ɔ osufuɛ wie i lika nianlɛ timan ɔ ti su trɔ. Asa ekun’n, a te yo kpinndinkpinndin yɛ a kwla di junman kekle mun. ?Ɔ maan ngue yɛ a kunndɛ kɛ á yó mán Zoova ɔ? Atrɛkpa’n, a sunnzun kɛ á káci atin bofuɛ, annzɛ á súan aniɛn uflɛ naan á bó jasin fɛ’n aniɛn sɔ’n nun. Annzɛ kusu á ká ɔ asɔnun’n nun naan á sú Zoova yɛ á úka ɔ wiengu kpa trá laa’n. Kannzɛ like nga a sunnzun kɛ á yó mán Zoova ɔ ti sɛ, ɔ ti sɛ’n, sanngɛ ɔ fata kɛ a di junman naan w’a ɲan like w’a fa nian ɔ wun lika. I sɔ’n ti’n, usa ɔ wun kɛ: ‘?Junman benin yɛ ń dí ɔ? ?Blɛ nɲɛ yɛ ń fá súan junman sɔ’n niɔn?’
WAFA NGA A KWLA JRAN ƝANMIƐN NDƐ’N SU FA NGWLƐLƐ AJALƐ’N
14. ?Kɛ á kúnndɛ sí mɛn nun junman nga a kwla di’n, ngue ti yɛ ɔ fata kɛ a nian ɔ wun kpa ɔ?
14 Biblu’n nun afɔtuɛ nsan nga e wunnin be lɛ’n, be kwla uka ɔ naan w’a si junman nga á dí’n. Ɔ ti su kɛ awa i sran mun ɔ nin be nga be man amun afɔtuɛ suklu lɔ’n, be kwla kle wɔ like ng’ɔ fata kɛ a suan naan ɔ lika liɛ’n nun lɔ’n, annzɛ lika nga a kunndɛ kɛ á trán sú Zoova’n, w’a ɲan junman ndɛndɛ’n. Afɔtuɛ nga sran sɔ’m be man’n, be nun wie kwla tike ɔ ɲin. Sanngɛ nian ɔ wun kpa. Sran sɔ’m be kloman Zoova. Be kwla wlawla ɔ kɛ a klo mɛn’n ɔ nin i nun ninnge mun. (1 Zan 2:15-17) Asa ekun’n, kɛ á kúnndɛ mɛn nga nun junman’n, nán ɔ wla fi su kɛ ɔ klun akunndan’n kwla laka ɔ.—An kanngan Nyanndra Mun 14:15 nun; Zer. 17:9.
15, 16. ?Junman ndɛ’n nun’n, wan mun yɛ be kwla man ɔ afɔtuɛ kpakpa mun ɔn?
15 Kɛ a ko si junman fanunfanun nga a kwla ɲan be di’n, ɔ fata kɛ a usa ngwlɛlɛ afɛ. (Nya. 1:5) ?Wan mun yɛ be kwla fa Biblu’n nun ndɛ mun uka ɔ naan w’a si junman nga be nin dilɛ fata’n niɔn? Yɛle be nga be klo Zoova, mɔ be si ɔ su sa’n kwlaa, mɔ ɔ wun yo be fɛ’n. Be kwla uka ɔ naan w’a di ɔ bɔbɔ ɔ wun nanwlɛ. Yɛle kɛ junman nga a sunnzun kɛ á dí’n, sɛ a kwla di i sakpa’n, á wún i wlɛ. Atrɛkpa’n, be afɔtuɛ’n úka ɔ naan w’a bu like nga á yó i mɛn nun’n i akunndan uflɛ. Sɛ ɔ si nin ɔ nin be klo Zoova’n, be kwla uka ɔ kpa. Asa ekun’n, asɔnun kpɛnngbɛn nga a nin be o asɔnun kunngba’n nun’n, be kwla fa ɔ sie ngwlɛlɛ atin’n su. A kwla wun atin bofuɛ nin akpasua nin nvle su nianfuɛ’m be wun wie. A kwla usa be kɛ: ‘?Ngue ti yɛ amun fali ajalɛ kɛ amún klɛ́n amun wun sú Zoova ɔ? ?Wafa sɛ yɛ amun boli amun junman’n i dilɛ bo ɔ? ?I su mmlusuɛ benin yɛ amun a ɲɛn i ɔ?’—Nya. 15:22.
16 Be nga be si wɔ kpa mɔ be klo ɔ sa’n, be kwla man ɔ afɔtuɛ m’ɔ́ yó ɔ wun sa ye’n. Wienun ɔn a bu i kɛ kolɛzi dilɛ’n ti kekle. I ti’n, a kunndɛ kɛ á yáci i dilɛ naan á káci atin bofuɛ. Sran ng’ɔ si wɔ kpa m’ɔ klo wɔ sa’n kwla sie i sɔ liɛ’n i nzɔliɛ. Kpɛkun ɔ kle wɔ kɛ suklu dilɛ’n kwla uka ɔ naan w’a suan ɔ awlɛn tralɛ naan w’a yoman fuɛnfuɛ. Awlɛn tralɛ’n ti nzuɛn kpa kun m’ɔ fata kɛ sran kwlaa nga i waan ɔ́ sú Zoova tititi’n, ɔ yi i nglo ɔ.—Jue. 141:5; Nya. 6:6-10.
17. ?Junman benin yɛ ɔ fataman kɛ a di ɔ?
17 Sran kwlaa ng’ɔ su Zoova’n, saan ninnge wie’m bé tɛ́nndɛn i ɲrun. Ɔ maan sɛ w’a niɛnmɛn i wun kpa’n, ɔ cɛman naan w’a lafiman Ɲanmiɛn su kpa kun naan w’a yaci i sulɛ. (1 Kor. 15:33; Kol. 2:8) I wie yɛle junman nga e di’n. Junman wie’m be o lɛ’n, be dilɛ’n kwla tanndan e ɲrun tɛ kpa. ?A si ɔ tranwlɛ’n nun lɔ aniaan wie mun mɔ junman nga be di’n ti’n, “be lafi-man Nyanmiɛn su kpa kun” ɔn? (1 Tim. 1:19) Kɛ a fa wun i lɛ’n, nán di junman ng’ɔ kwla yo naan a nin Zoova be afiɛn w’a saci’n. Sɛ w’a dimɛn i sɔ junman’n, ɔ ti ngwlɛlɛ ayeliɛ.—Nya. 22:3.
BLƐ MƆ A TE YO GBANFLƐN ANNZƐ TALUA’N SU ZOOVA KPA
18, 19. ?Sɛ dɔ nga su’n, a kunndɛman kɛ á klɛ́n ɔ wun sú Zoova’n, ngue yɛ ɔ fata kɛ a yo ɔ?
18 Sɛ sakpasakpa naan a kunndɛ kɛ á sú Zoova’n, dɔ nga su mɔ a te yo gbanflɛn annzɛ talua’n yɛ ɔ fata kɛ a bo i bo. Ajalɛ nga a kwla fa be naan w’a su Zoova aklunjuɛ su blɛ kasiɛn nga nun’n, yɛ ɔ fata kɛ a fa ɔ.—Jue. 148:12, 13.
19 ?Yɛ sɛ dɔ nga su’n, a kunndɛman kɛ á klɛ́n ɔ wun sú Zoova nin? ?Ngue yɛ ɔ fata kɛ a yo ɔ? Like kwlaa nga a su yo naan w’a lafi Zoova su kpa ekun’n, nán yaci i yolɛ. Akoto Pɔlu kleli like ng’ɔ yoli naan Zoova w’a yrɛ i su’n. Ɔ seli kɛ: “Sɛ amun nun wie mun amun akunndan’n ti ngunmin-ngunmin’n, Nyanmiɛn wá yí sa sɔ’n nglo klé amun. Lika kwlaa nga y’a ju’n, kannzɛ ɔ ti sɛ, maan ajalɛ kunngba nga e fa boli i bo’n, e fa wɔ.” (Fil. 3:15, 16) Maan ɔ tran ɔ klun titi kɛ Zoova klo wɔ. Afɔtuɛ ng’ɔ man’n, be ti kpa tra afɔtuɛ kwlaa. I sɔ’n ti’n, ikisa mɔ a te yo gbanflɛn annzɛ talua’n, lo ɔ wun mɛn i. I liɛ’n, ɔ́ klé wɔ ajalɛ nga á fá m’ɔ su yoman ɔ nsisɔ’n.