NDƐ NG’Ɔ KLƐ FLUWA’N SU’N | ?A BU I KƐ ƝANMIƐN BU WƆ AKUNNDAN?

Ɲanmiɛn nian wɔ su

“Nyanmiɛn i nyin ta atin nga sran’m be fa’n su. Ɔ wun ajalɛ kwlaa nga be tu’n.”​—ZƆB 34:21.

LIKE NGA TI YƐ SRAN WIE’M BE LAFIMAN SU SƆ’N: Fluwa sifuɛ dandan’m be waan nzraama nga be wun be’n, be kwla ju akpingbinngbin ya. I sɔ’n ti, sran wie’m be usa be wun kɛ: ‘?Wan yɛle klɔ sran mɔ Ɲanmiɛn Kpli kó níɛn i su ɔ?’

LIKE NGA ƝANMIƐN NDƐ’N KLE’N: Ɲanmiɛn w’a fɛmɛn i nuan ndɛ’n w’a manman e sa ngbɛn, naan ɔ nianman e lɔ kun. Sanngɛ, Ɲanmiɛn bɔbɔ gua e awlɛn su nzue. Ɔ se kɛ: “Ń wá mán wɔ afɔtuɛ, ń nían wɔ su.”​—Jue Mun 32:8.

Afuɛ nga be flɛ i 1900 nun naan y’a ju Zezi blɛ su’n, Ezipti bla kun o lɛ be flɛ i kɛ Agar. Ɔ ti Abramu i yi Sarai i afanniɛn. Kpɛkun, i ɲin yiman Sarai. I sɔ’n ti’n, Sarai seli kɛ ɔ jaso i awlo’n nun. Yɛ Agar ɔli ɔ, ɔ juli aawlɛ flɛnnɛn’n nun. Agar w’a yoman sa kpa. ?I sɔ’n ti Ɲanmiɛn su niɛnmɛn i lɔ kun? Ɲanmiɛn Ndɛ’n waan: “Anannganman i anz’n ko toli Agar.” Anzi’n guɛli i awlɛn su nzue. Ɔ seli i kɛ: “Anannganman tili wɔ aunnvuɛ sunlɛ’n.” I sɔ ti’n, Agar seli Zoova kɛ: “A suan Nyanmiɛn’n b’ɔ wun min’n.”​—Bo Bolɛ 16:4-13.

Ɲanmiɛn nian ɔ su wie. Nian, bla ta kwlaa ng’ɔ klo i mma mun’n, ɔ niɛn i mma’n be su. I li kɛ i wa’n te yo bakan’n, yɛ ɔ niɛn i su kpa ɔ. Afin blɛ sɔ’n nun’n ɔ leman wunmiɛn. I sɔ kunngba’n, blɛ mɔ e leman wunmiɛn’n, yɛ Ɲanmiɛn nian e su kpa ɔ. Zoova seli kɛ: “N tran lika nga be o nglonglo mmua lɔ’n be nun, yɛ min nzuɛn nin klɔ sran liɛ timan kun. Sanngɛ be nga b’a fɛ’n, ɔ nin be nga be wun a fɔ’n, min nin be e o nun, kɛ ɔ́ yó naan m’an wla be fanngan, naan m’an wla be nga b’a fɛ’n be fanngan wie’n ti.”​—Ezai 57:15.

Sanngɛ, a kwla usa ɔ wun kɛ: ‘?Ɲanmiɛn nian min su wafa sɛ? ?Min sran waka ngbɛn’n yɛ Ɲanmiɛn wun i ɔ? ?Annzɛ ɔ nian lele ju min awlɛn’n nun lɔ, ɔ maan ɔ si wafa nga n ti’n?’