BIBLU’N I SU KOSAN’M BE SU TƐLƐ

?Anzi’m be kwla uka e?

Anzi’m be ti kpanngban kpa. Ɲanmiɛn Zoova yili be lele naan w’a yi sran mun. (Zɔb 38:4, 7) Anzi’m be le wunmiɛn dan. Ɲanmiɛn i junman yɛ be di ɔ. Laa’n, Ɲanmiɛn sunmannin be kɛ be sasa i sufuɛ mun yɛ be kle be atin. (Jue Mun 91:10, 11) Andɛ’n, anzi’m be uka Zezi i sɔnnzɔnfuɛ mun naan be bo jasin fɛ’n kle sran mun.​—An kanngan Sa Nglo Yilɛ 14:6, 7 nun.

?Ɔ fata kɛ e srɛ anzi mun kɛ be uka e? Cɛcɛ. Ɲanmiɛn yɛ e su i ɔ. I sɔ’n ti’n, Ɲanmiɛn yɛ ɔ fata kɛ e srɛ i ɔ. (Sa Nglo Yilɛ 19:10) Anzi’m be ti Ɲanmiɛn i sufuɛ. Ɔ maan, be yoman sran’m be klun sa. Ɲanmiɛn klun sa yɛ be yo ɔ. I sɔ’n ti’n, ɔ fata kɛ e srɛ Ɲanmiɛn kunngba cɛ, Zezi dunman nun.​—An kanngan Jue Mun 103:20, 21, ɔ nin Matie 26:53 be nun.

?Anzi’m be kwlakwla be ti kpa?

Anzi’m be ti kɛ sran mun sa. Yɛle kɛ, Ɲanmiɛn mianman be kɛ be yo like. Anzi wie’m be wa yoli ɲin kekle Ɲanmiɛn su. (2 Piɛr 2:4) Be nun klikli ng’ɔ yoli sɔ’n, be wa flɛli i kɛ Satan. Be nga be suli i su’n, be flɛli be kɛ mmusu mun. Koko nun wa’n, Satan nin i mmusu’m b’a ɲanman tranwlɛ ɲanmiɛn su lɔ kun. Be kannin be bo guali asiɛ’n su.​—An kanngan Sa Nglo Yilɛ 12:7-9 nun.

Kɛ ɔ fɛ i afuɛ 1914 nun’n, klunwi yolɛ’n ɔ nin sa tɛ yolɛ’n w’a yo dan. I sɔ’n kle kɛ Ɲanmiɛn su wa nunnun Satan nin mmusu mun. Kpɛkun, asiɛ’n i su tranlɛ’n ɔ́ yó fɛ kɛ mɛn’n i bo bolɛ’n nun’n sa.​—An kanngan Sa Nglo Yilɛ 12:12; 21:3, 4 nun.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 10 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.pr418.com