Like nga Zezi i nguan cɛnlɛ’n kle e’n
“W’a cɛn.”—MAT. 28:6.
?AMUN KWLA YIYI NUN?
?Ngue ti yɛ be kwlaa nga Ɲanmiɛn cɛnnin be laa’n, be nin Zezi i cɛnlɛ liɛ’n, ɔ timan kun ɔn?
?Ngue yɛ Zezi yo i dɔ nga su m’ɔ kle kɛ Ɲanmiɛn cɛnnin i sakpa ɔ?
?Ngue yɛ Zezi i cɛnlɛ’n kle e ɔ?
1, 2. (a) ?Kosan benin yɛ Zuifu kpɛnngbɛn’m be usali Piɛli ɔ? (b) ?Wafa sɛ yɛ Piɛli tɛli be su ɔ? (An nian desɛn ng’ɔ o kan like suanlɛ’n bo i bo lɛ’n.) (c) ?Ngue ti yɛ Piɛli kwla kannin ndɛ’n i yakpa su ɔ?
KƐ ZEZI wuli’n, i osu w’a cɛman lele. Kpɛkun cɛn kun’n, Zuifu kpɛnngbɛn’m be fali ndɛ be miannin Piɛli i sa. Zuifu kpɛnngbɛn kunngba sɔ mun yɛ be cicili Zezi i wun ndɛ mɔ be kunnin i’n niɔn. Be waan Piɛli w’a yo bian fɔlɛfuɛ kun i juejue. I sɔ’n ti, be fali ya dan. Be usali Piɛli kɛ: “?Wan dunman nun yɛ an yoli-ɔ?” Srɛ w’a kunman Piɛli. Ɔ tɛli be su kɛ: “Jésus-Krist b’ɔ fin Nazarɛt bɔ an boboli i waka’n su bɔ Nyanmiɛn cɛnnin i’n, i dunman nun yɛ bian nga w’a yo juejue b’ɔ jin amun nyrun wa nin-ɔn.”—Yol. 4:5-10.
2 ?Nán Piɛli yɛ srongble’n ti’n, blɛ kun nun’n, ɔ kɛnnin i kpɛ nsan kɛ ɔ siman Zezi’n niɔn? (Mar. 14:66-72) ?Ngue ti yɛ siɛn’n, ɔ kwla jran kpɛnngbɛn’m be ɲrun kan ndɛ kle be yakpa su ɔ? Ɲanmiɛn wawɛ’n jrɛnnin i sin ti ɔ. Sanngɛ kusu’n, ɔ lafili su kpa kɛ Ɲanmiɛn cɛnnin Zezi. ?Ngue ti yɛ ɔ lafili su sɔ ɔ? ?Ngue ti yɛ e kusu e kwla lafi su kɛ Ɲanmiɛn cɛnnin Zezi sakpa ɔ?
3, 4. (a) ?Zezi i sɔnnzɔnfuɛ’m be nannan’m be blɛ su’n, sa benin yɛ Ɲanmiɛn maan ɔ juli ɔ? (b) ?Wan mun yɛ Zezi cɛnnin be ɔ?
3 Zezi i sɔnnzɔnfuɛ’m be si kɛ be nga be wuli’n, be kwla cɛn. Afin be nannan’m be blɛ su’n, Ɲanmiɛn maan i nuan ijɔfuɛ Eli nin Elize be cɛnnin sran mun. (1 Fam. 17:17-24; 2 Fam. 4:32-37) Cɛn kun’n, sran wie’m be toli sran kun i fuɛn’n be yili i Elize i asieliɛ’n nun. Kɛ sran sɔ’n i fuɛn’n kannin Elize i owie’n, ɔ cɛnnin. (2 Fam. 13:20, 21) Sa sɔ mɔ Ɲanmiɛn ndɛ nga be klɛli’n ɔ kan be ndɛ’n, Klistfuɛ klikli’m be lafili su kɛ be yoli sɔ sakpa. E kusu’n, e lafi su kɛ Ɲanmiɛn Ndɛ’n ti nanwlɛ.
4 Ɲanmiɛn Ndɛ’n kle kɛ Zezi cɛnnin sran wie mun. Kɛ e kanngan sran sɔ’m be cɛnlɛ’n i su ndɛ’n, ɔ wluwlu e wun dan. I wie yɛle kɛ cɛn kun’n, Zezi cɛnnin angbeti bla kun i wa yasua kunngba cɛ’n. Wafa nga i sɔ’n yoli bla’n i fɛ’n, maan e bu i akunndan e nian. (Lik 7:11-15) Cɛn kun ekun’n, Zezi cɛnnin ba bla kaan kun m’ɔ le afuɛ 12. Wafa nga i sɔ’n yoli ba bla’n i si nin i nin’n be fɛ’n, maan e bu i akunndan e nian. (Lik 8:49-56) Kɛ Zezi cɛnnin Lazali mɔ Lazali fín ndia’n nun fíte’n, wafa nga i sɔ’n yoli be nga be o lɛ’n, maan e bu i akunndan e nian.—Zan 11:38-44.
ZEZI I NGUAN CƐNLƐ’N TI I LIƐ NGUNMIN
5. ?Ngue ti yɛ be kwlaa nga Ɲanmiɛn cɛnnin be laa’n, be nin Zezi i cɛnlɛ liɛ’n, ɔ timan kun ɔn?
5 Akoto’m be si kɛ Zezi i nguan cɛnlɛ’n, ɔ ti i liɛ ngunmin. Afin be kwlaa nga be cɛnnin be laa’n, ɔ nin be nga Zezi bɔbɔ cɛnnin be’n, be wuli ekun. Sanngɛ Zezi liɛ’n, Ɲanmiɛn cɛnnin i aolia nun sran yɛ ɔ su wuman kun. (An kanngan Sa Nga Be Yoli’n 13:34 nun.) Piɛli seli kɛ: “Be kunnin i, sanngɛ Nyanmiɛn Wawɛ’n cɛnnin i. [...] Ɔ ɔli nyanmiɛn su lɔ, ɔ o Nyanmiɛn i sa fama su, ɔ sie anz mun, nin lɔ kpɛnngbɛn mun, ɔ nin be ngblewa-ngblewa mun.” (1 Piɛ. 3:18-22) Be kwlaa nga Ɲanmiɛn cɛnnin be laa’n, ɔ nin be nga Zezi bɔbɔ cɛnnin be’n, be cɛnlɛ’n yoli abonuan. Sanngɛ Zezi i cɛnlɛ’n liɛ’n, ɔ ti abonuan tra su.
6. ?Wafa sɛ yɛ Zezi i cɛnlɛ’n yoli i sɔnnzɔnfuɛ mun ɔn?
6 Kɛ Zezi wuli’n, i kpɔfuɛ’m be buli i kɛ i liɛ w’a wie. Sanngɛ Ɲanmiɛn cɛnnin i. Kpɛkun, ɔ mannin Zezi i kwlalɛ dan. Yɛ sran fi kwlá yomɛn i like yaya kun. I sɔ’n yoli i sɔnnzɔnfuɛ’m be fɛ dan. Zezi i cɛnlɛ’n kleli kɛ ɔ ti Ɲanmiɛn Wa sakpa. I kwlaa sɔ mɔ i sɔnnzɔnfuɛ’m be wunnin i wlɛ ti’n, be ɲannin wunmiɛn. B’a tranman sɛnvuɛ kun. Yɛ srɛ w’a kunman be kun. Sɛ Ɲanmiɛn w’a cɛnman Zezi’n, nn Ɲanmiɛn i klun sa’n su kpɛnman su. Asa ekun’n, sɛ Ɲanmiɛn w’a cɛnman Zezi’n, nn jasin fɛ’n nga Zezi i sɔnnzɔnfuɛ’m be bo’n, ɔ ti ngbɛn.
7. (a) ?Ngue yɛ Zezi yo i dɔ nga su ɔ? (b) ?Kosan benin mun yɛ e kwla fa usa e wun ɔn?
7 E mɔ e ti Zoova i sufuɛ’m, e si kɛ Zezi timan sran dan kun sa ngbɛn. Sanngɛ e si kɛ, kɛ é sé yɛ’n, ɔ nian jasin fɛ’n mɔ e bo i mɛn wunmuan’n nun’n i su. Asa ekun’n, ɔ ti Famiɛn ɲanmiɛn su lɔ. Ɔ ka kan’n, ɔ́ wá núnnún klunwifuɛ mun nin sa tɛ’n kwlaa. Ɔ maan, asiɛ’n káci lika klanman. Yɛ sran’m bé trán su anannganman. (Lik 23:43) Sɛ ɔ ti kɛ Ɲanmiɛn w’a cɛnman Zezi sa’n, nn i kwlaa sɔ’n su yoman ye. ?Sanngɛ ngue ti yɛ e kwla lafi su kɛ Ɲanmiɛn cɛnnin Zezi sakpa ɔ? ?Yɛ ngue yɛ Zezi i cɛnlɛ’n kle e ɔ?
ZOOVA KLELI KƐ Ɔ KWLA WIE’N
8, 9. (a) ?Ngue ti yɛ Zuifu kpɛnngbɛn’m be kunndɛli kɛ sran nian Zezi i ndia’n su ɔ? (b) ?Kɛ bla’m bé jú ndia’n su lɔ’n, ngue yɛ be sieli i nzɔliɛ ɔ?
8 Kɛ be kunnin Zezi mɔ be sieli i’n, Ɲanmiɛn ɲrun jranfuɛ dandan mun nin Farizifuɛ’m be ɔli Pilati wun lɔ. Be ko seli i kɛ: “Nannan, e wla kpɛn ndɛ kun bɔ kɛ bian gblɛfuɛ dan sɔ’n i nyin o su’n ɔ kannin’n su, i waan sɛ be kun i naan ɔ di le nsan’n, ɔ́ cɛ́n. I sɔ’n ti, se sonja mun maan be ko nian ndia’n su lele ɔ di le nsan naan i sɔnnzɔnfuɛ’m b’a fɛ-mɛn i fuɛn’n b’a se-man sran’m be kɛ w’a cɛn’n ti. Sɛ ɔ yo sɔ’n, gblɛ nga bé wá tó i kasiɛn’n, ɔ́ trá laa liɛ’n.” Pilati seli be kɛ: “Sonja’m be yɛ be o lɛ-ɔ, an fa be wɔ maan be ko nian su kɛ an klo’n sa.” Be ɔli, yɛ be yoli i kɛ nga Pilati kan kleli be’n sa.—Mat. 27:62-66.
9 Be fali Zezi i fuɛn’n be sieli i ndia kun mɔ be kpɛli i yɛbuɛ kun nun’n i nun. Kpɛkun, be kondoli yɛbuɛ dan kun sieli i ndia sɔ’n i anuan’n nun. Ɲanmiɛn ɲrun jranfuɛ dandan mun nin Farizifuɛ’m be buli i kɛ b’a ko sie Zezi naan i liɛ w’a wie. Sanngɛ Ɲanmiɛn liɛ’n, ɔ timan sɔ. Kɛ i le nsan juli’n, Mali m’ɔ fin Magdala’n nin Mali kun’n, be ɔli ndia’n i nianlɛ. Bé jú lɔ’n, anzi kun w’a kondo yɛbuɛ mɔ be fa ɲinnin ndia’n i anuan’n, yɛ ɔ ti yɛbuɛ sɔ’n su lɛ. Ɔ seli bla’m be kɛ be nian ndia’n nun lɔ, naan nán srɛ kun be. Kpɛkun, ɔ seli be kɛ: “[Zezi] nun-man wa, w’a cɛn.” (Mat. 28:1-6) Nanwlɛ, Zezi o nguan nun ekun.
10. ?Ndɛ benin yɛ Pɔlu kannin m’ɔ kle kɛ Ɲanmiɛn cɛnnin Zezi sakpa ɔ?
10 Kɛ ɔ fɛ i cɛn mɔ bla’m b’a wunman Zezi i fuɛn’n ndia’n nun lɔ’n, lele m’ɔ́ fá jú cɛn 40, sa nga be juli’n be kleli kɛ Ɲanmiɛn cɛnnin Zezi sakpa. Pɔlu seli Korɛnti lɔ Klistfuɛ mun kɛ: “Sa nga be fa kleli min’n, bɔ n kusu n fa kleli amun’n ɔ ti cinnjin kpa. Be klɛli i Nyanmiɛn Ndɛ’n nun kɛ Krist ɔ́ wá wú sa tɛ bɔ e yoli’n ti, yɛ ɔ wuli. Be sieli i. Yɛ be klɛli i kɛ ɔ́ cɛ́n i le nsan su, ɔ maan Nyanmiɛn cɛnnin i. Sefas wunnin i, i sin i sɔnnzɔnfuɛ blu-nin-nnyɔn’m be wie’m be wunnin i. Kɛ ɔ dili le nnyɔn kun’n, e niaan wie’m bɔ be tra ya nnun’n bɔ be o likawlɛ’n, be wunnin i. Be nun wie’m b’a wu, sanngɛ be kpanngban lika tɛ o lɛ. I sin Zak kusu wunnin i, yɛ i sin be b’ɔ sunmannin be’n, be kwlaa be wunnin i. Kɛ be kwlaa sɔ’n be wunnin i’n, i sin m bɔ n ti kɛ ba bɔ i anglo a ju-man yɛ be wuli i sa’n, n wunnin i wie.”—1 Kor. 15:3-8.
LIKE NGA TI YƐ E SI KƐ ƝANMIƐN CƐNNIN ZEZI SAKPA’N
11. ?Zezi i cɛnlɛ’n i su ndɛ benin yɛ “be klɛli i Nyanmiɛn Ndɛ’n nun” ɔn?
11 I klikli’n yɛle kɛ, “be klɛli i Nyanmiɛn Ndɛ’n nun.” Ɲanmiɛn Ndɛ’n kannin kɛ Zezi cɛ́n. I wie yɛle kɛ, kɛ Davidi srɛ́ Ɲanmiɛn’n, ɔ seli i kɛ: “A su yaci-man min bɔ n ti ɔ sran min lɛ kɛ n kplɔ.” (An kanngan Jue Mun 16:10 nun.) Afuɛ 33 nun Pantekɔtu nun’n, Piɛli kleli kɛ sran sɔ mɔ Davidi kɛnnin i ndɛ’n yɛle Zezi. Piɛli seli kɛ: “[Davidi] kán ndɛ’n, ɔ boli Krist i cɛnlɛ ndɛ’n su kɛ Nyanmiɛn a yaci-mɛn i blɔlɔ lɔ, yɛ ɔ maan i fuɛn’n w’a kplɔ-man.”—Yol. 2:23-27, 31.
12. ?Kɛ Ɲanmiɛn cɛnnin Zezi’n, wan mun yɛ be wunnin i ɔ?
12 I nɲɔn su’n, yɛle kɛ sran kpanngban kpa be wunnin i. Kɛ Ɲanmiɛn cɛnnin Zezi’n, Zezi yili i wun nglo kleli i sɔnnzɔnfuɛ mun. Le kunngba nga Zezi cɛnnin’n, i sɔnnzɔnfuɛ nɲɔn be su kɔ klɔ kun mɔ be flɛ i Emais su. Kpɛkun, ɔ yili i wun nglo kleli be atin’n nun. (Lik 24:13-15) Blɛ uflɛ nun’n, Piɛli wunnin i, yɛ i sɔnnzɔnfuɛ wie mɔ be yiali’n, be wunnin i. Kpɛkun, ɔ nin be kokoli yalɛ. Asa ekun’n, sran mɔ be tra 500 mɔ be o likawlɛ’n, be wunnin i. Sran kpanngban sɔ mɔ be wunnin Zezi’n, e kwlá seman kɛ be buali ato.
13. ?Ngue yɛ Zezi i sɔnnzɔnfuɛ’m be yoli m’ɔ kle kɛ be lafi su kpa kɛ Ɲanmiɛn cɛnnin Zezi ɔ?
13 I nsan su’n, yɛle kɛ Zezi i sɔnnzɔnfuɛ’m be kɛnnin i ndɛ juejue su be kleli sran mun. Zezi i sɔnnzɔnfuɛ’m be kan kleli sran mun juejue su kɛ Ɲanmiɛn cɛnnin Zezi. I sɔ’n ti’n, be kleli be yalɛ, be kleli be ɲrɛnnɛn. Yɛ be kunnin wie mun bɔbɔ. Be nga be kpɔ Zezi mɔ be kunnin i’n, Piɛli kan kleli be kɛ Ɲanmiɛn cɛnnin Zezi. ?Sɛ Ɲanmiɛn w’a cɛnman Zezi sakpa’n, ngue ti yɛ Piɛli kó fɛ́ i nguan’n cící wie’n i nuan kɛ ngalɛ’n sa ɔ? Nanwlɛ, Piɛli nin i wiengu’m be wunnin i wlɛ weiin kɛ Ɲanmiɛn cɛnnin Zezi naan Zezi yɛ ɔ nian jasin fɛ bolɛ junman’n su ɔ. Asa ekun’n, be lafili su kpa kɛ sɛ be wu’n, Ɲanmiɛn cɛ́n be wie. I wie yɛle Zezi i sɔnnzɔnfuɛ Etiɛni liɛ’n. Kɛ bé kún i’n, ɔ lafili su kɛ Ɲanmiɛn cɛ́n i.—Yol. 7:55-60.
14. ?Ngue ti yɛ e lafi su kɛ Ɲanmiɛn cɛnnin Zezi ɔ?
14 I nnan su’n, e si kɛ Zezi ti Famiɛn ɲanmiɛn su lɔ dɔ nga su naan i kunngba’n, ɔ ti Asɔnun’n i su kpɛn. Sran’m be uka Zezi i sɔnnzɔnfuɛ’m be su cɛn kwlaa. Sɛ Ɲanmiɛn w’a cɛnman Zezi’n, nn sran’m be kwlá ukaman i sɔnnzɔnfuɛ’m be su kɛ ngalɛ’n sa. Afin, Zezi yɛ ɔ nian jasin fɛ bolɛ junman’n su ɔ. E bɔbɔ kusu’n, sɛ ɔ ti kɛ Ɲanmiɛn w’a cɛnman Zezi sa’n, nn atrɛkpa’n, e su timɛn i wun ndɛ le. Nanwlɛ, e lafi su kɛ Ɲanmiɛn cɛnnin Zezi naan Zezi yɛ ɔ nian jasin fɛ’n mɔ e bo i mɛn wunmuan nun’n i su ɔ.
LIKE NGA ZEZI I CƐNLƐ’N KLE E’N
15. ?Kɛ mɔ Ɲanmiɛn cɛnnin Zezi ti’n, ngue yɛ e yo ɔ?
15 Kɛ mɔ Ɲanmiɛn cɛnnin Klist ti’n, e bo jasin fɛ’n i yakpa su. Kɛ ɔ fɛ i Zezi blɛ su lele m’ɔ́ fá jú andɛ’n, Ɲanmiɛn i kpɔfuɛ’m be tanndan jasin fɛ bolɛ’n i ɲrun. I wie yɛle kɛ be kle like ng’ɔ timan su’n, be yo jasin bofuɛ’m be finfin, be yo be like yaya, be tannin be jasin fɛ bolɛ’n, be kle be ɲrɛnnɛn. Kpɛkun, be kun be nun wie mun. Ɔ nin i sɔ ngba’n, be bo jasin fɛ’n. Afin, Ɲanmiɛn seli kɛ: “Alɛ ninnge kwlaa nga be yi i kɛ be fa kun amun’n, ɔ́ yó ngbɛn.” (Eza. 54:17) Asa ekun’n, Zezi nin e o nun kɛ nga ɔ tali e nda’n sa. I sɔ’n ti’n, e sroman Satan nin i minniɛn mun. (Mat. 28:20) Nanwlɛ, e bo jasin fɛ’n i yakpa su. Afin, e lafi su kɛ e kpɔfuɛ fi kwlá jranman junman sɔ’n.
16, 17. (a) ?Ngue yɛ Klist i cɛnlɛ’n kle ɔ? (b) ?Kɛ nga Zan 11:25 fa kan’n sa’n, ngue yɛ Ɲanmiɛn tinnin Zezi kɛ ɔ yo ɔ?
16 Ɔ kle e kɛ ndɛ nga Zezi kannin be’n, be ti nanwlɛ. Pɔlu seli kɛ sɛ Ɲanmiɛn w’a cɛnman Klist’n, nn jasin fɛ mɔ Klistfuɛ’m be bo’n ti ato, nn Klistfuɛ’m be kusu b’a lafi su ngbɛn. Ndɛ kunngba’n yɛ sran kun m’ɔ suan Biblu’n i su like’n, ɔ kannin ɔn. Ɔ seli kɛ: “Sɛ Ɲanmiɛn w’a cɛnman Klist’n, [...] é sé kɛ be lakali Klistfuɛ mun naan be fali ato ndɛ su.” Nanwlɛ, sɛ Ɲanmiɛn w’a cɛnman Zezi’n, é sé kɛ Zezi bɔbɔ i su ndɛ nga i sɔnnzɔnfuɛ nnan be klɛli’n, ɔ ti ngua dilɛ ndɛ. Sanngɛ, ɔ timan sɔ. Ɲanmiɛn cɛnnin Klist sakpa. I sɔ’n kle kɛ ndɛ kwlaa nga Klist kannin’n, be ti nanwlɛ.—An kanngan 1 Korɛntfuɛ Mun 15:14, 15, 20 nun.
17 Zezi seli kɛ: “Min yɛ n cɛn sran mun-ɔn, m bɔbɔ min yɛ be flɛ min nguan nin-ɔn. Sran kwlaa ng’ɔ lafi n su’n, sɛ ɔ wu’n, ɔ́ nyán nguan ekun.” (Zan 11:25) Ndɛ sɔ mɔ Zezi kannin’n, ɔ́ kpɛ́n su weiin. Afin kɛ Zoova cɛnnin Zezi’n, i sin’n Zoova tinnin i naan ɔ cɛn sran mun. Sran sɔ’m be wie’m bé kɔ́ ɲanmiɛn su. Yɛ be kpanngban kpa bé trán asiɛ’n su wa tititi. Kɛ Zezi wuli mɔ Ɲanmiɛn cɛnnin i’n, i sɔ’n kle kɛ cɛn wie lele’n, wie’n su tranman lɛ kun. I sɔ mɔ e wun i wlɛ’n ti’n, e jran kekle sa’n kwlaa nun. Sɛ kunlɛ bɔbɔ yɛ be waan bé kún e’n, srɛ kunman e.
18. ?Kɛ Ɲanmiɛn cɛnnin Zezi ti’n, ngue yɛ cɛn wie lele Zezi wá yó ɔ?
18 Ɔ kle e kɛ cɛn kun bé dí sran’m be jɔlɛ weinwein. Kɛ Pɔlu bó jasin fɛ’n Atɛni lɔ’n, ɔ kannin like nga cɛn kun Ɲanmiɛn wá yó’n i ndɛ. Ɔ seli kɛ: “[Ɲanmiɛn] w’a sie cɛn kun bɔ sɛ cɛn sɔ’n ju’n, ɔ maan bé fá sran’n bɔ be o mɛn’n nun’n be kwlaa ba sran b’ɔ sieli i’n i ja su, ɔ́ dí jɔlɛ be weinwein. Kɛ Nyanmiɛn cɛnnin sran sɔ’n, ɔ ti nzɔliɛ b’ɔ kle sran’m be kwlaa kɛ ɔ sieli i jɔlɛ difuɛ sakpa.” (Yol. 17:31) Ndɛ sɔ’n kle kɛ Ɲanmiɛn sieli Zezi kɛ ɔ yo sran’m be jɔlɛ difuɛ. E lafi su kɛ Zezi wá dí jɔlɛ mun weinwein klolɛ su.—An kanngan Ezai 11:2-4 nun.
19. ?Kɛ mɔ Ɲanmiɛn cɛnnin Zezi ti’n, ngue yɛ e kunndɛ kɛ é yó ɔ?
19 Ɔ wla e fanngan kɛ e yo Ɲanmiɛn i klun sa’n. Sɛ Zezi w’a wuman yɛ Ɲanmiɛn w’a cɛnmɛn i’n, nn é ká sa tɛ’n nun é wú. Kpɛkun, e liɛ w’a wie. (Rɔm. 5:12; 6:23) Sɛ Ɲanmiɛn w’a cɛnman Zezi’n, é sé kɛ: “Maan e di like e nɔn nzan, ainman é wú, wuun e liɛ a wie.” (1 Kor. 15:32) Sanngɛ, nán mɛn dilɛ’n yɛ ɔ ti e cinnjin ɔn. E liɛ’n, e lafi su kɛ cɛn wie lele Zoova wá cɛ́n sran mun. Ɔ maan, e kunndɛ kɛ é yó i klun sa’n tititi.
20. ?Ngue yɛ Zezi i cɛnlɛ’n kle ɔ?
20 Ɔ kle kɛ Zoova o lɛ sakpa, ɔ ti Kpli naan “be nga be kunndɛ i’n, ɔ́ yí i wun klé be.” (Ebr. 11:6) Zoova cɛnnin Zezi, kpɛkun ɔ fɛli i sɛli i sin ɲanmiɛn su lɔ. Yɛ Zezi su wuman kun. I sɔ mɔ Zoova yoli’n, ɔ kle kɛ i ngwlɛlɛ’n nin i kwlalɛ’n ti dan. I sɔ’n kle ekun kɛ, ndɛ nga Zoova kan’n, ɔ yiɛ i nuan. Zoova seli kɛ bla’n i “osu’n,” ɔ́ wá dí junman cinnjin kpa kun. Yɛle kɛ, ɔ́ wá yó maan sran’m bé wún i wlɛ kɛ Zoova yɛ ɔ ti Famiɛn’n niɔn. Kɛ ɔ ko yo naan sa sɔ’n w’a kpɛn su’n ti’n, Zoova cɛnnin Zezi.—Bob. 3:15.
21. ?Kɛ e si kɛ cɛn wie lele Zoova wá cɛ́n sran mun’n, ngue yɛ i sɔ’n yo e ɔ?
21 Kɛ e si kɛ cɛn wie lele Zoova wá cɛ́n sran mun’n, ɔ yo e fɛ dan. I sɔ’n ti, é lɛ́ i ase. Aolia nun’n, Zezi i sɔnnzɔnfuɛ Zan tili sran kun nɛn. Ɔ seli kɛ: “Siɛn’n Nyanmiɛn i tranwlɛ’n wo sran’m be afiɛn! Ɔ nin bé trán, bé yó i sran, yɛ i bɔbɔ yó be Nyanmiɛn. Ɔ́ núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.” Kpɛkun, sran’n guɛli i ndɛ’n i bo kɛ: “Klɛ ndɛ nga, afin min ndɛ’n ti nanwlɛ, be kwla fa su.” ?Wan yɛ ɔ fali sa sɔ mɔ bé wá jú’n, ɔ kleli Zan aolia nun ɔn? Zezi Klist mɔ Ɲanmiɛn cɛnnin i’n yɛ ɔ fa kleli i ɔ.—Ngl. 1:1; 21:3-5.