Maan e uka Klist i niaan mun tititi

1, 2. (a) ?Ɲanndra benin yɛ Zezi buli be ɔ? (An nian desɛn ng’ɔ o kan like suanlɛ’n bo i bo lɛ’n.) (b) ?Bua nin boli’m be wun ɲanndra’n i su kosan benin mun yɛ e kunndɛ kɛ é sí be bo ɔ?

ZEZI buli sran kpa nanwlɛfuɛ m’ɔ si ngwlɛlɛ’n, ɔ nin talua blu be wun ɲanndra kleli i sɔnnzɔnfuɛ Piɛli, nin Andre, nin Zaki, nin Zan. Kpɛkun, ɔ buli junman difuɛ nsan be wun ɲanndra kleli be. I sin’n, blɛ mɔ i “bɔ kacili sran’n,” ɔ́ bá wá dí “nvle-nvle’m be kwlaa” be jɔlɛ’n, ɔ kɛnnin i ndɛ kleli be. Kɛ ɔ́ kán ndɛ sɔ’n, ɔ buli ɲanndra kun ekun. Ɲanndra sɔ’n nun’n, ɔ seli kɛ i bɔ kacili sran’n, ɔ́ wá bú sran’m be nun akpasua nɲɔn kɛ nnɛn tafuɛ bu i bua mun nin i boli’m be nun gua be ngunminngunmin’n sa. Kpɛkun, ɔ kannin sran akpasua kun ekun i ndɛ. Ɔ seli kɛ sran sɔ’m be ti “Famiɛn’n” i “niaan” mun.​—An kanngan Matie 25:31-33, 34a, 35-46 nun.

² Bua nin boli’m be wun ɲanndra sɔ’n mɔ Zezi buli’n, andɛ Zoova i sufuɛ’m be fa be ɲin sie su kpa. Afin, ɔ kle like nga ti yɛ sran wie’m bé ɲán anannganman nguan mɔ sanngɛ, sran wie’m be su ɲanman nguan mlɔnmlɔn’n. Ɲanndra sɔ’n ti nguan annzɛ wie ndɛ. I sɔ’n ti’n, ɔ ti cinnjin kpa kɛ e si like nga é yó naan y’a ɲan nguan’n. Like suanlɛ nga wá tɛ́ kosan yɛ’m be su: ?Wafa sɛ yɛ Zoova maan i sufuɛ’m be wunnin ɲanndra sɔ’n i bo ɔ? ?Ngue ti yɛ e kwla se kɛ jasin fɛ’n bolɛ’n i ndɛ yɛ ɔ kan ɔn? ?Wan mun yɛ ɔ fata kɛ be bo jasin fɛ’n niɔn? ?Ngue ti yɛ ikisa’n, ɔ ti cinnjin kɛ e nin “famiɛn’n” nin i “niaan” mun e nanti klanman ɔn?

ZOOVA MAAN I SUFUƐ’M BE WUNNIN ƝANNDRA’N I BO

3, 4. (a) ?Sɛ e waan é sí bua nin boli’m be wun ɲanndra’n i bo kpa’n, ngue yɛ ɔ fata kɛ e dun mmua e wun i wlɛ ɔ? (b) ?Afuɛ 1881 nun’n, ɲanndra sɔ’n i su ndɛ benin yɛ Sasafuɛ Tranwlɛ’n kannin ɔn?

³ Sɛ e waan é wún boli nin bua’m be wun ɲanndra’n i bo kpa’n, ɔ fata kɛ e wun sran nga Zezi kan be ndɛ ɲanndra sɔ’n nun’n be wlɛ. Asa ekun’n, ɔ fata kɛ e wun blɛ nga i nun yɛ bé dí sran’m be jɔlɛ’n, ɔ nin like nga ti yɛ be kwla fa sran wie mun sunnzun bua annzɛ boli’n be wlɛ.

⁴ Afuɛ 1881 nun’n, Sasafuɛ Tranwlɛ’n seli kɛ Zezi m’ɔ “kacili sran’n” yɛle “famiɛn’n.” Yɛ ɔ yiyili nun kɛ nán be nga be nin Zezi bé dí famiɛn ɲanmiɛn su lɔ’n, be ngunmin yɛ be ti i niaan mun ɔn. Sanngɛ, be kwlaa nga bé ɲán anannganman nguan asiɛ’n su wa’n, be ti i niaan wie. Sasafuɛ Tranwlɛ’n kunngba’n seli kɛ Klist i famiɛn dilɛ afuɛ akpi blɛ’n, i nun yɛ ɔ́ bú sran’m be nun síe be ngunminngunmin ɔn. Naan be nga be nantili Ɲanmiɛn i mmla’n be su sa’n kwlaa nun’n, be yɛ be ti kɛ bua mun sa ɔ.

5. ?Afuɛ 1923 nun’n, bua nin boli’m be wun ɲanndra’n i su ndɛ benin yɛ Sasafuɛ Tranwlɛ’n kannin ɔn?

⁵ Kɛ ɔ́ kɔ́ i ɲrun’n, Zoova maan i sufuɛ’m be wa wunnin ɲanndra sɔ’n i bo kpa. Afuɛ 1923, Ɔktɔblu 15, Sasafuɛ Tranwlɛ’n seli kɛ Zezi yɛ ɔ “kacili sran’n” niɔn. Naan Zezi i niaan mun yɛle be ng’ɔ nin bé kɔ́ ɲanmiɛn su’n. Yɛ ɔ nin bé dí famiɛn afuɛ akpi. Sasafuɛ Tranwlɛ’n kunngba’n seli ekun kɛ bua mun yɛle be nga be lafi su kɛ bé trán asiɛ’n su wa’n, mɔ Zezi nin i niaan’m bé síe be’n. Ɲanndra nun’n, Zezi kleli kɛ sran sɔ’m bé úka Famiɛn’n i niaan mun. Ɔ maan, blɛ mɔ Zezi i niaan’m be te o asiɛ’n su wa’n, yɛ ɔ́ bú sran’m be nun síe be ngunminngunmin ɔn. Ɔ́ yó sɔ kwlaa naan ɔ nin i niaan mun b’a ko di famiɛn afuɛ akpi kun ɲanmiɛn su lɔ. Ɔ maan, be nga be lafi su kɛ Zezi i famiɛn dilɛ’n ti yɛ be liɛ yó ye’n, be yɛ be ti bua mun ɔn.

6. ?Afuɛ 1995 nun’n, ɲanndra’n i su ndɛ benin yɛ Sasafuɛ Tranwlɛ’n kannin ɔn?

⁶ Laa’n, e buli i titi kɛ wafa nga sran’m be sɔ jasin fɛ’n nun mɛn’n i awieliɛ blɛ nga nun’n, yɛ ɔ ti be nun mɔ Zezi bu sie be ngunminngunmin’n niɔn. Yɛle kɛ, sɛ sran kun ti Ɲanmiɛn ndɛ’n naan ɔ fa su’n, nn ɔ ti bua. Sanngɛ sɛ w’a faman su’n, nn ɔ ti boli. Afuɛ 1995 nun’n, y’a diman ɲanndra’n i nun yiyilɛ wafa sɔ’n i su kun. Afin afuɛ 1995, Ɔktɔblu 15, Sasafuɛ Tranwlɛ’n yiyili Matie 24:29-31, ɔ nin Matie 25:31, 32 be nun. (An kanngan be nun.)b Ɔ seli kɛ, kɛ ɲrɛnnɛn dan blɛ’n nun Zezi bá, mɔ ‘i ɲrun ɔ́ yó ɲanɲan’n,’ yɛ ɔ́ dí sran’m be jɔlɛ ɔ.

7. ?Wafa sɛ yɛ e wun bua nin boli’m be wun ɲanndra’n i wlɛ siɛn’n niɔn?

⁷ Andɛ’n, e wun ɲanndra mɔ Zezi buli’n i bo kpa. E wun i wlɛ kɛ Zezi m’ɔ “kacili sran’n” yɛ ɔ ti “famiɛn’n” niɔn. Famiɛn’n i “niaan mun” yɛle Klistfuɛ nga Ɲanmiɛn kpali be sieli be ngunmin mɔ be nin Klist bé dí famiɛn ɲanmiɛn su lɔ’n. (Rɔm. 8:16, 17) Bua nin Boli mun yɛle nvlenvle’m be kwlaa. Kɛ ɲrɛnnɛn dan blɛ’n wá jú i awieliɛ’n, yɛ bé dí be jɔlɛ ɔ. Ɔ cɛ kaan ɲrɛnnɛn blɛ sɔ’n, ɔ́ bó i bo. Wafa nga sran’m be nin Zezi i niaan mɔ Ɲanmiɛn kpali be sieli be ngunmin’n be trannin’n, i su yɛ Zezi jrán dí be jɔlɛ ɔ. Nanwlɛ, Zoova fanngan nun’n, bua nin boli’m be wun ɲanndra’n, ɔ nin ɲanndra wie mun ekun mɔ Matie ndɛ tre 24 nin 25 be kan be ndɛ’n, e wun be bo kpa e kɔ e ɲrun titi. I sɔ’n ti’n, é lɛ́ i ase dan!

ƝANNDRA’N KLE E KƐ JASIN FƐ’N BOLƐ’N TI CINNJIN KPA

8, 9. ?Ngue ti yɛ Zezi bu be ng’ɔ fa be sunnzun bua’n, be “nanwlɛfuɛ” ɔ?

⁸ Kɛ Zezi bú i ɲanndra’n, w’a kanman jasin fɛ’n bolɛ’n i ndɛ trele. ?Sɛ ɔ ti sɔ’n niɔn, ngue ti yɛ e kwla se kɛ ɲanndra sɔ’n fa e ɲin sie i jasin fɛ’n bolɛ’n su ɔ?

⁹ Zezi kannin boli nin bua mɔ bé bú be nun gúa be ngunminngunmin’n i ndɛ. Sanngɛ, nán boli nin bua kpakpa sa be ndɛ yɛ ɔ kannin ɔn. Kusu nán aliɛ kpakpa, annzɛ tralɛ kpakpa sa yɛ be nga ɔ fa be sunnzun bua’n, be mannin i niaan mɔ Ɲanmiɛn kpali be sieli be ngunmin’n mun ɔn. Asa ekun’n, nán kɛ i niaan’m be tɔli tukpacɛ, annzɛ be wlali be bisua yɛ be niannin be lika sakpasakpa ɔ. Ɲanndra yɛ Zezi buli ɔ. Ɔ buli ɲanndra sɔ’n naan ɔ́ klé i sɔnnzɔnfuɛ’m be like. I waan ɔ́ klé be kɛ, be ng’ɔ fa be sunnzun bua m’ɔ bu be sran ‘nanwlɛfuɛ’n,’ be yɛle be nga be nin i niaan’m be tran klanman mɛn’n i awieliɛ blɛ kekle nga nun’n.​—Mat. 10:40-42; 25:40, 46; 2 Tim. 3:1-5.

10. ?Wafa sɛ yɛ e kwla uka Klist i niaan mun ɔn?

¹⁰ Kɛ Zezi kán sa nga bé wá jú mɛn’n i awieliɛ blɛ’n nun’n i ndɛ’n, yɛ ɔ buli bua nin boli’m be wun ɲanndra’n niɔn. (Mat. 24:3) I wie yɛle kɛ, ɔ seli kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n.” (Mat. 24:14) Kwlaa naan Zezi w’a bu bua nin boli’m be wun ɲanndra’n, ɔ buli junman difuɛ nsan be wun ɲanndra. Zezi buli ɲanndra sɔ’n naan i “niaan” mun mɔ Ɲanmiɛn kpali be sieli be ngunmin’n be wun i wlɛ kɛ, ɔ fata kɛ be tu be klun be bo jasin fɛ’n. I niaan sɔ’m be nun wie’m be te o asiɛ’n su wa. Sanngɛ b’a sɔnman. Kusu, ɔ fata kɛ be bo jasin fɛ’n “mɛn’n wunmuan’n” nun i sin naan mɛn’n i awieliɛ’n w’a ju. Bua nin boli’m be wun ɲanndra’n nun’n, Zezi kleli kɛ be nga be ti kɛ bua mun sa’n, bé úkɛ i niaan mun. Be ukalɛ sɔ’n i wie yɛle be klunklo sika manlɛ’n, ɔ nin be fanngan wlalɛ’n. Sanngɛ, like uflɛ o lɛ m’ɔ fata kɛ be yo ɔ.

?WAN MUN YƐ Ɔ FATA KƐ BE BO JASIN FƐ’N NIƆN?

11. (a) ?Kosan benin yɛ e kwla usa e wun ɔn? (b) ?Yɛ ngue ti e usa e wun kosan sɔ’n niɔn?

¹¹ Andɛ’n, Zezi i sɔnnzɔnfuɛ’m be ju kɔe akpinngbin mɔcuɛ. Be kwlaa sɔ’m be nun’n, be nga Ɲanmiɛn kpali be sieli be ngunmin’n b’a sɔnman. Kusu’n, be yɛ Zezi fali talan mɔ yɛle jasin fɛ’n bolɛ’n, ɔ wlali be sa nun ɔn. (Mat. 25:14-18) I sɔ’n ti’n, e kwla usa e wun kɛ: ‘?Be nga Zezi w’a manman be talan’n, ɔ fata kɛ be bo jasin fɛ’n wie?’ Kɛ e bu sa wie’m be akunndan’n, e kwla se kɛ ɛɛn.

12. ?Ngue yɛ ndɛ nga Zezi kannin m’ɔ o Matie 28:19, 20 nun’n, ɔ kle e ɔ?

¹² Zezi seli i sɔnnzɔnfuɛ’m be kwlaa kɛ be bo jasin fɛ’n. Kɛ Zezi cɛnnin nguan’n, ɔ seli i sɔnnzɔnfuɛ mun kɛ be kle sran’m be like maan be kaci i sɔnnzɔnfuɛ. Yɛ “like kwlaa” ng’ɔ kleli be’n, maan be kusu be kle sran uflɛ. Like kwlaa sɔ m’ɔ fata kɛ be kle sran mun’n, i wie yɛle jasin fɛ’n i bolɛ’n. (An kanngan Matie 28:19, 20 nun.) I sɔ’n ti’n, Klistfuɛ nga be lafi su kɛ bé kɔ́ ɲanmiɛn su’n, ɔ nin be nga be lafi su kɛ bé trán asiɛ’n su wa’n, be kwlaa yɛ ɔ fata kɛ be bo jasin fɛ’n niɔn.​—Yol. 10:42.

13. ?Ngue yɛ like nga Zan wunnin i aolia nun’n, ɔ kle e ɔ?

¹³ Sa Nglo Yilɛ fluwa’n kle kɛ be nga be kpali be sieli be ngunmin’n, be nin sran wie mun yɛ bé bó jasin fɛ’n niɔn. Zezi maan i sɔnnzɔnfuɛ Zan wunnin “atɔnvlɛ’n” aolia nun. Sran 144.000 mɔ be nin Klist bé dí famiɛn ɲanmiɛn su lɔ’n be akpasua’n, yɛ ɔ ti atɔnvlɛ’n niɔn. Atɔnvlɛ’n se kɛ maan sran kwlaa ng’ɔ klo’n, ɔ bla naan ‘ɔ fa nzue ng’ɔ man nguan’n, ɔ fa, dein su fiteman nun.’ (Ngl. 14:1, 3; 22:17) Nzue sɔ’n ti e ti kpɔlɛ tɛ’n mɔ Zezi fɛli i wun yili’n i nzɔliɛ. Tɛ sɔ mɔ Zezi yili’n ti’n, cɛn wie lele sran’m be su yoman sa tɛ kun. Yɛ be su wuman kun. (Mat. 20:28; Zan 3:16; 1 Zan 4:9, 10) Be nga Ɲanmiɛn kpali be sieli be ngunmin’n be tu be klun be kan e ti kpɔlɛ tɛ’n i ndɛ kle sran mun. Kpɛkun like nga be kwla yo naan b’a ɲɛn i su mmlusuɛ wie’n, be yiyi nun kle be. (1 Kor. 1:23) Sanngɛ, Zan wunnin sran akpasua kun ekun. I sɔfuɛ’m be lafi su kɛ bé trán asiɛ’n su wa. Be kusu be se sran mun kɛ be “bla” be w’a fa nzue m’ɔ man nguan’n. I sɔ’n kle kɛ, be kwlaa nga be ti Ɲanmiɛn ndɛ mɔ be fa su’n, ɔ fata kɛ be kusu be bo jasin fɛ’n wie.

14. ?Ngue yɛ e kwla yo e kle kɛ e fa “Krist mmla’n” su ɔ?

¹⁴ Be kwlaa nga be fa “Krist mmla’n” su’n, ɔ fata kɛ be bo jasin fɛ’n. (Gal. 6:2) Zoova kunndɛ kɛ i sufuɛ’m be kwlaa be nanti mmla kunngba’n su. Laa’n, ɔ seli Izraɛlifuɛ mun kɛ: “Mmla sɔ’m be ti amun Izraɛlfuɛ mun amun liɛ, yɛ be ti aofuɛ nga be tran amun mɛn’n nun be liɛ wie kusu.” (Tul. 12:49; Sau. 24:22) Klistfuɛ’m be diman Moizi Mmla’n su. “Krist mmla’n” su yɛ be kwlakwla be di ɔ. Klist mmla’n i wie yɛle like kwlaa nga Zezi kleli i sɔnnzɔnfuɛ mun’n. Like ng’ɔ kleli be’n, i cinnjin kpafuɛ’n yɛle kɛ maan be klo Ɲanmiɛn nin sran. (Zan 13:35; Zak 2:8) Nanwlɛ, ɔ fata kɛ e klo Zoova, nin Zezi, ɔ nin sran mun. Yɛ like cinnjin kpa nga e kwla yo e kle sɔ’n, yɛle kɛ maan e bo Ɲanmiɛn Sielɛ’n i jasin fɛ’n.​—Zan 15:10; Yol. 1:8.

15. ?Ngue ti yɛ e kwla se kɛ Zezi i sɔnnzɔnfuɛ’m be kwlakwla yɛ ɔ fata kɛ be bo jasin fɛ’n niɔn?

¹⁵ Ndɛ nga Zezi kan kleli sran akpasua kaan kun’n, ɔ kwla yo sran kpanngban be liɛ wie. I wie yɛle kɛ, Zezi tali i sɔnnzɔnfuɛ 11 be nda kɛ be nin i bé dí famiɛn ɲanmiɛn su lɔ. Sanngɛ be kwlaa ng’ɔ nin bé dí famiɛn’n, be ti sran 144.000. (Lik 22:29, 30; Ngl. 5:10; 7:4-8) Kɛ Zezi cɛnnin nguan’n, i sɔnnzɔnfuɛ kan nga be o i wun lɛ’n, yɛ ɔ seli be kɛ be ko bo jasin fɛ’n niɔn. (Yol. 10:40-42; 1 Kor. 15:6) Sanngɛ, Klistfuɛ klikli’m be kwlaa be boli jasin fɛ’n. (Yol. 8:4; 1 Piɛ. 1:8) Andɛ’n, e si kɛ Zezi w’a kan kleman e tinuntinun kɛ e bo jasin fɛ’n. Sanngɛ, e sran kɔe akpinngbin mɔcuɛ’n, e kwlakwla yɛ e di junman sɔ’n niɔn. E si kɛ, kɛ e bo jasin fɛ’n, i sɔ’n kle kɛ e lafi Zezi su.​—Zak 2:18.

MAAN IKISA’N E NIN KLIST I NIAAN MUN E NANTI KLANMAN

16-18. (a) ?Wafa sɛ yɛ e kwla uka Klist i niaan mun ɔn? (b) ?Ngue ti yɛ ɔ fata kɛ e yo sɔ ikisa ɔ?

¹⁶ Satan si kɛ i “cɛn’n w’a sɔn-man kun.” Ɔ maan, Klist i niaan mɔ Ɲanmiɛn kpali be sieli be ngunmin mɔ be o asiɛ’n su wa’n, ɔ nin be kun cɛn kwlakwla. (Ngl. 12:9, 12, 17) Ɔ nin i sɔ ngba’n, be fa jasin fɛ’n bolɛ’n i nun ta. Yɛ andɛ’n, sran kpanngban kpa be tie Ɲanmiɛn ndɛ’n. Awlanmannun’n, be nin a wunmɛn i sɔ le. I sɔ’n kle wein kɛ Zezi nin i sɔnnzɔnfuɛ’m be o nun.​—Mat. 28:20.

¹⁷ Kɛ e nin Klist i niaan mun e bo jasin fɛ’n, ɔ yo e fɛ dan. Sanngɛ nɛ́n i ngba ɔ. E man sika, yɛ e kplan Ɲanmiɛn Sielɛ sua mun, ɔ nin aɲia dandan’m be yolɛ sua mun, ɔ nin betɛli mun. Asa ekun’n, e ɲin yi asɔnun kpɛnngbɛn mun, ɔ nin aniaan nga “sran kpa nanwlɛfuɛ m’ɔ si ngwlɛlɛ’n” man be junman’n. I sɔ mɔ e yo’n, ɔ kle kɛ e kunndɛ kɛ é úka Klist i niaan mun.​—Mat. 24:45-47; Ebr. 13:17.

¹⁸ Ɔ ka kaan’n, Ɲanmiɛn wá wíe Klistfuɛ ng’ɔ kpali be sieli be ngunmin’n be nzɔliɛ sie. Kpɛkun, anzi’m bé yáci “aunngban b’ɔ fin asiɛ’n i bue nnan su’n” nun. Kɛ ɔ ko yo sɔ’n, ɲrɛnnɛn dan’n blɛ’n bó i bo. (Ngl. 7:1-3) Zezi fɛ́ i sɔnnzɔnfuɛ nga Ɲanmiɛn kpali be sieli be ngunmin’n kɔ́ ɲanmiɛn su. I sin’n, Armagedɔn alɛ’n tɔ́. (Mat. 13:41-43) Kɛ Klist wá bá’n, e kunndɛ kɛ ɔ bu e kɛ i bua sa. ?Nɛ́n i ɔ? Sɛ ɔ ti sɔ’n, maan ikisa’n, e nin i niaan mun e nanti klanman.