?Min li n kwla bo jasin fɛ’n?
1. ?Sɛ ɔ yo e kɛ e kwlaman jasin fɛ’n i bo’n, ngue ti yɛ ɔ fataman kɛ e sa sin bubu e ɔ?
1 Sɛ ɔ yo e kɛ e kwlaman jasin fɛ’n i bo’n, nán maan e sa sin bubu e. Kannzɛ e siman fluwa annzɛ kɛ e nian sran wafa nga e ti’n, e wunman kɛ e si like yo’n, sanngɛ nɛ́n i sɔ’n su yɛ be jran be se kɛ sran kun kwlaman jasin fɛ’n i bo ɔ. Zezi i sɔnnzɔnfuɛ klikli wie mun bɔbɔ, sran’m b’a buman be like fi. Be waan “b’a diman suklu, yɛ be timan sran dan.” Ɔ nin i sɔ ngba’n, be sa tɔli jasin fɛ’n i bolɛ nun. Yɛle kɛ, Zezi i ajalɛ’n i su nantilɛ’n yoli be nnana.—Yol. 4:13; 1 Piɛ. 2:21.
2. ?Wafa sɛ yɛ Zezi kleli sran’m be like ɔ?
2 Zezi i like klelɛ liɛ’n: Kɛ Zezi klé sran’m be like’n, ndɛ ng’ɔ kan’n ti pɔpɔ, i wlɛ wunlɛ yoman ya. Be nga be timan sran dan bɔbɔ’n, be wun i su fawlɛ. Ndɛ m’ɔ fiti be su klanman’n, ɔ nin kosan ng’ɔ usa’n, ɔ nin ɲanndra nin sunnzun ase ng’ɔ fa’n, be yo maan i ndɛ tiefuɛ’m be fa be akunndan’n kwlaa sie ndɛ ng’ɔ kan’n su. (Mat. 6:26) Sran’m be ndɛ loli i kpakpa liɛ su wie. (Mat. 14:14) Asa ekun’n, kɛ ɔ́ íjɔ’n, i wun usumɛn, kpɛkun ɔ kan ndɛ kɛ sran kun m’ɔ le sin jranfuɛ sa. Afin ɔ si kɛ Zoova yɛ ɔ sunmɛnnin i naan i yɛ ɔ mɛnnin i tinmin naan w’a kwla di i junman’n niɔn.—Lik 4:18.
3. ?Wafa sɛ yɛ Zoova uka e naan y’a kwla bo jasin’n niɔn?
3 Zoova uka e: Ɲanmiɛn yɛ ɔ ti e Like Klefuɛ Dan’n niɔn. Ɔ sin i Ndɛ’n nin i anuannzɛ’n be lika kle e like naan y’a si jasin fɛ’n i bo kpa. (Zan 6:45) Wafa nga Zezi kleli sran’m be like’n, Zoova maan be klɛli i kwlaa sɔ’n sieli. Ɔ maan, e kwla suan naan y’a yo kɛ i sa wie. Asa ekun’n, Zoova fɛ i wawɛ’n uka e. Kusu’n, aɲia’m be bo lɔ’n, ɔ kle e like kpanngban. (Zan 14:26) Kpɛkun ɔ fa aniaan nga be sa w’a tɔ jasin bolɛ’n nun uka e naan e sa w’a tɔ nun wie.
4. ?Ngue ti yɛ sɛ e lafi su kɛ e kwla jasin fɛ’n i bo’n, i su ɔ?
4 Sɛ e se kɛ e kwla jasin fɛ’n i bo’n, i su ɔ. Afin “sa nga e yo be’n, Nyanmiɛn yɛ maan e yo-ɔ.” (2 Kor. 3:5) I ti’n, maan e lafi Zoova su. Kpɛkun ninnge ng’ɔ fa uka e naan y’a di junman’n, maan e fa uka e wun. Sɛ e yo sɔ’n, é ‘nyán like b’ɔ e kwla fa di junman kwlaa ng’ɔ ti kpa’n.’—2 Tim. 3:17.