Ɔ fata kɛ e gua like nga e luali’n i su nzue naan ɔ yo kpa
1. ?Ngue yɛ ɔ fata kɛ e gua su nzue naan w’a yo kpa ɔ?
1 Like mɔ be lua’n, ɔ fata kɛ be gua su nzue naan w’a yo kpa. I kunngba’n, kɛ e kan Ɲanmiɛn i ndɛ’n e kle e jasin bowlɛ nun lɔfuɛ mun’n, ɔ ti kɛ y’a lua nanwlɛ ndɛ’n be awlɛn’n nun sa. (1 Kor. 3:6) Sɛ e kunndɛ kɛ like nga e luali’n ɔ tra ndin, ɔ fifi naan ɔ bo nɲrɛ’n, ɔ fata kɛ e gua su nzue, yɛle kɛ e sa e sin e ko kle be Ɲanmiɛn i ndɛ’n.
2. ?Ndɛ nga é kókó su yalɛ’n, wafa sɛ yɛ e kwla yo naan ndɛ tiefuɛ’n i ɲin w’a trɛn i sin ɔn?
2 Maan e man kosan kun su: Kɛ é síesíe e wun naan y’a ko bo jasin fɛ’n, kosan nga e kwla usa naan cɛn uflɛ’n y’a kwla sa e sin naan e nin sran’n y’a koko su yalɛ likawlɛ’n, maan e bu i akunndan e sie. Kpɛ klikli nga e ko to sran’n mɔ e nin i koko yalɛ ko wie’n, maan e usa kosan sɔ’n. Kpɛkun cɛn nga é sá e sin’n é kó níɛn i osu’n, maan e nuan sɛ su. Jasin bofuɛ kpanngban be wun i kɛ ɔ ti kpa kɛ be kpa fluwa Biblu’n kle i nun like suanlɛ kun naan wafa nga e kle sran’m be Biblu’n nun like’n, b’a kwla kle sran’n.
3. ?Kɛ e nin sran kun e ko wie yalɛ koko’n, ninnge benin mun yɛ e kwla klɛ be e sie ɔ?
3 E klɛ ninnge mun e sie: I kpɛ klikli nga e nin sran’n e yia’n, kɛ e nin i e ko wie yalɛ koko cɛ’n, maan e klɛ like nga e kokoli su yalɛ’n e sie. Maan e klɛ i dunman’n ɔ nin i adrɛsi’n. Asa kusu’n, e kwla klɛ cɛn nin dɔ’n mɔ e nin i e yiali nun’n, ɔ nin like nga e kɛnnin i ndɛ’n, ɔ nin fluwa nga sran sɔ’n fali’n. Sɛ ɔ kɔ asɔnun annzɛ ɔ le bla’n, annzɛ ɔ le bian annzɛ ɔ le ba o, i kwlaa sɔ’n maan e klɛ. Kpɛkun ninnge nga be lo i’n, maan e klɛ be wie. I liɛ’n, kɛ é sá e sin’n, e nin i e kwla koko ninnge nga be ti i cinnjin’n be su yalɛ. Asa kusu’n, cɛn nga e nuan sɛli su kɛ é kó níɛn i osu’n, ɔ nin kosan nga é tɛ́ su’n, maan e klɛ be e sie wie.
4. ?Sran’m be osu nianlɛ nun’n, ngue ti yɛ ɔ fataman kɛ e sa kan ase ɔ?
4 Nán e kan e sa ase: Kɛ e ko lua Ɲanmiɛn i ndɛ’n sran’m be awlɛn’n nun’n, Satan liɛ nga ɔ kunndɛ’n, yɛle kɛ ɔ́ yó naan ‘ndɛ nga be tili’n ɔ mlin be klun.’ Ɔ su yacimɛn i sɔ’n i yolɛ le. (Mar. 4:14, 15) Ɔ maan sɛ e sa e sin naan e toman sran’m be awlo lɔ’n, nán maan e sa sin bubu e. E kwla klɛ be lɛtri annzɛ e kwla klɛ fluwa kan sie i be anuan’n bo. I sɔ’n yɛ aniaan bla kun m’ɔ ti titi atin bofuɛ’n yoli ɔ. Ɔ boli bla kun i Biblu’n nun like klelɛ bo i anuan’n nun lɛ. Sanngɛ kɛ ɔ́ jú i ɲrun’n, ɔ kɔ ɔ, ɔ toman bla’n kun. Ɔ maan ɔ klɛli bla sɔ’n i lɛtri. Le kun m’ɔ toli bla’n i awlo lɔ’n, bla’n seli i kɛ lɛtri m’ɔ klɛli i’n, ɔ kɛnnin i dan. Afin i sɔ’n kle kɛ i ndɛ lo aniaan bla’n. Sɛ e gua nanwlɛ ndɛ nga e luɛli i sran’m be awlɛn’n nun’n i su nzue’n, é dí aklunjuɛ dan. Yɛle kɛ atrɛkpa’n, kun ‘wlɔ́ ablasan, kun ekun wlɔ́ ablesiɛn, yɛ kun ekun wlɔ́ ya.’—Mar. 4:20.