?Amun kunndɛ kɛ amún ɲán be bɔbɔ jasin bowlɛ liɛ?
1. ?Blɛ benin yɛ sran kun kwla ɲɛn i bɔbɔ i jasin bowlɛ liɛ ɔ?
1 ?Blɛ benin yɛ sran kun kwla ɲɛn i bɔbɔ i jasin bowlɛ liɛ ɔ? Sɛ e asɔnun’n i jasin fɛ’n bowlɛ cɛnnin’n, e kwla se kɛ be man e lika liɛ mɔ e kwla bo i nun jasin ɔn. Lika sɔ’n kwla yo e tranwlɛ’n i wun koko lɛ. Afuɛ 2007 Fevrie i Ɲanmiɛn Sielɛ Blɛ junman fluwa’n i afiɛn fluwa’n se kɛ: “Sɛ ɔ nin i fata’n, e kwla ɲan e jasin bowlɛ liɛ. I sɔ’n kwla uka e naan y’a fa blɛ nga e le i’n y’a bo jasin fɛ’n i kpa. Asa kusu’n, e kwla se jasin bofuɛ uflɛ kɛ ɔ nin e bo jasin fɛ’n e lika liɛ’n nun.”
2. ?Kannzɛ e ɲan e jasin bowlɛ liɛ’n, sanngɛ ngue yɛ ɔ fata kɛ e yo ɔ?
2 Maan e suan jasin bolɛ akpasua’n i bo: Sɛ e ɲan jasin fɛ’n bowlɛ e junman diwlɛ’n i wun koko lɛ’n, e kwla fa like dilɛ blɛ’n e di nun junman. Wie liɛ kusu sɛ e jra’n, e nin aniaan wie e kwla bo i nun jasin naan y’a wɔ awlo. Sɛ kusu lika nga be mannin e’n o e awlo’n i wun koko lɛ’n, e nin e awlobo’n e kwla di nun junman nnɔsua. Yɛ kɛ mɔ e su tranman jasin fɛ’n bolɛ aɲia’n i bo’n ti’n, ɔ ti kpa kɛ e dun mmua srɛ Zoova naan y’a bo junman’n i dilɛ’n bo. (Fil. 4:6) Sanngɛ, maan e yo ngwlɛlɛfuɛ naan kannzɛ i li é dí junman’n e bɔbɔ e lika liɛ nun’n, e suan blɛ mɔ asɔnun wunmuan’n yia bo jasin fɛ’n i bo. Fue cɛn annzɛ Mɔnnɛn cɛn mɔ aniaan sunman be yia naan b’a fite’n, yɛ ɔ fata kɛ e suan be bo kpa ɔ.
3. ?Sɛ e le e bɔbɔ e jasin fɛ’n bowlɛ liɛ’n, mmlusuɛ benin yɛ é ɲɛ́n i ɔ?
3 Mmlusuɛ mun: Sɛ e le e bɔbɔ e jasin fɛ’n bowlɛ liɛ’n, e kwla di nun junman blɛ kwlaa nga e klo’n. E kwla fa blɛ kpanngban e di nun junman. Afin e su nantiman lele e kɔman jasin fɛ’n bolɛ aɲia’n i bo. I sɔ atin mɔ be man’n, cɛn kunngun atin bofuɛ nin titi atin bofuɛ wie’m be kwla fa di be junman’n. Yɛ kɛ mɔ sran nga be sɔ e nun kpa’n be o akpasua kunngba nun’n ti’n, e kwla ko nian be osu ndɛndɛ e kle be Biblu’n nun like. Jasin bofuɛ sunman be sieli i nzɔliɛ kɛ, kɛ be man be bɔbɔ be jasin bowlɛ liɛ’n, i sɔ’n uka be naan b’a si lika sɔ’n nunfuɛ mun kpa. Naan kusu b’a uka be naan b’a lafi Ɲanmiɛn su. I sɔ’n ti’n, maan e kunndɛ kɛ be man e bɔbɔ e jasin fɛ’n bowlɛ liɛ. I liɛ’n, e nin e awlobo’n e kwla bo jasin fɛ’n i kpa ekun.—2 Tim. 4:5.