?Sɛ e ti sran kpa’n e liɛ yó ye?

Kɛ ɔ fɛ i laa lele andɛ’n, sran kpanngban be bu i kɛ sɛ sran kun yo sa kpakpa mun’n i liɛ yó ye. Fluwa sifuɛ dan kun suan Kɔnfisisi. Ɔ seli kɛ: “Like nga a kunndɛman kɛ be fa yo wɔ’n, nán fa yo sran.”a Be nga be tran Azi mɛn’n nun lɔ’n, be nun sunman be waan ndɛ sɔ’n ti nanwlɛ. Afin sɛ a yo sran’m be kpa’n, be kusu bé yó wɔ kpa wie.

LIKE NGA SRAN WIE’M BE YO’N

Sran kpanngban be bu i kɛ sɛ be nzuɛn’n ti kpa’n be liɛ yó ye. I sɔ’n ti’n, be ɲin yi sran, be nin sran tran klanman, yɛ be mian be ɲin naan b’a yoman sa tɛ. Be flɛ bla kun kɛ Lɛn. Ɔ tran Viɛtinamun. Ɔ seli kɛ: “N buli i kɛ sɛ min nzuɛn’n ti kpa’n, ń ɲán su ye.”

Bla kunngba’n su man yalɛfuɛ mun nin be nga be la gua su’n be aliɛ.

Sran wie’m be liɛ’n, ndɛ nga be kan kle be be asɔnun nun lɔ’n i ti yɛ be yo sa kpa-ɔ. I wie yɛle bian kun m’ɔ suan Su Yunun i liɛ’n. Ɔ tran Taiwanin. Ɔ seli kɛ: “Be seli e kɛ sɛ e yo sa kpa’n, sɛ e wu’n é dí ye. Sanngɛ sɛ e yo sa tɛ’n, é wún ɲrɛnnɛn.”

?WAFA SƐ YƐ I BO’N GUA-Ɔ?

Bla’n w’a ju i awlo lɔ yɛ w’a fɛ i wa’n. Sanngɛ afɛ’n w’a tin i su yɛ i wla bo i wun.

I yo, kɛ e yo e wiengu’m be kpa’n e bɔbɔ e ɲan su ye. Sanngɛ be nga be yo be wiengu’m be kpa’n, nán cɛn ngba yɛ be wiengu’m be yo be kpa wie-ɔ. I sɔ sa’n juli bla kun mɔ be flɛ i kɛ Siwu Pinjin’n i su. Ɔ tran Ɔnkɔngu. Ɔ seli kɛ: “N wunnin i wlɛ kɛ, kɛ a yo sran’m be kpa’n nán cɛn ngba yɛ be yo wɔ kpa wie-ɔ. N miannin min ɲin kpa naan min nzuɛn’n w’a yo kpa. Yɛ n niannin min awlobofuɛ’m be lika kpa. Sanngɛ min wun’n yacili min nin e wa’n ɔli.”

Sran wie’m be sieli i nzɔliɛ kɛ be nga be kɔ asɔnun bɔbɔ’n, nán be ngba yɛ be ti kpa-ɔ. Be flɛ bla kun kɛ Ɛtsuko. Ɔ tran Zapɔn, ɔ seli kɛ: “Laa’n min yɛ n ti e asɔnun’n nun gbanflɛn nin talua’m be anuannzɛ’n i su kpɛn’n niɔn. Sanngɛ n wunnin i kɛ be kunndɛ bla annzɛ bian, be ɲin ci be wiengu yɛ be wua asɔnun’n i sika’n. Nanwlɛ, i sɔ’n boli min nuan dan.”

“N miannin min ɲin kpa naan min nzuɛn’n w’a yo kpa. Yɛ n niannin min awlobofuɛ’m be lika kpa. Sanngɛ min wun’n yacili min nin e wa’n ɔli.”—SIWU PINJIN, Ɔ TRAN ƆNKƆNGU.

Be nga asɔnun ndɛ’n ti be cinnjin kpa mɔ be mian be ɲin be yo sa kpa bɔbɔ’n, nán cɛn ngba yɛ be ɲan su ye-ɔ. Bla kun m’ɔ o Viɛtinamun lɔ’n sieli i sɔ liɛ’n i nzɔliɛ. Be flɛ i kɛ Vanin. Ɔ seli kɛ: “Cɛn kwlakwla n fa waka mma wie mun nin flɛli nin aliɛ n man min nannan nga be wuli’n. Yɛ n yoli e asɔnun’n nun ninnge wie mun ekun. N yoli sɔ afuɛ kaka kpa. N buli i kɛ sɛ n yo sɔ’n, min liɛ yó ye. Ɔ nin i sɔ’n ngba’n, min wun’n wa tɔli tukpacɛ kekle kpa. Kpɛkun e wa bla m’ɔ ɔli suklu dilɛ nvle uflɛ nun’n, ɔ kpɛli co wuli.”

SƐ E TI SRAN KPA’N I SƆ’N NGUNMIN KWLÁ YOMAN NAAN E LIƐ W’A YO YE

Sɛ e ti sran kpa naan e yo ninnge kpakpa mun’n, i sɔ’n ti kpa. Sanngɛ i sɔ’n ngunmin kwlá yoman naan e liɛ w’a yo ye. ?Ngue ti-ɔ? Maan e fa e ɲin e sie ndɛ nga Ɲanmiɛn Ndɛ’n kan’n su.

NÁN SRAN NGBA YƐ Ɔ YO SA NG’Ɔ TI KPA’N NIƆN

“Sa tɛ yofuɛ kunngba cɛ kwla saci like kpanngban.”—AKUNNDANFUƐ’N 9:18.

Kannzɛ bɔbɔ e mian e ɲin e yo ninnge kpakpa mun’n, sanngɛ sran tɛ’m be ti’n sa kwla ɲan e. I wie yɛle kɛ sɛ tukpacɛ m’ɔ sa ndɛndɛ’n ɔ tɔ lika kun’n, awa’n kwla se kɛ nán e fa e wun e mantan e wiengu mun kun. Kannzɛ bɔbɔ e mian e ɲin e nanti ndɛ sɔ’n su’n, sanngɛ be nga be nantiman su’n be dunman nun ti’n tukpacɛ sɔ’n kwla sa e.

SRAN WIE KWLA BU I KƐ Ɔ YO LIKE KPA KUSU NN LIKE TƐ YƐ Ɔ SU YO-Ɔ

“Atin wie o lɛ, a wun i-ɔ ɔ waan ɔ ti kpa, sanngɛ i agualiɛ’n yɛlɛ wie.”—NYANNDRA MUN 14:12.

Kɛ ɔ fɛ i laa lele andɛ’n, sran wie’m be yo ninnge wie mɔ be bu i kɛ ɔ ti kpa-ɔ. Sanngɛ i agualiɛ su’n be wunnin i kɛ nán like kpa yɛ be su yo-ɔ. Ɔ nin i sɔ’n ngba’n be isali like nga be yoli’n i bo nzuɛn’n.

SA WIE’M BE KWLA FU E NUN

“Amun siman sa ng’ɔ́ ɲán amun ainman’n.”—ZAKI 4:14.

Kannzɛ bɔbɔ sran kun ti kpa sɛ, sanngɛ ɔ kwla kpɛ co wu. Kɛ tukpacɛ nga be flɛ i kɛ koronaviri’n bali’n, e wunnin i sɔ liɛ’n. Sran wie’m be kunndɛli kɛ bé úka be nga tukpacɛ’n sali be’n. Sanngɛ be bɔbɔ be wuli. Maan e kan Sinua’m be mɛn’n nun lɔ bla kun i ndɛ kan. Be flɛ i kɛ Litinin. I baba yoli asidan loto’n nun kpɛkun ɔ wuli. Ɔ seli kɛ: “N wunman sa nga ti yɛ sran kpa kɛ min baba sa’n ɔ wuli’n. Min baba miɛnnin i ɲin dili junman kekle fa niannin e lika. Ɔ ti wun ase kanfuɛ, yɛ ɔ di nanwlɛ. Kpɛkun asidan sɔ’n nun’n i kunngba cɛ yɛ ɔ wuli-ɔ.”

E wunnin i kɛ kannzɛ bɔbɔ e ti sran kpa’n, sanngɛ nɛ́n i sɔ’n ngunmin ti yɛ e liɛ yó ye-ɔ. ?Sɛ ɔ ti sɔ’n niɔn, nn ngue yɛ ɔ kwla uka e naan e liɛ w’a yo ye-ɔ? Fluwa kun yɛ ɔ kwla uka e naan e liɛ w’a yo ye-ɔ. Afin ɔ tɛ kosan wie mɔ e fa usa e wun’n be su. Kpɛkun ɔ kle like trele nga e kwla yo naan e liɛ w’a yo ye’n.

a Sɛ a kunndɛ kɛ á sí ndɛ uflɛ wie mɔ Kɔnfisisi kannin’n, nian fluwa L’humanité à la recherche de Dieu i ndɛ tre 7 i ndɛ kpɔlɛ 31-35 be nun. Zoova i Lalofuɛ mun yɛ be yili fluwa sɔ’n niɔn. A kwla ɲan wie www.pr418.com su.