?Kwlalɛ benin yɛ asɔnun kpɛnngbɛn’m be le i asɔnun’n nun-ɔn?

1. ?Ninnge nga ti yɛ Zoova i awlobo nunfuɛ’m be bo ti kun, be nun kun yɛle benin?

KƐ E ti Zoova i awlobo’n nunfuɛ’n, i sɔ’n yo fɛ. ?Ngue ti yɛ Zoova i awlobo’n nunfuɛ’m be bo ti kun-ɔn? Ninnge nga ti yɛ ɔ ti sɔ’n, be nun kun yɛle kɛ e kwlakwla e ɲin yi be nga Zoova mannin be kwlalɛ’n. Sanngɛ sɛ e wun like nga ti yɛ Zoova mannin sran wie’m be kwlalɛ’n i wlɛ kpa’n, e afiɛn mántan kpa trá laa’n.

2. ?Kosan benin mun yɛ é wá tɛ́ be su like suanlɛ nga nun-ɔn?

² Like suanlɛ nga nun’n, é wá kán be nga be le kwlalɛ asɔnun’n nun’n be ndɛ. Asa ekun’n, é wá tɛ́ kosan nga’m be su: ?Junman benin yɛ Zoova fa mannin aniaan bla mun asɔnun’n nun-ɔn? ?Aniaan bian’m be ti aniaan bla’m be su kpɛn? ?Kwlalɛ nga asɔnun kpɛnngbɛn’m be le i’n, ɔ nin awlobo kpɛn’m be liɛ’n ɔ ti kun? Maan e dun mmua e kan wafa ng’ɔ fata kɛ e bu aniaan bla mun’n, i ndɛ.

?WAFA SƐ YƐ Ɔ FATA KƐ E BU ANIAAN BLA MUN-ƆN?

3. ?Ngue yɛ ɔ kwla uka e naan y’a bu junman nga aniaan bla’m be di’n i like cinnjin-ɔn?

³ E niaan bla’m be mian be ɲin kpa be uka be awlofuɛ mun, be bo jasin fɛ’n yɛ be suan aniaan’m be bo asɔnun’n nun. I sɔ’n ti’n, e klo be kpa. Sɛ e fa e ɲin e sie i wafa nga Zoova nin Zezi be bu aniaan bla mun’n i su’n, é kló be kpa trá laa’n. Asa ekun’n, sɛ e fa e ɲin e sie i wafa nga akoto Pɔlu nin bla wie’m be nantili’n su’n, é sí wafa ng’ɔ fata kɛ e nin aniaan bla mun e nanti’n.

4. ?Wafa sɛ yɛ Biblu’n kle kɛ Zoova bu yasua nin bla’m be sran-ɔn?

⁴ Biblu’n kle kɛ i yasua-o, i bla-o, Zoova bu be kwlaa be sran. I wie yɛle kɛ Klisifuɛ klikli’m be blɛ su’n, i yasua-o, i bla-o, Zoova fɛli i wawɛ’n mannin be kwlaa. Ɔ maan, be kwla kannin aniɛn wafawafa. (Yol. 2:1-4, 15-18) I kpa bɔbɔ’n, be nga Zoova kpali be kɛ be nin Zezi be ko di famiɛn ɲanmiɛn su lɔ’n, bla’m be o be nun wie. (Gal. 3:26-29) Asa ekun’n, i bla-o, i yasua-o, be kwlaa bé wá ɲán nguan m’ɔ leman awieliɛ’n asiɛ’n su wa. (Ngl. 7:9, 10, 13-15) Kpɛkun bla’m be o be nga Zezi sunmannin be kɛ be ko bo jasin fɛ’n naan be kle sran’m be like’n, be nun wie. (Mat. 28:19, 20) Sa Nga Be Yoli’n fluwa’n kan bla kun m’ɔ suan Prisiyi’n, i ndɛ. Ɔ nin i wun Akila be yiyili Ɲanmiɛn Ndɛ’n nun weinwein kleli Apolɔsu m’ɔ si fluwa kpa’n.—Yol. 18:24-26.

5. ?Wafa sɛ yɛ Liki 10:38, 39, 42 kle kɛ Zezi buli bla’m be sran-ɔn?

⁵ Zezi buli bla’m be sran. Zezi w’a yoman kɛ Farizifuɛ’m be sa. Afin be liɛ’n, be buman bla’m be wie. Yɛ be kloman kɛ bé kán ndɛ bé klé be nzra nun. I kpa bɔbɔ’n, be nin be kokoman Ɲanmiɛn Ndɛ’n i su yalɛ le. Sanngɛ Zezi liɛ’n, i yasua-o, i bla-o, ɔ nin be kokoli Ɲanmiɛn Ndɛ’n i nun ndɛ cinnjin wie’m be su yalɛ.b (An kanngan Liki 10:38, 39, 42 nun.) Asa ekun’n, kɛ ɔ́ kó bó jasin fɛ’n klɔklɔ’m be su’n, ɔ kplinnin su kɛ bla’m be ko sunmɛn i. (Lik. 8:1-3) I kpa bɔbɔ’n, kɛ be cɛnnin i’n bla mun yɛ ɔ seli be kɛ be ko bo su kle akoto mun-ɔn.—Zan 20:16-18.

6. ?Wafa sɛ yɛ akoto Pɔlu kleli kɛ ɔ bu bla’m be sran-ɔn?

⁶ Akoto Pɔlu kleli kɛ ɔ bu bla’m be sran. I wie yɛle kɛ ɔ seli Timote kɛ i ɲin yi bla mun. I kpa bɔbɔ’n, ɔ seli Timote kɛ ɔ ‘bu bla kpɛnngbɛn mun i nin, yɛ ɔ bu talua mun i niaan bla.’ (1 Tim. 5:1, 2) Kannzɛ bɔbɔ Pɔlu ukali Timote naan ɔ lafi Ɲanmiɛn su kpa’n, sanngɛ ɔ dili i nanwlɛ kɛ Timote i nin ɔ nin i nannan bla’n yɛ be dun mmua kleli i “Ɲanmiɛn Ndɛ’n” niɔn. (2 Tim. 1:5; 3:14, 15) Kɛ Pɔlu klɛ́ Rɔmunfuɛ’m be fluwa’n, ɔ boli aniaan bla’m be tinuntinun be dunman yoli be like. Kpɛkun ɔ kannin junman nga aniaan bla sɔ’m be dili’n i ndɛ yɛ ɔ yoli be mo.—Rɔm. 16:1-4, 6, 12; Fp. 4:3.

7. ?Kosan benin mun yɛ é wá tɛ́ be su-ɔ?

⁷ Kɛ nga e fa wunnin i ndɛ kpɔlɛ nga be sinnin lɛ’n be nun’n sa’n, Biblu’n seman kɛ aniaan bian’m be ti kpa tra aniaan bla mun. Aniaan bla’m be klun ti ufue, be klo sran yɛ be uka asɔnun’n nunfuɛ’m be kpa. Asɔnun kpɛnngbɛn’m be lafi su kɛ be nin aniaan bla’m be kwla di junman likawlɛ naan bo kun yolɛ w’a tran asɔnun’n nun. Sanngɛ kosan wie’m be o lɛ m’ɔ fata kɛ e tɛ be su-ɔ. ?Ngue ti yɛ Zoova kunndɛ kɛ blɛ wie nun’n, aniaan bla’m be kata be ti’n su-ɔ? ?Kɛ mɔ aniaan bian’m be ngunmin yɛ be sie be asɔnun kpɛnngbɛn nin asɔnunfuɛ’m be ukafuɛ’n ti’n, é sé kɛ aniaan bian’m be ti aniaan bla’m be su kpɛn?

?ANIAAN BIAN’M BE TI ANIAAN BLA’M BE SU KPƐN?

8. ?Efɛzifuɛ Mun 5:23 kle kɛ aniaan bian’m be ti aniaan bla’m be su kpɛn? An yiyi nun.

⁸ Kosan sɔ’n i su tɛlɛ’n yɛle cɛcɛ. Aniaan bian kun timan aniaan bla kwlaa nga be o asɔnun’n nun’n be su kpɛn. Klisi kunngba cɛ yɛ ɔ ti aniaan bla’m be kwlaa be su kpɛn-ɔn. (An kanngan Efɛzifuɛ Mun 5:23 nun.) Awlobo nun’n, yasua’n yɛ ɔ sie i yi-ɔ. Kannzɛ bɔbɔ b’a yo ba yasua kun i batɛmun’n, sanngɛ ɔ timɛn i nin’n i su kpɛn. (Efɛ. 6:1, 2) Asɔnun’n nun’n, asɔnun kpɛnngbɛn’m be le kwlalɛ aniaan bian nin aniaan bla’m be su. (1 Tes. 5:12; Ebr. 13:17) Aniaan bla nga be nin-a jaman bian mɔ be tranman be si nin be nin’m be bo wun kun’n, be ɲin yi asɔnun kpɛnngbɛn nin be si nin be nin mun. Sanngɛ kɛ aniaan yasua mun sa’n, aniaan bla sɔ’m be su kpɛn’n yɛle Zezi.

9. ?Ngue ti yɛ blɛ wie nun’n, ɔ fata kɛ aniaan bla’m be kata be ti-ɔ?

⁹ Zoova mannin yasua’m be atin kɛ be tinngɛ asɔnun’n. Sanngɛ w’a manman bla’m be atin kɛ be yo i sɔ like. (1 Tim. 2:12) ?Ngue ti-ɔ? Like nga ti yɛ Zoova sieli Zezi yasua’m be su kpɛn’n, like kunngba sɔ’n ti yɛ ɔ sieli yasua’m be kɛ be tinngɛ asɔnun’n niɔn. Yɛle kɛ ɔ kunndɛ kɛ be yo ninnge mun sɛsɛsɛ asɔnun’n nun. Ɔ maan sɛ sa wie ti’n, ɔ fata kɛ aniaan bla kun di junman ng’ɔ fata kɛ aniaan bian kun yɛ ɔ di’n, Zoova kunndɛ kɛ ɔ kɛtɛ i ti.c (1 Kor. 11:4-7) Like nga ti yɛ Zoova se aniaan bla’m be kɛ be yo sɔ’n, yɛle kɛ ɔ kunndɛ kɛ be ɲin yi be ng’ɔ mannin be kwlalɛ’n. Nán kɛ i waan ɔ́ klé kɛ yasua’m be ti kpa tra be ti-ɔ. Kɛ mɔ y’a wun i sɔ liɛ’n i wlɛ’n, maan e tɛ kosan nga su: ?Kwlalɛ nga asɔnun kpɛnngbɛn’m be le i’n, ɔ nin awlobo kpɛn’m be liɛ’n ɔ ti kun?

?KWLALƐ NGA ASƆNUN KPƐNNGBƐN’M BE LE I’N, Ɔ NIN AWLOBO KPƐN’M BE LIƐ’N TI KUN?

10. ?Ngue ti yɛ ɔ ju wie’n, asɔnun kpɛnngbɛn kun kwla bu i kɛ sɛ ɔ kpɛ mmla man aniaan mun’n i sɔ’n ti su-ɔ?

¹⁰ Asɔnun kpɛnngbɛn’m be klo Klisi. Yɛ be klo be nga Zoova nin Zezi be seli be kɛ be nian be lika’n. (Zan 21:15-17) Ɔ maan asɔnun kpɛnngbɛn kun kwla bu i kɛ ɔ ti aniaan’m be si. Afin ɔ nian be lika kpa. I sɔ’n ti’n, ɔ kwla se i wun kɛ sɛ ɔ fata kɛ awlobo kpɛn kun kpɛ mmla fa sɛsɛ i awlofuɛ mun’n, nn i kusu ɔ kwla kpɛ mmla fa sasa Ɲanmiɛn i sufuɛ mun. Ɔ ju wie kusu’n, like nga ti yɛ asɔnun kpɛnngbɛn’m be yo sɔ’n yɛle kɛ aniaan wie’m be se be kɛ be kle be like ng’ɔ fata kɛ be yo’n. ?Sanngɛ kwlalɛ nga asɔnun kpɛnngbɛn’m be le i’n ɔ nin awlobo kpɛn’m be liɛ’n, ɔ ti kun?

11. ?Ngue ti yɛ e kwla se kɛ junman nga awlobo kpɛn mun nin asɔnun kpɛnngbɛn’m be di’n be fa be wun-ɔn?

¹¹ Akoto Pɔlu seli kɛ junman nga asɔnun kpɛnngbɛn’m be di’n ɔ nin awlobo kpɛn’m be liɛ’n, be fa be wun. (1 Tim. 3:4, 5) I wie yɛle kɛ Zoova kunndɛ kɛ awlobofuɛ’m be kwlaa be ɲin yi awlo kpɛn’n. (Kol. 3:20) Asa ekun’n, ɔ kunndɛ kɛ asɔnun nunfuɛ’m be ɲin yi asɔnun kpɛnngbɛn mun. Asa’n, i awlobo kpɛn mun-o, i asɔnun kpɛnngbɛn mun-o, Zoova kunndɛ kɛ be uka be nga be sie be’n naan be nin i be afiɛn mantan kpa. Kpɛkun ɔ kunndɛ kɛ be yo naan sran sɔ’m be wun i wlɛ kɛ be klo be. Kɛ nga awlobo kpɛn’m be fa yo’n sa’n, Zoova kunndɛ kɛ asɔnun kpɛnngbɛn’m be uka aniaan nga sa o be su’n. (Zak. 2:15-17) Zoova kunndɛ kɛ awlobofuɛ mun nin asɔnun kpɛnngbɛn’m be uka be wiengu mun naan be nanti i mmla’m be su. Sanngɛ ɔ se be kɛ ‘nán be fa ndɛ uflɛ uka ng’ɔ ti klɛwa’ Biblu’n nun’n i su.—1 Kor. 4:6.

12-13. ?Ngbaciɛ benin yɛ ɔ o junman nga asɔnun kpɛnngbɛn’m be di’n ɔ nin awlobo kpɛn’m be liɛ’n i afiɛn-ɔn?

¹² Sanngɛ ngbaciɛ o junman nga asɔnun kpɛnngbɛn’m be di’n ɔ nin awlobo kpɛn’m be liɛ’n i afiɛn. I wie yɛle kɛ Zoova mannin asɔnun kpɛnngbɛn’m be atin kɛ be di i sufuɛ’m be jɔlɛ. Yɛ sɛ be nun kun yo sa tɛ naan i waan ɔ kacimɛn i sa’n, be tu i asɔnun’n nun.—1 Kor. 5:11-13.

¹³ Sanngɛ ninnge nga Zoova mannin awlobo kpɛn’m be atin kɛ be yo’n, w’a manman asɔnun kpɛnngbɛn’m be atin kɛ be yo sɔ wie. I wie yɛle kɛ Zoova mannin awlobo kpɛn’m be atin kɛ be kpɛ mmla be man be awlofuɛ mun, yɛ be yo naan be nanti be su. (An kanngan Rɔmunfuɛ Mun 7:2 nun.) Asa ekun’n, sɛ i mma’m be fite’n ɔ le atin kle be dɔ ng’ɔ fata kɛ be sa be sin awlo’n. Yɛ sɛ ba’m be nantiman mmla sɔ’m be su’n, be kwla tu be fɔ. (Efɛ. 6:1) Sanngɛ sɛ awlobo kpɛn’n waan ɔ́ fá ajalɛ wie’n, ɔ fata kɛ ɔ nin i yi’n be koko su yalɛ. Afin be nɲɔn’n “be ti sran wunmuan.”d—Mat. 19:6.

MAAN E ƝIN YI KLISI M’Ɔ TI ASƆNUN’N I SU KPƐN’N

14. (1) ?Kɛ nga Marki 10:45 fa kan’n sa’n, ngue ti yɛ kɛ Zoova sieli Zezi asɔnun’n i su kpɛn’n, i sɔ’n ti su-ɔ? (2) ?Ngue junman yɛ e anuannzɛ’n i ɲrun dinfuɛ’m be di-ɔ? (An nian kuku nga be flɛ i kɛ “?Ngue junman yɛ e anuannzɛ’n i ɲrun dinfuɛ’m be di-ɔ?” i nun.)

¹⁴ Zoova fɛli i wa’n yili klɔ sran’m be kwlakwla be ti tɛ. E kwlaa nga e o asɔnun’n nun’n, e o sran sɔ’m be nun wie. (An kanngan Marki 10:45 nun; Yol. 20:28; 1 Kor. 15:21, 22) Ɔ maan kɛ ɔ fali Zezi m’ɔ kpɔli e ti’n sieli i asɔnun’n i su kpɛn’n, i sɔ’n ti su. Kɛ mɔ Zezi ti asɔnun’n i su kpɛn ti’n, ɔ le atin kpɛ like ng’ɔ fata kɛ e tinuntinun e yo annzɛ like ng’ɔ fata kɛ awlobofuɛ mun annzɛ asɔnun nunfuɛ’m be yo’n, i su mmla. Yɛ ɔ le atin se kɛ be nanti mmla sɔ’m be su. (Gal. 6:2) Sanngɛ nán mmla ngunmin yɛ ɔ kpɛ-ɔ. Ɔ klo e yɛ ɔ nian e tinuntinun e lika.—Efɛ. 5:29.

15-16. ?Ngue yɛ ndɛ nga aniaan bla Maale nin aniaan bian Bɛnzamɛn be kannin’n ɔ kle e-ɔ?

¹⁵ Kɛ aniaan bla’m be nanti atin nga aniaan yasua nga be kpali be kɛ be nian be lika’n be kle be su’n, be yi i nglo kɛ be ɲin yi Klisi. Be flɛ aniaan bla kun m’ɔ w’a ja bian’n kɛ Maale. Ɔ tran Etazinin. Ɔ boli ndɛ nga aniaan bla kpanngban be kan’n, i kpɔlɛ seli kɛ: “Min klun jɔ junman ng’ɔ fata kɛ n di i awlo lɔ’n ɔ nin asɔnun’n nun’n be su. N yo like kwlaa nga n kwla yo naan m’an kle kɛ min ɲin yi min wun nin asɔnun kpɛnngbɛn mɔ Zoova mannin be kwlalɛ’n. Kɛ mɔ min wun nin aniaan’m be ɲin yi min mɔ be si junman nga n di’n i su ye ti’n, i sɔ yolɛ’n ti pɔpɔ min sa nun.”

¹⁶ Sɛ aniaan bian’m be ɲin yi aniaan bla mun’n, bé klé kɛ be wun like nga ti yɛ Zoova mannin sran wie’m be kwlalɛ’n i wlɛ. Be flɛ aniaan bian kun kɛ Bɛnzamɛn. Ɔ tran Angle lɔ. Ɔ seli kɛ: “Aɲia’m be bo’n, kɛ aniaan bla’m be tɛ kosan’m be su’n, ɔ uka min kpa. Asa ekun’n, be kan wafa nga e kwla kle sran’m be Biblu’n nun like kpa’n ɔ nin wafa nga e kwla bo jasin fɛ’n naan w’a ba nvlɛ’n, be ndɛ. Nanwlɛ, e kwla ɲan junman nga aniaan bla’m be di’n i su ye.”

17. ?Ngue ti yɛ ɔ fata kɛ e ɲin yi be nga Zoova mannin be kwlalɛ’n niɔn?

¹⁷ Kɛ e kwlakwla, i yasua-o, i bla-o, i awlobo kpɛn-o, i asɔnun kpɛnngbɛn-o, e wun like nga ti yɛ Zoova mannin sran wie’m be kwlalɛ’n i wlɛ mɔ e ɲin yi be ng’ɔ mannin be kwlalɛ’n, e bo yo kun. Sanngɛ ng’ɔ ti cinnjin kpa’n yɛle kɛ i sɔ’n manman e Si Zoova m’ɔ o nglo lɔ’n.—Jue. 150:6.