?A lafi su kpa kɛ sran kun yɛ ɔ yili ninnge mun-ɔn?

1. ?Zoova i su ndɛ benin yɛ a si i-ɔ?

ATRƐKPA’N, kɛ bé wú wɔ’n nn ɔ si nin ɔ nin be ti Zoova i Lalofuɛ. Ɔ maan kɛ ɔ fin ɔ kaan nun’n, a si Zoova i su ndɛ wie mun. I wie yɛle kɛ a si kɛ i yɛ ɔ yili like kwlaa-ɔ. Asa ekun’n, a si i nzuɛn mun nin like nga i waan ɔ́ yó mán klɔ sran mun’n.​—Bob. 1:1; Yol. 17:24-27.

2. ?Wafa sɛ yɛ sran’m be bu be nga be lafi su kɛ sran kun yɛ ɔ yili ninnge mun’n niɔn?

² Andɛ’n, sran kpanngban be lafiman su kɛ Ɲanmiɛn o lɛ naan i yɛ ɔ yili like kwlaa-ɔ. Be waan kɛ mɛn’n bó i bo’n, ninnge kanngan wie’m be boli nun sa ngbɛn. Kpɛkun ninnge sɔ’m be kacili like uflɛ lele yɛ w’a fa ju yɛ. Be nga be kɛn i sɔ ndɛ’n be si fluwa kpa. Asa’n, be waan ndɛ nga Biblu’n kan’n timan nanwlɛ naan fluwa sifuɛ dandan nga be flɛ be kɛ siansifuɛ’n be ndɛ liɛ’n yɛ ɔ ti nanwlɛ-ɔ. Asa ekun’n, be waan be nga b’a ɔman suklu’n yɛ be lafi su kɛ sran kun yɛ ɔ yili ninnge mun-ɔn. Be se ekun kɛ sran sɔ’m be wunman sa wlɛ naan be lakalɛ yoman ya.

3. ?Ngue ti yɛ ɔ ti cinnjin kɛ e yo like kwlaa nga e kwla yo naan y’a lafi Ɲanmiɛn su kpa’n niɔn?

³ Ndɛ nga sran sɔ’m be kan’n kwla yo maan sran kun mɔ laa’n ɔ lafi su kɛ Zoova yɛ ɔ yili like kwlaa’n, ɔ su lafiman ndɛ sɔ’n su kun. ?Yɛ e li? ?I sɔ sa’n kwla ju e su wie? Sɛ i sɔ sa’n jú e su annzɛ ɔ su juman e su’n, i sɔ’n fin like nga ti yɛ e lafi su kɛ Zoova yɛ ɔ yili ninnge mun’n. ?Kɛ mɔ be seli e kɛ Zoova yɛ ɔ yili like kwlaa’n, i ti yɛ e lafi su wie-ɔ? ?Annzɛ e bɔbɔ e fali blɛ e suannin su like kpa ka naan y’a lafi su? (1 Kor. 3:12-15) Kannzɛ e su Zoova w’a cɛ bɔbɔ’n, sanngɛ ɔ fata kɛ e yo like kwlaa nga e kwla yo naan y’a lafi i su kpa titi’n. Sɛ e yo sɔ’n, e su faman ndɛ nga mɛn’n nun ngwlɛlɛfuɛ’m be kan’n nin “ndɛ ngbɛnngbɛn mɔ be ti gblɛ ngunmin’n,” be su. Afin ndɛ sɔ mun nin Biblu’n nun ndɛ’n be sansan be wun. (Kol. 2:8; Ebr. 11:6) Like suanlɛ nga nun’n, é wá kán like nga ti yɛ sran kpanngban be lafiman su kɛ sran kun yɛ ɔ yili ninnge mun’n i ndɛ. I sin’n, é wá wún like nga e kwla yo naan y’a lafi su kpa ekun kɛ Zoova yɛ ɔ yili like kwlaa’n. Yɛ i agualiɛ su’n, é wá kán like nga e kwla yo naan y’a lafi Zoova su kpa titi’n i ndɛ.

LIKE NGA TI YƐ SRAN WIE’M BE LAFIMAN SU KƐ SRAN KUN YƐ Ɔ YILI NINNGE MUN’N

4. ?Kɛ nga Ebre Mun 11:1 fa kan’n sa’n, ngue yɛle Ɲanmiɛn sulafilɛ’n?

⁴ Sran wie’m be bu i kɛ be nga be lafi su kɛ Ɲanmiɛn o lɛ’n, be kle be wun yalɛ ngbɛn. Afin like fi kleman kɛ ɔ o lɛ sakpa. Sanngɛ ndɛ nga Biblu’n kan’n nin be liɛ’n timan kun. (An kanngan Ebre Mun 11:1 nun.) Ninnge trele wie’m be ti yɛ e lafi su kɛ Zoova nin Zezi nin Ɲanmiɛn i Famiɛn Dilɛ’n be o lɛ-ɔ. (Ebr. 11:3) Siansi bian kun m’ɔ kacili Zoova i Lalofuɛ’n, ɔ seli kɛ: “Ɔ le like nga ti yɛ maan Zoova i Lalofuɛ’m be lafi ninnge wie’m be su’n. Be ɲin kpaman ndɛ nga siansifuɛ’m be kɛn i ninnge sɔ’m be su’n, i su.”

5. ?Ngue ti yɛ sran kpanngban be lafiman su kɛ sran kun yɛ ɔ yili ninnge mun-ɔn?

⁵ Ninnge kaka be kle kɛ sran kun yɛ ɔ yili ninnge mun-ɔn. ?Yɛ nn ngue ti yɛ sran kpanngban be lafiman ndɛ sɔ’n su-ɔ? Like nga ti yɛ ɔ ti sɔ’n, yɛle kɛ sran’m be faman be ɲin be siemɛn i ninnge sɔ’m be su. Be flɛ aniaan bian kun kɛ Robɛɛ. Ɔ seli kɛ: “I nun mɔ n te kɔ suklu’n, b’a kleman e kɛ sran kun yɛ ɔ yili ninnge mun-ɔn. I sɔ’n ti’n, n lafiman su kɛ sran kun yɛ ɔ yili like kwlaa-ɔ. Sanngɛ kɛ n ɲannin afuɛ 22 Zoova i Lalofuɛ’m be boli jasin fɛ’n be kleli min. Be fali Biblu’n be kleli min kɛ sran kun yɛ ɔ yili like kwlaa-ɔ. Ndɛ nga be kannin’n ti weiin yɛ be kwlá siman su akplowa.”b​—An nian kuku nga be flɛ i kɛ “Siɛ nin niɛn’m be liɛ” i nun.

6. ?Like uflɛ benin ti yɛ sran wie’m be lafiman su kɛ sran kun yɛ ɔ yili ninnge mun-ɔn?

⁶ Like nga ti yɛ sran wie’m be lafiman su kɛ sran kun yɛ ɔ yili like kwlaa’n, i wie yɛle kɛ be liɛ’n like nga be wunmɛn i’n, be lafiman su kɛ ɔ o lɛ. Kusu nn aunmuan mɔ be wunmɛn i’n, be lafi su kɛ ɔ o lɛ. Biblu’n se kɛ sran ng’ɔ lafi Ɲanmiɛn su’n, ɔ si kɛ “ninnge nga sran ɲinma wunman be’n, be o lɛ sakpa.” (Ebr. 11:1) Kɛ ɔ ko yo naan y’a lafi su kɛ Ɲanmiɛn o lɛ’n, ɔ fata kɛ e fa blɛ e suan ninnge nga be kle kɛ Ɲanmiɛn o lɛ sakpa’n be su like kpa. Sanngɛ sran kpanngban be leman blɛ be yoman sɔ. Kusu sɛ sran kun w’a faman blɛ w’a suanman ninnge sɔ’m be su like’n, ɔ su kwlá lafiman su kɛ Ɲanmiɛn o lɛ.

7. ?Siansifuɛ’m be ngba yɛ be lafiman su kɛ Ɲanmiɛn yɛ ɔ yili ninnge mun-ɔn? An yiyi nun.

⁷ Siansifuɛ kpanngban be suannin ninnge nga be kle kɛ sran kun yɛ ɔ yili ninnge mun’n be su like kpa. Ɔ maan be wa lafili su kɛ Ɲanmiɛn yɛ ɔ yili ninnge mun-ɔn.c Kɛ aniaan bian Robɛɛ mɔ e dun mmua kɛnnin i ndɛ’n i liɛ’n sa’n, laa’n be nun kpanngban be lafiman su kɛ sran kun yɛ ɔ yili ninnge mun-ɔn. Afin suklu lɔ’n b’a kleman be sɔ. Sanngɛ i sin’n, be wa sili Zoova yɛ be kacili i sufuɛ. Kɛ be sa’n, maan e tinuntinun e suan Ɲanmiɛn i su like kpa naan y’a kwla lafi i su. Kannzɛ e dili suklu-o annzɛ y’a diman suklu-o, ɔ fata kɛ e mian e ɲin e yo sɔ. Afin sran fi su yomɛn i sɔ’n manman e.

LIKE NGA E KWLA YO NAAN Y’A LAFI SU KƐ SRAN KUN YƐ Ɔ YILI NINNGE MUN’N

8-9. (1) ?Kosan benin yɛ é wá tɛ́ su siɛn’n niɔn? (2) ?Sɛ e suan ninnge nga Ɲanmiɛn yili be’n be su like’n, i su ye benin yɛ é ɲɛ́n i-ɔ?

⁸ ?Ngue yɛ e tinuntinun e kwla yo naan y’a lafi su kɛ sran kun yɛ ɔ yili ninnge mun-ɔn? Maan e fa e ɲin e sie i ninnge nnan mɔ e kwla yo be’n, be su.

⁹ Maan e suan ninnge nga Ɲanmiɛn yili be’n be su like. E kwla suan nnɛn nin ijre nin waka nin nzraama’m be su like. (Jue. 19:2; Eza. 40:26) Sɛ e suan ninnge sɔ’m be su like kpa’n, é láfi su kpa kɛ Zoova yɛ ɔ yili ninnge mun-ɔn. Ɔ ju wie’n, e fluwa’m be kan ninnge nga Ɲanmiɛn yili be’n be ndɛ. Kɛ é kánngan fluwa sɔ’m be nun’n, nán e tu tra ndɛ sɔ mun. Ndɛ sɔ’m be wlɛ wunlɛ kwla yo kekle, sanngɛ maan e mian e ɲin e kanngan be nun. Kpɛkun nga e wun i wlɛ’n, maan e fa sie e klun. Asa ekun’n, e aɲia dandan’m be bo’n, e nian video wie mɔ be kan ninnge nga Ɲanmiɛn yili be’n be ndɛ. Video sɔ’m be o jw.org su. Maan e wɔ lɔ naan e ko nian video sɔ mun.

10. An kan like kun m’ɔ kle kɛ sran kun yɛ ɔ yili ninnge mun’n i ndɛ. (Rɔmunfuɛ Mun 1:20)

¹⁰ Kɛ é súan ninnge nga Ɲanmiɛn yili be’n be su like’n, maan e fa e ɲin e sie i like nga ninnge sɔ’m be kle e Ɲanmiɛn su’n, i su. (An kanngan Rɔmunfuɛ Mun 1:20 nun.) Ninnge sɔ’m be nun kun yɛle wia’n. Kɛ wia’n bo’n ninnge nga be o asiɛ’n su’n be yo kpa. Sanngɛ wia’n i je wie’m be o lɛ’n, be kwla yo e abɔlɛ. I sɔ’n ti’n, Ɲanmiɛn yoli maan kpukpuwa kun sasa asiɛ’n naan wia’n i je sɔ’m b’a boman e su. Kɛ wia’n bo dan’n, kpukpuwa sɔ’n yo kpukplukpu kpa naan w’a kwla sasa asiɛ’n i kpa. ?Kɛ a niɛn i sa’n, nán sran kun m’ɔ klo sran kpɛkun ɔ si ngwlɛlɛ’n yɛ ɔ kwla yo i sɔ like’n niɔn?

11. ?Nin yɛ e kannin ninnge nga Ɲanmiɛn yili be’n be ndɛ-ɔ? (An nian kuku nga be flɛ i kɛ “Ninnge wie mɔ be kwla uka wɔ naan w’a lafi Ɲanmiɛn su kpa’n,” i nun.)

¹¹ E kannin ninnge nga Ɲanmiɛn yili be’n be ndɛ fluwa Zoova i Lalofuɛ’m be like kunndɛlɛ fluwa nun ɔ nin jw.org su. E kwla nian fluwa sɔ’n nun annzɛ e kɔ jw.org su e ko kanngan ndɛ sɔ’m be nun. Asa ekun’n, e kwla nian video nga be o ndɛ akpasua nga be flɛ i kɛ “Évolution ou conception?” i nun’n. Video sɔ’m b’a waman yɛ be kan nnɛn nin ninnge uflɛ wie mɔ Ɲanmiɛn yili be’n be ndɛ. Asa’n, be kan wafa nga siansifuɛ’m be niannin ninnge sɔ’m be su be yili ninnge wie mun’n be ndɛ wie.

12. ?Kɛ é súan Biblu’n nun like’n, ngue su yɛ ɔ fata kɛ e fa e ɲin e sie-ɔ?

¹² Maan e suan Biblu’n nun like. Siansi bian nga e kɛnnin i ndɛ, ndɛ kpɔlɛ 4 nun’n, i klikli nun’n ɔ lafiman su kɛ sran kun yɛ ɔ yili ninnge mun-ɔn. Sanngɛ i sin’n ɔ wa lafili i sɔ’n su. I bɔbɔ seli kɛ: “N fali min ɲin sieli i ndɛ nga siansifuɛ’m be kannin’n su. Sanngɛ n suannin Biblu’n nun like wie. I kwlaa sɔ’n ukali min naan m’an lafi su kɛ Ɲanmiɛn yɛ ɔ yili like kwlaa-ɔ.” Atrɛkpa’n e si Biblu’n nun ndɛ wie mun. Ɔ nin i sɔ ngba’n, ɔ fata kɛ e suan nun like titi naan y’a lafi su kpa kɛ sran kun yɛ ɔ yili ninnge mun-ɔn. (Zoz. 1:8; Jue. 119:97) Biblu’n kan sa wie mɔ Ɲanmiɛn dun mmua boli be su ka naan b’a ju’n be ndɛ. Sa sɔ’m be kpɛnnin su sɛsɛsɛ kɛ nga Ɲanmiɛn fa kannin’n sa. Asa’n, Biblu’n nun ndɛ wie fi sɛnsɛnmɛn i wun. Kusu nn be nga be klɛli Biblu’n nun ndɛ’n b’a tranman likawlɛ. Kɛ é súan Biblu’n nun like’n, maan e fa e ɲin e sie i i kwlaa sɔ’n su. Sɛ e yo sɔ’n, é láfi su kpa ekun kɛ sran kun m’ɔ klo e kpɛkun ɔ si ngwlɛlɛ’n yɛ ɔ yili e naan i nuan Ndɛ’n yɛle Biblu’n.d​—2 Tim. 3:14; 2 Piɛ. 1:21.

13. ?Biblu’n nun ndɛ benin yɛ ɔ kle kɛ Ɲanmiɛn si ngwlɛlɛ-ɔ?

¹³ Kɛ é súan Biblu’n nun like’n, maan e bu wafa nga i nun ndɛ’n kwla uka e’n i akunndan. I wie yɛle kɛ Biblu’n se kɛ nán e klo sika. Afin sɛ e klo sika’n ‘é kpɛ́ saɛ mán e bɔbɔ e wun.’ (1 Tim. 6:9, 10; Nya. 28:20; Mat. 6:24) Biblu’n kannin ndɛ sɔ’n w’a cɛ kpa. Sanngɛ andɛ nin andɛ ndɛ sɔ’n te yo nanwlɛ. Fluwa kun m’ɔ kan ninnge nga sran’m be yo be andɛ’n be ndɛ’n, ɔ seli kɛ: “Be nga be klo sika’n be diman aklunjɔɛ yɛ be wla bo be wun. Asa’n be nga be ɲin yiman sika nga be le i’n, be koko dan. Yɛ wie liɛ’n be tɔ su tukpacɛ bɔbɔ.” I kwlaa sɔ’n kle kɛ kɛ Biblu’n se kɛ nán e klo sika’n, e bɔbɔ e kpa yolɛ ti-ɔ. Biblu’n nun ndɛ mma kpanngban o lɛ mɔ sɛ e nanti be su’n é ɲán su ye-ɔ. Kɛ e nanti Biblu’n nun ndɛ’n su mɔ e ɲan su ye’n, e lafi sran nga i nuan ndɛ yɛle Biblu’n i su kpa ekun. Afin e wun i wlɛ kɛ ɔ si ngwlɛlɛ naan ɔ klo e. Ɔ maan sɛ e waan é fá ajalɛ wie’n é dún mmua níɛn i nuan Ndɛ’n nun. (Zak. 1:5) Kɛ e yo sɔ kusu’n, e di aklunjɔɛ.​—Eza. 48:17, 18.

14. ?Sɛ e suan Biblu’n nun like’n Zoova i su ndɛ benin yɛ é sí i-ɔ?

¹⁴ Kɛ é súan Biblu’n nun like’n, like ng’ɔ fata kɛ ɔ yo e cinnjin kpa’n yɛle Zoova i silɛ’n. (Zan 17:3) Kɛ e suan Biblu’n nun like’n, i sɔ’n uka e naan y’a si Zoova i nzuɛn mun. Nzuɛn sɔ’m be ɲin fite ninnge ng’ɔ yili be’n be nun. Asa’n, i sɔ’n uka e naan y’a wun i wlɛ kɛ Zoova ti sran jrɛiin. (Tul. 34:6, 7; Jue. 145:8, 9) Sɛ e si Zoova kpa’n, é láfi i su kpa, é kló i yɛ e nin i e afiɛn mántan kpa.

15. ?Kɛ e kan Ɲanmiɛn i ndɛ e kle sran mun’n, i su ye benin yɛ e ɲɛn i-ɔ?

¹⁵ Maan e kan Ɲanmiɛn i su ndɛ nga e si i’n, e kle e wiengu mun. Sɛ e yo sɔ’n é láfi i su kpa trá laa’n. ?Yɛ sɛ sran kun usa e Ɲanmiɛn i su ndɛ wie naan e siman wafa nga é tɛ́ i su’n nin? Maan e ko kunndɛ kosan sɔ’n i su tɛlɛ’n e fluwa’m be nun naan y’a kwla tɛ sran sɔ’n i su klanman. (1 Piɛ. 3:15) Asa ekun’n, e kwla se aniaan kun kɛ ɔ uka e naan e tɛ sran’n i kosan’n su. Sɛ e tɛli sran’n i kosan’n su naan ɔ fali su annzɛ w’a faman su-o, sanngɛ e liɛ’n é ɲán like nga e ko kunndɛli’n i su ye. Yɛle kɛ é láfi Ɲanmiɛn su kpa trá laa’n. Asa ekun’n, e su faman fluwa sifuɛ nga be se kɛ ninnge’m be boli nun sa ngbɛn’n be ndɛ nga be kan’n su.

MAAN E LAFI ƝANMIƐN SU KPA TITI

16. ?Sɛ y’a nianman e wun su’n ngue sa yɛ ɔ kwla ju-ɔ?

¹⁶ Kannzɛ e su Zoova w’a cɛ bɔbɔ’n, sanngɛ ɔ fata kɛ e yo like kwlaa nga e kwla yo naan y’a lafi i su kpa’n. ?Ngue ti-ɔ? Afin e Ɲanmiɛn sulafilɛ’n kwla kan ase. E wunnin i kɛ Biblu’n se kɛ sran ng’ɔ lafi Ɲanmiɛn su’n, ɔ si kɛ ninnge nga sran ɲinma wunman be’n, be o lɛ sakpa. Kusu e si kɛ ninnge nga e ɲinma wunman be’n, be su lafilɛ’n ti kekle. Ɔ maan sɛ y’a nianman e wun su’n, ɔ cɛman naan e Ɲanmiɛn sulafilɛ’n w’a kpɔnzɔ. Pɔlu kɛnnin i sɔ liɛ’n i ndɛ seli kɛ ɔ ti ‘sa tɛ kun m’ɔ cɛman nn w’a tanndan e ja nun’n.’ (Ebr. 12:1) ?É yó sɛ naan y’a tɔman sa tɛ sɔ’n nun?​—2 Tes. 1:3.

17. ?Ngue yɛ ɔ kwla uka e naan y’a lafi Ɲanmiɛn su kpa-ɔ?

¹⁷ Like klikli ng’ɔ fata kɛ e yo’n, yɛle kɛ e srɛ Zoova naan ɔ fɛ i wawɛ’n man e yɛ e yo sɔ kpɛ sunman. ?Ngue ti-ɔ? Afin Ɲanmiɛn sulafilɛ’n wo nzuɛn nga Ɲanmiɛn wawɛ’n yo maan klɔ sran yi i nglo’n be nun wie. (Gal. 5:22, 23) Sɛ Ɲanmiɛn w’a fɛmɛn i wawɛ’n w’a manman sran kun’n, ɔ kwlá lafimɛn i su. I sɔ’n ti’n, maan e srɛ i titi kɛ ɔ fɛ i wawɛ’n man e. Sɛ e yo sɔ kusu’n, ɔ́ fá mán e. (Lik. 11:13) Ɔ ju wie bɔbɔ’n kɛ é srɛ́ i’n, e kwla se i kɛ: ‘Uka min maan n lafi wɔ su kpa.’​—Lik. 17:5.

18. ?Kɛ nga Jue Mun 1:2, 3 fa kan’n sa’n, cenjele like benin yɛ e le i-ɔ?

¹⁸ Like nɲɔn su ng’ɔ fata kɛ e yo’n, yɛle kɛ e suan Ɲanmiɛn Ndɛ’n i nun like titi. (An kanngan Jue Mun 1:2, 3 nun.) Kɛ bé klɛ́ ndɛ ng’ɔ o jue sɔ’n nun’n, nn Izraɛli lɔ’n be nga be le Ɲanmiɛn mmla’n i fluwa su’n b’a sɔnman. Famiɛn mun nin Ɲanmiɛn ɲrun jranfuɛ mun yɛ be le wie-ɔ. I sɔ’n ti’n, afuɛ nso kwlakwla’n, ɔ fata kɛ ‘i yasua-o, i bla-o, i bakan-o, i aofuɛ-o’ be kwlakwla be yia naan be tie Ɲanmiɛn i mmla’n. (Mml. 31:10-12) Zezi blɛ su kusu’n, be nga be le Ɲanmiɛn mmla’n i fluwa su’n b’a sɔnman wie. Ɲanmiɛn sulɛ sua’m be nun yɛ be kwla ɲɛn i sɔ fluwa mun-ɔn. Sanngɛ andɛ’n Ɲanmiɛn Ndɛ’n i ɲanlɛ timan kekle. I sɔ’n ti e cenjele like dan. ?Wafa sɛ yɛ e kwla kle kɛ Biblu’n mɔ e le i’n ɔ yo e fɛ-ɔ?

19. ?Ngue yɛ e kwla yo naan y’a lafi Ɲanmiɛn su kpa-ɔ?

¹⁹ Like nga e kwla yo fa kle kɛ Biblu’n mɔ e le i’n ɔ yo e fɛ’n, yɛle i nun kannganlɛ cɛn kwlakwla’n. Asa’n, ɔ fata kɛ e sie blɛ kun naan e fa suɛn i nun like wie. Nán e minndɛ kɛ e ɲan e ti ka naan y’a kanngan Biblu’n nun. Sɛ e mian e ɲin e suan Biblu’n nun like titi’n, é láfi Ɲanmiɛn su tankaan kpa.

20. ?Ngue yɛ w’a fua kpa kɛ á yó-ɔ?

²⁰ E liɛ’n, e timan kɛ mɛn’n nun ‘ngwlɛlɛfuɛ nin be mɔ be si sa’n’ be sa. Afin e lafi Ɲanmiɛn Ndɛ’n su. (Mat. 11:25, 26) Kɛ mɔ e suan Biblu’n nun like’n ti’n, e si like nga ti yɛ mɛn’n w’a yo tɛ kɛ nga sa’n. Asa’n, e si like nga Zoova wá yó naan w’a siesie mɛn nun sa mun’n. I sɔ’n ti’n, maan e fua kpa kɛ é yó like kwlaa nga e kwla yo naan y’a lafi Ɲanmiɛn su kpa’n. Kpɛkun e uka sran mun naan be lafi su kɛ sran kun yɛ ɔ yili ninnge mun-ɔn. (1 Tim. 2:3, 4) Maan e ɲin tran blɛ mɔ be kwlaa nga be o asiɛ’n su’n, bé mánmán Zoova’n i sin kpa. Blɛ sɔ’n nun’n, bé wá sé kɛ: ‘Zoova e Ɲanmiɛn, sɛ be manman wɔ’n, i su-ɔ. Afin wɔ yɛ a yili like kwlaa-ɔ.’​—Ngl. 4:11.