Fluwa’n nun kannganfuɛ’m be kosan mun

Saun Yolɛ 19:16 se kɛ: “Nán amun fua amun wiengu kun i ti.” ?Ngue yɛ ndɛ sɔ’n kle e-ɔ?

Zoova seli Izraɛlifuɛ’m be kɛ ɔ fata kɛ be yo sanwun. Kɛ ɔ ko yo naan b’a kwla yo sɔ’n, ɔ seli be kɛ: “Nán amun tɔn amun osufuɛ’m be suɛn. Nán amun fua amun wiengu kun i ti naan amun tɔn i suɛn maan be fa ndɛ be yi i su naan be kun i ngbɛn. Min yɛ n ti Anannganman’n niɔn.”​—Sau. 19:2, 16.

Ebre nun ndɛ nga e kacili i Wawle nun kɛ “nán amun fua amun wiengu kun i ti’n” be kwla fa kan like kaka ndɛ. Zifu’m be fluwa kun m’ɔ kan Saun Yolɛ fluwa’n i ndɛ’n, ɔ seli kɛ: “Ndɛ ng’ɔ o Saun Yolɛ 19:16 nun’n, […] i wlɛ wunlɛ ti kekle. Afin be kwla fa kan like kaka ndɛ. Sɛ e waan é káci Ebre nun ndɛ sɔ’n i trele sa’n, é sé kɛ: ‘Nán jran ɔ wiengu’n i wun.’”

Kɛ ɔ ko yo naan fluwa sifuɛ wie’m b’a wun ndɛ sɔ’n i wlɛ kpa’n, be fali be ɲin be sieli i Saun Yolɛ 19:15 su. Ndɛ mma sɔ’n se kɛ: “Nán amun bu ndɛ kwlɛ. Nán amun nian kɛ sran nga ti yalɛfuɛ’n ti amún bú ndɛ yí i su. Nán amun nian kɛ sran nga kusu ti sikafuɛ’n ti amún jrɛ́n i sin. Sanngɛ kɛ ndɛ’n fa ti’n, yɛ amun fa kan man amun wiengu mun-ɔn.” Ɔ maan Saun Yolɛ 19:16 nun’n kɛ Zoova se kɛ nán Izraɛlifuɛ’m be fua be wiengu ti’n, i wie yɛle kɛ sɛ be su siesie awlobo ndɛ annzɛ aata dilɛ nun ndɛ annzɛ ndɛ uflɛ wie’n, ɔ fataman kɛ be nian sran ɲrun naan b’a di ndɛ’n. Sanngɛ ndɛ ng’ɔ o Saun Yolɛ 19:16 nun’n be kwla fa kan like uflɛ ndɛ wie.

Maan e fa e ɲin e sie i ndɛ mma sɔ’n i ndɛ ɲanman klikli’n su. Ɲanmiɛn seli i nvle nunfuɛ’m be kɛ nán be tɔn be wiengu suɛn. Asa ekun’n i waan nán be kan sran wun ndɛ be sin. Sran wun ndɛ kanlɛ’n ti tɛ. Sanngɛ ng’ɔ ti tɛ kpa’n yɛle sran suɛn tɔnlɛ’n. (Nya. 10:19; Aku. 10:12-14; 1 Tim. 5:11-15; Zak. 3:6) Sran ng’ɔ tɔn sran suɛn’n, i ɲinfu bua sran sɔ’n i su ato fa saci i dunman. Ɔ ju wie’n, be kwla kun sran nga be tɔnnin i suɛn’n bɔbɔ. Sa sɔ’n juli Nabɔti su. Sran wie’m be tɔnnin i suɛn kɛ w’a yo like tɛ kpa kun. I sɔ’n ti’n be finfinnin i yɔbuɛ lele be kunnin i. (1 Fam. 21:8-13) Ɔ maan Saun Yolɛ 19:16 nun’n kɛ be se kɛ nán e fua e wiengu ti’n, i wie yɛle kɛ nán e tɔn e wiengu suɛn. Afin sɛ e yo sɔ’n, e kwla fa e wiengu i nguan’n e sie i wie nuan.

Asa ekun’n, sran ng’ɔ tɔn i wiengu suɛn’n ɔ kle kɛ ɔ kpɔ i wiengu sɔ’n. Kusu 1 Zan 3:15 se kɛ: “Sran kwlaa ng’ɔ kpɔ i niaan’n, ɔ ti sran kunfuɛ. Yɛ amun si kɛ sran kunfuɛ’n su ɲanman nguan m’ɔ leman awieliɛ’n.” I sɔ’n ti’n, kɛ Ɲanmiɛn seli Izraɛlifuɛ’m be kɛ ‘nán be fua be wiengu ti,’ i sin’n ɔ seli be kɛ ‘nán be niaan i kpɔlɛ ndɛ sa tran be klun.’​—Sau. 19:17.

Ndɛ ng’ɔ o Saun Yolɛ 19:16 nun’n ɔ kle e like cinnjin kpa kun. Yɛle kɛ ɔ fataman kɛ e bu e wiengu’m be wun akunndan tɛ yɛ nán e tɔn be suɛn. Asa ekun’n, ɔ fataman kɛ e ɲin blo be wun. Sɛ e yo sɔ’n, ɔ cɛman naan y’a kpɔ be. Ɔ fata kɛ e nian e wun su kpa naan y’a yoman sɔ.​—Mat. 12:36, 37.