?Ɔ wla kpɛn su?

?A kanngannin afuɛ nga nun Sasafuɛ Tranwlɛ’n nga be fiteli’n be nun kpa? Sɛ ɔ ti sɔ’n, tɛ kosan nga’m be su maan e nian:

?Kɛ Zaki 5:11 nun’n be se kɛ “Zoova kleli kɛ sran ndɛ lo i kpa naan ɔ si sran aunnvuɛ’n,” ngue yɛ i sɔ’n kle e Zoova su-ɔ?

Kɛ mɔ Zoova si sran aunnvɔɛ ti’n, ɔ sisimɛn i bo naan w’a yaci e wun sa mun w’a cɛ e. Zaki 5:11 kle e ekun kɛ Zoova kunndɛ kpa kɛ ɔ́ úka e. Ɔ fata kɛ e niɛn i ajalɛ kpa sɔ’n su.​—w21.01, b. 21.

?Ngue ti yɛ Zoova mannin sran wie’m be kwlalɛ-ɔ?

Klolɛ m’ɔ klo e’n ti yɛ ɔ yoli sɔ-ɔ. I sɔ m’ɔ yoli’n ti’n, i awlo nunfuɛ’m be yo ninnge mun sɛsɛsɛ yɛ be tran fɔun. Sɛ awlobo kun nunfuɛ’m be nanti wafa nga Zoova fa siesieli ninnge’m be su’n, be su yoman ninnge mun sukusuku. Yɛle kɛ bé sí sran ng’ɔ fata kɛ ɔ fa ajalɛ mun awlo’n nun’n, yɛ bé sí sran ng’ɔ fata kɛ ɔ nanti be su’n.​—w21.02, b. 3.

?Ngue ti yɛ kɛ é fá ɛntɛnɛti é dí junman’n ɔ fata kɛ e nian e wun su-ɔ?

Sɛ e fa ɛntɛnɛti e di junman’n, ɔ fata kɛ e kpa be nga e tra be janvuɛ’n be nun kpa. I li sɛ e o sran akpasua kun mɔ i nunfuɛ’m be yia ɛntɛnɛti su be koko yalɛ’n i nun’n, yɛ ɔ fata kɛ e nian e wun su kpa’n niɔn. (1 Tim. 5:13) Asa’n, maan e nian e wun su naan y’a faman ato ndɛ wie mun y’a truman ɛntɛnɛti su. Kpɛkun nán e fa aniaan mun e kunndɛ sika.​—w21.03, b. 31.

?Ngue ti yɛ Ɲanmiɛn yacili Zezi lɛ m’ɔ wunnin ɲrɛnnɛn-ɔn?

Like klikli’n yɛle kɛ, kɛ be kunnin Zezi waka’n su’n i sɔ’n yoli maan Zifu’m be ɲannin be ti sannzan nga be boli be’n i sa nun. (Gal. 3:10, 13) I nɲɔn su’n yɛle kɛ Ɲanmiɛn waan ɔ́ klé Zezi like naan w’a kwla yo i ɲrun jranfuɛ dan. Kpɛkun i nsan su’n yɛle kɛ, kɛ Zezi nantili seiin lele ɔ fa wuli’n, ɔ kleli kɛ kannzɛ be kle sran kun i ɲrɛnnɛn tɛtɛ kpa bɔbɔ’n, sanngɛ ɔ kwla nanti seiin titi. (Zɔb 1:9-11)​—w21.4, b. 16-17.

?Sɛ lika nga e bo jasin fɛ’n lɛ’n e toman sran’m be awlo’n, ngue yɛ e kwla yo-ɔ?

Maan e wɔ blɛ nga e kwla to be awlo’n. Annzɛ e kacikaci lika nga e bo jasin fɛ’n. Annzɛ kusu maan e kacikaci wafa nga e bo jasin fɛ’n. I wie yɛle kɛ e kwla klɛ be nga e toman be awlo’n be fluwa.​—w21.05, b. 15-16.

?Kɛ akoto Pɔlu seli kɛ ‘mmla’n i dunman nun ti’n, ɔ wuli’n’ ngue ndɛ yɛ i waan ɔ́ kán-ɔn? (Gal. 2:19)

Moizi Mmla’n ti’n, Izraɛlifuɛ’m be wunnin i wlɛ kɛ be ti sa tɛ yofuɛ. Asa’n, mmla sɔ’n niannin be su lele Klisi bali. (Gal. 3:19, 24) Kɛ Pɔlu wunnin i sɔ liɛ’n i wlɛ’n, ɔ lafili Klisi su. Ɔ maan Mmla’n w’a siemɛn i kun. I ti’n, sɛ é kwlá sé’n, ‘mmla’n i dunman nun ti’n, ɔ wuli.’​—w21.06, b. 31.

?Sa benin nun yɛ Zoova trɛ i awlɛn-ɔn?

Sa sɔ mun yɛle kɛ sran’m be saci i dunman, be tɛnndɛn i sielɛ’n i ɲrun, i mma wie’m be yoli ɲin kekle i su, Satan buɛ i su ato cɛn kwlakwla, i sufuɛ kpa’m be wun be ɲrun, i janvuɛ wie’m be wuli, yɛ klunwifuɛ’m be kle sran’m be yalɛ. Asa’n, sran’m b’a saci dan, kpɛkun sran’m be saci ninnge ng’ɔ yili be’n.​—w21.07, b. 9-12.

?Be awlɛn tralɛ’n i su ajalɛ kpa benin yɛ Zozɛfu kle e-ɔ?

Zozɛfu i niaan’m be yoli i tɛ dan. Asa ekun’n, kɛ ɔ juli Ezipti lɔ’n, sran’m be tɔnnin i suɛn yɛ be wlɛli i bisua afuɛ kpanngban. Sanngɛ sa kwlaa sɔ’m be nun’n, ɔ trɛli i awlɛn minndɛli Zoova.​—w21.08, b. 12.

?Asiɛ’n i kejelɛ benin yɛ Aze 2:6-9, 20-22 kɛn i ndɛ-ɔ?

Kɛ e bo Ɲanmiɛn Sielɛ’n i jasin fɛ’n, ɔ yo sran kpan- ngban be ya. Sanngɛ be nun wie’m be fa ajalɛ kpa yɛ be su Ɲanmiɛn. Jasin fɛ sɔ mɔ e bo’n ɔ keje nvle’m be nun. Ɔ cɛ kan’n, Ɲanmiɛn wá kéje nvlenvle’m be nun ekun. Yɛle kɛ ɔ́ wá núnnún be.​—w21.09, b. 15-19.

?Ngue ti yɛ ɔ fataman kɛ e sa sin bubu e jasin fɛ’n i bolɛ’n nun-ɔn?

Zoova fɛ i ɲin sie i e ɲin mɔ e mian e bo jasin fɛ’n i su, yɛ ɔ yo i fɛ. Sɛ e sa sin bubuman e naan e bo i titi’n, é ɲán nguan m’ɔ leman awieliɛ’n.​—w21.10, b. 25-26.

?Wafa sɛ yɛ Saun Yolɛ ndɛ tre 19 kwla uka e naan y’a nanti ndɛ ng’ɔ o 1 Piɛli 1:15 nun’n su-ɔ?

E kwla se kɛ ndɛ ng’ɔ o 1 Piɛli 1:15 nun’n fin Saun Yolɛ 19:2 nun. Saun Yolɛ ndɛ tre 19 kan sa fanunfanun nga be nun e kwla nanti ndɛ ng’ɔ o 1 Piɛli 1:15 nun’n su’n, be ndɛ.​—w21.12, b. 3-4.