Sran kun i su ndɛ’n

Maan e si sran kwlaa aunnvɔɛ

Cɛn kun’n, aniaan bla kun m’ɔ tran Nuvɛli Zelandi lɔ’n ɔ niannin video kun jw.org su. Video sɔ’n kle kɛ sran’m be yoman Zoova i annvɔ sa ngbɛn, sanngɛ ɔ yo ninnge wie mun fa uka be. (Eza. 63:​7-9) Ɔ fali ajalɛ kɛ ɔ́ yó sɔ wie. Yɛle kɛ ɔ́ úka sran mun. Cɛn kunngba sɔ’n nun’n, kɛ ɔ ɔli i ninnge wie’m be tolɛ’n, ɔ wunnin bla kun m’ɔ la gua su-ɔ. Ɔ seli bla’n kɛ i waan ɔ́ tó like mɛ́n i naan ɔ di. Bla’n kplinnin su. Kɛ aniaan bla’n fali aliɛ’n bali’n, ɔ fali e fluwa nɲa ?Cɛn wie lele’n ɲrɛnnɛn’n wíe? fa boli jasin fɛ’n kleli bla’n.

Bla’n boli sunlɛ bo. Kpɛkun ɔ seli aniaan bla’n kɛ i si nin i nin be ti Zoova i Lalofuɛ naan i kaan nun’n be kleli i ndɛ nanwlɛ’n. Sanngɛ kɛ ɔ ɲinnin’n w’a suman Zoova. Sanngɛ koko nun wa’n, ɔ srɛli Zoova kɛ ɔ ukɛ i naan ɔ sɛ i sin i wun. Aniaan bla’n mɛnnin i Biblu kun, kpɛkun ɔ fali ajalɛ naan w’a kwla kle i Biblu’n nun like.a

E kwla si sran’m be aunnvɔɛ kɛ Zoova sa. Be nga e kwla si be aunnvɔɛ sɔ’n be wie yɛle e osufuɛ mun, nin e niaan nga be o asɔnun’n nun’n. Wafa nga e kwla kle kɛ e si aunnvɔɛ ekun’n, yɛle kɛ e kunndɛ wafa nga e kwla bo jasin fɛ’n e kle e wiengu mun’n.