?Ngue yɛ é yó naan y’a kwla su Zoova aklunjuɛ su titi ɔ?
“Sɛ sran kun cɛ nyanmiɛn’n bo wa lele naan ɔ di afuɛ kpanngban kpa bɔbɔ’n, ɔ fata kɛ i klun jɔ i sɔ’n ti.”—AKU. 11:8.
?AMÚN TƐ́ SU SƐ?
?Ngue ti yɛ wie liɛ’n, e wla bo e wun ɔn?
?Wafa sɛ yɛ Ɲanmiɛn Ndɛ’n kwla uka e naan y’a su Ɲanmiɛn aklunjuɛ su titi ɔ?
?Wafa sɛ angbeti bla’n, nin Eli, ɔ nin sran ng’ɔ toli Jue Mun 102 be su ndɛ’n, ɔ uka e naan y’a kwla su Ɲanmiɛn aklunjuɛ su titi ɔ?
1. ?Ninnge benin mun yɛ Zoova man e naan e klun jɔ ɔ?
ZOOVA kunndɛ kɛ e klun jɔ. I sɔ’n ti’n, ɔ man e ninnge kpanngban. Ninnge sɔ’m be nun kun yɛle nguan mɔ e le i’n. Kpɛkun, ɔ yoli maan e kwla su i e mɛnmɛn i. (Jue. 144:15; Zan 6:44) Asa ekun’n, ɔ kle e kɛ ɔ klo e. Ɔ suan e bo naan y’a kwla jran kekle i sulɛ’n nun. (Zer. 31:3; 2 Kor. 4:16) Ɔ fɛ i ndɛ’n sie e ɲrun titi. Kpɛkun, e nin e niaan mun e bo ti kun e tran fɛfɛfɛ. Ɔ maan, ɔ ti kɛ e o mɛn klanman’n nun sa. Asa ekun’n, like nga Ɲanmiɛn fa sie e ɲrun mɔ e lafi su’n ti’n, e wla gua ase.
2. ?Ngue ti yɛ Ɲanmiɛn i sufuɛ nanwlɛfuɛ wie’m be klun jɔman ɔn?
2 E mɔ e ti Ɲanmiɛn i sufuɛ’n, ɔ fata kɛ e klun jɔ. Sanngɛ e niaan wie’m be klun jɔman, be wla bo be wun. Afin be se be klun lɔ kɛ Ɲanmiɛn buman junman nga be di be mɛn i’n i like. Be liɛ’n, ɔ yo be kɛ be o aosin nun naan b’a mlin sa. Ɔ maan, kɛ be se kɛ “sɛ sran kun cɛ nyanmiɛn bo wa’n lele naan ɔ di afuɛ kpanngban’n” ɔ fata kɛ i klun jɔ’n, be bumɛn i nanwlɛ.—Aku. 11:8.
3. ?Ngue ti yɛ wie liɛ’n, e wla bo e wun ɔn?
3 E niaan wie mun’n, oke yolɛ annzɛ tukpacɛ’n, annzɛ sa wie mun ekun ti yɛ be wla bo be wun ɔn. (Jue. 71:9; Nya. 13:12; Mml. 28:34) Asa ekun’n, e kwlaa e klun akunndan’n ti tɛ. I sɔ’n ti, kannzɛ Ɲanmiɛn klun jɔ e wun’n, e wla kwla bo e wun. (Zer. 17:9; 1 Zan 3:20) Satan kusu bua Ɲanmiɛn i sufuɛ’m be su ato. Ɔ maan be nga be bu akunndan nga Satan bu’n wie’n, be kwla se e kɛ Ɲanmiɛn buman e sran. I sɔ ndɛ yɛ Elifazi m’ɔ lafiman Ɲanmiɛn su’n, ɔ kan kleli Zɔbu ɔ.—Zɔb 4:18, 19.
4. ?Ngue yɛ like suanlɛ nga wá klé e ɔ?
4 Zoova kɛn i weiin kɛ kannzɛ “e sin kongo tuun kpa b’ɔ yo sro’n i nun’n,” ɔ jin e sin. (Jue. 23:4) Wafa ng’ɔ kle kɛ ɔ jin e sin’n, i kun yɛle i nuan ndɛ’n m’ɔ fa mannin e’n. Ɲanmiɛn Ndɛ’n ‘ti kekleke, ɔ maan ɔ kwla bu awa ngblingbli mun.’ Yɛle kɛ Biblu’n kwla uka e naan y’a wla akunndan tɛtɛ nga e bu mɔ be ti kɛ awa ngblingbli sa’n, be ase. (2 Kor. 10:4, 5) Like suanlɛ nga wá klé e wafa nga Ɲanmiɛn Ndɛ’n kwla uka e naan y’a su Ɲanmiɛn aklunjuɛ su titi’n. I liɛ’n, e wla gúa ase. Kpɛkun, é kwlá wlá sran uflɛ fanngan naan w’a su Ɲanmiɛn aklunjuɛ su titi wie.
ƝANMIƐN NDƐ’N KWLA UKA E
5. ?Ngue yɛ e kwla yo naan y’a su Ɲanmiɛn aklunjuɛ su titi ɔ?
5 Akoto Pɔlu kannin ninnge wie mɔ e kwla yo naan y’a kwla su Ɲanmiɛn aklunjuɛ su titi’n be ndɛ. Ɔ seli Korɛnti lɔ Klistfuɛ mun kɛ: “Amun bɔbɔ an bu amun klun lɔ nian sɛ an lafi Krist su sakpa o.” (2 Kor. 13:5) Sran ng’ɔ lafi Klist su sakpa’n, ɔ fa ndɛ nga Klistfuɛ kpa’m be lafi su m’ɔ o Ɲanmiɛn Ndɛ’n nun’n i kwlaa su. Sɛ ndɛ nga e kan’n, ɔ nin e ayeliɛ’n be taka Ɲanmiɛn Ndɛ’n su’n, i sɔ’n kle kɛ e “lafi Klist su sakpa.” Ɔ maan like nga Ɲanmiɛn Ndɛ’n kle’n, ɔ fataman kɛ e nanti wie su naan e yaci wie lɛ.—Zak 2:10, 11.
6. ?Ngue ti yɛ ɔ fata kɛ ‘e bu e klun lɔ e nian sɛ e lafi Krist su sakpa’ ɔ? (An nian foto ng’ɔ o kan like suanlɛ’n bo i bo lɛ’n.)
6 Kɛ ɔ yo naan e bu e klun lɔ e nian sɛ e lafi Klist su sakpa’n, ɔ kwla yo kekle. I li kɛ e wla bo e wun’n, yɛ i sɔ yolɛ’n ti kekle kpa man e ɔ. Sanngɛ maan e wun i wlɛ kɛ Zoova i klun akunndan’n, ɔ nin e liɛ’n timan kun. Wafa ng’ɔ bu e’n yɛ ɔ ti cinnjin ɔn. (Eza. 55:8, 9) Kɛ Zoova niɛn i sufuɛ mun’n, ɔ nianman be naan ɔ́ bú be fɔ. Sanngɛ, ɔ fɛ i ɲin sie be nzuɛn kpa’n su. Kpɛkun, ɔ nian be naan ɔ́ úka be. Maan e nian Ɲanmiɛn Ndɛ’n nun. I liɛ’n, sɛ ‘e lafi Klist su sakpa’n,’ é wún i wlɛ. Asa ekun’n, é wún wafa nga Ɲanmiɛn bu e’n i wlɛ kpa wie. É wún i wlɛ kɛ Ɲanmiɛn bu e sran. Ɔ maan, e wla gúa ase, yɛ e ɲrun’n títí.
7. ?Wafa sɛ yɛ laa Ɲanmiɛn i sufuɛ kpa wie’m be su ndɛ’n kwla uka e ɔ?
7 Biblu’n kan laa Ɲanmiɛn i sufuɛ kpa wie’m be ndɛ. Maan e bu be su ndɛ sɔ’m be akunndan kpa. I sɔ’n úka e naan y’a bu e klun lɔ y’a nian sɛ e “lafi Klist su sakpa o.” Kɛ é yó sɔ’n, maan e fa sa ng’ɔ juli be su’n e sunnzun e liɛ’n. Kpɛkun wafa nga sa sɔ’n yoli be’n, maan e bu i akunndan. Yɛ maan e usa e wun kɛ sɛ sa ng’ɔ juli be su’n, ɔ ju e su wie’n ngue yɛ é yó ɔ. Sran sɔ mɔ Biblu’n kan be ndɛ’n, é wá kán be nun nsan be ndɛ. Be su ndɛ sɔ’n wá úka e naan y’a kwla su Zoova aklunjuɛ su titi.
ANGBETI BLA YALƐFUƐ’N
8, 9. (a) ?Ngue sa yɛ ɔ o angbeti bla’n i su ɔ? (b) ?Akunndan benin yɛ atrɛkpa’n, angbeti bla’n buli ɔ?
8 Cɛn kun’n, Ɲanmiɛn sua’n nun Zerizalɛmu lɔ’n, Zezi fɛli i ɲin sieli i angbeti bla kun su. Like nga bla sɔ’n yoli’n i su ndɛ nga Zezi kannin’n, ɔ kwla uka e kpa. Ɔ kwla uka e naan sɛ e kwlá suman Ɲanmiɛn kɛ nga e sunnzun kɛ é sú i’n sa’n, e sa sin w’a bubuman e. (An kanngan Lik 21:1-4 nun.) Maan e bu sa ng’ɔ o bla sɔ’n su’n i akunndan e nian. I wun’n wuli, yɛ i wla w’a bo i wun. Asa ekun’n, i blɛ su Ɲanmiɛn sufuɛ’m be su kpɛnngbɛn’m be nianman be nga be leman wie’m be lɔ. I tɛ bɔbɔ’n, “be de angboti mmla’m be awlo mun.” (Lik 20:47) Angbeti bla’n ti yalɛfuɛ dan. Afin sika ng’ɔ fa guɛli i sika guawlɛ’n nun’n, ɔ juman be blɛ su sran ng’ɔ di junman miniti ablasan’n i akatua.
9 Kɛ bla’n fɛ́ i jɛtɛ mma kanngan nɲɔn’n kó gúɛ sika guawlɛ nun’n, an bu wafa nga i sɔ’n yoli i’n i akunndan be nian. Atrɛkpa’n, ɔ seli i klun lɔ kɛ sɛ ɔ ti kɛ i wun’n i ɲin o su’n, nn sika ng’ɔ́ mán’n, ɔ́ trá ngalɛ’n. Asa kusu’n, kɛ ɔ wunnin kɛ ɔ kwlá manman sika kpanngban kɛ aɲanbeunfuɛ’m be liɛ’n sa’n, atrɛkpa’n, ɔ yoli i ɲannzuɛn. Sanngɛ i kwlaa yoli o, ɔ yoli i liɛ ng’ɔ kwla yo’n naan w’a suan Ɲanmiɛn sulɛ’n i bo’n.
10. ?Wafa sɛ yɛ Zezi kleli kɛ Zoova bu angbeti bla’n i sran ɔn?
10 Zezi kleli kɛ Zoova bu angbeti bla’n i sran naan i ɲin yi like nga bla’n mannin’n. Ɔ seli kɛ bla’n “i sika liɛ’n b’ɔ yili’n, ɔ tra [aɲanbeunfuɛ’m] be kwlaa be liɛ’n.” Sika mɔ bla’n mannin’n, bé wá fá sánngan sika nga sran uflɛ’m be yili’n nun. Ɔ nin i sɔ ngba’n, Zezi buli bla’n i wun m’ɔ klɛn mannin Zoova i like dan. Kɛ be nga be nian sika guawlɛ’n su’n bé wá ísa i nun sika’n bé kó ká’n, be su siman kɛ Zoova bu angbeti bla’n i sika ng’ɔ mannin’n i like dan. Yɛ be su wunmɛn i wlɛ kɛ Zoova bu bla sɔ’n i sran. Sanngɛ, nán wafa nga be bu bla’n, annzɛ wafa nga bla’n bɔbɔ bu i wun’n yɛ ɔ ti cinnjin ɔn. Wafa nga Zoova bu i’n yɛ ɔ ti cinnjin ɔn. ?Ngue yɛ angbeti bla’n i su ndɛ sɔ’n kle e ɔ?
11. ?Ngue yɛ angbeti bla’n i su ndɛ’n kle e ɔ?
11 Sa nga be o e su’n ti’n, wie liɛ’n, e kwlá yoman like nga e klo kɛ é yó mán Zoova’n i kpa. I wie yɛle kɛ oke yolɛ’n nin tukpacɛ’n ti’n, aniaan wie’m be kwlá faman blɛ kpanngban be boman jasin fɛ’n. I sɔ’n ti, wie liɛ’n, be se be klun lɔ kɛ b’a yoman like fi naan b’a mɛn i su rapɔru. Wie liɛ’n, nán kɛ sa kekle wie tanndan sran’n i ɲrun ɔn. Sanngɛ, ɔ kwla se i klun lɔ kɛ i ɲin m’ɔ mian bo jasin fɛ’n ɔ ti ngbɛn. Sɛ i sɔ wie yɛ e bu’n maan e wla kpɛn angbeti bla yalɛfuɛ’n i ndɛ’n su. I ndɛ’n kle kɛ Zoova fɛ i ɲin sie like nga e yo mɛn i’n su. Yɛ kannzɛ ɔ ti kaan sɛ’n, sanngɛ ɔ bu i like dan. I li kɛ sa wie o e su mɔ e mian e ɲin e yo like sɔ’n yɛ ɔ bu i like dan kpa’n niɔn. Ninnge nga e yo mannin Zoova afuɛ ng’ɔ sinnin lɛ’n nun’n, maan e bu be akunndan e nian. Atrɛkpa’n, e miannin e ɲin kpa naan y’a kwla yo ninnge wie mun. Sɛ i sɔ yɛ e yoli’n, maan e lafi su kɛ i sɔ’n jɔli Zoova i klun. Kɛ Zoova i sulɛ’n nun e mian e ɲin e yo like kwlaa nga e kwla yo’n, i sɔ’n kle kɛ e “lafi Klist su sakpa.”
“FA MIN NGUAN’N”
12-14. (a) ?Akunndan benin yɛ Eli buli ɔ? (b) ?Ngue ti yɛ Eli buli i sɔ akunndan’n niɔn?
12 Eli ti Zoova nuan ijɔfuɛ nanwlɛfuɛ. Ɔ lafi Zoova su kpa. Sanngɛ blɛ wie nun’n, i wla wa boli i wun dan. Ɔ maan, ɔ seli i klun lɔ kɛ ɔ flunman kɛ ɔ wu. Ɔ seli Zoova kɛ: “Anannganman w’a yo kpa sɔ. Fa min nguan’n.” (1 Fam. 19:4) Be nga sa kɛ ngalɛ’n sa’n nin a juman be su le’n, be kwla bu i kɛ Eli w’a buman i srɛlɛ sɔ’n i sin naan ɔ ‘kan ndɛ’n ɔ tɔtɔ nun.’ (Zɔb 6:3) Sanngɛ nn Eli i ndɛ kpa ɔ. Zoova kusu w’a buman i fɔ, sanngɛ ɔ ukɛli i.
13 ?Ngue ti yɛ Eli i wla boli i wun sɔ ɔ? Cɛn kun’n, Eli yoli abonuan sa kun Izraɛlifuɛ’m be kwlaa be ɲrun. Sa sɔ’n kleli weiin kɛ Zoova yɛ ɔ ti Ɲanmiɛn’n niɔn. Ɔ maan cɛn sɔ nun’n, be kunnin Baal i nuan ijɔfuɛ 450. (1 Fam. 18:37-40) Eli buli i kɛ, kɛ ɔ fin i lɛ’n, Izraɛlifuɛ’m bé wá sá be sin bé sú Zoova. Sanngɛ b’a yoman sɔ. I tɛ bɔbɔ’n, Famiɛn’n i yi Zezabɛli sunmannin sran kun kɛ ɔ ko se i kɛ ɔ́ wá kún i. Kɛ Eli tili ndɛ sɔ’n, srɛ kunnin i dan. Ɔ maan, ɔ wanndi ɔli Zida nvle nun aawlɛ flɛnnɛn’n nun lɔ, ɔ ko fiali.—1 Fam. 18:37-40.
14 Kɛ i kunngba ti i fiawlɛ’n nun lɔ’n, ɔ seli i klun lɔ kɛ Ɲanmiɛn nuan ijɔfuɛ junman m’ɔ su di’n, ɔ ti i wun yalɛ klelɛ ngbɛn. I sɔ’n ti, ɔ seli Zoova kɛ: “N timan kpa n traman min si mun.” I si mɔ be wuli’n b’a kaci ndutre, yɛ be kwlá yoman like fi kun. Ɔ maan, Eli su se kɛ ɔ o i liɛ sa ngbɛn. Naan ninnge ng’ɔ yo be’n, ɔ leman kun sa mɔ Zoova nin sran’m be bu i like kpa ɔ.
15. ?Wafa sɛ yɛ Zoova kleli Eli kɛ ɔ ti i sran nanndoliɛ ɔ?
15 Akunndan nga Eli buli’n, nɛ́n i wie yɛ Zoova mɔ like fi nunmɛn i sin’n ɔ bu ɔ. Zoova bu Eli i sran nanndoliɛ. Ɔ yoli ninnge wie mun naan Eli wun i wlɛ sɔ. Yɛle kɛ, ɔ sunmɛnnin i anzi kun naan ɔ wa wla Eli i fanngan. Asa ekun’n, Zoova mɛnnin i aliɛ naan w’a ɲan wunmiɛn w’a kwla nanti cɛn ablanan w’a ju Orɛbu oka’n su lɔ. Asa kusu’n, Zoova tinngɛli i akunndan’n naan w’a bumɛn i kɛ i ngunmin yɛ ɔ te su i nanwlɛ su ɔ. I kpa bɔbɔ’n, Zoova mɛnnin i junman kun kɛ ɔ ko di. Nanwlɛ, Zoova wlali Eli fanngan. Ɔ maan Eli kwla ko dili i junman’n ekun.—1 Fam. 19:5-8, 15-19.
16. ?Wafa sɛ yɛ Zoova wlali amun fanngan ɔn?
16 Sa ng’ɔ juli Eli su’n, ɔ kwla uka e naan sɛ e lafi Klist su sakpa’n, y’a wun i wlɛ naan e sa sin w’a bubuman e. I klikli nun’n, maan e bu wafa nga Zoova nian e lika’n i akunndan. Atrɛkpa’n, asɔnun kpɛnngbɛn kun annzɛ aniaan kun mɔ i ɲin w’a ti Ɲanmiɛn sulɛ’n nun kpa’n, w’a man e afɔtuɛ wie le. (Gal. 6:2) ?Kɛ e kanngan Biblu’n nin fluwa nga anuannzɛ’n yi be’n be nun’n nin? ?Yɛ kɛ e kɔ aɲia’m be bo’n nin? I kwlaa sɔ’m be wla e fanngan dan. ?Nɛ́n i ɔ? Cɛn kwlaa nga be wla e fanngan’n, maan e wla kpɛn su kɛ i sɔ’n fin Zoova naan e lɛ i ase.—Jue. 121:1, 2.
17. ?Kɛ Zoova niɛn i sufuɛ mun’n, ngue su yɛ ɔ fɛ i ɲin sie ɔ?
17 Like kun ekun m’ɔ fata kɛ e wun i wlɛ’n yɛle kɛ, wafa nga Zoova bu e’n yɛ ɔ ti cinnjin ɔn. (An kanngan Rɔmfuɛ Mun 14:4 nun.) Zoova liɛ’n, sɛ like nga e yo’n ti kaan annzɛ ɔ ti dan’n, nɛ́n i lifuɛ’n su yɛ ɔ fɛ i ɲin sie ɔ. Wafa nga e tu e klun e yo like sɔ’n, i su yɛ ɔ fɛ i ɲin sie ɔ. Kɛ Eli sa’n, e kwla bu i kɛ like nga e yo man Zoova’n, ɔ ti e wun yalɛ klelɛ ngbɛn. Sanngɛ nn like dan kpa yɛ e yo ɔ. Atrɛkpa’n, e ayeliɛ’n kle aniaan wie’m be ajalɛ kpa. Asa ekun’n, jasin fɛ’n mɔ e tu e klun e bo’n ti’n, sran wie’m be kwla tili ndɛ nanwlɛ’n.
18. ?Ngue yɛ junman kwlaa nga Zoova man e’n, ɔ kle ɔ?
18 I kasiɛn su’n, junman kwlaa nga Zoova man e’n, maan e wun i wlɛ kɛ i klun jɔ e wun ti yɛ ɔ man e ɔ. (Zer. 20:11) Kɛ Eli sa’n, e kwla bu i kɛ Zoova i junman nga e di’n ɔ baman nvlɛ. Wie liɛ kusu’n, e kwla bu i kɛ like nga e sunnzun kɛ é yó i Zoova i sulɛ nun’n, e su kwlá yomɛn i le. I sɔ’n ti’n, e sa sin kwla bubu e. Sanngɛ, maan e wun i wlɛ kɛ Zoova w’a yiman e ase. Afin i dunman’n o e su, yɛ e bo jasin fɛ’n m’ɔ ti junman nanndoliɛ’n. I sɔ’n ti’n, maan e tu e klun e su Zoova titi. I liɛ’n, kɛ nga Zezi fa kɛnnin i junman difuɛ nsan be wun ɲanndra’n nun sa’n, ɔ́ sé e kɛ: “Bla maan e si able.”—Mat. 25:23.
“NYRƐNNƐNFUƐ BƆ I WLA A BO’N” I SRƐLƐ’N
19. ?Sa benin yɛ ɔ o sran ng’ɔ toli Jue Mun 102 i su ɔ?
19 Kɛ sran ng’ɔ kpɛli Jue mun 102 tó jue sɔ’n, nn ‘i wla a bo.’ Awlaboe’n ti’n, ɔ leman wunmiɛn kun. (Jue. 102, jue’n i su fitilɛ) Ndɛ ng’ɔ kannin’n kle kɛ awlaboe’n w’a kun i kpo, naan w’a kɛ i liɛ ngunmin. (Jue. 102:4, 5, 7, 12) Ɔ yoli i kɛ Zoova w’a yi i blo mmua sa.—Jue. 102:10.
20. ?Sɛ sran kun o ɲrɛnnɛn’n nun naan ɔ srɛ Zoova, wafa sɛ yɛ i bo gúa mɛ́n i ɔ?
20 Jue tofuɛ’n o ɲrɛnnɛn’n nun. Sanngɛ, w’a yaciman Zoova i manmanlɛ. (An kanngan Jue Mun 102:20-22 nun.) Jue Mun 102 kle kɛ be nga be lafi Ɲanmiɛn su kpa bɔbɔ’n, be wla kwla bo be wun wie. Kɛ ɔ yo sɔ’n, sa ng’ɔ o be su’n i ngunmin i akunndan yɛ be bu ɔ. Jue tofuɛ’n seli kɛ ‘w’a kaci i liɛ kɛ anunman bɔ i kunngba tran sua’m be ti su’n sa.’ Yɛle kɛ ɔ ɲanman sran naan w’a ukɛ i. Sɛ ɔ yo e sɔ wie’n, maan e srɛ Zoova e fa sa’n e wlɛ i sa nun. I sɔ’n kwla uka e naan e wla w’a gua ase. Afin Zoova bɔbɔ seli kɛ “ɔ́ síe i su be nga afɛ o be su’n be srɛlɛ’n i bo. Be srɛlɛ sɔ’n su yomɛn i tɛ.” (Jue. 102:17) Maan e lafi ndɛ sɔ’n su kpa.
21. ?Sɛ e wla bo e wun’n, ngue yɛ é yó naan y’a jran kekle ɔ?
21 Sɛ e wla bo’n, Jue Mun 102 kan like nga e kwla yo naan y’a jran kekle’n i ndɛ wie. Yɛle kɛ jue tofuɛ’n buli Zoova i tranlɛ m’ɔ nin i be tran’n i akunndan. (Jue. 102:12, 27) Ɔ wunnin i wlɛ kɛ Zoova kpɔcimɛn i sufuɛ mun le. I sɔ’n wlɛli i fanngan. Ɔ maan, sɛ sa wie ti e wla bo naan e kwlá diman Zoova i junman’n kɛ nga e sunnzunnin kɛ é dí’n sa’n, maan e srɛ i. Maan e srɛ i kɛ ɔ suan e bo naan e wun sa ng’ɔ o e su’n i trawlɛ. Sanngɛ, like ng’ɔ ti cinnjin kpa’n yɛle kɛ, maan e srɛ i naan ‘sran’m be bo i dunman’n.’—Jue. 102:20, 21.
22. ?Ngue yɛ e tinuntinun e kwla yo naan Zoova i klun w’a jɔ e wun ɔn?
22 Nanwlɛ, Ɲanmiɛn Ndɛ’n kwla uka e naan sɛ e lafi Klist su sakpa’n, y’a wun i wlɛ. Asa ekun’n, ɔ uka e naan y’a wun i wlɛ kɛ e ti Zoova i sran nanndoliɛ. Satan i mɛn’n nga nun sɛ é kwlá sé’n, afɛ’n su e su cɛn kwlaa. Ɔ maan e kwlá seman kɛ e wla su boman e wun le. Sanngɛ, e tinuntinun e kwla mian e ɲin e su Zoova klanman titi. Sɛ e yo sɔ’n, Zoova i klun jɔ́. Kpɛkun, ɔ́ mán e anannganman nguan.—Mat. 24:13.