Ɲanmiɛn mannin Zezi i tinmin naan ɔ yo naan ɲrɛnnɛn kwlaa be wie. Abonuan sa nga Zezi yoli be’n be kle kɛ ɔ kwla siesie e su sa nga e bɔbɔ e kwlá siesieman’n. I wie yɛle kɛ ɔ kwla nunnun fɔ mɔ Adan i sa tɛ’n ti’n, ɔ trannin klɔ sran’m be nun’n ɔ nin i sin sa mun. I wie yɛle tukpacɛ’n nin wie’n. (Mat. 9:​1-6; Rɔm. 5:​12, 18, 19) Abonuan sa ng’ɔ yoli be’n be kle kɛ ɔ kwla yo maan tukpacɛ “wafawafa kwlaa” be wie. Yɛ ɔ kwla cɛn be nga be wuli’n mun bɔbɔ. (Mat. 4:23; Zan 11:​43, 44) Asa’n, ɔ kwla mmusu mun yɛ ɔ kwla yo maan aunmuan ng’ɔ fita dan kpa bɔbɔ’n ɔ kpɛ. (Mar. 4:​37-39; Lik. 8:2) Nanwlɛ, kɛ e si kɛ Zoova fɛli i sɔ tinmin’n mɛnnin i Wa’n, i sɔ’n yo e fɛ dan! E kwla lafi su kɛ Ɲanmiɛn Sielɛ blɛ’n nun’n, nda kwlaa nga Ɲanmiɛn tali’n bé kpɛ́n su. I nun mɔ Zezi o asiɛ’n su wa’n ɔ yoli abonuan sa kpanngban. I sɔ’n kle kɛ kɛ ɔ́ wá dí Famiɛn’n, ɔ́ yó i sɔ asiɛ wunmuan’n su. w23.04 3 § 5-7

Sɛ a o asɔnun bo kun mɔ i nunfuɛ’m be sɔnnin’n nun naan be faman ijɔlɛ’n be wlaman ɔ nuan kpɛ sunman’n a kwla se ɔ wun kɛ sɛ a yaci ɔ sa’n su manlɛ’n ɔ flunman. Sanngɛ nán yaci ɔ sa’n su manlɛ. Kɛ á síesíe ɔ wun awlo lɔ’n, sie kosan kpanngban mɔ a kwla tɛ be su’n be nzɔliɛ. Kpɛkun aɲia’n bo lɔ’n, sɛ a man ɔ sa’n su kosan kun su naan b’a tɛman ɔ su’n, man ɔ sa’n su kosan uflɛ su ekun. Asa’n, kɛ á síesíe Sasafuɛ Tranwlɛ’n, bu wafa nga ndɛ kpɔlɛ mun nin like suanlɛ’n i flɛlɛ’n be kɔ likawlɛ’n i akunndan. Sɛ a yo sɔ’n, lele mɔ aɲia’n fá wíe’n a kwla wun ndɛ kun mɔ a kwla kan-ɔn. Asa ekun’n, a kwla siesie ɔ wun naan w’a tɛ ndɛ kpɔlɛ nga be yiyi Biblu’n nun ndɛ nga be bo ti kploun kpa’n be nun’n, be kosan’n su. ?Ngue ti-ɔ? Afin kɛ e ko ju ndɛ kpɔlɛ sɔ’m be su’n, sran kpanngban be manman be sa’n su. ?Yɛ sɛ a kwlá tɛman kosan wie fi su nin? I lɛ nun’n, ka naan aɲia kun w’a bo i bo’n, a kwla ko wun aɲia’n i tinngɛfuɛ’n i wun kpɛkun a se i kɛ kosan kun wo lɛ mɔ a kunndɛ kɛ á tɛ́ su-ɔ. w23.04 21-22 § 9-10

Zozɛfu i klunklo su’n ɔ yoli like kwlaa nga Zoova seli i kɛ ɔ yo’n. Ɔ maan ɔ yoli bian kpa. Kpɛ nsan, Zoova kleli i like ng’ɔ fata kɛ ɔ yo naan w’a sɛsɛ i awlobofuɛ mun’n. Blɛ kwlaa sɔ’n nun’n, Zozɛfu ka lɛ yoli like nga Zoova seli i kɛ ɔ yo’n. Kannzɛ ninnge sɔ’m be yolɛ w’a yoman pɔpɔ’n, sanngɛ ɔ miɛnnin i ɲin yoli be. (Mat. 1:20; 2:​13-15, 19-21) Kɛ mɔ Zozɛfu nantili ajalɛ kwlaa nga Ɲanmiɛn fali be’n be su’n ti’n, ɔ kwla sasali Mari yɛ ɔ niɛnnin i lika. Ninnge nga Zozɛfu yoli be’n ti’n, e si kɛ Mari kloli i kpa yɛ i ɲin yili i! Yasua nga b’a ja bla’n, amun kwla nian Zozɛfu i ajalɛ’n su. Yɛle kɛ amun awlobofuɛ’m be lika nianlɛ’n nun’n, amun nanti Biblu’n nun ndɛ’n su. I liɛ’n, kannzɛ lika’n kaci amun su sɛ’n, amún kló amun yi mun titi yɛ amun aja’n táka kpa. Aniaan bla kun tran nvle nga be flɛ i kɛ Vanuatu’n nun yɛ ɔ nin i wun be jali w’a di afuɛ 20. Ɔ seli kɛ: “Kɛ min wun waan ɔ́ fá ajalɛ kun’n ɔ kunndɛ ajalɛ sɔ’n i su ndɛ nga Zoova kan’n kpɛkun ɔ nanti ndɛ nga Zoova kan’n su. Kɛ ɔ yo sɔ’n, min ɲin yi i kpa tra laa’n. Asa’n, min wla gua ase yɛ n lafi su kɛ ajalɛ ng’ɔ fa be’n be ti kpa.” w23.05 21 § 5