Zoova i Lalofuɛ’m be yi fluwa aniɛnaniɛn ko ju 750 tra su nun, naan b’a tu be klun b’a bo ‘jasin fɛ’n’ b’a kle be nga “be fin mɛnmɛn nin nvle-nvle’n kwlaa nun’n, ɔ nin be kwlaa nga be aniɛn’n ti fanunfanun’n, ɔ nin sran wafa-wafa’n kwlaa.” (Sa Nglo Yilɛ 14:6) ?Wafa sɛ yɛ i sɔ’n kwla yo ye ɔ? Mɛn wunmuan’n nun’n, be nga be klɛ fluwa sɔ mun’n, ɔ nin sran kaka mɔ be kaci fluwa mun aniɛn­aniɛn’m be nun’n, yɛ be suan junman sɔ’n i bo ɔ.

Be dun mmua klɛ fluwa’m be nun ndɛ mun Angle nun. Zoova i Lalofuɛ’m be anuannzɛ’n i Ɲrun dinfuɛ’m be junman nga nian junman nga be di i biolo nga be flɛ i Fluwa klɛlɛ lika’n su. Biolo sɔ’n kusu nian be nga be klɛ fluwa’n be junman’n su. Be nun wie’m be o Betɛli nga ɔ ti be anuannzɛ’n i bo bia’n, i nun lɔ, yɛ wie’m be o Betɛli uflɛ’m be nun. Kɛ mɔ fluwa klɛfuɛ’m be fin nvle fanunfanun nun’n ti’n, ndɛ nga ɔ o Zoova i Lalofuɛ’m be fluwa’m be nun’n, ɔ kan sran fanunfanun.

Be fa ndɛ’n ko man fluwa kacifuɛ mun. Kɛ be ko wie fluwa kun nun ndɛ’n i klɛ’n, mɔ biolo’n man atin’n, be fa ndɛ’n be sie i ɔrdinatɛli nun. Kpɛkun ɔ tɔ be nga be kaci fluwa mun aniɛnaniɛn’m be nun’n, mɔ be o mɛn wunmuan’n nun’n, be sa nun. Be kusu’n, be jran ndɛ nga be klɛli i Angle nun su yɛ be kaci i be aniɛn’n nun, naan i ɲin w’a fite weiin kpa kɛ nga be fa kɛnnin i Angle nun’n sa ɔ.​—Akunndanfuɛ’n 12:10.

Ɔrdinatɛli’m be ti’n junman’n kɔ ndɛndɛ. Nanwlɛ, ɔrdinatɛli’m be kwlá diman junman nga fluwa klɛfuɛ nin i kacifuɛ’m be di’n. Sanngɛ be ti yɛ junman’n di ndɛndɛ ɔ. Yɛle kɛ Zoova i Lalofuɛ’m be yili ɔrdinatɛli nun like nga be flɛ i MEPS (Système électronique d’édition multilingue). Ɔ uka be maan be kwla klɛ ndɛ mun aniɛnaniɛn kpanngban nun ɔrdinatɛli’n nun. Kpɛkun, ɔ yo maan be kwla fa desɛn annzɛ foto be fa sie i ndɛ nga be klɛli’n i wun. I sin’n, be fɛ i kwlaa sɔ’n fa sie i fluwa su.

Nanwlɛ, junman nga Zoova i Lalofuɛ’m be di’n, ɔ timan kaan. Aniɛn wie’m be o lɛ bɔbɔ’n, i kanfuɛ’m b’a sɔnman. Sanngɛ ɔ nin i sɔ ngba, Zoova i Lalofuɛ’m be yi fluwa aniɛn sɔ’m be nun. ?Yɛ ngue ti ɔ? Be yo i sɔ, afin Zoova “klo kɛ ɔ́ dé sran’m be kwlaa naan be wun sa ng’ɔ ti nanwlɛ’n i wlɛ kpa.”​—1 Timote 2:3, 4.

• ?Ngue yɛ Zoova i Lalofuɛ’m be yo naan b’a yi be fluwa mun ɔn?

• ?Ngue ti yɛ Zoova i Lalofuɛ’m be kacikaci fluwa mun aniɛn kpanngban nun sɔ ɔ?

Afuɛ kwlaa nun’n, Zoova i Lalofuɛ’m be yi Biblu’n akpinngbin kpanngban, ɔ nin fluwa uflɛ wie mun, be fa cɛcɛ sran mun. Be yoman be atɛ. Asa’n, be kplan Ɲanmiɛn Sielɛ Sua nin Betɛli mun, yɛ be nian be lika wie. Asa ekun’n, be nian Betɛli lɔ junman difuɛ nin ngaliɛ difuɛ’m be lika, kpɛkun kɛ ɲrɛnnɛn sa’m be tɔ sran’m be su’n, be di be nɛnnɛn wie. Atrɛkpa’n, a usa ɔ wun kɛ: ‘?Nin yɛ be ɲan sika be yo i kwlaa ngalɛ’n niɔn?’

Be yiman blusu, be srɛman sika, yɛ be deman gbogbo nun sika. Kannzɛ bɔbɔ Zoova i Lalofuɛ’m be bo jasin fɛ’n bolɛ junman’n i wun kalɛ dan’n, sanngɛ be srɛman sran sika naan b’a fa suan be junman’n i bo. I afuɛ ya tra su yɛ, fluwa Sasafuɛ Tranwlɛ’n i nɲɔn su’n nun’n, be seli kɛ be lafi su kɛ Zoova jin be sin. Naan i ti’n, be su “srɛman klɔ sran kɛ ɔ suan be bo.” Sakpasakpa, b’a srɛman sran sika le!​—Matie 10:8.

Be klunklo sika nga be man’n yɛ be fa di junman ɔn. Biblu’n nun like mɔ Zoova i Lalofuɛ’m be kle’n, ɔ jɔ sran wie’m be klun. Ɔ maan be klunklo su’n, be man be sika kan be fa suan be junman sɔ’n i bo. Asa ekun’n, Zoova i Lalofuɛ’m be bɔbɔ be fa be blɛ’n, ɔ nin be wunmiɛn’n ɔ nin be sika’n, ɔ nin be ninnge kpakpa nga be le be’n, be fa di Ɲanmiɛn i junman’n asiɛ wunmuan’n su aklunjuɛ su. (1 Be Nyoliɛ 29:9) Aɔtɔ wie’m be o Ɲanmiɛn Sielɛ Sua nin aɲia dandan’m be yowlɛ’m be nun, be nga be kunndɛ kɛ bé mán be klunklo like kan’n, be fa gua nun. Annzɛ be kwla sin e ɛntɛnɛti adrɛsi jw.org i lika be yo sɔ. Blɛ sunman’n, be nga be gua sika aɔtɔ’m be nun’n, be dan lika timan aɲanbeunfuɛ. Be ti kɛ angbeti bla yalɛfuɛ nga Zezi kɛnnin i ndɛ’n sa. I waan bla sɔ’n fali jɛtɛ mma kanngan nɲɔn guɛli i Ɲanmiɛn sua nun lɔ sika guawlɛ’n nun. (Lik 21:1-4) Ɔ maan cɛn kwlaa, sran ngba kwla ‘yi sika nga i sa ju su’n sie’ naan ‘i like ng’ɔ bu i akunndan kɛ sɛ ɔ man-an ɔ ti kpa’n, w’a fa man.’​—1 Korɛntfuɛ Mun 16:2; 2 Korɛntfuɛ Mun 9:7.

Zoova i Lalofuɛ’m be si kɛ, kɛ ɔ ko yo naan Zoova i klun sa’n w’a kwla kpɛn su’n ti’n, be nga be kunndɛ kɛ bé ‘fá be sa nun ninnge kpakpa’n wie bé lɛ́’ i ase’n, ɔ́ kán be awlɛn’n titi naan b’a suɛn i Sielɛ junman’n i bo.​—Nyanndra Mun 3:9.

• ?Ngbaciɛ benin yɛ ɔ o Zoova i Lalofuɛ mun ɔ nin Ɲanmiɛn sulɛ wafa onga’m be afiɛn ɔn?

• ?Sika nga sran’m be klunklo su be man’n, junman benin yɛ be fa di ɔ?

Biblu’n fa sran’m be ɲin sie i Ɲanmiɛn Sielɛ’n mɔ Zezi kɛnnin i ndɛ’n i su. Ɔ maan be flɛ Zoova i Lalofuɛ’m be aɲia sua’n kɛ Ɲanmiɛn Sielɛ Sua.​—Lik 8:1.

Be ti Ɲanmiɛn sulɛ kpafuɛ’n i sua. Lika sɔ’n nun yɛ be siesie jasin fɛ’n bolɛ junman’n niɔn. (Matie 24:14) Ɔ le sua kun nin i kplanlɛ wafa, sanngɛ be ngba be ti sɛsɛ. Blɛ sunman nun’n, asɔnun nɲɔn, annzɛ nɲɔn tra su be yo aɲia lɔ. Jasin bofuɛ nin asɔnun mɔ be su sɔn’n ti’n, koko nun wa’n, be kplannin Ɲanmiɛn Sielɛ Sua akpiakpi ya tra su. Ɔ ti kɛ cɛn kun sa’n, be kplan sua nnun sa. ?Wafa sɛ yɛ i sɔ’n kwla yo ye ɔ?​—Matie 19:26.

Sika nga sran’m be man’n be guɛ i likawlɛ naan b’a fa kplan be sua sɔ mun. Be fa sika sɔ’n ko man Betɛli’n. Asɔnun kwlaa nga ɔ kunndɛ kɛ ɔ́ kplɛ́n i Ɲanmiɛn Sielɛ Sua annzɛ ɔ́ síesíe i ye’n, be kwla mɛn i wie.

Sua kplanfuɛ’m be ti sran wafawafa. Be tuaman be kalɛ. Nvle sunman nun’n, be siesieli Ɲanmiɛn Sielɛ Sua kplanfuɛ’m be akpasuaakpasua. Kɛ be ko kplan sua kun’n, be kɔ nvle kunngba’n nun asɔnun uflɛ liɛ’n su. Kannzɛ bɔbɔ lika’n o mmua sɛ’n, sanngɛ be kɔ lɔ be ko uka asɔnun mun be Ɲanmiɛn Sielɛ Sua’m be kplanlɛ’n nun. Nvle uflɛ wie’m be nun’n, be sieli Zoova i Lalofuɛ wie mɔ be si sua kplanlɛ junman’n i di kpa’n naan be nian mɛn’n i asa kun su Sielɛ Sua’m be kplanlɛ’n su. Kɛ bé kplán Ɲanmiɛn Sielɛ Sua lika kun nun’n, sran wie mɔ be junman yɛle sua’m be wun ninnge’m be yolɛ’n be klunklo be kunndɛ kɛ bé dí junman’n wie. Sanngɛ lika sɔ’n nun asɔnun’n nunfuɛ mun yɛ be di junman’n i dan lika ɔ. Zoova i wawɛ’n ɔ nin i sufuɛ’m be klun mɔ be tu di junman sɔ’n, yɛ maan i kwlaa sɔ’n yo ye ɔ.​—Jue Mun 127:1; Kolɔsfuɛ Mun 3:23.

• ?Ngue ti yɛ be flɛ Zoova i Lalofuɛ’m be aɲia sua’n kɛ Ɲanmiɛn Sielɛ Sua ɔ?

• ?Ngue yɛ maan mɛn wunmuan’n nun’n be kplanlɛ’n kwla yo ye ɔ?