Uka be nga ɔ fata kɛ e minndɛ kan naan e nin be y’a suan fluwa Biblu’n kle i nun like’n
1. ?Sran ngba yɛ ɔ ka lɛ sɔ fluwa Biblu’n kle nun ɔn? Amun yiyi nun.
1 Ka naan sran kun w’a yo Zoova i sufuɛ’n, ɔ fata kɛ ɔ si ndɛ ng’ɔ o Biblu’n nun’n. Sanngɛ be nga be timan Klistfuɛ’n be nun wie’m be bumɛn i kɛ Biblu’n ti Ɲanmiɛn Ndɛ. Sran uflɛ wie’m be lafiman Ɲanmiɛn su kaan sa, yɛ be buman Biblu’n i like. ?Ngue yɛ ɔ kwla ukali be nga i klikli nun’n, b’a sɔman fluwa Biblu’n kle nun ɔn? Nvle fanunfanun 20 nun jasin bofuɛ wie’m be tɛli kosan sɔ’n su. Ndɛ nga be kannin’n, i su yɛ afɔtuɛ nga be o ja ngua yɛ’n be taka ɔ.
2. ?Sɛ sran kun se e kɛ ɔ lafiman Ɲanmiɛn su’n, ngue yɛ ɔ fata kɛ e wun i wlɛ ɔ? ?Yɛ ngue ti ɔ?
2 Be nga be lafiman Ɲanmiɛn su’n: Kɛ sran kun se e kɛ ɔ lafiman Ɲanmiɛn su’n, sɛ e wun sa nga ti yɛ ɔ se sɔ’n i wlɛ’n, ɔ ti kpa. ?Ɔ bu i kɛ sran fin ndo ti ɔ? ?Sa tɛtɛ nga be o asiɛ’n su annzɛ nanwlɛ mɔ Ɲanmiɛn sulɛ wafa’m be diman’n i ti ɔ? ?I tranwlɛ lɔ sran’m be lafiman Ɲanmiɛn su ti ɔ? Atrɛkpa’n i klun lɔ’n, ɔ se i wun kɛ Ɲanmiɛn o lɛ. Sanngɛ ɔ bumɛn i kɛ Ɲanmiɛn sulafilɛ’n ti like cinnjin. Jasin bofuɛ kpanngban be usali sran’n i kɛ: “?Kɛ a bu i sɔ titi ɔ?” Be wunnin kɛ sran’n tɛli su ndɛndɛ kpa. Kɛ sran’n kɛ́n i klun ndɛ’n, maan e sie e su i nuan bo. Nán e kpɛ i nuan ndɛ’n. Sɛ e si sa nga ti yɛ sran kun lafiman Ɲanmiɛn su’n, é wún ndɛ ng’ɔ fata kɛ e kan’n ɔ nin Biblu’n i akua ng’ɔ fata kɛ e fa mɛn i’n.—Nya. 18:13.
3. ?É yó sɛ naan y’a kle kɛ e ɲin yi sran’n?
3 Kɛ é íjɔ e liɛ’n, maan e nian e wun su kpa. Nán maan e bu ndɛ ng’ɔ kan’n i fɔ. Aniaan nga be o Amlɛnkɛn’m be mɛn’n nun lɔ’n, be man e afɔtuɛ kun. Be waan: “Ɔ ti cinnjin kɛ e wun i wlɛ kɛ sran kun le atin lafi like ng’ɔ klo’n su. Sɛ e waan é klé i kɛ e ndɛ liɛ’n yɛ ɔ yo fɛ’n, i sɔ’n su yoman like fi ye. Sanngɛ maan e usɛ i kosan naan i bɔbɔ wun ndɛ’m be wlɛ.” Akpasua sunianfuɛ kun liɛ’n, ɔ yaci sran’n nun ɔ kɛn i klun ndɛ’n. Kpɛkun ɔ se i kɛ: “?Ndɛ sɔ’n e kwlá wunmɛn i wlɛ wafa uflɛ wie?” I sin’n, ɔ su kɛn i ndɛ liɛ’n.
4. ?Wafa sɛ yɛ e kwla uka Budafuɛ mun ɔn?
4 Budafuɛ kpanngban be lafiman su kaan sa kɛ Ɲanmiɛn o lɛ. I sɔ’n ti’n, Angle’m be mɛn’n nun lɔ’n, jasin bofuɛ kpanngban be fa fluwa pɛplɛpɛ ng’ɔ suan La paix et le bonheur durables : comment les trouver fa bo jasin. Be kanngan fluwa’n i su fitilɛ’n nun. I sin’n, be koko akpasua “ Existe-t-il vraiment un Créateur Très-Haut ? ” ɔ nin “ Un guide bénéfique pour tous les humains ” be su yalɛ. Kpɛkun i sin’n, be fa fluwa Biblu’n kle be kle sran’n, yɛ be se i kɛ: “Kannzɛ a lafiman Ɲanmiɛn su’n, sanngɛ Biblu’n i nun like suanlɛ’n kwla yo ɔ ye kpa. Afin afɔtuɛ kpakpa’m be o nun.” Aniaan kun m’ɔ bo jasin fɛ’n kle sinua nga be tran Amlɛnkɛn’m be mɛn’n nun lɔ’n seli kɛ: “E jasin bowlɛ nun lɔ sran kpanngban be klo fluwa nun kannganlɛ. Ɔ maan kpɛ sunman, kɛ e fa fluwa’n e man be’n, lele nin i kɛ é sá e sin é kó wún be wun ekun’n, nn b’a wie nun kanngan. Sanngɛ like nga be flɛ i kɛ Biblu’n nun like suanlɛ’n, be wunmɛn i wlɛ. I sɔ’n ti’n, kpɛ klikli nga n to be’n, n fa fluwa pɛplɛpɛ Jasin fɛ kpa kun fin Ɲanmiɛn! man be. Afin wafa nga be klɛli i nun ndɛ’n, ɔ kpɛ yalɛ kokolɛ ba.” Amlɛnkɛn’m be nvle’n nun lɔ aniaan kun m’ɔ ti sinua’m be lika nun lɔ akpasua sunianfuɛ’n seli kɛ, kpɛ klikli nga e to be’n, e kwla fa fluwa Biblu’n kle e kle be. Sanngɛ maan e dun mmua e koko i ndɛ tre 2 m’ɔ kan Biblu’n i ndɛ’n, i su yalɛ’n. Ɔ flunman tra kɛ e suan i ndɛ tre 1 m’ɔ kan Ɲanmiɛn ndɛ’n, i nun like.
5. ?Ngue ti yɛ e awlɛn tralɛ’n ti cinnjin ɔn?
5 Kɛ ɔ yo naan sran kun w’a lafi Ɲanmiɛn su’n, ɔ fa blɛ kpanngban. I sɔ’n ti’n, ɔ fata kɛ e tra e awlɛn. Kɛ e nin sran’n é kókó yalɛ’n, kɔlɛ ɔ su kaman lɛ wunmɛn i wlɛ kɛ e le Yifuɛ kun. Sanngɛ kɛ ɔ́ kɔ́ i ɲrun’n, ɔ́ kwlá sé i wun kɛ atrɛkpa’n Ɲanmiɛn o lɛ. Annzɛ kusu sa nga ti yɛ sran wie’m be lafi su kɛ Ɲanmiɛn o lɛ’n, ɔ́ kwlá wún i wlɛ.
6. ?Ngue ti yɛ Biblu’n timan sran wie’m be cinnjin ɔn?
6 Be nga Biblu’n timan be cinnjin annzɛ be lafiman Biblu’n su’n: Wie liɛ’n, sran’n lafi su kɛ Ɲanmiɛn o lɛ. Sanngɛ Biblu’n nun ndɛ’n timɛn i cinnjin. Afin ɔ lafiman su kɛ ɔ ti Ɲanmiɛn Ndɛ. Atrɛkpa’n, i nvle nun lɔfuɛ’m be timan Klistfuɛ. Yɛ ɔ bu i kɛ Biblu’n ti nvle nga i nunfuɛ’m be se be wun kɛ be ti Klistfuɛ’m be liɛ. Annzɛ kusu i nvle nun lɔfuɛ’m be se be wun kɛ be ti Klistfuɛ, sanngɛ Ɲanmiɛn ndɛ’n su falɛ’n loman be. I sɔ’n ti’n, ɔ bumɛn i kɛ Biblu’n kwla ukɛ i. ?Yɛ wafa sɛ yɛ e kwla uka i sɔ sran liɛ mun naan Biblu’n w’a yo be cinnjin naan b’a kwla suan fluwa Biblu’n kle i nun like ɔ?
7. ?Wafa sɛ yɛ e kwla fa sran’m be ɲin sie i Biblu’n su ɔ?
7 Bɛtɛli ng’ɔ o Glɛki nvle’n nun lɔ’n klɛli i kɛ: “Kɛ e tike Biblu’n su mɔ e fɛ i nun ndɛ’n e kle sran nga Biblu’n timan be cinnjin’n, i sɔ’n yɛ ɔ ti ajalɛ’n i kpafuɛ’n niɔn. Jasin bofuɛ kpanngban be sieli i nzɔliɛ kɛ Biblu’n nun ndɛ’n kan sran’m be awlɛn’n tra e nuan nun ndɛ liɛ’n. (Ebr. 4:12) Kɛ sran kpanngban be wunnin Ɲanmiɛn i dunman’n Biblu’n nun’n, be kunndɛli kɛ bé súan Biblu’n nun like.” Betɛli ng’ɔ o Ɛndi lɔ’n kusu klɛli kɛ: “Nguan’n ɔ nin wie’n i su nanwlɛ’n yo Ɛndu’m be nun kpanngban be fɛ kpa. Asa ekun’n, kɛ be wun i kɛ Biblu’n kle kɛ cɛn wie lele sran’m be su bubuman be wun nun akpasuaakpasua naan be su kpaman sran nun kun’n, i sɔ’n yo be fɛ kpa wie.” Kɛ jasin bofuɛ’m be fa sa ng’ɔ o sran’m be su’n, be fiti be ndɛ’n su’n, be kwla fa Biblu’n kle be wafa nga Ɲanmiɛn i Sielɛ’n wá yó be ye’n.
8. ?Ndɛ benin yɛ e kwla kan kle be nga be ɲin ci Biblu’n niɔn?
8 Wie liɛ’n, be nga be tɔn be wun suɛn kɛ be ti Klistfuɛ’n be ti’n, sran’n i ɲin ci Biblu’n. Sɛ ɔ ti sɔ’n, maan e se i kɛ sran sɔ’m be kpɛli Biblu’n i nun ndɛ’n i wun. Ɛndi lɔ Betɛli’n klɛli kɛ: “Ɔ ju wie’n, ɔ fata kɛ e uka sran mun naan be wun i wlɛ kɛ Biblu’n timan asɔnun wafawafa’m be aja like.” Aniaan’m be waan fluwa pɛplɛpɛ Quel est le but de la vie ? Comment le découvrir ? i akpasua 4 i nun ndɛ’n wluwlu Ɛndu’m be wun kpa. Akpasua sɔ’n nun’n, be yiyi nun kɛ asɔnun wafa’m be kpɛli Ɲanmiɛn Ndɛ’n i wun, naan bé wá le núnnún Biblu’n i osu mlɔnmlɔn. Brezili lɔ titi atin bofuɛ kun liɛ’n, kɛ ɔ to sran kun m’ɔ kloman Biblu’n, ɔ se i kɛ: “Sɛ a klo’n a kwla si Biblu’n nun ndɛ’n kpa. I sɔ yɛ sran kpanngban yo ɔ. Nán kɛ san fii bé káci asɔnunfuɛ ti ɔ. Sanngɛ sɛ a suan Biblu’n nun like’n, like nga á sí i’n, ɔ́ bó ɔ nuan.”
9. ?Sɛ i klikli nun’n, like nga Biblu’n kle’n timan sran kun i cinnjin’n, ngue ti yɛ ɔ fataman kɛ e sa sin bubu e ɔ?
9 Zoova si sran’m be tinuntinun be klun akunndan’n. (1 Sam. 16:7; Nya. 21:2) Ɔ su yo naan be nga be awlɛn’n ti kpa’n, be wa su i kpa. (Zan 6:44) Sran sɔ’m be nun wie’m be liɛ’n, be nin a kleman be Ɲanmiɛn i su like le, annzɛ be siman Biblu’n i nun ndɛ sunman. Jasin fɛ nga e bo’n kwla ‘de be naan be wun sa ng’ɔ ti nanwlɛ’n i wlɛ kpa.’ (1 Tim. 2:4) Sɛ bɔbɔ i klikli nun’n, like nga Biblu’n kle’n timan be nun wie’m be cinnjin’n, nán maan i sɔ’n bubu amun sa sin. Amun fa Biblu’n i akua nga be yili be amun aniɛn’n nun’n be nun kun kle be naan amun nin be nian nun. I liɛ’n be konvi sɔ́ Biblu’n nun ndɛ’n. I sin’n, maan amun fa e fluwa ?Ngue like yɛ Biblu’n kle i sakpasakpa ɔ? kle be Biblu’n nun like. E fluwa’m be nun cinnjin kpafuɛ nga e fa kle sran’m be Biblu’n nun like’n, yɛ ɔ o lɛ ɔ.
[Kuku, bue 4]
Sɛ sran’n se e kɛ ɔ lafiman Ɲanmiɛn su’n:
• Usɛ i kɛ: “?Kɛ a bu i sɔ titi ɔ?” I liɛ’n á kwlá sí sa nga ti yɛ ɔ se sɔ’n.
• Sɛ ɔ ti Budafuɛ’n, fa fluwa pɛplɛpɛ La paix et le bonheur durables : comment les trouver i bue 9-12 kle i like.
• Sɛ ɔ bu i kɛ klɔ sran fin ndo’n:
Fa Réveillez-vous ! be nun ndɛ akpasua ng’ɔ suan “ Hasard ou conception ? ” kle i.
Fa video Les merveilles de la création révèlent la gloire de Dieu kle i.
Fa fluwa pɛplɛɛplɛ nga mun kle i: Une vie pleinement satisfaisante : Comment ? i ndɛ akpasua 4. La vie a-t-elle été créée ? Ɔ nin Cinq questions à se poser sur l’origine de la vie.
• Sɛ sran lufle bulɛ’n ɔ nin ɲrɛnnɛn’n ti’n, sran’n lafiman Ɲanmiɛn su kun’n, fluwa nga’m be kwla ukɛ i:
Fluwa Y a-t-il un Créateur qui se soucie de vous ? i ndɛ tre 10.
Fluwa pɛplɛɛplɛ nga mun: Dieu se soucie-t-il vraiment de nous ? i bue 6. Ɔ nin Quel est le but de la vie ? i ndɛ akpasua 6.
• Sɛ a wun kɛ sran’n su lafi su kɛ Ɲanmiɛn o lɛ’n, fa fluwa Biblu’n kle naan kle i Biblu’n nun like. Sɛ amun bo i bo i ndɛ tre 2 annzɛ ndɛ tre uflɛ ng’ɔ nin i fata’n su’n, ɔ ti kpa.
[Kuku, bue 5]
Sɛ sran’n se kɛ ɔ lafiman Biblu’n su’n:
• Fa fluwa La vie : comment est-elle apparue ? Évolution ou création ? i ndɛ tre 17 nin 18 kle i like.
• Ɛndu’m be liɛ’n, fa fluwa pɛplɛpɛ Pourquoi adorer Dieu en amour et en vérité ? kle be like.
• Zuifu’m be liɛ’n, fa fluwa pɛplɛpɛ Connaîtrons-nous un jour un monde sans guerre ? i bue 3-11 kle be like.
• Sa nga ti yɛ Biblu’n nun mmla’m be su nantilɛ’n ti kpa’n, kɛn i ndɛ kle sran’n. Fluwa nin video nga a kwla fa kle i’n yɛ:
Réveillez-vous ! nun ndɛ akpasua “ De l’aide pour les familles. ”
Video La Bible, une force dans votre vie.
Fluwa pɛplɛɛplɛ nga mun: Jasin fɛ kpa kun fin Ɲanmiɛn! i like suanlɛ 9 nin 11. Un livre pour tous, i bue 22-26. Une vie pleinement satisfaisante : Comment ? i ndɛ akpasua 2.
Budafuɛ’m be liɛ’n, fa fluwa La voie qui mène à la paix et au bonheur i bue 3-7 kle be like.
Ɲanmiɛn flɛfuɛ’m be liɛ’n, fa fluwa La vraie foi : le chemin qui mène au bonheur i akpasua 3 kle be like.
?Sɛ ɔ jasin bowlɛ nun lɔ sran’m be ɲin ci Biblu’n nin? Maan a nin be koko yalɛ kpɛ sunman kwlaa naan w’a se be kɛ Biblu’n nun yɛ ngwlɛlɛ ndɛ nga a kan kle be’n, ɔ fin ɔn.
• Wafa nga Ɲanmiɛn nuan ijɔfuɛ’m be ndɛ’n kpɛnnin su’n, yiyi nun kle be. Fluwa nin video nga a kwla fa kle be’n yɛ:
Video La Bible : un récit historique exact, des prophéties dignes de foi.
Fluwa pɛplɛpɛ Un livre pour tous i bue 27-29.
• Sɛ sran’n kunndɛ kɛ ɔ́ sí Biblu’n i nun ndɛ wie mun’n, fa fluwa Biblu’n kle kle i like.
[Kuku, bue 6]
Sɛ sran’n waan ɔ lafiman Ɲanmiɛn su’n, a kwla se i kɛ:
• “?N kwla kan sa nga ti yɛ n lafi su kɛ e le Yifuɛ’n i ndɛ n kle wɔ?” Kanngan fluwa Comment raisonner i bue 72-74 nun lɔ ndɛ wie’m be nun kle i. Annzɛ se i kɛ, a kwla fa fluwa kun mɔ i nun kannganlɛ’n yoli ɔ fɛ’n blɛ i.
• “?Sanngɛ, sɛ ɔ ti kɛ Ɲanmiɛn o lɛ’n, nn á kúnndɛ kɛ i nzuɛn’n yo sɛ?” Sran kpanngban be tɛ su kɛ be kunndɛ kɛ ɔ yo Ɲanmiɛn kun m’ɔ klo sran, m’ɔ yo sa nuan su sɛsɛsɛ, m’ɔ si aunnvuɛ, m’ɔ kpaman sran nun’n. Fa Biblu’n naan kle i kɛ Ɲanmiɛn le nzuɛn sɔ mun. (A kwla fa fluwa Biblu’n kle i ndɛ tre 1 kle i like. An bo i bo ndɛ kpɔlɛ 6 su.)
Sɛ sran’n waan ɔ lafiman Biblu’n su’n, a kwla se i kɛ:
• “Sran kpanngban be se sɔ wie. Wie’m be waan Biblu’n nin siansifuɛ’m be ndɛ’n sansan be wun, annzɛ be waan be kwlá nantimɛn i nun mmla’m be su. ?Sanngɛ w’a kanngan Biblu’n nun le? [Maan sran’n tɛ kosan’n su. I sin’n, fa fluwa pɛplɛpɛ Un livre pour tous i su fitilɛ’n m’ɔ o i bue 3 su’n kle i. Kpɛkun fa fluwa’n mɛn i.] Sran kpanngban be buman Biblu’n i like afin Ɲanmiɛn i sulɛ wafa wie’m be kpɛli i nun ndɛ’n i wun. Fluwa’n i bue 4 nin 5 kɛn i sɔ’n i ndɛ. N klo kɛ cɛn uflɛ’n, e koko su yalɛ.”
• “Sran kpanngban be bu i sɔ wie. ?Sanngɛ, n kwla fa Biblu’n nun ndɛ kun m’ɔ yo min fɛ kpa’n n kle wɔ? [Kanngan Zɔb 26:7 annzɛ Ezai 40:22 nun. Ndɛ sɔ’m be kle kɛ Biblu’n nin siansifuɛ’m be ndɛ’n kɔ likawlɛ.] Biblu’n man awlobofuɛ’m be afɔtuɛ kpakpa ekun. N klo kɛ cɛn uflɛ ń klé wɔ afɔtuɛ sɔ’m be nun kun.”
• “Ń yó wɔ mo nin ɔ klun ndɛ kanlɛ. Sanngɛ sɛ Ɲanmiɛn klɛli fluwa kun mannin klɔ sran mun’n, nn a bu i kɛ ndɛ benin yɛ ɔ́ kwlá trán fluwa sɔ’n nun ɔn?” I sin’n, fa Biblu’n nun ndɛ kun m’ɔ nin i liɛ’n be kɔ likawlɛ’n kle i.