An wla Ɲanmiɛn sulɛ tɛfuɛ’n i ase!

Satan nin i mmusu’m be kloman kɛ amun su Ɲanmiɛn. Sɛ ɔ ka be ngunmin ti’n, be klo kɛ bé yó naan sran’m be kpɔci Ɲanmiɛn. ?Wafa sɛ yɛ be yo i sɔ-ɔ? I wafa kun yɛle Ɲanmiɛn sulɛ wafa ng’ɔ timan su’n. (2 Korɛntfuɛ Mun 11:13-15) Sɛ Ɲanmiɛn sulɛ wafa kun kleman nanwlɛ ng’ɔ fin Biblu’n nun’n, nn Ɲanmiɛn sulɛ wafa sɔ’n timan su. Ɲanmiɛn sulɛ wafa ng’ɔ timan su’n ti kɛ sika m’ɔ timan kpa’n sa, ɔ kwla fa i kpakpafuɛ’n, sanngɛ nɛ́n i kpafuɛ’n wie-ɔ. Ɔ kwla kle amun yalɛ dan.

Ɲanmiɛn sulɛ wafa ng’ɔ timan su’n i gblɛ ninnge klelɛ’n kwlá jɔman Zoova m’ɔ ti Ɲanmiɛn nanwlɛfuɛ’n i klun le. I nun mɔ Zezi o asiɛ’n su wa’n, asɔnunfuɛ wie’m be akpasua kun be kunndɛli kɛ be kun i. Be buli i kɛ wafa nga be su Ɲanmiɛn’n yɛ ɔ ti kpa-ɔ. Be seli kɛ: “E si ti kunngba cɛ, e si sɔ’n yɛlɛ Nyanmiɛn.” ?Zezi kplinnin su? Ɔ si’ɛ! Ɔ seli be kɛ: ‘Amun si’n yɛle mmusu’m be si’n, Satan.’ (Zan 8:41, 44) Andɛ’n, ɔ yo sran kpanngban be kɛ Ɲanmiɛn yɛ be su i ɔ, sanngɛ nanwlɛ, Satan nin i mmusu mun yɛ be su be ɔ!—1 Korɛntfuɛ Mun 10:20.

Kɛ waka saciwa m’ɔ su mma saciwa sa cɛ’n, be nga be suman Ɲanmiɛn kɛ ɔ nin i fata sa’n, be ayeliɛ’n ti tɛ. Sran’m be ninnge tɛtɛ nga be yo’n ti, mɛn’n w’a tɔ nvati. Bian nin bla kunndɛlɛ sukusuku, utre dilɛ, awie wualɛ, ɲrɛnnɛn wunlɛ, sran kunlɛ, kpɛkun bla’m be gblu tɔlɛ, yɛ w’a tru lika’n nun ɔn. Sran kpanngban nga be yo i sɔ ninnge mun’n be o Ɲanmiɛn sulɛ wafa kun nun. Sanngɛ be Ɲanmiɛn sulɛ’n kaciman be ayeliɛ’n naan b’a yo like ng’ɔ ti kpa’n. Sɛ b’a yaciman ninnge tɛtɛ’m be yolɛ’n, be su kwlá yoman Ɲanmiɛn i janvuɛ.—Matie 7:17, 18.

Ɲanmiɛn sulɛ ng’ɔ timan su’n, ɔ kle sran’m be waka sran’m be sɔlɛ. Ɲanmiɛn se kɛ nán e sɔ waka sran. I sɔ’n ti su. ?Sɛ sran kun nin amun ijɔman mlɔnmlɔn naan ɔ nin amun foto’n i ngunmin cɛ yɛ be ijɔ’n, ɔ́ yó amun fɛ? ?I sɔ sran’n kwlá yó amun janvuɛ kpa? Ɔ si’ɛ mlɔnmlɔn. Zoova klo kɛ sran’m be nin i bɔbɔ be ijɔ. W’a seman kɛ e nin waka sran annzɛ fafuɛ mɔ be leman nguan’n, yɛ e ijɔ-ɔ.—Lɔ Tulɛ 20:4, 5.

Ɲanmiɛn sulɛ ng’ɔ timan su’n, ɔ kle kɛ sɛ alɛ tɔ naan be kun sran’n, ɔ ti kpa. Zezi seli kɛ Ɲanmiɛn i janvuɛ’m bé kló be wun. E kunman sran nga e klo be’n. (Zan 13:35) Sa tɛ yofuɛ mun bɔbɔ’n, ɔ fataman kɛ e kun be. Kɛ Zezi i kpɔfuɛ’m be bɛli i tralɛ’n, w’a kplinman su kɛ i sɔnnzɔnfuɛ’m be di i ti utre.—Matie 26:51, 52.

Ɲanmiɛn sulɛ ng’ɔ timan su’n, ɔ kle sran’m be kɛ klunwifuɛ’m bé wún ɲrɛnnɛn sin dan kun nun. Sanngɛ, Biblu’n kle kɛ sa tɛ’n i agualiɛ’n yɛle wie’n. (Rɔmfuɛ Mun 6:23) Zoova ti Ɲanmiɛn kun m’ɔ klo sran-ɔn. ?Ɲanmiɛn m’ɔ klo sran’n ɔ kwla kle sran’m be ɲrɛnnɛn sa trilili? Cɛcɛ! Mɛn klanman nun’n, Ɲanmiɛn sulɛ wafa kunngba cɛ nga Zoova i klun jɔ sufuɛ’n, yɛ ɔ́ ká lɛ-ɔ. (Sa Nglo Yilɛ 15:4) Ɲanmiɛn sulɛ i wafawafa kwlaa nga be bo’n taka Satan i gblɛ ndɛ’m be su’n, be su tranman lɛ kun.