Maan e tinuntinun e yo Zezi i srɛlɛ’n i su sa

“Min Si, [...] yi ɔ Wa’n i sran wafa ng’ɔ ti’n i nglo nɛn i kusu man ɔ kɔmin su.”​—ZAN 17:1.

?WAFA SƐ YƐ AMÚN TƐ́ SU Ɔ?

?Kɛ be se kɛ be ‘si’ Ɲanmiɛn’n, i bo yɛle benin?

?Ngue yɛ ɔ kle kɛ Zoova tɛli Zezi i srɛlɛ’n su akoto’m be blɛ su ɔ?

?Ngue yɛ é yó naan y’a kle kɛ e yo Zezi i srɛlɛ’n i su sa ɔ?

1, 2. ?Kɛ Zezi nin i akoto’m be wieli Delɛ cɛn’n i di’n, ngue yɛ Zezi yoli ɔ?

AFUƐ nga be flɛ i 33 nun’n, Nisan i cɛn ba 14 su’n, Zezi nin i akoto’m be dili Delɛ Cɛn’n. Kɛ ɔ́ yó sɔ’n, nn lika’n w’a san. Kɛ Izraɛlifuɛ’m bé dí cɛn sɔ’n, be wla kpɛn su kɛ Ɲanmiɛn deli be Eziptifuɛ’m be sa nun. Sanngɛ Ɲanmiɛn wá dé sran mun ekun. I lifuɛ’n, ɔ́ yó dan trá wafa ng’ɔ deli Izraɛlifuɛ mun laa’n. Zezi i sɔnnzɔnfuɛ kpa mun yɛ Ɲanmiɛn wá dé be sɔ ɔ. Yɛle kɛ, kɛ aliɛ wá cɛ́n’n,a Zezi i kpɔfuɛ’m bé wá kún i. Sanngɛ nn w’a yoman sa tɛ fi. I wulɛ sɔ’n ti’n, cɛn wie lele sran’m be su yoman sa tɛ kun yɛ be su wuman kun.​—Ebr. 9:12-14.

² Kɛ ɔ ko yo naan e wla w’a fiman aklunye sa sɔ mɔ Zezi yoli’n i su’n ti’n, Zezi kpɛli cɛn dilɛ uflɛ kun i ba. Cɛn sɔ’n yɛ bé wá dí i afuɛ nuan kwlaa siɛn’n niɔn. Ɔ maan, be su diman Zuifu’m be Delɛ cɛn’n kun. Kɛ Zezi kpɛ́ cɛn dilɛ sɔ’n i ba’n, ɔ fali kpaun, ɔ bubuli nun fa mannin i akoto 11. Ɔ seli kɛ: “Kpaun ng’ɔ o yɛ’n ti min wunnɛn i nzɔliɛ, amun ti yɛ n su fa man-an. An yo i kɛ nga ń yó i yɛ’n sa, maan amun wla kpɛn n su.” I sin’n, ɔ fali klowa mannin be naan w’a se be kɛ: “Like ng’ɔ o klowa nga nun’n, ɔ ti min mmoja, ɔ ti aenguɛ uflɛ nga Nyanmiɛn waan ɔ nin amún trá’n, i nzɔliɛ, amun ti yɛ be su wa guɛ i ase-ɔ.”​—Lik 22:19, 20.

3. (a) ?Ngue yɛ Ɲanmiɛn nin nvle uflɛ bé wá yó ɔ? (b) ?Kɛ é wá yíyí Zezi i srɛlɛ nun’n, kosan onin yɛ e ɲin trán be su ɔ?

³ Aenguɛ nga Zoova nin Izraɛlfuɛ’m be trali’n, be su diman su kun. Afin Zoova nin nvle uflɛ bé wá trá aenguɛ. Nvle uflɛ sɔ’n yɛle Zezi i sɔnnzɔnfuɛ mɔ Zoova wá fɛ́ i wawɛ’n kpá be síe be ngunmin’n. Laa’n, Izraɛli nvle nunfuɛ’m be bo w’a yoman kun b’a suman Ɲanmiɛn. Be sacili Ɲanmiɛn dunman. I kwlaa sɔ’n ti’n, Zezi kunndɛman kɛ i sɔnnzɔnfuɛ’m be yo kɛ be sa. (Zan 7:45-49; Yol. 23:6-9) Ɔ kunndɛ kɛ be bo yo kun be su Ɲanmiɛn naan Ɲanmiɛn dunman’n fu. I sɔ’n ti’n, ɔ srɛli i Si Ɲanmiɛn. Srɛlɛ sɔ’n, lele nin andɛ sran fi nin a srɛman sɔ le. (An nian desɛn klikli’n.) Zezi i Ɲanmiɛn srɛlɛ sɔ’n m’ɔ o Zan 17:1-26 nun’n, é wá yíyí nun. Kɛ é yó sɔ’n, maan e ɲin tran kosan nɲɔn nga su. Yɛle kɛ: “?Ɲanmiɛn tɛli Zezi i srɛlɛ’n su? ?Min ayeliɛ’n kle kɛ n yo srɛlɛ mɔ Zezi srɛli’n i su sa?”

NINNGE NGA BE YOLI ZEZI I CINNJIN KPA’N

4, 5. (a) ?Ngue yɛ ndɛ nga Zezi fa boli i srɛlɛ’n i bo’n, ɔ kle e ɔ? (b) ?Wafa sɛ yɛ Zoova tɛli i Wa’n su ɔ?

⁴ Kɔnguɛ nga Zezi nin i sɔnnzɔnfuɛ’m bé dí cɛn’n, ɔ kleli be Ɲanmiɛn i su like kpanngban kpa lele. I sin ɔ mɛnnin i ɲin su niannin Ɲanmiɛn su lɔ seli kɛ: “Min Si, blɛ’n w’a ju siɛn’n, yi ɔ Wa’n i sran wafa ng’ɔ ti’n i nglo nɛn i kusu man ɔ kɔmin su. Afin a fali sran’m be kwlaa wlɛli i sa nun kɛ ɔ sie be naan ɔ man be kwlaa nga a fa be mɛnnin i’n be anannganman nguan. [...] N yoli maan a nyannin kɔmin asiɛ’n su wa, yɛ junman nga a mannin min kɛ n di’n, n wieli i di. I sɔ’n ti siɛn’n, min Si, nyrun nga kɛ n wo ɔ wun lɔ’n n lɛ i’n naan w’a yi mɛn’n, maan n nyan nyrun kunngba sɔ’n ɔ wun lɔ ekun.”​—Zan 17:1-5.

⁵ Ninnge nga be ti Zezi i cinnjin kpa’n, yɛ ɔ dun mmua boli be su ɔ. Ɔ srɛli kɛ maan i Si ɲan ɲrun. Kɛ ɔ́ klé i sɔnnzɔnfuɛ’m be srɛlɛ’n, like kunngba’n yɛ ɔ srɛli ɔ. (Lik 11:2) I sin’n, ɔ buli i sɔnnzɔnfuɛ’m be akunndan. Ɔ srɛli Ɲanmiɛn kɛ ɔ “man be kwlaa [...] be anannganman nguan.” I sin ekun’n, ɔ kɛnnin i bɔbɔ i like liɛ ng’ɔ miɛn i’n, i ndɛ. Ɔ srɛli kɛ: “Min Si, nyrun nga kɛ n wo ɔ wun lɔ’n n lɛ i’n naan w’a yi mɛn’n, maan n nyan nyrun kunngba sɔ’n.” Zoova tɛli i Wa’n su klanman. Afin like nga Zezi w’a srɛman bɔbɔ’n, ɔ fa mɛnnin i. Yɛle kɛ “dunman nga Nyanmiɛn fa flɛli i’n [...] ti dan tra [anzi’m] be liɛ’n.”​—Ebr. 1:4.

MAAN E ‘SI’ ƝANMIƐN M’Ɔ TI KUNNGBA CƐ’N

6. ?Ngue yɛ ɔ fata kɛ Zezi i akoto’m be yo naan b’a ɲan anannganman nguan ɔn? ?Ngue yɛ ɔ kle kɛ be yoli sɔ ɔ?

⁶ Zezi kannin like ng’ɔ fata kɛ sran’m be yo naan w’a ɲan anannganman nguan’n, i ndɛ wie. (An kanngan Zan 17:3 nun.) Ɔ seli kɛ ɔ fata kɛ be ‘si’ Ɲanmiɛn nin i bɔbɔ Klist titi. Ɔ maan, ɔ fata kɛ e mian e ɲin e suan be su like kpa. Kpɛkun maan e nanti like nga e suan’n su titi. I sɔ yɛ Zezi i akoto’m be yoli ɔ. Ɔ maan Zezi seli kɛ: “Ndɛ nga a kan kleli min’n, n kan kleli be, yɛ be fali su.” (Zan 17:8) Sanngɛ sɛ akoto’m be waan bé ɲán anannganman nguan’n, ɔ fata kɛ be yo like kun ekun. Yɛle kɛ maan be bu Ɲanmiɛn ndɛ’n i su akunndan yɛ be fa su titi. I sɔ kusu yɛ be yoli ɔ. Afin Zerizalɛmu uflɛ nga be wlɛli i bo ase nin yɛbuɛ 12, be klɛli be dunman su yɛ ɔ su nunnunman le.​—Ngl. 21:14.

7. ?Kɛ be se kɛ be si Ɲanmiɛn’n, i bo yɛle benin? ?Ngue ti yɛ ɔ ti cinnjin kɛ e si Ɲanmiɛn kpa ɔ?

⁷ Sɛ e waan é ɲán anannganman nguan’n, ɔ fata kɛ e ‘si’ Ɲanmiɛn wie. ?Kɛ be se kɛ be si Ɲanmiɛn’n, i bo yɛle benin? Nɛ́n i ngunmin yɛle Ɲanmiɛn i nzuɛn nin i klun sa mɔ e suan be su like titi’n. Sanngɛ ɔ fata kɛ e klo Ɲanmiɛn yɛ e nin i e afiɛn mantan kpa. Kpɛkun, ɔ fata kɛ e klo e niaan Klistfuɛ mun kpa wie. Afin Biblu’n waan: “Sran ng’ɔ klo-man sran’n, wuun ɔ si-man Nyanmiɛn.” (1 Zan 4:8) Kɛ be se kɛ be si Ɲanmiɛn’n i wie ekun yɛle kɛ be fɛ i ndɛ’n su. (An kanngan 1 Zan 2:3-5 nun.) Kɛ e si kɛ e o be nga be si Zoova be nun wie’n, ɔ yo e fɛ dan. Sanngɛ ɔ fata kɛ e nian e wun su kpa naan y’a yoman kɛ Zida Iskariɔti sa. Afin ɔ nin Ɲanmiɛn be afiɛn sacili. I sɔ’n ti’n, maan e mian e ɲin kpa naan e nin Zoova e nanti klanman titi. I liɛ’n, Zoova kwla si e aunnvuɛ naan y’a ɲan anannganman nguan.​—Mat. 24:13.

‘Ɔ DUNMAN’N TI’

8, 9. ?Like kpa nga ti yɛ Zezi bali mɛn nun’n yɛle benin? ?Ngue yɛ Zezi sieli i nzɔliɛ m’ɔ yoli i ya kpa ɔ?

⁸ Kɛ e wie Zan ndɛ 17 nun kanngan’n, e wun kɛ Zezi i akoto m’ɔ nin be o lɛ’n, be ndɛ loli i kpa. Sanngɛ be nga bé wá káci i sɔnnzɔnfuɛ’n, be ndɛ loli i kpa wie. (Zan 17:20) Kannzɛ be ndɛ loli Zezi’n, sanngɛ like ng’ɔ yoli i cinnjin kpa’n yɛle kɛ ɔ́ yó naan be bo i Si’n i dunman fɛ naan i Si’n i dunman’n fu. I sɔ’n ti’n, kɛ ɔ́ bó jasin fɛ’n, w’a yaciman i Si i dunman bolɛ le. Cɛn kun’n, ɔ wluli Zuifu’m be Ɲanmiɛn sulɛ nin i srɛlɛ sua’n nun lɔ. Ɔ fali Ezai fluwa’n kanngannin nun kleli like nga ti yɛ ɔ bali mɛn nun’n. Ɔ seli kɛ: “E Min Nyanmiɛn i Wawɛ’n wo min su, yɛlɛ kɛ ɔ guali min su ngo kɛ m bo jasin fɛ’n kle yalɛfuɛ mun.” E si kɛ, kɛ Zezi kánngan Ɲanmiɛn ndɛ sɔ nun’n, ɔ boli Ɲanmiɛn dunman weiin.​—Lik 4:16-21.b

⁹ Afuɛ kpanngban lele naan Zezi w’a ba asiɛ’n su’n, Zuifu’m be Ɲanmiɛn sulɛ wafa’m be kpɛnngbɛn’m be seli sran mun kɛ nán be bo Ɲanmiɛn dunman. Kɛ Zezi bali m’ɔ sieli i sɔ’n i nzɔliɛ’n, ɔ yoli i ya kpa. Ɔ maan ɔ seli kpɛnngbɛn sɔ mun kɛ: ‘N si yɛ maan m bali-ɔ, yɛ an sɔ-man min nun. Sanngɛ sɛ sran wie kpɛ i bɔbɔ i ti nun ba’n, amún sɔ́ i nun!’ (Zan 5:43) Kɛ ɔ ka kan i kpɔfuɛ’m bé wá kún i’n, ndɛ ng’ɔ kannin’n, ɔ kleli like kpa nga ti yɛ ɔ bali mɛn nun’n. Ɔ srɛli Ɲanmiɛn seli kɛ: “N Si, yo maan ɔ dunman’n fu.” (Zan 12:28) E wun kɛ like ng’ɔ yoli Zezi i cinnjin kpa’n, yɛle i Si i dunman’n m’ɔ fata kɛ ɔ fu’n. I sɔ’n ti yɛ i srɛlɛ nga e su yiyi nun yɛ nun’n, ɔ kɛnnin i ndɛ kpɛ sunman’n niɔn.

10, 11. (a) ?Ngue yɛ Zezi yoli naan i sɔnnzɔnfuɛ’m b’a si i Si i dunman’n niɔn? (b) ?Ngue ti yɛ Zezi i sɔnnzɔnfuɛ’m be fa Ɲanmiɛn dunman’n kle sran mun ɔn?

¹⁰ Zezi srɛli i Si seli kɛ: “Be nga a fa be mɛn’n nun mannin min’n, n yoli maan be sili wɔ. Be ti ɔ liɛ yɛ a fa be mannin min-ɔn, yɛ be fali ɔ ndɛ’n su. N nun-man mɛn’n nun wa kun, sanngɛ be liɛ’n be tɛ o wa, n kusu n su ba ɔ sin. Min Si bɔ ɔ nzuɛn’n nin klɔ sran liɛ’n ti-man kun’n, ɔ dunman’n b’ɔ o n su’n ti, nian be su. Maan be yo sran wunmuan kɛ min nin wɔ e ti sran wunmuan’n sa.”​—Zan 17:6, 11.

¹¹ Kɛ Zezi se kɛ ‘ɔ yoli maan i sɔnnzɔnfuɛ’m be sili i Si’n,’ nán i Si i dunman Zoova i ngunmin yɛ ɔ boli kleli be ɔ. Sanngɛ ɔ ukali be naan b’a si Zoova bɔbɔ kpa. Yɛle kɛ ɔ kleli be kɛ Ɲanmiɛn i nzuɛn’n nin klɔ sran liɛ’n timan kun. Kpɛkun ɔ kleli be wie kɛ Ɲanmiɛn nin sran mun si tran. (Tul. 34:5-7) Kɛ é sé yɛ’n, Zezi ti famiɛn ɲanmiɛn su lɔ. Sanngɛ ɔ te suan i sɔnnzɔnfuɛ’m be bo naan be fa Ɲanmiɛn dunman’n kle sran mun asiɛ wunmuan’n su. ?Ngue ti yɛ be yo sɔ ɔ? Be yo sɔ naan sran kpanngban be si Zoova, i sin naan mɛn nga w’a wie. Kɛ Ɲanmiɛn wá núnnún mɛn tɛ nga’n, ɔ́ dé i sufuɛ mun. Ɔ maan i dunman wá fú dan.​—Eze. 36:23.

“NAAN MƐN NUNFUƐ’M BE LAFI SU”

12. ?Kɛ ɔ ko yo naan y’a gua junman nga Zezi dili’n i bo’n, ninnge nsan benin yɛ ɔ fata kɛ e yo ɔ?

¹² I nun mɔ Zezi o asiɛ’n su wa’n, ɔ ukali i sɔnnzɔnfuɛ mun kpa naan be wla be nzuɛn tɛ’n i ase. Afin junman ng’ɔ boli i bo’n, ɔ́ fá wlá be sa nun kɛ be guɛ i bo. Zezi srɛli Ɲanmiɛn seli kɛ: “Kɛ a fa sunman min mɛn’n nun’n, n kusu n fa sunmannin be mɛn’n nun sɔ.” Kpɛkun kɛ ɔ ko yo naan i sɔnnzɔnfuɛ’m b’a kwla di junman sɔ’n, ɔ srɛli i Si kɛ ɔ uka be like cinnjin nsan nun. I klikli’n yɛle kɛ, ɔ srɛli kɛ i Si uka i sɔnnzɔnfuɛ mun naan b’a yoman Satan mɛn’n i nunfuɛ. I nɲɔn su’n, ɔ srɛli kɛ i sɔnnzɔnfuɛ’m be fa i Si i ndɛ’n su naan be kaci i Si liɛ mlɔnmlɔn. Yɛ i kasiɛn su’n, ɔ srɛli kɛ i sɔnnzɔnfuɛ’m be kaci sran wunmuan kɛ i bɔbɔ nin i Si’n be ti sran wunmuan’n sa. I sɔ’n ti’n, ɔ fata kɛ e tinuntinun e usa e wun kɛ: ‘?Like nsan sɔ mɔ Zezi srɛli’n, i su sa yɛ n yo ɔ?’ Zezi lafili su kɛ sɛ i sɔnnzɔnfuɛ’m be yo ninnge ng’ɔ srɛli’n be su sa’n, sran kpanngban sɔ́ be ndɛ’n nun klanman.​—An kanngan Zan 17:15-21 nun.

13. ?Ngue yɛ ɔ kle kɛ Zoova tɛli Zezi i srɛlɛ’n su akoto’m be blɛ su ɔ?

¹³ Kɛ e nian Sa Nga Be Yoli’n fluwa nun’n, e wun kɛ Zoova tɛli Zezi i srɛlɛ’n su. Afin akoto’m be blɛ su’n, sran wafawafa kwlaa kacili Klistfuɛ. Wie’m be ti yalɛfuɛ yɛ wie’m be ti wlengbi. Wie’m be ti kanga yɛ wie’m be ti diewa. Wie’m be ti Zuifu yɛ wie’m be timan Zuifu. Sɛ be waan bé níɛn i kwlaa sɔ’n ti’n, be bo su yoman kun. Sanngɛ be bo yoli kun lele. Ɔ maan Pɔlu fa be sunnzunnin sran wunmuan kun mɔ i ti’n yɛle Zezi’n. (Efɛ. 4:15, 16) ?Ngue ti yɛ be bo kwla yoli kun Satan i mɛn sukusuku nga nun ɔn? Zoova wawɛ’n i fanngan nun ti yɛ be kwla trannin klanman sɔ ɔ.​—1 Kor. 3:5-7.

14. ?Ngue yɛ ɔ kle kɛ Zoova tɛli Zezi srɛlɛ’n su e blɛ liɛ’n nun ɔn?

¹⁴ Kɛ akoto’m be ngba be wuli’n, Zezi i sɔnnzɔnfuɛ’m be nuan w’a sɛman be wun kun. Yɛle kɛ sran wie mɔ be nin Ɲanmiɛn be buli’n, be wa yili be wun nglo, be kannin ato ndɛ mun. (Yol. 20:29, 30) Sanngɛ afuɛ nga be flɛ i 1919 nun’n, Zezi yoli maan i sɔnnzɔnfuɛ nga Ɲanmiɛn kpali be sieli be ngunmin’n, be fin Ɲanmiɛn sulɛ wafa ng’ɔ timan su’n be nun fiteli. Siɛn’n, be bo ti kun be ‘klo be wiengu.’ (Kol. 3:14) Kpɛkun be bo jasin fɛ’n mɛn wunmuan’n nun. ?Junman’n i bo gua sɛ? I bo gua kpa. Afin andɛ’n, sran kpanngban mɔ be tra miliɔn nso’n be nin be nga be kpali be sieli be ngunmin’n be bo ti kun be su Zoova. I sɔfuɛ’m be fin “mɛnmɛn’n kwlaa nin nvle-nvle’n kwlaa nun, sran wafa-wafa’n kwlaa o be nun, be ijɔ aniɛn wafa-wafa’n kwlaa.” (Zan 10:16; Ngl. 7:9) I sɔ’n kle weiin kɛ Zoova tɛli ndɛ yɛ mɔ Zezi kannin’n su klanman. Ɔ srɛli i Si kɛ: “Maan [...] mɛn nunfuɛ’m be si kɛ wɔ yɛ a sunmannin min-ɔn, yɛ a klo be kɛ a fa klo min’n sa.”​—Zan 17:23.

Ɔ GUƐLI I SRƐLƐ’N I BO KLANMAN

15. ?Zezi srɛli be nga Ɲanmiɛn kpali be sieli be ngunmin’n be ti seli sɛ?

¹⁵ Nisan i le 14 kɔnguɛ nun’n, Zezi nin i sɔnnzɔnfuɛ’m be trali aenguɛ kɛ ɔ nin bé dí famiɛn. Ɔ maan be ɲannin ɲrun. (Lik 22:28-30; Zan 17:22) Sran sɔ mɔ Ɲanmiɛn fɛli i wawɛ’n kpali be sieli be ngunmin’n, Zezi srɛli be ti. Ɔ seli kɛ: “Min Si, lika nga n wo lɔ’n, n klo kɛ be nga a fa be mannin min’n, be tran lɔ wie naan be wun nyrun nga wɔ maan n lɛ i’n, afin i sin naan w’a yi mɛn’n yɛ a sɔtɔ n klolɛ-ɔ.” (Zan 17:24) Ɲanmiɛn i sufuɛ nga be ti i bua’m be wie’n, be ɲin bloman be niaan sɔ’m be wun. I lɛ’n kle kɛ Ɲanmiɛn i sufuɛ’m be kwlaa be bo ti kun.

16, 17. (a) ?Kɛ Zezi gúɛ i srɛlɛ’n i bo’n, ngue yɛ ɔ seli kɛ ɔ su yacimɛn i yolɛ ɔ? (b) ?Ngue yɛ ɔ fata kɛ e yo i titi ɔ?

¹⁶ Andɛ Zoova le i sufuɛ mun, be si i kpa yɛ be bo ti kun. Sanngɛ Ɲanmiɛn sulɛ wafa nga be timan su’n, be kpɛnngbɛn’m be se be sran mun kɛ nán be bu be wie. Kpɛkun sran’m be yo sɔ sakpa. Like kunngba’n yɛ Zezi blɛ sufuɛ’m be yoli ɔ. Ɔ maan, Zezi guɛli i srɛlɛ’n i bo klanman kɛ: “Min Si bɔ a ti sran kpa, mɛn nunfuɛ’m be si-man wɔ, sanngɛ n si wɔ, yɛ be nga be o yɛ’n, be si kɛ wɔ yɛ a sunmannin min-ɔn. N yoli maan be sili wɔ, yɛ n yoli maan bé wá sí wɔ ekun naan klolɛ nga a fa kloli min’n, be si kɛ a klo be sɔ wie, yɛ be si kɛ min nin be y’a yo sran wunmuan.”​—Zan 17:25, 26.

¹⁷ Zezi yoli maan sran’m be sili i Si i dunman’n. Andɛ m’ɔ ti asɔnun i ti’n, junman kunngba’n yɛ ɔ di ɔ. Ɔ suan e bo, ɔ maan e fa i Si i dunman’n ɔ nin i Si i klun sa’n kle sran mun. I sɔ’n ti’n, maan e nanti atin nga Zezi kle e’n su yɛ e bo jasin fɛ’n juejue su naan sran’m be kaci i sɔnnzɔnfuɛ. (Mat. 28:19, 20; Yol. 10:42) Asa ekun’n, maan e mian e ɲin naan e bo yo kun titi. Sɛ e yo i kwlaa sɔ’n, é klé kɛ srɛlɛ nga Zezi srɛli’n, e yo i su sa. Ɔ maan Ɲanmiɛn dunman Zoova’n ɔ́ fú, yɛ e kusu e klun jɔ́ tititi.

[Ja ngua lɛ ndɛ mun]

[Foto, bue 24]

[Foto, bue 26]

Zoova wawɛ’n i fanngan nun Klistfuɛ klikli’m be bo yoli kun. (An nian ndɛ kpɔlɛ 13 nun.)

[Foto, bue 28]

Zoova i sufuɛ’m be kwlaa be bo ti kun asiɛ’n su. (An nian ndɛ kpɔlɛ 14 nun.)