NDƐ NG’Ɔ KLƐ FLUWA’N SU’N | ?NDƐ ONIN YƐ Ɔ O BIBLU’N NUN ƆN?
?Wafa sɛ yɛ mɛn’n boli i bo ɔ?
Biblu’n i nun fluwa klikli mɔ be flɛ i Bo Bolɛ’n, ɔ bo nglo nin asiɛ’n be yilɛ’n i su ndɛ’n i kpɔlɛ kan. Ɔ se kɛ: “Kɛ mɛn’n bo i bo’n, Nyanmiɛn yili nglo nin asiɛ’n.” (Bo Bolɛ 1:1) Kɛ Ɲanmiɛn wieli waka nin nɲanɲa nin nnɛn’m be yi’n, ɔ yili sran nɲɔn. Be flɛ yasua’n kɛ Adam yɛ bla’n suan Ɛvu. Ɲanmiɛn yili be kɛ i bɔbɔ sa. Yɛle kɛ be kwla nian Ɲanmiɛn i nzuɛn’n su. I kun yɛle kɛ, be kwla bu akunndan be fa ajalɛ. Sɛ be fa ndɛ nga Ɲanmiɛn kan kleli be’n su’n, like nga Ɲanmiɛn sunnzunnin i be lika’n, ɔ́ kpɛ́n su. Yɛle kɛ bé wú ba bé trɛ́ asiɛ’n su. Kpɛkun be nin be mma nin be anunman’m bé dí alaje, fɔ’n su tranman be nun yɛ bé ɲán anannganman nguan.
Sanngɛ aolia nun sran nga Ɲanmiɛn yili be mɔ be flɛ be anzi’n, be nun kun lakali sran mun naan be yo i liɛ. I sɔ’n ti’n, be wa flɛli anzi sɔ’n kɛ Satan. I bo yɛle kɛ “ɲrun tanndanfuɛ.” Anzi sɔ’n sinnin wuo kun lika seli Ɛvu kɛ sɛ w’a tieman Ɲanmiɛn nuan ndɛ’n, i liɛ yó ye trá su. Adam nin Ɛvu be fali Satan i ndɛ’n su. I sɔ’n ti’n, be nin be Yifuɛ’n be afiɛn sacili. Ajalɛ tɛ nga be fɛli i lɛ’n ti’n, b’a kwlá ɲanman anannganman nguan. Kpɛkun, be fali sa tɛ’n nin fɔ’n nin wie wulɛ’n sali e kwlakwla.
Be ja nun lɛ’n, Ɲanmiɛn kannin like nga ɔ́ wá yó naan Adam i mma nin i anunman’m b’a fite nun naan b’a ɲan anannganman nguan’n, i ndɛ. Ɲanmiɛn seli kɛ “osu” kun wá bá. Osu sɔ’n ti sran nanndoliɛ. Ɔ́ wá núnkun Satan. Kpɛkun ɔ́ yó maan ɲrɛnnɛn nin afɛ kwlaa nga Satan nin Adam nin Ɛvu be ti sran’m be wun i’n, bé wíe. (Bo Bolɛ 3:15) ?Wan yɛle “osu” sɔ’n? Kɛ ɔ́ kɔ́ i ɲrun’n, yɛ sran’m bé wá sí i ɔ.
Kɛ ɔ ko yo naan Ɲanmiɛn i klun sa’n w’a kpɛnman su’n, Satan w’a yaciman Ɲanmiɛn i ɲrun tanndanlɛ. Ɔ yoli maan kluwifuɛ’m be wa sɔnnin kpa. Ɔ maan Nowe blɛ su’n, Ɲanmiɛn seli kɛ ɔ́ wá tɔ́ anannganman su nzue fá núnnún be. I ti’n, ɔ seli Nowe m’ɔ ti sran kpa’n kɛ ɔ bobo like kun m’ɔ fa mmeli’n. I sin’n, ɔ klekleli Nowe i nnɛn wie mun naan Nowe nin i awlofuɛ mun be fa be wlu mmeli sɔ’n nun. I liɛ’n, kɛ nzue’n tɔ́’n, be su wuman wie.
Kɛ nzue’n tɔli mɔ afuɛ kun sinnin’n, Nowe nin i awlobo’n be fin mmeli’n nun fiteli. Kɛ ɔ́ yó sɔ nn asiɛ’n i su w’a yo saun, klunwifuɛ’m be nunman lɛ kun. Sanngɛ “osu” nga Ɲanmiɛn kɛnnin i ndɛ’n nin a baman.
—Ndɛ’n taka Bo Bolɛ ndɛ tre 1-11, nin Zid 6, 14, 15 ɔ nin Sa Nglo Yilɛ 12:9 be su.
[Foto, bue 4]