NDƐ NG’Ɔ KLƐ FLUWA’N SU’N | ?NDƐ ONIN YƐ Ɔ O BIBLU’N NUN ƆN?
Like nga Ɲanmiɛn yoli naan sran’m be fite nun’n
“Osu” nga Ɲanmiɛn waan ɔ́ bá’n, Ɲanmiɛn seli i sufuɛ kpa Abraamu kɛ ɔ́ yó i anunman’m be nun kun. I anunman sɔ’n ti’n, “asiɛ’n su nvle-nvle’m be kwlaa” be liɛ yó ye. (Bo Bolɛ 22:18) Zakɔbu m’ɔ ti Abraamu i anunman’n, ɔ ko trannin Ezipti mɛn’n nun. I mma nin i anunman’m be trɛli lɔ kpa, be kacili nvle kun. Nvle sɔ’n yɛle laa Izraɛli nvle’n.
Ezipti famiɛn wlɛfuɛ kun fali Izraɛlifuɛ mun yoli i kanga. Kɛ ɔ yoli sɔ’n, Ɲanmiɛn seli i nuan ijɔfuɛ Moizi kɛ ɔ ko fa be fite. Kɛ be juli ndɛ mma jenvie’n i nuan lɛ’n, Ɲanmiɛn maan Moizi kpacili nzue’n nun naan b’a sin. I sin’n, Ɲanmiɛn mannin Izraɛlifuɛ’m be mmla kɛ ɔ ko yo naan b’a nanti klanman naan sa w’a ɲanman be’n ti. Mmla sɔ’n Mmla blu’n o nun wie. Mmla’n nun’n, Ɲanmiɛn kleli Izraɛlifuɛ mun sraka nin tɛ ng’ɔ fata kɛ be yi naan w’a yaci be sa tɛ mun w’a cɛ be’n. Ɲanmiɛn maan Moizi seli Izraɛlifuɛ mun kɛ ɔ́ wá mán be i nuan ijɔfuɛ kun. Sran sɔ’n yɛle “osu” nga Ɲanmiɛn kɛnnin i ndɛ kɛ ɔ́ bá’n.
Kɛ ɔ dili afuɛ 400 tra su’n, Ɲanmiɛn kannin “osu” sɔ’n i ndɛ kleli Famiɛn Davidi. Ɔ seli Davidi kɛ sran sɔ’n wá dí famiɛn yɛ i famiɛn dilɛ’n ká lɛ tititi. Sran sɔ’n yɛle Mɛsi’n. Ɲanmiɛn fɛli i kɛ ɔ de sran mun, yɛ ɔ yo naan asiɛ’n kaci mɛn klanman.
Blɛblɛblɛ Ɲanmiɛn kannin Mɛsi’n i su ndɛ wie mun ekun kleli i nuan ijɔfuɛ wie mun nin Davidi. Be seli kɛ Mɛsi’n yó klun ufuefuɛ nin wun ase kanfuɛ. Kpɛkun kɛ ɔ́ síe mɛn’n, awe’n nin sa tɛtɛ yolɛ’n, ɔ nin alɛ dilɛ’n, bé wíe. Sran’m be kwlakwla bé trán fɔun. Be nin nnɛn’m bé trán sɔ wie bɔbɔ. Tukpaciɛ’n nin ɲrɛnnɛn’n nin wie’n be su tranman lɛ kun. Be nga be wuli bɔbɔ’n, bé cɛ́n. Afin Ɲanmiɛn w’a kunndɛman kɛ sa sɔ’m be tran lɛ.
Ɲanmiɛn maan i nuan ijɔfuɛ Mise seli kɛ bé wú Mɛsi’n Bɛtleɛmu lɔ. Yɛ i nuan ijɔfuɛ Daniɛli waan bé kún i. Sanngɛ Ɲanmiɛn cɛ́n Mɛsi’n kpɛkun ɔ́ síe i Famiɛn ɲanmiɛn su lɔ. Aolia nun’n, Daniɛli kunngba’n wunnin kɛ Mɛsi i famiɛn dilɛ’n su saciman le. Yɛ ɔ́ sín mɛn nun famiɛn diwlɛ’m be kwlaa be osu. ?Mɛsi’n i balɛ’n i su ndɛ nga Ɲanmiɛn nuan ijɔfuɛ’m be kannin’n, be kpɛnnin su sɛsɛsɛ?
—Bo Bolɛ ndɛ tre 22-50, nin Ezipti Lɔ Tulɛ, nin Mmla’n nin 2 Samiɛl, nin Jue Mun, nin Ezai, nin Daniɛl, nin Mise ɔ nin Zakari 9:9 be su yɛ ndɛ’n taka ɔ.
[Kuku, bue 5]
ƝANMIƐN DUNMAN’N LƐMAN WUNSU
Biblu sunman nun’n, Bo Bolɛ 2:4 nun yɛ be dun mmua bo dunman Zoova’n niɔn. I klikli nun’n, be klɛli Ɲanmiɛn Ndɛ’n Ebre nin Arameɛn nin Glɛki nun. Be klɛli dunman sɔ m’ɔ ti Ɲanmiɛn liɛ klonglo’n i kpɛ kɔe 7.000. I bo yɛle kɛ “ɔ kaci sran’n i wafa ng’ɔ klo kɛ ɔ́ káci’n.” Ɔ kle e kɛ Ɲanmiɛn kwla yo like kwlaa ng’ɔ fata kɛ ɔ yo naan i klun sa’n nin kasiɛ ng’ɔ bo be’n, b’a kpɛn su’n.
[Foto, bue 5]
[Foto, bue 5]