NDƐ NG’Ɔ KLƐ FLUWA’N SU’N | ?NDƐ ONIN YƐ Ɔ O BIBLU’N NUN ƆN?

“Y’a wun Mɛsi’n”

Ɲanmiɛn nuan ijɔfuɛ Mise seli kɛ bé wú Mɛsi’n Bɛtleɛmu lɔ. Kɛ afuɛ kɔe ya nso sinnin’n, ɔ yoli sɔ sakpa. Asa ekun’n, Mɛsi’n i balɛ’n i su ndɛ nga Ɲanmiɛn nuan ijɔfuɛ Daniɛli kannin’n, ɔ kpɛnnin su wie. Kɛ be wuli Zezi m’ɔ dili afuɛ 30, ɔ yoli Mɛsi. Yɛle kɛ afuɛ nga be flɛ i 29 nun’n, be yoli Zezi i batɛmu kpɛkun Ɲanmiɛn i wawɛ’n jrɛli i su. Ɔ maan blɛ ng’ɔ ti i su sɛsɛsɛ’n, Mɛsi mɔ be minndɛli i lele mɔ yɛle Osu nga be kɛnnin i ndɛ kɛ ɔ́ bá’n, ɔ bali.

Kɛ be yoli Zezi i batɛmu cɛ’n, w’a sisimɛn i bo. Ɔ boli i junman’n i dilɛ bo. Yɛle kɛ ɔ “boli Nyanmiɛn sielɛ jasin fɛ’n” kleli sran mun. (Lik 8:1) Kɛ nga Ɲanmiɛn nuan ijɔfuɛ’m be fa kannin’n sa’n, Zezi yoli wɛtɛɛfuɛ nin klun ufuefuɛ, yɛ sran ndɛ loli i kpa. Ɔ kleli sran’m be like klolɛ su yɛ be kwla fɛli i ndɛ’n su. Kpɛkun ɔ ‘wieli sran’m be wunnɛn ya’n kwlaa’ naan sran’m be wun i wlɛ kɛ Ɲanmiɛn jin i sin. (Matie 4:23) I sɔ’n ti’n, bakanngan nin kpɛnngbɛn’m be kwlaa be fali be wun mɛntɛnnin i. Be seli kɛ: “Y’a wun Mɛsi’n.”​—Zan 1:41.

Zezi seli kɛ kwlaa naan w’a sie like kwlakwla’n, sa wie’m bé jú. I waan alɛ tɔ́, asiɛ’n kéje yɛ sa kekleekle wie mun ekun bé jú. I sɔ’n ti’n, ɔ wlali sran’m be kwlaa be su nun kɛ “be tran minndɛ.”​—Mark 13:37.

Zezi w’a yoman sa tɛ kaan sa. I ɲin yili Ɲanmiɛn lele guɛli i ti nin i bo. Sanngɛ sran’m be ɲin cili i yɛ be kunnin i. I wulɛ sɔ’n ti tɛ yilɛ. Ɔ yili naan e ɲan like ng’ɔ fili Adam nin Ɛvu be sa’n. Yɛle kɛ e ɲan anannganman nguan asiɛ’n su.

Kɛ nga Ɲanmiɛn nuan ijɔfuɛ’m be fa kannin’n sa’n, Zezi wuli kpɛkun kɛ ɔ dili cɛn nsan’n, Ɲanmiɛn cɛnnin i. Ɔ cɛnnin i aolia nun sran kwlafuɛ kpa. I sin’n, ɔ fiteli i sɔnnzɔnfuɛ 500 tra su be ɲrun. Kpɛkun kwlaa naan w’a wɔ ɲanmiɛn su’n, ɔ mannin i sɔnnzɔnfuɛ’m be junman. Ɔ seli be kɛ be kɛn i bɔbɔ Zezi nin i Famiɛn Diwlɛ’n be ndɛ kle “nvle-nvle’n kwlaa.” (Matie 28:19) ?Ngue yɛ ɔ kle kɛ be dili junman sɔ’n i kpa ɔ?

​—Matie, nin Mark, nin Lik, nin Zan ɔ nin 1 Korɛntfuɛ Mun be su yɛ ndɛ’n taka ɔ.

[Foto, bue 6]