25 Kan ikaduwang taon ni Hading Asa kan Juda, nagin hadi sa Israel si Nadab+ na aki ni Jeroboam, asin naghadi siya sa Israel sa laog nin duwang taon. 26 Padagos niyang ginibo kun ano an maraot sa paghiling ni Jehova, asin inarog niya an ginibo kan saiyang ama+ saka an kasalan kaini na nagin dahilan kan pagkakasala kan Israel.+ 27 Nakipagkumplutan laban sa saiya si Baasa na aki ni Ahias na hali sa tribo* ni Isacar. Mantang sinasalikupan ni Nadab asin kan bilog na Israel an Gibeton,+ na sakop kan mga Filisteo, ginadan siya ni Baasa duman. 28 Ginadan siya ni Baasa kan ikatulong taon ni Hading Asa kan Juda asin si Baasa an nagin hadi na kasalida niya. 29 Kan siya na an hadi, ginaradan niya tulos an bilog na pamilya* ni Jeroboam. Mayo siyang itinadang buhay sa pamilya ni Jeroboam; inubos niya sinda arog kan sinabi ni Jehova paagi kan saiyang lingkod na si Ahias na taga Shilo.+