16 Sarong aldaw, kan pasiring kami sa lugar na pamibian, nasabat mi an sarong suruguon na babayi na may sanib na maraot na espiritu, sarong demonyo na nagtatao sa saiya nin kakayahan na manghula.+ Dakul na kuwarta an nakukua kan saiyang mga amo dahil sa panghuhula niya. 17 An babaying ini sigeng sunod ki Pablo saka sa samuya asin sigeng kurahaw nin arog kaini: “An mga lalaking ini mga uripon kan Kahuruhalangkawing Diyos+ asin nagbabalangibog sa saindo kan dalan nin kaligtasan.”