Ezekiel
31 Kan ika-11 taon, kan inot na aldaw kan ikatulong bulan, nag-abot giraray sako an tataramon ni Jehova, na sinasabi: 2 “Aki nin tawo, sabihon mo ki Faraon na hadi kan Ehipto asin sa saiyang mga tawuhan,+
‘Siisay an makakapareho sa saimong kadakulaan?
3 May sarong Asiriano, sarong sedro sa Lebanon,
Na may magagayon na sanga siring sa palungpong na nagtatao nin limpoy, asin halangkawon ini;
Sukdo sa mga panganuron an puro kaiyan.
4 Nagdakula iyan dahil sa katubigan, naglangkaw iyan dahil sa mga tubig na nasa burabod sa kairaruman.
Napapalibutan nin mga sapa an natatanuman kaiyan;
An mga tubig na hali sa mga iyan an nagpapatubig sa gabos na kahoy sa kalangtadan.
5 Kaya mas nagin halangkaw iyan kisa sa gabos na kahoy sa kalangtadan.
Nagdakul an darakulang sanga kaiyan, asin naglaba an saradit na sanga kaiyan
Dahil sa abundang tubig na nasa mga sapa kaiyan.
6 Nagsalagan* sa darakulang sanga kaiyan an gabos na gamgam sa kalangitan,
Nag-ugbon an gabos na layas na hayop sa kalangtadan sa sirong kan saradit na sanga kaiyan,
Asin an gabos na darakulang nasyon nag-istar sa limpoy kaiyan.
7 Nagin kahanga-hanga an gayon kaiyan pati an laba kan mga sanga kaiyan,
Huli ta an mga gamot kaiyan uminirarom pasiring sa abundang katubigan.
8 Daing ibang sedro sa hardin nin Diyos+ an maikukumparar diyan.
Mayo sa mga kahoy na enebro an may darakulang sanga na kapareho kan sa mga iyan,
Asin dai mapapantayan kan mga kahoy na platano an mga saradit na sanga kaiyan.
Mayong ibang kahoy sa hardin nin Diyos an makakapareho sa gayon kaiyan.
9 Pinagayon ko iyan asin pinarambong,
Asin an gabos na iba pang kahoy sa Eden, an hardin kan tunay na Diyos, naaara diyan.’
10 “Kaya ini an sinabi kan Soberanong Kagurangnan na Jehova: ‘Dahil nagin halangkawon iyan,* na suminukdo na an puro sa mga panganuron, asin nagin arogante an puso kaiyan dahil sa langkaw kaiyan, 11 itatao ko iyan sa makapangyarihan na tagapamahala kan mga nasyon.+ Siguradong mahiro siya laban diyan, asin isisikwal ko iyan dahil sa karatan kaiyan. 12 Papaludon iyan nin mga dayuhan, an mga pinakadaing hirak sa mga nasyon, asin babayaan ninda iyan sa ibabaw kan kabukidan, asin magkakararakdag sa gabos na kababan an mga dahon kaiyan, tapos an mga nagkabararing sanga kaiyan mapapaduman sa gabos na sapa sa dagang iyan.+ An gabos na banwaan sa daga mahali sa lindong kaiyan asin babayaan iyan. 13 An gabos na gamgam sa kalangitan maistar sa natumbang puon kaiyan, asin an gabos na layas na hayop sa kalangtadan maistar sa mga sanga kaiyan.+ 14 Mangyayari ini tanganing mayong kahoy na harani sa katubigan an maglangkaw na marhay o sumukdo an puro sa mga panganuron asin tanganing mayong kahoy na napapatubigan na marhay an makaabot sa mga iyan an langkaw. Huli ta gabos sinda itatao sa kagadanan, sa irarom kan daga, kaiba an mga aki nin katawuhan, na pasiring sa lubungan.’*
15 “Ini an sinabi kan Soberanong Kagurangnan na Jehova: ‘Sa aldaw na bumaba iyan sa Lubungan,* papamunduon ko an mga tawo. Kaya, tatahuban ko an hararom na katubigan, asin sasagupon ko an mga sapa kaiyan para mapugulan an abundang katubigan. Papadiklumon ko an Lebanon dahil kaiyan, asin an mga kahoy sa kalangtadan gabos magkakaruluyos. 16 Sa tanog kan pagbagsak kaiyan, papatakigon ko an mga nasyon pag dinara ko na iyan pababa sa Lubungan* kaiba an gabos na minaibaba sa lubungan,* asin an gabos na kahoy sa Eden,+ an pinakamagayon saka an pinakamarahay sa Lebanon, an gabos na napapatubigan na marhay, mararanga sa irarom kan daga. 17 Nagbaba sinda sa Lubungan* kaiba niya, duman sa mga ginadan paagi sa espada,+ kaibanan an saiyang mga parasuportar* na nag-istar sa saiyang limpoy sa tahaw kan mga nasyon.’+
18 “‘Arin sa mga kahoy sa Eden an kapareho mo sa kamurawayan saka kadakulaan?+ Pero siguradong ibababa ka sa irarom kan daga kaiba an mga kahoy sa Eden. Mahigda ka kaibanan kan mga bakong turi, kaiba kan mga ginadan paagi sa espada. Mangyayari ini ki Faraon saka sa gabos niyang tawuhan,’ an sabi kan Soberanong Kagurangnan na Jehova.”