Jeremias

26 Sa kapinunan kan pamamahala kan hadi kan Juda na si Jehoiakim+ na aki ni Josias, uminabot an tataramon na ini hali ki Jehova: 2 “Ini an sabi ni Jehova, ‘Magtindog ka sa patyo kan harong ni Jehova asin magtaram ka manungod sa* gabos na tawo sa mga siyudad kan Juda na minaralaog sa harong ni Jehova tanganing magsamba.* Sabihon mo sa sainda an gabos na ipinagbubuot ko sa saimo; dai mo pagbawasan ni sarong tataramon. 3 Tibaad magdangog sinda asin talikdan kan lambang saro an maraot niyang dalan, asin magbago an isip ko* kun manungod sa kapahamakan na napagdesisyunan ko nang ipaabot sa sainda huli sa maraot nindang mga gibo.+ 4 Sabihon mo sa sainda: “Ini an sabi ni Jehova, ‘Kun dai kamo magdadangog sa sako paagi sa pagsunod sa sakuyang katugunan* na itinao ko sa saindo, 5 asin paagi sa pagdangog sa mga sinasabi kan mga lingkod kong propeta, na isinusugo ko sa saindo nin pauruutro,* na dai nindo pigdadangog,+ 6 gigibuhon ko an harong na ini na magin arog kan Shilo,+ asin gigibuhon ko an siyudad na ini na magin sarong bagay na sasambiton kan gabos na nasyon sa daga sa saindang pagmaldisyon.’”’”+

7 Asin nadangog kan mga saserdote asin kan mga propeta saka kan bilog na banwaan na sinasabi ni Jeremias an mga tataramon na ini sa harong ni Jehova.+ 8 Kaya kan matapos sabihon ni Jeremias an gabos na ipinagbuot sa saiya ni Jehova na itaram sa bilog na banwaan, dinakop siya kan mga saserdote asin kan mga propeta saka kan bilog na banwaan asin nagsarabi: “Siguradong magagadan ka. 9 Taano ta nagpopropesiya ka sa ngaran ni Jehova, na nagsasabi, ‘An harong na ini magigin arog kan Shilo, asin an siyudad na ini lalaglagon asin babayaan na mayong nag-iistar’?” Asin an bilog na banwaan nagtiripon sa palibot ni Jeremias sa harong ni Jehova.

10 Kan madangog kan mga halangkaw na opisyal* kan Juda an mga tataramon na ini, nagduruman sinda sa harong ni Jehova hali sa harong* kan hadi asin nagtukaw sa may entrada kan bagong trangkahan ni Jehova.+ 11 An mga saserdote saka an mga propeta nagsabi sa mga halangkaw na opisyal* asin sa bilog na banwaan: “Dapat sentensiyahan nin kagadanan an tawong ini,+ huling nagpropesiya siya laban sa siyudad na ini arog kan nadangog nindo mismo.”+

12 Dangan sinabi ni Jeremias sa gabos na halangkaw na opisyal* asin sa bilog na banwaan: “Si Jehova an nagsugo sakuya tanganing ipropesiya laban sa harong na ini asin laban sa siyudad na ini an gabos na tataramon na nadangog nindo.+ 13 Kaya ngunyan, baguhon nindo an saindong mga dalan saka an saindong mga gibo asin magsunod kamo sa boses ni Jehova na saindong Diyos, asin si Jehova magbabago nin isip* kun manungod sa kapahamakan na itinaram niya laban sa saindo.+ 14 Pero kun manungod sako, nasa kamot nindo ako. Gibuha nindo sako an sa hiling nindong marahay asin tama. 15 Pero tandaan nindo na pag ako ginadan nindo, magkakasala kamo asin an siyudad na ini saka an mga nag-iistar digdi huli sa paggadan nindo sa sarong tawong daing sála, huling an totoo, talagang isinugo ako ni Jehova sa saindo tanganing sabihon an gabos na tataramon na nadangog nindo.”

16 Dangan sinabi kan mga halangkaw na opisyal* saka kan bilog na banwaan sa mga saserdote asin sa mga propeta: “Dai dapat sentensiyahan nin kagadanan an tawong ini, ta nagtaram siya sa sato sa ngaran ni Jehova na satuyang Diyos.”

17 Dugang pa, an nagkapira sa kamagurangan kan nasyon nagtirindog asin nagsabi sa bilog na katiripunan* kan banwaan: 18 “Si Mikas+ na taga Moreset nagpopropesiya kaidtong panahon ni Hading Hezekias+ kan Juda, asin sinabi niya sa bilog na banwaan nin Juda, ‘Ini an sabi ni Jehova na pamayo nin mga hukbo:

19 “Ipinagadan daw siya ni Hading Hezekias kan Juda asin kan gabos na taga Juda? Bakong nagkaigwa nin pagkatakot ki Jehova an hadi asin nakimahirak ki Jehova,* kaya nagbago an isip ni Jehova kun manungod* sa kapahamakan na sinabi niyang ipapaabot niya sa sainda?+ Kaya sa gigibuhon ta, kita man sana an magdadara sa sadiri* ta nin kapahamakan.

20 “Asin may saro pang lalaki na nagpopropesiya sa ngaran ni Jehova, si Uria na aki ni Semaias na taga Kiriat-jearim,+ na nagpropesiya laban sa siyudad na ini asin laban sa dagang ini na kapareho kan mga sinabi ni Jeremias. 21 Nadangog ni Hading Jehoiakim+ asin kan gabos niyang matitibay na parapakilaban saka kan gabos na halangkaw na opisyal* an mga sinabi niya, asin gusto siyang ipagadan kan hadi.+ Kan mabaretaan ini ni Uria, bigla siyang natakot asin nagdulag pa-Ehipto. 22 Tapos, isinugo ni Hading Jehoiakim si Elnatan+ na aki ni Acbor na magpa-Ehipto kaiba an iba pang mga lalaki. 23 Kinua ninda si Uria sa Ehipto asin dinara siya ki Hading Jehoiakim; ginadan siya kan hadi paagi sa espada+ asin itinapok an bangkay niya sa lubungan kan mga ordinaryong tawo.”

24 Pero si Ahikam+ na aki ni Safan+ tinabangan si Jeremias, kaya dai siya naitao sa mga tawo tanganing gadanon.+