Jeremias

40 May uminabot na tataramon ki Jeremias hali ki Jehova pagkatapos siyang palibrehon hali sa Rama+ ni Nebuzaradan+ na pamayo kan mga guwardiya. Dinara kaya siya kaini duman na nakaposas an mga kamot, asin kaiba siya kan gabos na puwersahan na kinurua sa Jerusalem asin sa Juda na dadarahon sa Babilonya. 2 Dangan kinua kan pamayo kan mga guwardiya si Jeremias asin sinabi kaini sa saiya: “Si Jehova na saimong Diyos an naghula kan kapahamakan na ini laban sa lugar na ini, 3 asin ipinaabot iyan ni Jehova arog kan mismong sinabi niya, huling nagkasala kamo ki Jehova asin dai nindo sinunod an boses niya. Iyan an dahilan kaya nangyari ini sa saindo.+ 4 Hahalion ko na ngunyan an mga posas mo sa kamot. Kun gusto mong mag-iba sako sa Babilonya, mag-iba ka, asin ako an bahala saimo duman. Pero kun habo mong mag-iba sako sa Babilonya, dai ka mag-iba. Hilinga! Nasa atubangan mo an bilog na kadagaan. Magduman ka sain mo man gusto.”+

5 Dai pa nakakahali si Jeremias kan sabihon ni Nebuzaradan: “Magbalik ka ki Gedalias+ na aki ni Ahikam+ na aki ni Safan,+ na ninombrahan kan hadi kan Babilonya na mamahala sa mga siyudad kan Juda, asin mag-istar kang kaiba niya asin kan banwaan; o magduman ka sain mo man gusto.”

Dangan pinabalunan siya kan pamayo kan mga guwardiya nin kakanon asin tinawan nin regalo tapos pinahali na siya. 6 Kaya nagpasiring si Jeremias sa Mizpa,+ ki Gedalias na aki ni Ahikam, asin nag-istar siya kaiba niya asin kan mga tawong nawalat sa kadagaan.

7 Kan huri, an gabos na namamayo nin hukbo na yaon kaidto sa kalangtadan, kaiba an saindang mga tawuhan, nabaretaan na si Gedalias na aki ni Ahikam ninombrahan kan hadi kan Babilonya na mamahala sa kadagaan asin sa mga lalaki, babayi, saka mga aki hali sa pobreng mga tawo sa kadagaan* na dai puwersahan na dinara sa Babilonya.+ 8 Kaya nagduruman sinda ki Gedalias sa Mizpa.+ An mga nagduruman iyo si Ismael+ na aki ni Netanias, si Johanan+ asin Jonathan na mga aki ni Karea, si Seraias na aki ni Tanhumet, an mga aki ni Efai na Netofatita, asin si Jezanias+ na aki kan Maacatita, kaiba an mga tawuhan ninda. 9 Si Gedalias na aki ni Ahikam na aki ni Safan suminumpa sa sainda saka sa mga tawuhan ninda, na an sabi: “Dai kamo matakot na maglingkod sa mga Caldeo. Mag-istar kamo sa dagang ini saka maglingkod sa hadi kan Babilonya, asin magigin marahay an kamugtakan nindo.+ 10 Ako man, maistar ako sa Mizpa tanganing magin representante nindo sa* mga Caldeo na minadigdi sa sato. Pero magtipon kamo nin arak, mga prutas sa tig-init, saka lana, tapos ilaag nindo an mga iyan sa saindong mga lalagan na istakan asin mag-istar kamo sa mga siyudad na inokupar nindo.”+

11 Asin nabaretaan man kan gabos na Judio na nasa Moab, Ammon, asin Edom, siring man kan gabos na yaon sa iba pang kadagaan, na tinugutan kan hadi kan Babilonya na may matadang mag-istar sa Juda asin na ninombrahan niyang mamahala sa mga ini si Gedalias na aki ni Ahikam na aki ni Safan. 12 Kaya nagpuon na magbaralik an gabos na Judio hali sa gabos na lugar kun sain sinda nagkawararak, asin nagpasiring sinda sa daga nin Juda, ki Gedalias sa Mizpa. Asin nagtipon sinda nin dakulon nanggad na arak saka mga prutas sa tig-init.

13 Nagpasiring ki Gedalias sa Mizpa si Johanan na aki ni Karea asin an gabos na namamayo nin hukbo na yaon kaidto sa kalangtadan. 14 Sinabi ninda sa saiya: “Dai mo aram na si Baalis na hadi kan mga Ammonita+ isinugo si Ismael na aki ni Netanias tanganing gadanon ka?”*+ Pero dai naniwala sa sainda si Gedalias na aki ni Ahikam.

15 Dangan si Johanan na aki ni Karea pasekretong nagsabi ki Gedalias sa Mizpa: “Mahali ako asin gagadanon ko si Ismael na aki ni Netanias; mayo nin makakaaram kaini. Taano ta gagadanon ka niya,* asin taano ta kaipuhan magkawararak an gabos na tawo sa Juda na nagdirigdi sa saimo asin mapara an mga natada sa Juda?” 16 Pero si Gedalias+ na aki ni Ahikam nagsabi ki Johanan na aki ni Karea: “Dai mo paggibuhon ’yan, ta bakong totoo an pigsasabi mo manungod ki Ismael.”