Ezekiel
46 “Ini an sinabi kan Soberanong Kagurangnan na Jehova: ‘An trangkahan kan patyong nasa laog na nakaatubang sa sirangan+ dapat na pirming sarado+ sa anom na aldaw nin pagtrabaho,+ pero sa aldaw nin Sabbath saka sa aldaw kan bagong bulan dapat iyan na bukasan. 2 An pamayo maagi sa portiko kan trangkahan sa paglaog niya hali sa patyong nasa luwas+ asin matindog sa may poste kan pintuan kan trangkahan. Iaatang kan mga saserdote an saiyang bílog na dulot na pigtututong saka an saiyang mga atang sa pakikikabtang, asin maduko siya sa may entrada kan trangkahan tapos maluwas na. Pero dai dapat isara an trangkahan sagkod sa banggi. 3 Maduko man an mga tawo kan kadagaan sa atubangan ni Jehova sa may atubangan kan entrada kan trangkahan na iyan sa mga aldaw nin Sabbath asin bagong bulan.+
4 “‘An bílog na dulot na pigtututong na iaatang ki Jehova kan pamayo sa aldaw nin Sabbath dapat na anom na lalaking kordero na daing depekto asin sarong lalaking karnero na daing depekto.+ 5 An dulot na tipasi dapat na sarong epa* para sa lalaking karnero asin ano man na maitatao niya para sa mga lalaking kordero, kaiba an sarong hin* nin lana para sa kada epa.+ 6 Sa aldaw kan bagong bulan, an dulot dapat na sarong torilyong baka na daing depekto, anom na lalaking kordero, asin sarong lalaking karnero; dapat na daing depekto an mga iyan.+ 7 An idudulot niya bilang dulot na tipasi dapat na sarong epa para sa torilyong baka, sarong epa para sa lalaking karnero, asin ano man na kaya niya para sa mga lalaking kordero. Asin dapat siyang magdulot nin sarong hin nin lana para sa kada epa.
8 “‘Pag naglaog an pamayo, dapat siyang mag-agi sa portiko kan trangkahan, asin diyan man siya dapat magluwas.+ 9 Asin pag an mga tawo sa kadagaan naglaog pasiring sa atubangan ni Jehova sa panahon kan mga kapiyestahan,+ an mga naglaog para magsamba na nag-agi sa norteng trangkahan+ dapat na magluwas sa timog na trangkahan,+ asin an mga naglaog na nag-agi sa timog na trangkahan dapat na magluwas sa norteng trangkahan. Mayo nin siisay man an dapat na magbalik sa trangkahan na inagihan niya palaog, huling dapat sindang magluwas sa trangkahan na kahampang kan piglaugan ninda. 10 Kun manungod sa pamayo na kaibanan ninda, dapat siyang maglaog pag naglaog sinda, asin dapat siyang magluwas pag nagluwas sinda. 11 Sa mga kapiyestahan saka sa mga panahon nin okasyon, an dulot na tipasi dapat na sarong epa para sa torilyong baka, sarong epa para sa lalaking karnero, asin ano man na maitatao niya para sa mga lalaking kordero, kaiba an sarong hin nin lana para sa kada epa.+
12 “‘Kun an pamayo matao nin bílog na dulot na pigtututong+ o nin mga atang sa pakikikabtang bilang gikan-sa-buot na dulot ki Jehova, an trangkahan na nakaatubang sa sirangan bubukasan para sa saiya, asin itatao niya an saiyang bílog na dulot na pigtututong saka an saiyang mga atang sa pakikikabtang arog kan ginigibo niya pag aldaw nin Sabbath.+ Pagkaluwas niya, dapat na isara an trangkahan.+
13 “‘Aroaldaw kang dapat magtao nin sarong lalaking kordero na masarong taon pa sana an edad bilang bílog na dulot na pigtututong para ki Jehova.+ Dapat mong gibuhon iyan kada aga. 14 Kaiba kaiyan, kada aga dapat kang magtao nin sarong ikaanom na kabtang* nin sarong epa bilang dulot na tipasi, kaiba an un-tersiong* hin nin lana na pangwirik sa pinong harina bilang dulot na tipasi na regular na idinudulot ki Jehova. Saro ining nagdadanay na reglamento. 15 Dapat nindang itao kada aga an lalaking kordero, an dulot na tipasi, asin an lana bilang bílog na dulot na pigtututong na regular na idinudulot.’
16 “Ini an sinabi kan Soberanong Kagurangnan na Jehova: ‘Kun an pamayo magregalo nin daga sa kada saro sa saiyang mga aki bilang mana, magigin pagsadiri iyan kan saiyang mga aki. Magigin pamana iyan sa sainda. 17 Pero kun regaluhan niya an saro sa saiyang mga suruguon nin hali sa saiyang mana, magigin pagsadiri iyan kan suruguon sagkod sa taon nin katalingkasan;+ dangan ibabalik iyan sa pamayo. Pero an ipinamana niya sa saiyang mga aki magdadanay na pagsadiri ninda. 18 Dai dapat kuanon kan pamayo an arin man na mana kan banwaan paagi sa pagpalayas sa sainda sa pagsadiri ninda. An itatao niyang mana sa saiyang mga aki dapat na hali mismo sa pagsadiri niya, tanganing mayo nin siisay man sa banwaan ko an mapahali sa pagsadiri niya.’”
19 Dangan dinara niya ako sa laog;+ nangagi kami sa laugan na kataid kan trangkahan na pasiring sa mga banal na kuwartong kakanan* kan mga saserdote, na nakaatubang sa norte,+ asin may nahiling akong lugar duman sa likod sa may kamping sulnupan. 20 Sinabi niya sako: “Digdi papakalakagaan kan mga saserdote an dulot para sa pagkakasala saka an dulot para sa kasalan asin digdi man lulutuon an dulot na tipasi,+ para mayo sindang dadarahon na ano man pasiring sa patyong nasa luwas asin dai ninda mapasahan nin kabanalan* an mga tawo.”+
21 Dinara niya ako sa patyong nasa luwas asin iinagi sa apat na kanto kan patyo. May nahiling akong patyo sa kada kanto kan patyong nasa luwas. 22 Sa apat na kanto kan patyong nasa luwas, igwa nin saradit na patyo na 40 maniko* an laba saka 30 maniko an lakbang. Parareho an sukol kan apat na patyo.* 23 Sa laog kan apat na iyan igwa nin mga nakapalibot na pasamano* sa gilid, asin sa baba kan mga iyan igwa nin ginibong mga pakalakagaan kan mga dulot. 24 Dangan sinabi niya sako: “Ini an mga lugar kun sain pinapakalakagaan kan mga lingkod sa templo an atang kan banwaan.”+