Salmo
Para sa direktor nin musika; nasa tono kan “Dai Paglaglaga.” Salmo ni David. Sarong Miktam.*
58 Makakapagtaram daw kamo manungod sa katanusan kun masilensiyo kamo?+
Makakapaghusgar daw kamo na may katanusan, kamong mga aki nin tawo?+
2 Imbes, nagpaplano kamo nin pagkabakong matanos sa saindong puso,+
Asin nagwawaras an mga kamot nindo nin kadahasan sa daga.+
3 An mga maraot lagalag* na puon pa sa pagkamundag;*
Matagas na an payo ninda, mga putikon puon pa kan sinda mamundag.
4 An kamandag ninda siring sa kamandag nin mga halas;+
Mga bungog sinda siring sa kobra na nagtatakop kan talinga niya.
5 Dai iyan magdadangog sa boses kan mga paraorasyon,
Gurano man sinda katibay mag-orasyon.
6 O Diyos, tarangkasa sa saindang nguso an mga ngipon ninda!
Pasaa an mga panga kan mga leon na ini,* O Jehova!
7 Lugod na mawara sinda siring sa tubig na naubos sa pagbulos.
Lugod na kurbahon Niya an* saiyang busog asin pabaragsakon sinda paagi kan saiyang mga pana.
8 Lugod na magin siring sinda sa sarong atol* na mantang nag-aabante natutunaw;
Siring sa umboy nin sarong ina na gadan nang nagluwas kaya dai na nahiling an aldaw.*
9 Bago pa mamatian kan mga lutuan nindong kuron an init kan matunok na palungpong na ipinanggatong,
Hahayupon na nin Diyos, siring sa duros nin bagyo, an sangang basa pa pati su nagkakalayo na.+
10 An matanos mag-uugma ta nahiling niya an pamamalos;+
An saiyang mga bitis mababasa sa dugo kan maraot.+
11 Dangan sasabihon kan mga tawo: “Talagang igwang itinataong balos sa saro na matanos.+
Talagang igwa nin sarong Diyos na naghuhukom sa daga.”+