Jeremias
46 Ini an tataramon ni Jehova na sinabi niya ki Jeremias na propeta manungod sa mga nasyon:+ 2 Para sa Ehipto,+ may koneksiyon sa hukbo ni Faraon Neco+ na hadi kan Ehipto, na nasa kahalabaan kan Salog nin Eufrates asin nadaog ni Hading Nabucodonosor* kan Babilonya sa Carkemis kan ikaapat na taon kan hadi kan Juda na si Jehoiakim+ na aki ni Josias:
3 “Iandam nindo an saindong mga pansagang* saka mga darakulang kalasag,
Asin mag-abante kamo pasiring sa ralaban.
4 Ikarabit na nindo sa mga kabayo an mga gakod asin sumangkay kamo, kamong mga parakabayo.
Pumuwesto kamo asin isulot an saindong mga helmet.
Pakintaba an mga garod* asin isulot an saindong mga gubing na metal.*
5 ‘Taano ta nahihiling ko sindang grabe an takot?
Nag-aatras sinda, nagkadaraog an mga parapakilaban ninda.
Nagdurulag sindang natataranta, dai nagsasalingoy an mga parapakilaban ninda.
May grabeng takot sa enterong palibot,’ an sabi ni Jehova.
6 ‘An marikas dai makadalagan parayo, asin an mga parapakilaban dai makadulag.
Sa norte, sa may pangpang kan Salog nin Eufrates,
Nagkasiringkog sinda asin nagkaturumba.’+
7 Siisay ining nagtataas na siring sa Salog nin Nilo,
Siring sa mga salog nin nagraragasang katubigan?
8 An Ehipto nagtataas na siring sa Salog nin Nilo,+
Siring sa mga salog nin nagraragasang katubigan,
Asin nagsasabi iyan, ‘Masakat ako asin lalantupan an daga.
Lalaglagon ko an siyudad asin an mga nag-iistar diyan.’
9 Magturukad kamo, kamong mga kabayo!
Magpakaskas kamo nin todo, kamong mga karwahe!
Magsalakay an mga parapakilaban,
An Cus asin Put, na nagkakapot kan kalasag,+
10 “Aldaw iyan kan Soberanong Kagurangnan, si Jehova na pamayo nin mga hukbo; aldaw iyan nin pamamalos tanganing bumalos sa saiyang mga kalaban. Asin an espada manghahalon saka magpapakabasog asin mainom kan saindang dugo sagkod na maniguan, huling an Soberanong Kagurangnan, si Jehova na pamayo nin mga hukbo, igwang pag-atang* na gigibuhon sa daga kan norte sa may Salog nin Eufrates.+
11 Magtukad ka sa Gilead tanganing magkua nin balsamo,+
O birhen na aking babayi nin Ehipto.
Baliwala an pigpurbaran mong kadakul na bulong,
Huling dai ka na mauumayan.+
12 Nadangog kan mga nasyon an saimong kawaran nin onra,+
Asin an saimong kurahaw nin pag-agrangay nadadangog sa bilog na daga.
Huling an sarong parapakilaban nasisikyod sa kapwa niya parapakilaban,
Asin pareho sindang natutumba.”
13 Ini an tataramon na sinabi ni Jehova ki Jeremias na propeta manungod sa pag-abot ni Hading Nabucodonosor* kan Babilonya tanganing pabagsakon an daga nin Ehipto:+
14 “Ipahayag nindo ini sa Ehipto, ibalangibog nindo ini sa Migdol.+
Ibalangibog nindo ini sa Nof* asin sa Tapanhes.+
Sabihon nindo, ‘Pumuwesto kamo asin ihanda an sadiri nindo,
Ta sarong espada an manghahalon sa enterong palibot mo.
15 Taano ta nagkaaranod an saimong mga makukusog na tawuhan?
Dai sinda nagdanay sa puwesto ninda,
Huling ibinagsak sinda ni Jehova.
16 Kadakul sa sainda an nagkakasiringkog asin nagkakaturumba.
Sinasabi ninda sa kada saro:
“Tindog! Magbalik kita sa banwaan ta asin sa dagang tinubuan ta
Huling maringis an espada.”’
17 Ibinalangibog ninda duman,
‘Si Faraon na hadi kan Ehipto saro sanang ribok na daing kamanungdanan
18 ‘Isinusumpa ko sa sadiri ko,’* an sabi kan Hadi, na an pangaran Jehova na pamayo nin mga hukbo,
‘Maabot siya* na siring kan Tabor+ sa tahaw kan mga bukid
Asin siring kan Carmel+ sa kataid kan dagat.
19 Mag-ipos ka na kan mga dadarahon mo para sa saimong pagkadistiyero,*
O aking babaying nag-iistar sa Ehipto.
Huli ta an Nof* magigin sarong bagay na dahilan na an mga tawo tarakigan;
20 An Ehipto garo sarong magayon na tarnerang baka,*
Pero an mga nangangagat na langaw hali sa norte maarabot laban sa saiya.
21 Dawa pa garo mga pinatabang ugbon na baka an mga suldados na binayadan niyang makipaglaban para sa saiya,
Sinda man uminatras asin iribang duminurulag.
Dai ninda kinayang magdanay sa puwesto ninda,+
Huling an aldaw kan saindang kapahamakan uminabot sa sainda,
An panahon nin pakipagkuwenta sa sainda.’
22 ‘An saiyang tanog arog kan sagitsit nin nagdudulag na halas,
Huling dakulon sindang minasalakay sa saiya, na may darang mga patok,
Arog nin mga lalaking nagpapalod nin mga kahoy.*
23 Papaludon ninda an mga kahoy sa kadlagan niya,’ an sabi ni Jehova, ‘dawa garo baga dai iyan kayang laugon.
Huling mas dakul sinda kisa sa mga duron, asin dai sinda kayang bilangon.
24 An aking babayi nin Ehipto mapapasupog.
Itatao siya sa kamot kan banwaan kan norte.’+
25 “Si Jehova na pamayo nin mga hukbo, an Diyos kan Israel, nagsabi: ‘Ibabaling ko na an atensiyon ko laban ki Amon+ na diyos kan No,*+ ki Faraon, sa Ehipto, sa mga diyos kaini,+ asin sa mga hadi kaini—iyo, ki Faraon asin sa gabos na nagtitiwala sa saiya.’+
26 “‘Asin itatao ko sinda sa mga gustong gumadan sa sainda,* ki Hading Nabucodonosor* kan Babilonya+ asin sa mga lingkod niya. Pero pagkatapos, iistaran ini arog kan nakaaging mga panahon,’ an sabi ni Jehova.+
27 ‘Asin ika, Jacob na sakuyang lingkod, dai ka matakot,
Asin dai ka makubhanan, O Israel.+
Huling ililigtas taka hali sa harayo
Pati an mga gikan* mo hali sa daga kun sain nagin mga bihag sinda.+
Mabalik an Jacob asin magigin tuninong saka may katrangkiluhan,
Asin mayo nin siisay man na makakapatakot sa sainda.+
28 Kaya dai ka matakot, Jacob na sakuyang lingkod,’ an sabi ni Jehova, ‘huling kaibanan mo ako.