Jeremias
14 Ini an tataramon ni Jehova na uminabot ki Jeremias manungod sa mga tigmara:+
2 An Juda nagmumundo,+ asin an mga trangkahan kaiyan napabayaan na.
Nag-iirarom an mga iyan sa daga na nangluluyang marhay an buot,
Asin sarong kurahaw an nag-iitaas hali sa Jerusalem.
3 Asin an saindang mga kagurangnan isinusugo an mga suruguon* ninda tanganing magsakdo nin tubig.
Nagduduman sinda sa mga kalot na istakan nin tubig* pero mayo sindang manumpungan na tubig.
Nagbabalik sindang mayong laog an saindang mga lalagan.
Napapasupog sinda asin nadidisganar,
Asin tinatahuban an saindang mga payo.
4 Huling an daga garatak-gatak,
Ta dai nag-uuran sa nasyon,+
An mga parauma disganado asin nagtatahob kan saindang mga payo.
5 Binabayaan dawa kan babaying usa sa kalangtadan an bagong ugbon niya
Huli ta mayo nin duot.*
6 Nakatindog an mga layas na asno sa ibabaw kan mga bulod na mayo nin ano man na nagtutubo.
Naghahalhal sinda nin siring sa mga layas na ayam na jakal;
Nagrurumarom an saindang mga mata huling mayo nin pananom.+
7 Dawa ngani an sadiri ming mga pagkakasala nagpapatotoo laban sa samuya,
O Jehova, humiro ka alang-alang sa saimong pangaran.+
Huli ta dakul na an samong mga gibo nin kawaran nin kaimbudan,+
Asin sa saimo kami nagkasala.
8 O paglaom kan Israel, an Paraligtas niya+ sa mga panahon nin kasakitan,
Taano ta garo ka sarong estranghero sa nasyon,
Siring sa sarong parabaklay na naghapit lang tanganing magpalihis nin banggi?
9 Taano ta garo ka sarong lalaking namumungnan,
Siring sa sarong matibay na parapakilaban na dai makapagligtas?
Dai mo kami pagbayaan.
10 Ini an sabi ni Jehova manungod sa banwaan na ini: “Gustong-gusto nindang magparalagaw-lagaw;+ dai ninda pinupugulan an mga bitis ninda.+ Kaya dai sinda ikinakaugma ni Jehova.+ Gigirumdumon niya ngunyan an saindang pagkakasala asin papanimbagon sinda sa mga kasalan ninda.”+
11 Dangan sinabi ni Jehova sa sako: “Dai ka mamibi na mapakarhay an banwaan na ini.+ 12 Pag nag-aayuno sinda, dai ko dinadangog an mga pakimahirak ninda,+ asin pag nagdudulot sinda nin mga bílog na dulot na pigtututong saka mga dulot na tipasi, dai ko ikinakaugma an mga iyan,+ huling paagi sa espada, paagi sa tiggutom, asin paagi sa epidemya,* gagaradanon ko sinda.”+
13 Sa siring, nagsabi ako: “O Soberanong Kagurangnan na Jehova! Sinasabi sa sainda kan mga propeta, ‘Dai kamo makakahiling nin espada, asin dai maabot sa saindo an tiggutom; imbes, tatawan ko kamo nin tunay na katuninungan sa lugar na ini.’”+
14 Dangan sinabi sa sako ni Jehova: “An mga propeta nagpopropesiya nin mga kaputikan sa ngaran ko.+ Dai ko sinda isinugo o pinagbutan o kinaulay.+ Putik na bisyon asin daing kamanungdanan na panghuhula saka pandadaya kan sadiri nindang puso an ipinopropesiya ninda sa saindo.+ 15 Kaya ini an sabi ni Jehova manungod sa mga propetang nagpopropesiya sa ngaran ko, dawa dai ko man sinda isinugo, asin mga nagsasabing mayo nin espada o tiggutom na maabot sa nasyon na ini: ‘An mga propetang iyan mapapara paagi sa espada asin paagi sa tiggutom.+ 16 Asin an mga tawong sinasabihan ninda kan saindang propesiya itatapok sa mga tinampo kan Jerusalem huli kan tiggutom asin kan espada, asin mayo nin malubong sa sainda+—sa sainda, sa mga agom ninda, sa mga aki nindang lalaki, o sa mga aki nindang babayi—huling iuula ko sa sainda an kapahamakan na maninigo sa sainda.’+
17 “Dapat mong sabihon ini sa sainda,
‘Magburulos lugod an mga luha sa mga mata ko aldaw asin banggi, dai lugod iyan magpundo,+
Huling an birhen na aking babayi nin sakuyang banwaan biyong rinunot asin linaglag,+
Na may grabe nanggad na lugad.
18 Kun minaluwas ako pasiring sa kalangtadan asin nagmamasid,
Nahihiling ko idtong nagkagaradan sa espada!+
Asin kun minalaog ako sa siyudad,
Nahihiling ko an mga hilang na resulta kan tiggutom!+
Huli ta an propeta saka an saserdote parehong nagpaparalibot-libot sa sarong nasyon na dai ninda aram.’”+
19 Isinikwal mo na daw nin lubos an Juda, o ikinaungis mo na daw* an Sion?+
Taano ta hinampak mo kami, kun kaya dai na kami mauumayan?+
Naglaom kami nin katuninungan, pero mayong marahay na nag-abot,
Nin panahon nin pagpaumay, pero an namamatian niyamo grabeng takot!+
20 Ako niyamo an karatan mi, O Jehova,
Asin an pagkakasala kan mga apuon niyamo,
Huling nagkasala kami sa saimo.+
21 Alang-alang sa saimong pangaran, dai mo kami isikwal;+
Dai mo paghamakon an mamuraway mong trono.
Girumdumon mo tabi, asin dai mo pagbalgahon an tipan mo sa samo.+
22 Igwa daw nin siisay man sa daing serbing mga idolo kan mga nasyon an makakapagpauran,
O kaya daw dawa kan langit na sa sadiri kaining buot magpabulos nin uran?
Bakong ika sana, O Jehova na samuyang Diyos, an Saro na makakagibo kaini?+
Asin naglalaom kami sa saimo,
Huling ika sana an naggibo kan gabos na bagay na ini.