Jeremias

41 Kan ikapitong bulan, an saro na kabilang sa pamilya kan hadi* asin saro sa mga panginot na lalaking lingkod kan hadi na si Ismael+ na aki ni Netanias na aki ni Elisama, kaiba an sampulong tawuhan, nagduman ki Gedalias na aki ni Ahikam sa Mizpa.+ Mantang magkairiba sindang nagkakakan sa Mizpa, 2 nagtindog si Ismael na aki ni Netanias saka an sampulong tawuhan na kaiba niya asin ginadan paagi sa espada si Gedalias na aki ni Ahikam na aki ni Safan. Kaya ginadan niya an saro na ninombrahan kan hadi kan Babilonya na mamahala sa kadagaan. 3 Ginadan man ni Ismael an gabos na Judio na kaiba ni Gedalias sa Mizpa, pati an mga suldados na mga Caldeo na yaon duman.

4 Kan ikaduwang aldaw, pagkatapos na gadanon si Gedalias, asin bago pa ini maaraman nin siisay man, 5 may nag-abot na 80 lalaki hali sa Sekem,+ Shilo,+ asin Samaria.+ Ahit an saindang barabas, gisi an saindang bado, ginurot ninda an saindang sadiri,+ asin may dara sindang mga dulot na tipasi saka kamangyan+ tanganing darahon sa harong ni Jehova. 6 Kaya nagluwas sa Mizpa si Ismael na aki ni Netanias tanganing sabaton sinda, asin nagtatangis siya mantang naglalakaw. Kan masabat na niya sinda, sinabi niya sa sainda: “Madya kamo, duman kita ki Gedalias na aki ni Ahikam.” 7 Pero kan makalaog na sinda sa siyudad, ginaradan sinda ni Ismael na aki ni Netanias saka kan saiyang mga tawuhan tapos ihinurulog an mga bangkay ninda sa kalot na istakan nin tubig.

8 Alagad may sampulong lalaki sa sainda na nagsabi ki Ismael: “Dai mo kami paggadanon, ta may nakatago kaming mga istak na trigo, sebada, lana, saka tangguli duman sa uma.” Kaya dai niya sinda ginadan, bakong arog kan ginibo niya sa mga tugang ninda. 9 Ngunyan, su gabos na bangkay kan mga lalaking ginaradan ni Ismael ihinulog niya sa sarong dakulang kalot na istakan nin tubig, su kalot na ginibo ni Hading Asa nin huli ki Hading Baasa kan Israel.+ Ini an kalot na istakan nin tubig na pinano ni Ismael na aki ni Netanias kan mga ginaradan niya.

10 Binihag ni Ismael an gabos na natada sa Mizpa,+ kaiba an mga aking babayi kan hadi saka an gabos na tawong natada sa Mizpa, na ibinugtak ni Nebuzaradan na pamayo kan mga guwardiya sa pangangataman ni Gedalias+ na aki ni Ahikam. Binihag sinda ni Ismael na aki ni Netanias asin naghali sinda tanganing magbalyo pasiring sa mga Ammonita.+

11 Kan mabaretaan ni Johanan+ na aki ni Karea asin kan gabos na namamayo nin hukbo na kaiba niya an manungod sa gabos na karatan na ginibo ni Ismael na aki ni Netanias, 12 iiniba ninda an gabos na lalaki asin naghali sinda tanganing makipaglaban ki Ismael na aki ni Netanias, asin nanumpungan ninda siya sa may dakulang katubigan* sa Gibeon.

13 Nag-ugma an gabos na tawong kaiba ni Ismael kan mahiling ninda si Johanan na aki ni Karea saka an gabos na namamayo nin hukbo na kaiba niya. 14 Dangan an gabos na tawong binihag ni Ismael hali sa Mizpa+ buminaralik asin uminiba ki Johanan na aki ni Karea. 15 Pero si Ismael na aki ni Netanias saka an walo sa mga tawuhan niya nagdulag ki Johanan asin nagpasiring sa mga Ammonita.

16 Iiniba ni Johanan na aki ni Karea saka kan gabos na namamayo nin hukbo na kaiba niya an natada sa mga tawo hali sa Mizpa, su mga ilinigtas ninda ki Ismael na aki ni Netanias pakatapos kaining gadanon si Gedalias+ na aki ni Ahikam. Dinara ninda hali sa Gibeon an mga lalaki, an mga suldados, an mga babayi, an mga aki, asin an mga opisyal kan palasyo. 17 Kaya naghali sinda asin nagdagos sa dagusan ni Kimham harani sa Betlehem,+ asin plano nindang magpasiring sa Ehipto+ 18 huli sa mga Caldeo. Natakot kaya sinda sa mga ini, huling ginadan ni Ismael na aki ni Netanias si Gedalias na aki ni Ahikam, na ninombrahan kan hadi kan Babilonya na mamahala sa kadagaan.+