Jonas
1 Ini an tataramon ni Jehova na uminabot ki Jonas*+ na aki ni Amitai: 2 “Magduman ka sa Nineve+ na dakulang siyudad, asin ipahayag mo an paghukom sa sainda,* huli ta nahiling ko an grabeng karatan ninda.”
3 Pero pinurbaran ni Jonas na dulagan si Jehova asin magpasiring sa Tarsis; nagduman siya sa Jope asin nakahiling nin barko na pasiring sa Tarsis. Kaya nagbayad siya nin pamasahe asin nagsakay para umiba sa sainda pasiring sa Tarsis, tanganing dumulag ki Jehova.
4 Dangan nagpaabot si Jehova nin makusog na duros sa dagat, asin nagkaigwa nin makusugon na bagyo sa dagat mala ta haros magkararapak na an barko. 5 Takuton na marhay an mga tripulante kaya an lambang saro sa sainda nag-apod sa kanya-kanya nindang diyos para maghagad nin tabang. Asin ihinulog ninda sa dagat an mga kargamento kan barko para mas gumian iyan.+ Pero yaon si Jonas sa ibaba, sa pinakalaog kan barko,* kun sain siya naghigda asin nakaturog nin nanok. 6 Dinulok siya kan kapitan kan barko asin sinabihan: “Ano ta nagtuturog ka? Bumuhat ka, mag-apod ka sa diyos mo! ’Baad lamang mahirak* sato an tunay na Diyos, asin dai kita magkagaradan.”+
7 Dangan sinabi ninda sa lambang saro: “Madya, magburunutan kita+ para maaraman kun siisay an dapat basulon sa kalamidad na ini.” Kaya nagburunutan sinda, asin an nabunot iyo su ki Jonas.+ 8 Sinabi ninda saiya: “Sabihon mo tabi samo, siisay an dapat basulon sa kalamidad na ini na uminabot sa sato? Ano an trabaho mo, saka sain ka hali? Ano an nasyon mo, saka sain kang banwaan hali?”
9 Nagsimbag siya: “Saro akong Hebreo, asin may pagkatakot* ako ki Jehova na Diyos kan kalangitan, an Saro na naggibo kan dagat saka kan daga.”*
10 Huli kaini, mas lalong natakot an mga tripulante, asin hinapot ninda siya: “Ano ining ginibo mo?” (Naaraman kan mga tripulante na dinudulagan niya si Jehova, huling sinabi niya ini sa sainda.) 11 Kaya sinabihan ninda siya: “Anong dapat ming gibuhon saimo para magkalma an dagat?” Mas nagkukusog pa kaya an bagyo sa dagat. 12 Nagsimbag siya: “Alsahon nindo ako saka ihulog nindo ako sa dagat, tapos makalma an dagat; aram kong ako an dahilan kaya uminabot an makusugon na bagyong ini.” 13 Alagad, nagparasagwan* pa an mga tripulante tanganing mapagilid an barko, pero dai ninda iyan mapagilid, dahil sige pang kusog kan bagyo.
14 Dangan nag-apod sinda ki Jehova asin nagsabi: “O Jehova, nakikimahirak tabi kami, dai man lugod kami magadan dahil sa lalaking ini!* Dai mo kami pagpanimbagon sa pagkagadan* kan inosenteng tawong ini, huling an gabos na ini uyon sa kabutan mo, O Jehova.” 15 Dangan, inalsa ninda si Jonas asin ihinulog sa dagat; tapos nagkalma an dagat. 16 Pagkatapos, nakamati an mga tripulante nin grabeng pagkatakot ki Jehova,+ asin nag-atang sinda ki Jehova saka naggibo nin mga promesa.
17 Nagsugo si Jehova nin sarong dakulaon na sira para halunon kaiyan si Jonas, kaya nagdanay si Jonas sa tulak kan sira sa laog nin tulong aldaw asin tulong banggi.+