Inot na Samuel

27 Alagad naisip ni David: “Maabot an aldaw na magagadan ako ni Saul. Marahay pang magdulag ako+ pasiring sa daga kan mga Filisteo. Tapos, mapundo na ’yan si Saul sa pagparahanap sa sako sa bilog na teritoryo kan Israel,+ saka makakadulag ako sa kamot niya.” 2 Kaya naghali si David kaiba an 600 niyang tawuhan+ asin nagpasiring sinda sa hadi kan Gat na si Akis,+ na aki ni Maoc. 3 Nag-istar si David sa poder ni Akis sa Gat, siya asin an saiyang mga tawuhan kaiba an saindang kanya-kanyang pamilya. An kaiba ni David iyo an duwa niyang agom na si Ahinoam+ na taga Jezreel asin si Abigail+ na taga Carmel, an balo ni Nabal. 4 Kan mabaretaan ni Saul na nagdulag si David pasiring sa Gat, nagpundo na siya sa kakahanap sa saiya.+

5 Dangan sinabi ni David ki Akis: “Kun mauyon ka, tawan mo ako nin lugar sa saro sa saradit mong siyudad asin duman ako maistar. Taano ta an saimong lingkod maistar na kaiba mo sa maharlikang siyudad?” 6 Kaya kan aldaw na idto, itinao sa saiya ni Akis an Ziklag.+ Iyan an dahilan kun taano ta nagin pagsadiri kan mga hadi kan Juda an Ziklag sagkod sa aldaw na ini.

7 Sarong taon may apat na bulan an lawig* kan pag-istar ni David sa daga kan mga Filisteo.+ 8 Sinasalakay ni David asin kan mga tawuhan niya an mga Gesurita,+ an mga Girzita, asin an mga Amalekita,+ huling pig-iistaran kan mga ini an daga puon sa Telam sagkod sa Sur+ asin sagkod sa daga nin Ehipto. 9 Pag minasalakay si David, ginagadan niya gabos, lalaki man o babayi,+ pero kinukua niya an mga karnero, baka, asno, kamelyo, asin mga bado. Pagkatapos, minabalik siya ki Akis. 10 Dangan mahapot si Akis: “Sain kamo nagsalakay ngunyan na aldaw?” Masimbag si David: “Sa timog* kan Juda”+ o “Sa timog kan teritoryo kan mga Jerameelita”+ o “Sa timog kan teritoryo kan mga Kenita.”+ 11 Gabos ginagadan ni David, lalaki man o babayi, asin mayo siyang dinadarang bihag sa Gat, ta an sabi niya: “Tanganing dai ninda kita isumbong asin magsabi, ‘Ini an ginibo ni David.’” (Asin ini an ginigibo niya sa bilog na panahon na nakaistar siya sa daga kan mga Filisteo.) 12 Kaya naniwala si Akis ki David, asin sa buot-buot niya: ‘Siguradong angguton na sa saiya an* banwaan niyang Israel, kaya magigin lingkod ko na siya pirmi.’