Esdras

9 Asin pagkatapos tulos na magibo an mga bagay na ini, nagdurulok sako an mga pamayo* asin nagsarabi: “An mga Israelita asin an mga saserdote saka an mga Levita dai pa minasuway sa mga tawo kan mga kadagaan asin dai pa ninda binabayaan an makababalding mga gibo-gibo kan mga ini+—kan mga Canaanita, mga Hiteo, mga Perizita, mga Jebusita, mga Ammonita, mga Moabita, mga Ehipsiyo,+ asin mga Amorita.+ 2 Kinua ninda an iba sa mga aking babayi kan mga ini para magin agom ninda asin kan saindang mga aking lalaki.+ Kaya, nasalakan an banal na banwaan*+ kan mga tawo kan mga kadagaan.+ An mga pamayo* asin an mga sekondaryong namamahala iyo pa an mga nanginginot sa pagkakasalang ini.”

3 Pagkadangog ko kaini, ginisi ko an sakong bado* asin rinabnot ko an sakuyang buhok saka barabas, asin napatukaw ako sa pagkabigla. 4 Dangan an gabos na may hararom na paggalang* sa tataramon kan Diyos nin Israel nagtiripon sa palibot ko huli sa kasalan kan mga dating bihag sa ibang nasyon, mantang ako nakatukaw sa pagkabigla sagkod na uminabot an pagdulot kan dulot na tipasi sa banggi.+

5 Asin kan oras na para sa pagdulot kan dulot na tipasi sa banggi,+ tuminindog ako hali sa sakuyang makasusupog na kamugtakan na girisi an bado, asin luminuhod ako dangan ibinuka an sakuyang mga kamot ki Jehova na sakuyang Diyos. 6 Asin sinabi ko: “O Diyos ko, nasusupog ako asin dai ko kayang umatubang sa saimo, O Diyos ko, huling an nagibo ming mga sála nagparadakul asin lampas na sa samong payo saka an samuyang kasalan nakaantos na sa langit.+ 7 Puon pa kan panahon kan samuyang mga apuon sagkod sa aldaw na ini, grabe an samuyang kasalan;+ asin huli sa samong mga sála, kami asin an samuyang mga hadi saka an samuyang mga saserdote itinao sa kamot kan mga hadi kan ibang mga nasyon, ginaradan paagi sa espada,+ binihag,+ sinamsaman,+ asin sinupog, arog kan kamugtakan mi ngunyan.+ 8 Pero ngunyan sa halipot na panahon, si Jehova na samuyang Diyos nagpahiling sa samo nin kabuutan paagi sa pagtugot na makatalingkas an mga natatada asin paagi sa pagtao sa samo nin ligtas na kamugtakan* sa saiyang banal na lugar,+ tanganing paugmahon kami, O samong Diyos, asin tanganing tawan kami nin dikit na kaginhawahan sa samuyang pagkauripon. 9 Huling maski mga uripon kami,+ dai kami pinabayaan kan samuyang Diyos sa samong pagkauripon; imbes pinahilingan niya kami nin maimbod na pagkamuot sa atubangan kan mga hadi kan Persia,+ tanganing tawan kami nin kusog na itugdok liwat an nagabang harong kan samuyang Diyos+ asin tanganing tawan kami sa Juda asin Jerusalem nin nagpoprotektar na pader.*

10 “Pero ngunyan, O samuyang Diyos, ano an masasabi mi pagkatapos kaini? Huli ta tinalikdan mi an mga tugon mo, 11 na itinao mo samo paagi sa saimong mga lingkod na mga propeta. Sinda nagsabi: ‘An daga na saindong lalaugon tanganing magin sadiri nindo sarong maating daga huli sa pagigin maati kan mga tawong nakaistar diyan,* huli kan saindang makababalding mga gibo-gibo. Biyo nindang pinano iyan kan saindang maating mga gibo.+ 12 Kaya, dai nindo ipagtao an saindong mga aking babayi sa saindang mga aking lalaki, asin dai man nindo pag-akuon an mga aki nindang babayi para sa mga aki nindong lalaki;+ asin dai kamo maggibo nin ano man na maresulta sa saindang katuninungan asin abundansiya,+ tanganing kumusog kamo asin makakakan kamo kan bunga kan daga saka magin sadiri nindo iyan sagkod lamang para sa saindong mga aki.’ 13 Asin pagkatapos kan gabos na nangyari sa samo huli sa samuyang maraot na mga gibo asin sa samuyang grabeng kasalan—huli ta ika, O samuyang Diyos, dai mo kami pinadusahan kan padusang maninigo para sa samong mga sála,+ asin tinugutan mo kaming mga yaon digdi na makatalingkas+— 14 susuwayon mi daw giraray an saimong mga tugon asin makikipag-aguman* sa mga tawong naggigibo kan makababalding mga bagay na ini?+ Bako daw na maaanggot kang marhay sa samo na huli kaiyan lubos mo kaming paparaon, na mayo nin matatada o makakaligtas? 15 O Jehova na Diyos kan Israel, matanos ka,+ huling nakaligtas kami asin nagkatarada sagkod ngunyan. Yaon kami ngunyan sa atubangan mo, kaming mga makasalan, maski ngani dai kuta kami maninigong umatubang sa saimo huli kaini.”+