Ikaduwang Cronica

5 Kaya natapos ni Solomon an gabos na kaipuhan niyang gibuhon para sa harong ni Jehova.+ Dangan ilinaog na ni Solomon an mga bagay na pinabanal ni David na saiyang ama,+ asin an plata, an bulawan, asin an gabos na kagamitan ilinaog niya sa mga sarayan nin kayamanan sa harong kan tunay na Diyos.+ 2 Kan panahon na iyan, tinipon ni Solomon an kamagurangan kan Israel, an gabos na pamayo kan mga tribo, asin an mga pamayo kan mga angkan kan Israel. Nagduruman sinda sa Jerusalem tanganing kuanon an kaban kan tipan ni Jehova sa Siyudad ni David,+ na iyo an Sion.+ 3 Nagtiripon sa atubangan kan hadi an gabos na lalaki kan Israel sa panahon kan kapiyestahan* na isineselebrar sa ikapitong bulan.+

4 Kaya nag-arabot an gabos na kamagurangan kan Israel, asin inalsa kan mga Levita an Kaban.+ 5 Dinara ninda an Kaban, an tolda nin pakipagtagbuan,+ asin an gabos na banal na kagamitan na yaon sa tolda. Dinara an mga iyan kan mga saserdote asin kan mga Levita.* 6 Nagtiripon sa atubangan kan Kaban si Hading Solomon asin an bilog na katiripunan nin Israel na ipinaapod niya. Kadakul na karnero asin baka an iinatang+ mala ta dai ini mabilang. 7 Dangan dinara kan mga saserdote an kaban kan tipan ni Jehova sa mamumugtakan kaini, sa pinakalaog na kuwarto, an Kabanal-banali, sa sirong kan mga pakpak kan mga kerubin.+ 8 Nakabuka an mga pakpak kan mga kerubin sa ibabaw kan kinamumugtakan kan Kaban, kaya hali sa itaas, natatahuban kan mga kerubin an Kaban saka an mga ulayán* kaini.+ 9 Haralaba an mga ulayán kaya an mga puro kaiyan nahihiling hali sa Banal sa atubangan kan pinakalaog na kuwarto, pero dai iyan nahihiling hali sa luwas. Asin yaon pa an mga iyan duman sagkod sa aldaw na ini. 10 Mayong ibang laog an Kaban kundi an duwang tablang gapo na ilinaog diyan ni Moises kan yaon siya sa Horeb,+ kan makipagtipan si Jehova+ sa banwaan nin Israel pagkaluwas ninda sa Ehipto.+

11 Kan magluwas an mga saserdote hali sa banal na lugar, (huling gabos na saserdoteng yaon duman nagpabanal kan saindang sadiri,+ ano man an kinabibilangan nindang dibisyon),+ 12 an mga parakantang Levita+ na kabilang ki Asaf,+ ki Heman,+ ki Jedutun,+ asin sa saindang mga aki saka mga tugang, gabos nakasulot nin badong gibo sa de-kalidad na tela asin may kapot na mga simbal, mga instrumentong de-kuwerdas, saka mga arpa; nakatindog sinda sa bandang sirangan kan altar, asin kaiba ninda an 120 saserdote na nagpapatanog nin mga trumpeta.+ 13 Kan an mga paratrumpeta asin parakanta sarabay na nag-uumaw asin nagpapasalamat ki Jehova, asin mantang nadadangog an tanog kan mga trumpeta, kan mga simbal, saka kan iba pang instrumento sa musika kasabay kan pag-umaw ninda ki Jehova, “huling marahay siya; nagdadanay sagkod lamang an maimbod na pagkamuot niya,”+ napano nin panganuron an harong, an harong ni Jehova.+ 14 Dai na makapagpadagos pa sa saindang paglilingkod an mga saserdote huli kan panganuron, ta napano kan kamurawayan ni Jehova an harong kan tunay na Diyos.+