Ezekiel

13 Asin nag-abot giraray sa sako an tataramon ni Jehova, na sinasabi: 2 “Aki nin tawo, magpropesiya ka laban sa mga propeta kan Israel,+ asin sabihon mo duman sa mga nag-iimbento nin sadiri nindang mga propesiya,*+ ‘Dangugon nindo an mensahe ni Jehova. 3 Ini an sinabi kan Soberanong Kagurangnan na Jehova: “Hirak man sa mangmang na mga propeta, na nagsusunod sa sadiri nindang kaisipan,* ata nang mayo man sindang nahihiling!+ 4 O Israel, an saimong mga propeta nagin garo mga layas na ayam na sora* sa kagabaan. 5 Dai kamo maduman sa mga raot na parte kan mga pader na gapo tanganing itugdok liwat iyan para sa banwaan* nin Israel,+ para kuta magdanay an Israel na nakatindog sa ralaban sa aldaw ni Jehova.”+ 6 “Nakahiling sinda nin mga bakong totoong bisyon saka naghula nin kaputikan, idtong mga nagsasarabi, ‘Ini an sinabi ni Jehova,’ ata nang dai man sinda isinugo ni Jehova, asin naghalat sindang magkatotoo an mga sinabi ninda.+ 7 Bako daw na bakong totoong bisyon an nahiling nindo asin kaputikan an ihinula nindo kan magsabi kamo, ‘Ini an sinabi ni Jehova,’ mantang mayo man akong sinabi?”’

8 “‘Kaya ini an sinabi kan Soberanong Kagurangnan na Jehova: “‘Huling nagtaram kamo nin bakong totoo asin kaputikan an mga bisyon nindo, mahiro ako laban sa saindo,’ an sabi kan Soberanong Kagurangnan na Jehova.”+ 9 Gagamiton ko an sakuyang kamot laban sa mga propeta na an mga bisyon bakong totoo asin naghuhula nin kaputikan.+ Dai sinda magigin kabilang sa mga pinagkakatiwalaan ko; asin dai man sinda makakabali sa mga nakarehistro sa banwaan nin Israel; ni makakabalik man sinda sa daga nin Israel; asin maaaraman nanggad nindo na ako an Soberanong Kagurangnan na Jehova.+ 10 Mangyayari an gabos na ini dahil ilinalagalag ninda an sakuyang banwaan paagi sa pagsabing, “May katuninungan!” ata nang mayo man nin katuninungan.+ Pag itinutugdok an sarong maluyang lanob, pinapalitadahan ninda iyan nin kulor puti.’*+

11 “Sabihan mo an mga nagpapalitada diyan nin kulor puti na magagaba iyan. Mabagsak an makusog na uran, mauran nin yelo,* tapos rarauton iyan nin makusugon na alipuros.+ 12 Asin pag nagaba an lanob, hahaputon kamo, ‘Anong nangyari sa ipinalitada nindo?’+

13 “Kaya ini an sinabi kan Soberanong Kagurangnan na Jehova: ‘Mapadara ako nin makusugon na alipuros saka nin makusugon na uran dahil sa kaanggutan ko, asin mapauran ako nin mapanglaglag na yelo* dahil sa grabeng kaanggutan ko. 14 Rurumpagon ko an lanob na pinalitadahan nindo nin kulor puti, tapos papabagsakon ko iyan sa daga, asin malalantad an pundasyon kaiyan. Pag nagbagsak an siyudad, magagadan kamo sa laog kaiyan; asin mamimidbid nanggad nindo na ako si Jehova.’

15 “‘Pag biyo ko nang ilinuwas an sakuyang kaanggutan sa lanob saka sa mga nagpalitada diyan nin kulor puti, sasabihon ko sa saindo: “Mayo na an lanob, asin mayo na man su mga nagpalitada diyan.+ 16 Mayo na an mga propeta kan Israel, idtong mga nagpopropesiya sa Jerusalem saka nakakahiling nin mga bisyon nin katuninungan para sa saiya, ata nang mayo man nin katuninungan,”’+ an sabi kan Soberanong Kagurangnan na Jehova.

17 “Pero ika, aki nin tawo, umatubang ka sa mga aking babayi kan saimong banwaan na nag-iimbento nin sadiri nindang mga propesiya, asin magpropesiya ka laban sa sainda. 18 Sabihan mo sinda, ‘Ini an sinabi kan Soberanong Kagurangnan na Jehova: “Hirak man sa mga babaying nagtatahi nin mga bandana para sa gabos na takyag* saka naggigibo nin mga belo na iba-iba an sukol para sa payo kan mga tawo tanganing litagon an mga tawo!* Piglilitag daw nindo an banwaan* ko asin pinagmamaigutan na iligtas an sadiri nindong buhay?* 19 Lalapastanganon daw nindo ako sa sakuyang banwaan para sa mga hakbot nin sebada asin para sa mga tada-tadang tinapay,+ na ginagadan idtong mga* dai dapat magadan asin pinapabayaan na mabuhay idtong mga* dai dapat mabuhay, na ginigibo iyan paagi sa pagputik nindo sa sakuyang banwaan, na nagdadangog sa saindong mga kaputikan?”’+

20 “Kaya ini an sinabi kan Soberanong Kagurangnan na Jehova: ‘Mahiro ako laban sa mga bandana nindo, O mga babayi, na ginagamit nindo sa paglitag sa mga tawo* na garo lang sinda mga gamgam,* asin rarabsingon ko an mga iyan sa saindong mga takyag asin papadulagon idtong mga piglilitag nindo na garo lang mga gamgam. 21 Rarabsingon ko an saindong mga belo asin ililigtas an sakuyang banwaan sa saindong kamot, asin dai na nindo sinda malilitag; asin mamimidbid nanggad nindo na ako si Jehova.+ 22 Huli ta pinaluya nindo an buot kan matanos na tawo paagi sa saindong kaputikan+ mantang habo ko siyang masakitan,* saka pinakusog nindo an kamot kan maraot na tawo,+ kaya dai siya nagtalikod sa saiyang maraot na dalan na huli kaiyan dai siya magdadanay na buhay.+ 23 Kaya, kamong mga babayi dai na makakahiling nin mga bakong totoong bisyon asin dai na makakapaghula;+ asin ililigtas ko an sakuyang banwaan sa saindong kamot, asin mamimidbid nanggad nindo na ako si Jehova.’”