Ezekiel
29 Kan ikasampulong taon, kan ika-12 aldaw kan ikasampulong bulan, nag-abot sako an tataramon ni Jehova, na sinasabi: 2 “Aki nin tawo, umatubang ka sa direksiyon ni Faraon na hadi kan Ehipto, asin magpropesiya ka laban sa saiya asin laban sa bilog na Ehipto.+ 3 Sabihon mo an mensaheng ini: ‘Ini an sinabi kan Soberanong Kagurangnan na Jehova:
“Uya, mahiro ako laban saimo, Faraon na hadi kan Ehipto,+
An higanteng hayop sa dagat na nag-iistar sa mga sapa kan saiyang Nilo,*+
Na nagsabi, ‘Sakuya an Salog nin Nilo.
Ginibo ko iyan para sa sadiri ko.’+
4 Pero lalagan ko nin mga kawit an saimong panga, tapos papadukuton ko sa mga kiskis mo an mga sira kan saimong Nilo.
Ihahawas taka sa saimong Nilo kaiba an gabos na sira kan Nilo na nakadukot sa mga kiskis mo.
5 Babayaan taka sa disyerto, ika saka an gabos na sira kan saimong Nilo.
Mabagsak ka sa kalangtadan, asin dai ka pupumpunon o titipunon.+
Ipapakakan taka sa mga layas na hayop kan daga asin sa mga gamgam kan kalangitan.+
6 Dangan mamimidbid nanggad kan gabos na nakaistar sa Ehipto na ako si Jehova,
Huli ta garo sana sinda sugkod na gibo sa dagami* sa banwaan* nin Israel.+
7 Kan magkapot sinda sa kamot mo, narunot ka,
Asin ika an dahilan kan pagkalugad kan saindang abaga.
8 “‘Kaya ini an sinabi kan Soberanong Kagurangnan na Jehova: “Uya, madara ako nin espada laban saimo,+ asin gagaradanon ko an mga tawo saka mga hayop diyan sa saimo. 9 An daga nin Ehipto magigin tiwangwang asin gaba;+ asin mamimidbid nanggad ninda na ako si Jehova, huli ta sinabi mo,* ‘Sakuya an Salog nin Nilo; ako an naggibo kaiyan.’+ 10 Kaya mahiro ako laban saimo saka sa saimong Nilo, asin gigibuhon kong gaba saka alang an daga nin Ehipto, sarong tiwangwang na lugar,+ puon sa Migdol+ sagkod sa Siene+ antos sa linderos kan Etiopia. 11 Dai iyan lalakawan nin tawo o nin ataman na hayop,+ asin dai iyan iistaran sa laog nin 40 taon. 12 Gigibuhon kong pinakatiwangwang na lugar an daga nin Ehipto, asin an mga siyudad kaiyan an magigin pinakatiwangwang na mga siyudad sa laog nin 40 taon;+ asin iwawararak ko an mga Ehipsiyo sa mga nasyon asin pagsusuruway-suwayon ko sinda sa mga kadagaan.”+
13 “‘Huli ta ini an sinabi kan Soberanong Kagurangnan na Jehova: “Pagkatapos nin 40 taon, titiripunon ko an mga Ehipsiyo hali sa mga banwaan kun sain sinda nagkawararak;+ 14 an mga bihag na Ehipsiyo ibabalik ko sa daga nin Patros,+ sa daga na saindang pinaghalian, asin duman magigi sindang sarong hamak na kahadian. 15 Magigin mas maluya an Ehipto kisa sa ibang mga kahadian asin dai na ninda makokontrol an ibang mga nasyon,+ asin papasaditon ko sindang marhay kaya dai na ninda madadaog an ibang mga nasyon.+ 16 Dai na iyan nuarin man makakatao nin kumpiyansa sa banwaan nin Israel,+ imbes ipapagirumdom na sana kaiyan sa sainda an pagkakasala ninda kan maghagad sinda nin tabang sa mga Ehipsiyo. Asin maaaraman nanggad ninda na ako an Soberanong Kagurangnan na Jehova.”’”
17 Dangan, kan ika-27 taon, kan inot na aldaw kan inot na bulan, nag-abot sako an tataramon ni Jehova, na sinasabi: 18 “Aki nin tawo, pinatrabahong marhay ni Hading Nabucodonosor*+ kan Babilonya an saiyang hukbo laban sa Tiro.+ Nakalbo an lambang payo, asin nabakrusan an lambang abaga. Pero siya saka an saiyang hukbo mayong naresibing kabayadan para sa ginibo niya laban sa Tiro.
19 “Kaya ini an sinabi kan Soberanong Kagurangnan na Jehova, ‘Uya, itatao ko an Ehipto ki Hading Nabucodonosor* kan Babilonya,+ asin kukuanon niya an kayamanan kaiyan asin sasamsaman nin biyo; asin iyan an magigin bayad sa saiyang hukbo.’
20 “‘Bilang bayad sa ginibo niya laban sa Tiro,* itatao ko sa saiya an Ehipto huling huminiro sinda para sa sako,’+ an sabi kan Soberanong Kagurangnan na Jehova.
21 “Sa aldaw na iyan, papatubuon ko an sarong sungay para sa* banwaan nin Israel,+ asin tatawan taka nin pagkakataon na magtaram sa sainda; asin mamimidbid nanggad ninda na ako si Jehova.”