Bilang
28 Tapos sinabi ni Jehova ki Moises: 2 “Pagbutan mo an mga Israelita asin sabihan mo sinda, ‘Siguraduhon nindo na iaatang nindo an dulot na para sa sako, an sakuyang tinapay. Dapat nindong iatang sa itinalaan na mga panahon+ an mga dulot na pinaagi sa kalayo na para sa sako, na an parong nakakapaginhawa* sa sako.’
3 Asin sabihon mo sa sainda, ‘Ini an mga dulot na pinaagi sa kalayo na iaatang nindo ki Jehova: duwang lalaking kordero na daing depekto na parehong sarong taon an edad, na regular na iaatang aroaldaw bilang dulot na pigtututong.+ 4 An sarong lalaking kordero iaatang mo pagkaaga, asin an saro pang lalaking kordero iaatang mo pag pabanggi na,*+ 5 kaiba an dulot na tipasi na ikasampulong kabtang* kan sarong epa* nin pinong harina na sinalakan nin un-kuartong* hin* nin lana na hali sa dinukdok na mga oliba.+ 6 Regular iyan na iaatang bilang dulot na pigtututong,+ arog kan ipinagbuot kaidto sa Bukid nin Sinai. Dulot iyan na pinaagi sa kalayo na an parong nakakapaginhawa* ki Jehova, 7 asin iaatang iyan kaiba kan isinasabay diyan na dulot na inumon—un-kuartong hin para sa kada lalaking kordero.+ Iula mo an arak sa banal na lugar bilang dulot na inumon para ki Jehova. 8 Asin iaatang mo an saro pang lalaking kordero pag pabanggi na.* Iaatang mo iyan bilang dulot na pinaagi sa kalayo na an parong nakakapaginhawa* ki Jehova kaiba an kaparehong dulot na tipasi asin dulot na inumon na idinulot pagkaaga.+
9 “‘Alagad, sa aldaw nin Sabbath,+ an dulot dapat na duwang lalaking kordero na daing depekto na parehong sarong taon an edad asin duwang ikasampulong kabtang* kan sarong takad na epa nin pinong harina na sinalakan nin lana bilang dulot na tipasi, kaiba an dulot na inumon na idinudulot kasabay kaiyan. 10 Iyan an dulot na pigtututong para sa Sabbath, apuwera pa kan dulot na pigtututong na regular na idinudulot asin kan dulot na inumon na kaiba kaiyan.+
11 “‘Sa kapinunan kan kada bulan,* mag-atang kamo ki Jehova nin mga dulot na pigtututong: duwang torilyong baka, sarong lalaking karnero, asin pitong lalaking kordero na daing depekto na pararehong sarong taon an edad.+ 12 Asin bilang dulot na tipasi+ para sa kada baka, magdulot kamo nin tulong ikasampulong kabtang* nin sarong takad nin pinong harina na sinalakan nin lana, asin bilang dulot na tipasi para sa lalaking karnero,+ magdulot kamo nin duwang ikasampulong kabtang nin sarong takad nin pinong harina na sinalakan nin lana, 13 asin bilang dulot na tipasi para sa kada lalaking kordero, magdulot kamo nin ikasampulong kabtang nin sarong takad nin pinong harina na sinalakan nin lana. Iaatang nindo an mga iyan bilang dulot na pigtututong, dulot na pinaagi sa kalayo na an parong nakakapaginhawa* ki Jehova.+ 14 Asin an mga dulot na inumon na idinudulot kaiba kan mga iyan dapat na kabangang hin nin arak para sa kada baka+ asin un-tersiong* hin para sa lalaking karnero+ asin un-kuartong hin para sa kada lalaking kordero.+ Iyan an dulot na pigtututong na iaatang kada bulan sa bilog na taon. 15 Mag-atang man kamo ki Jehova nin sarong ugbon na kanding bilang dulot para sa kasalan, apuwera pa sa dulot na pigtututong na regular na idinudulot kaiba an dulot na inumon.
16 “‘An ika-14 aldaw kan inot na bulan iyo an Paskuwa ni Jehova.+ 17 Asin sa ika-15 aldaw kan bulan na iyan, magkakaigwa nin kapiyestahan. Sa laog nin pitong aldaw, makakan kamo nin tinapay na daing lebadura.+ 18 Magkakaigwa nin banal na dakulang pagtiripon sa inot na aldaw. Dai kamo maggibo nin ano man na magabat na trabaho. 19 Asin mag-atang kamo ki Jehova nin mga dulot na pigtututong, mga dulot na pinaagi sa kalayo: duwang torilyong baka, sarong lalaking karnero, asin pitong lalaking kordero na pararehong sarong taon an edad. An iaatang nindong mga hayop dapat na daing depekto.+ 20 Iaatang nindo an mga iyan kaiba an mga dulot na tipasi na pinong harina na sinalakan nin lana,+ tulong ikasampulong kabtang nin sarong takad para sa kada baka asin duwang ikasampulong kabtang nin sarong takad para sa lalaking karnero. 21 Magdulot kamo nin ikasampulong kabtang nin sarong takad para sa kada saro kan pitong lalaking kordero. 22 Dapat man kamong mag-atang nin sarong kanding bilang dulot para sa kasalan tanganing mabayadan an kasalan nindo. 23 Iyan an mga iaatang nindo apuwera pa sa dulot na pigtututong na regular na idinudulot kada aga. 24 Sa laog nin pitong aldaw, aroaldaw kamong maatang nin arog kaiyan bilang kakanon,* bilang dulot na pinaagi sa kalayo na an parong nakakapaginhawa* ki Jehova. Dapat iyan na iatang kaiba kan dulot na pigtututong na regular na idinudulot kaiba an dulot na inumon. 25 Sa ikapitong aldaw magsagibo kamo nin banal na dakulang pagtiripon.+ Dai kamo maggibo nin ano man na magabat na trabaho.+
26 “‘Sa aldaw kan mga inot na hinog na bunga,+ pag madulot kamo ki Jehova nin dulot na bagong mga tipasi,+ magsagibo kamo nin banal na dakulang pagtiripon sa saindong kapiyestahan nin mga semana.+ Dai kamo maggibo nin ano man na magabat na trabaho.+ 27 Mag-atang kamo nin dulot na pigtututong na an parong nakakapaginhawa* ki Jehova: duwang torilyong baka, sarong lalaking karnero, asin pitong lalaking kordero na pararehong sarong taon an edad.+ 28 Asin bilang dulot na tipasi na kaiba kan mga iyan, magdulot kamo nin pinong harina na sinalakan nin lana—tulong ikasampulong kabtang nin sarong takad para sa kada baka, duwang ikasampulong kabtang nin sarong takad para sa lalaking karnero, 29 asin ikasampulong kabtang nin sarong takad para sa kada saro kan pitong lalaking kordero. 30 Mag-atang man kamo nin sarong ugbon na kanding tanganing mabayadan an mga kasalan nindo.+ 31 Iaatang nindo an mga iyan apuwera pa kan dulot na pigtututong na regular na idinudulot asin kan dulot na tipasi na kaiba kaiyan. Dapat na daing depekto an mga iaatang na hayop,+ kaiba kan mga dulot na inumon na idinudulot kasabay kan mga iyan.